Aposel 5:12-16.
Bilong harim (Audio)
Ol planti manmeri long olgeta hap bilong dispela graun ol i gat bikpela laik long lukim ol kainkain sain samting na ol kainkain mirakel samting. Yumi save pinis olsem, long P.N.G. i gat planti manmeri i gat bikpela laik long lukim ol dispela samting. Long Baibel i gat stori i stap long ol kainkain sain na ol kainkain mirakel na planti manmeri long ples bilong yumi ol i laik lukim ol dispela kain samting long ai bilong ol yet.
Na i no ol manmeri bilong P.N.G. tasol i gat bikpela laik long lukim ol dispela samting. Nogat. Planti manmeri bilong olgeta hap ol i laik lukim ol kainkain sain na ol kainkain mirakel. Na ol sampela misineri tu ol i laik lukim long ai bilong ol yet na ol i ken i raun long as sios bilong ol na stori long ol dispela samting.
Na sori tumas, i gat ol sampela man na meri, ol sampela as ples manmeri na ol sampela misineri tu, ol i giaman long ol i lukim ol kainkain sain na mirakel samting. Na sampela bilong ol i wokim ol giaman sain na ol giaman mirakel bilong trikim ol manmeri. Ol i mekim olsem bilong apim ol yet o bilong grisim ol manmeri na ol i bihainim ol na pas long lotu bilong ol na ol kain samting olsem.
Long Aposel 4:29-30 ol manmeri i bilipim na trastim na bihainim Jisas ol i askim God long strongim ol na ol i no ken i pret long tretim bilong ol hetpris lain. Ol i askim God long givim strong long ol na ol i autim tok bilong Jisas i go yet na ol i witnisim Jisas i kirap bek pinis na i stap. Na ol i askim God long wokim ol kainkain sain na mirakel long nem bilong Jisas. Na ol kainkain sain na mirakel i kamap!
Tasol pastaim ol sain na mirakel ol i lukim em i narapela kain sain na mirakel na i no wankain olsem ol i tingim olsem ol i ken i lukim. Em olsem na ol i lukim Pita i putim pasin bilong Ananaias na Safaira long ples klia, na wantu tupela i pundaun na tupela i dai pinis long ai bilong ol. Dispela em i wanpela strongpela sain na mirakel, na ol manmeri i lukim na ol manmeri i harim stori bilong en, orait olgeta i kisim bikpela pret! Long Aposel 5:11 Luk (man i raitim buk Aposel) em i tok olsem, “Na bikpela pret i kamap long olgeta manmeri bilong sios na long ol manmeri i harim stori bilong ol dispela samting.”
Em olsem na bihain long stori bilong Ananaias na Safaria, long Aposel 5:12-16, Luk em i stori long ol aposel i wokim ol planti narapela sain na mirakel namel long ol manmeri. Ol sikman, taim sado bilong Pita i tasim ol, sik bilong ol i lusim ol na ol i kamap orait. Na ol sampela sikman ol i karim i kam long ol aposel, orait ol aposel i stretim sik bilong ol, na ol sampela man i gat spirit nogut, orait ol aposel i oraitim ol.
Taim yumi tingting long ol sain na mirakel, orait yumi tingim ol dispela kain samting bilong stretim sik na rausim ol spirit nogut. Tasol yumi no ken i lusim tingting long ol sain na mirakel i kamap pastaim long stori bilong Ananaias na Safaira. Samting i kamap long tupela em i sain na mirakel tu wantaim ol sain na mirakel bilong stretim sik na rausim ol spirit nogut.
BIKPELA Jisas i wokim bikpela sain na mirakel long Ananaias na Safaria. Tingim. Ananaias i wokim hait pasin, tasol dispela hait pasin i kamap ples klia long Pita, na Pita i autim Ananaias. Na wantu Ananaias i pundaun na i dai pinis. Na Safaira i wokim hait pasin tu, tasol dispela hait pasin i kamap ples klia long Pita, na Pita i autim Safaira. Na Pita em i klia pinis olsem Safaira bai lus olsem man bilong em. Em olsem na Pita i tokim em olsem, na wantu Safaira i pundaun na i dai pinis. Ol dispela samting em i bikpela sain na mirakel samting.
Ol brata na sista, ating yumi laik abrusim ol hatpela samting Baibel i tokaut long en. Sampela taim ol sain na mirakel samting em i ken i kamapim amamas na tok tenkyu, tasol sampela taim ol sain na mirakel em i samting bilong pretim ol manmeri. Ol sain na mirakel Jisas i kamapim long sios femili long Jerusalem (long Ananaias na Safaria) ol dispela sain na mirakel em i kamapim bikpela pret long ol manmeri.
Mi mekim ol dispela tok bai yumi tingting gut, na yumi no hariap na tingting tasol long ol sain na mirakel samting em i samting bilong stretim sik na ol manmeri i amamas. Sampela taim God i wokim ol sain na mirakel samting bilong egensim manmeri i giaman long bilipim na trastim Jisas, bai olgeta manmeri ol i ken i skelim bilip bilong ol na laip bilong ol na ol i no ken i tingim tok bilong God em i samting nating.
Orait na, yumi skelim liklik, long wanem as ol bilip manmeri long Jerusalem ol i askim God long wokim ol sain na mirakel. Yumi skelim tingting bilong ol na yumi kisim save long ol i holim wanem kain tingting na ol i prea long God long wokim ol sain na mirakel. Na ol manmeri long ples bilong yumi, ol i holim wankain tingting olsem ol o nogat, orait yumi skelim na kisim save.
Long wanem as ol manmeri i bilip ol i askim BIKPELA long wokim ol sain na ol mirakel?
Lukim Aposel 4:29-30. Ol hetpris lain ol i tretim ol manmeri i bilip bilong pretim ol na ol i no ken i autim tok bilong Jisas moa. Em olsem na ol manmeri i bilip ol i prea na askim God long givim strong long ol na ol i no ken i pret na ol i ken i autim tok bilong Jisas i go yet na ol i witnisim Jisas i kirap bek pinis na i stap. Na em i dispela tingting i stap long bel bilong ol na ol i prea long BIKPELA. Nambawan tingting bilong ol i olsem, ol i no ken i pret na ol i ken i autim tok bilong Jisas i go yet na ol i witnisim Jisas i go yet, na olgeta manmeri ol i ken i save olsem, Jisas i kirap bek pinis na i stap, na trutru Jisas Em i rot God i makim bilong kisim bek ol kainkain sinmanmeri.
Em olsem na, yumi mas klia olsem, ol sain na ol mirakel samting em i no nambawan samting long tingting na bel bilong ol bilip manmeri i stap long Jerusalem. Nogat. Nambawan samting long tingting na bel bilong ol em i Jisas na feitful wok bilong Em. Ol i laik ol manmeri ol i mas save olsem, Jisas Em i Krais. Tok “Krais” (na tok “Mesaia”) i minim olsem, “Man God i makim bilong kisim bek ol manmeri bilong Em” (Jon 1:41 na Jon 4:25-26). Ol i laik ol manmeri ol i ken i tanim bel na bilipim na trastim Jisas, na God i kisim bek ol long feitful wok bilong Jisas, na ol i stap insait long nupela laip wantaim God.
Em olsem na ol manmeri i bilip ol i askim BIKPELA long wokim ol sain na mirakel samting, bilong helpim ol manmeri na ol i ken i save olsem Jisas i stap laip na ol i no ken i givim baksait moa long Em, na ol i tanim bel na kisim laip long feitful wok bilong Jisas.
Ol i no askim BIKPELA long wokim ol sain na mirakel samting bikos ol i laik lukim ol dispela kain samting. Nogat! Na ol i no askim BIKPELA long wokim ol sain na mirakel samting bilong kisim biknem bilong ol yet na ol manmeri i amamas long ol na apim ol. Nogat! Trutru tumas ol i askim BIKPELA long wokim ol sain na mirakel samting bilong helpim ol manmeri na ol i ken i save olsem, Jisas i kirap long matmat trutru na Em i stap laip, na trutru Jisas Em i Krais, Jisas Em i man God i makim bilong kisim bek ol kainkain sinmanmeri, na ol i tanim bel na bilipim na trastim Jisas na ol i kisim nupela laip wantaim God long feitful wok bilong Jisas.
Ol sain na ol mirakel i soim olsem Jisas i stap laip. Pastaim Jisas i raun long ol wanwan ples na ol i lukim Em i wokim ol sain na ol mirakel. Na bihain, taim Jisas i dai pinis na Em i kirap pinis, orait ol i lukim ol sain na mirakel moa, na dispela i helpim ol i save olsem, trutru Jisas i kirap na Em i stap laip.
Na ol planti manmeri long Jerusalem ol i manmeri Juda na ol i harim ol promis bilong God long maus bilong ol profet long Olpela Testamen (Aposel 2:5). Ol i wetim Mesaia, ol i wetim Krais, ol i wetim Man God i makim bilong kisim bek sinmanmeri, ol wetim dispela promis bilong God.
Em olsem na, ol manmeri i bilipim na trastim Jisas, ol i laik ol dispela manmeri Juda, em ol wanlain bilong ol, ol i mas save olsem, Jisas Em i Man God i makim bilong kisim bek sinmanmeri, Jisas Em i Mesaia, Jisas Em i Krais ol profet i bin tokaut long Em. Ol i laik ol hauslain bilong ol i save olsem, ol promis bilong God long maus bilong ol profet i kamap pinis na ol i lukim. Pastaim ol i givim baksait long Jisas, tasol nau ol i mas save olsem, Jisas Em i Man ol profet i bin tokaut long Em, na ol i ken i tanim bel na God i kisim bek ol long feitful wok bilong Jisas.
Ol manmeri Juda ol i save wetim taim bilong Las De (taim bilong Las De em i taim we God i salim Krais i kam na Em i stap BIKPELA). Ol manmeri i bilipim na trastim Jisas pinis ol i laik ol hauslain bilong ol i save olsem, taim bilong Las De i kamap pinis. Jisas Em i BIKPELA bilong taim bilong Las De. Long taim bilong Las De tok bilong Jisas bai ron i go long olgeta 4-kona bilong dispela graun, bai ol manmeri Jisas i lusim laip bilong Em bilong kisim bek, ol bai harim na tanim bel na bilipim na trastim Jisas na kisim nupela laip long feitful wok bilong Em, na ol i stap femili bilong God.
Trutru, ol manmeri i bilipim na trastim Jisas pinis, ol i laik ol hauslain bilong ol i save long Jisas. Long dispela as tasol ol i prea na askim BIKPELA long wokim ol sain na ol mirakel samting. Ol i laik ol hauslain bilong ol i save long Jisas na kisim laip long feitful wok bilong Jisas olsem ol. Ol i no laik lukim nating ol sain na mirakel tasol. Nogat. Ol i laik hauslain bilong ol i bilipim na trastim na bihainim na givim biknem long BIKPELA Jisas.
God i blesim trupela bilip.
Ol bilip manmeri ol i askim BIKPELA long wokim ol sain na mirakel, na BIKPELA i harim prea bilong ol, na Em i wokim ol sain na mirakel olsem ol i askim. Long han bilong ol aposel BIKPELA i wokim sain na mirakel long Ananaias na Safaria, na dispela i kamapim pret long olgeta manmeri. Na long han bilong ol aposel BIKPELA i wokim ol sain na mirakel bilong stretim sik bilong ol sampela manmeri, na dispela i kamapim amamas na tok tenkyu.
Na long ol dispela sain na mirakel ol planti manmeri i tanim bel na ol i bilipim na trastim na bihainim Jisas olsem ol bilip manmeri i prea long en (Aposel 5:14).
Tru tumas BIKPELA i harim prea bilong ol na as tingting bilong prea bilong ol i kamap olsem ol i askim BIKPELA! God Em i egensim giaman bilip bilong Ananaias na Safaria, na Em i blesim trupela bilip bilong manmeri i bilipim na trastim Jisas trutru. Em i blesim ol na Em i wokim ol sain na mirakel, bai ol manmeri ol i ken i save olsem, Jisas Em i Man God i makim bilong kisim bek ol kainkain sinmanmeri. Na ol planti kainkain sinmanmeri ol i tanim bel na ol i bilipim na trastim na bihainim Jisas.
Planti manmeri long ples bilong yumi ol i gat bikpela laik tumas long lukim nating ol sain na mirakel.
Ol brata na sista, ating planti manmeri long ples bilong yumi ol i gat bikpela laik tumas long lukim ol sain na mirakel, tasol ol i no kisim tingting long bel bilong ol olsem ol bilip manmeri long Jerusalem i kisim. Ol planti manmeri long ples bilong yumi ol i laik lukim ol sain na mirakel samting tasol, na ol i no tingting long helpim ol manmeri i save olsem Jisas Em i Man God i makim bilong kisim bek sinmanmeri. Ol i no tingting long putim olgeta gutpela wok bilong Jisas long ples klia bai ol manmeri ol i ken i tanim bel na bilipim na trastim feitful wok bilong Jisas. Ol i no tingting long witnisim Jisas bai ol manmeri ol i ken i save olsem, God i kisim bek sinmanmeri long feitful wok bilong Jisas tasol.
Na planti taim tumas ol sampela manmeri ol i gat bikpela laik long lukim ol sain na mirakel, tasol ol yet ol i les long Jisas na les long tanim bel na les long bilipim na trastim feitful wok bilong Jisas. Ol yet ol i les long kisim trupela save long feitful wok bilong Jisas na ol i les long ol narapela manmeri i kisim trupela save long feitful wok bilong Jisas. Ol i no opim maus bilong ol na tokaut long Jisas na tokaut long feitful wok bilong Jisas na tokaut long God i kisim bek sin manmeri long feitful wok bilong Jisas tasol. Nogat. Ol i laik lukim nating ol sain na mirakel tasol.
Ol brata na sista, i no gutpela long yumi bihainim dispela kain pasin. Nogat. Nogut yumi gat bikpela laik long lukim ol sain na mirakel tasol, na yumi no tingting long as bilong ol sain na mirakel. Ol sain na ol mirakel samting em i no nambawan samting long tingting na bel bilong ol bilip manmeri i stap long Jerusalem, na dispela em i no ken i stap nambawan samting bilong yumi. Nambawan samting long tingting na bel bilong ol bilip manmeri long Jerusalem em i Jisas na feitful wok bilong Em. Ol i laik ol manmeri ol i mas save olsem, Jisas Em i Krais, Jisas Em i Man God i makim bilong kisim bek sinmanmeri. Ol i gat bikpela laik long ol manmeri ol i ken i tanim bel na bilipim na trastim Jisas na God i kisim bek ol long feitful wok bilong Jisas na ol i stap insait long nupela laip wantaim God. Dispela kain tingting mas i stap nambawan tingting long bel bilong yumi tu.
Ol brata na sista, bai yumi lukim ol sain na mirakel samting mi no save. Tasol wanpela samting mi save long en i olsem, i mobeta long yumi kisim wankain tingting olsem ol bilip manmeri bilong Jerusalem. Mobeta yumi tingim ol hauslain bilong yumi, na yumi askim God long givim strong long yumi bilong autim tok bilong feitful wok bilong Jisas, na long dispela rot ol wanwan manmeri long hauslain bilong yumi ol i ken i kisim trupela save long feitful wok bilong Jisas, na ol i tanim bel na bilipim na trastim na bihainim Jisas.
Mobeta yumi kisim dispela kain tingting long bel bilong yumi, na yumi larim ol sain na ol mirakel samting i stap tasol long han bilong God, Em bai wokim o nogat, em i samting bilong laik bilong God.
Trupela bilip em i blesim bilong God.
Harim tok bilong Jisas long Tomas long Jon 20:29….
29Yu bin lukim Mi na long dispela as yu bilip; blesim i stap wantaim manmeri i no bin lukim Mi tasol ol i bilip.
Yumi tingim olsem ol manmeri i lukim ol kainkain sain na mirakel, orait God i blesim ol na ol i lukim. Jisas i tok olsem, ol manmeri i no bin lukim ol kainkain sain na mirakel, i no bin lukim Jisas i kirap long matmat na wokabaut, na ol i bilip, orait ol dispela manmeri God i blesim ol trutru. God i opim ai na ia na bel bilong ol na ol i bilipim na trastim na bihainim Jisas, ol i kisim nupela laip long feitful wok bilong Jisas, feitful wok bilong Jisas i kisim ol i kam insait long femili bilong God, orait ol dispela manmeri i lukim blesim trutru bilong God.
Yumi i no lukim ol sain na ol mirakel na God i givim bilip long yumi, orait yumi lukim trupela blesim bilong God.
Em tasol.
