Habakuk 3:1-19.
Long Habakuk sapta 1 na sapta 2 God i bin tisim profet Habakuk. Habakuk i kisim dispela tisim bilong God na long sapta 3 yumi ken i lukim tingting bilong Habakuk i senis. Nau Habakuk i daunim em yet na Em i laik God i mas kisim biknem. Em i laik ol lain bilong em ol i mas save long God. Olsem na, em i mekim prea olsem, “God, mi laik Yu kamapim ol gutpela samting gen long mipela na ol lain bilong mi ol i ken i save gut long Yu na givim biknem long Yu.” (Lain 2.)
Bel bilong ol lain bilong Habakuk, em ol lain Juda, bel bilong ol i kamap olsem ston. Ol i no save harim tok bilong God. Tru, ol i holim tok bilong God na ol i mekim lotu, tasol ol i no bihainim tok bilong God, na ol i no givim biknem long God. Ol i givim baksait long God tasol. Ol i no rispektim lo bilong God na ol i no bihainim God. Ol lain Juda ol i hatpela lain stret.
Em olsem na God i mas smasim dispela strongpela bel bilong ol, bai senis i kamap long ol. Na God bai yusim ol lain Babilon bilong smasim ol. God bai kapsaitim ol na daunim ol pastaim na ol i mas save olsem God Em i God na ol i givim biknem long God. Na bihain long dispela, orait ol gutpela samting i ken i kamap gen.
Habakuk i klia long dispela samting. Olsem na, em i prea olsem, “God, nau Yu bel hat long mipela na Yu bai mekim save long mipela, tasol plis Yu no ken lusim tingting long pasin marimari bihain long bel hat bilong Yu.” (Lain 2.)
Habakuk i klia olsem, ol lain Babilon bai kam na spoilim olgeta samting long hauslain bilong em na bagarapim planti manmeri na bagarapim Habakuk yet. Tasol Habakuk i orait long dispela. Long wanem? Bikpela tingting bilong em i olsem, “God i mas kisim biknem namel long ol lain bilong mi.” Habakuk i save olsem, God bai yusim ol lain Babilon bilong smasim strongpela bel bilong ol Juda pastaim, na bihain ol bai tanim bel na aninit long God gen na givim biknem long God gen.
Lukim lain 16. Taim Habakuk i tingting long ol dispela hevi God bai bringim long ol, orait em i pret nogut tru. Yu save, Habakuk em i man tasol na em i pret long ol lain Babilon. Tasol em i tingim olsem, “Mobeta dispela hevi i ken i kisim mipela na ol lain bilong mi i ken i save long God na ol i ken i tanim bel na givim biknem long God. Na bihain ol gutpela pasin i ken i kamap gen.” Bikpela tingting bilong Habakuk i olsem, “God i mas kisim biknem namel long ol lain Juda.”
Habakuk i holim tingting long ol samting God i bin wokim long bipo.
Lukim lain 3-15.
Habakuk em i man tasol olsem yu na mi. Olsem na, em i pret long dispela hevi God bai bringim long ol lain bilong em. Em olsem na, Habakuk i putim tingting bilong em i go bek gen long ol samting God i bin wokim long bipo. Na taim Habakuk i tingting long ol dispela samting God i bin mekim long bipo, orait Habakuk i kisim strong. Long wanem? Olgeta taim God i bin wokim sampela samting long histori bilong ol lain Juda, orait God i bin wokim bilong helpim ol lain bilong Em. Em i wokim bilong helpim ol lain manmeri Em i bin makim bilong kisim bek. Lukim lain 13….
13Yu bin mekim olsem bilong helpim ol lain bilong Yu yet. Na Yu bin mekim olsem bilong helpim ol dispela lain yu bin makim.
Ol toktok i stap long lain 3-15 i hat liklik long yumi. Long wanem? Habakuk i yusim ol tok piksa toktok bilong tokaut long ol samting God i bin mekim long bipo.
Em i luk olsem long lain 3-10 Habakuk i holim tingting long taim bilong Noa we God i bin salim bikpela ren bilong karamapim dispela graun. Long taim bilong Noa graun em i bruk na wara em i sut i kam antap na bikpela ren i pundaun na wara i karamapim olgeta hap bilong dispela graun.
Na long wanem as God i mekim olsem? Yu holim tingting. God i mekim olsem bilong mekim save long ol manmeri i bin givim baksait long Em. God i bin yusim bikpela strong bilong Em bilong mekim save long ol. Tasol tu, God i bin yusim bikpela strong bilong Em bilong sevim na lukautim Noa wantaim ol lain bilong em, em ol lain God i bin makim bilong kisim bek. Olsem na, Habakuk em i holim tingting long ol dispela samting na hau God i bin yusim strong bilong Em bilong helpim na sevim na lukautim Noa. Na dispela i strongim Habakuk na Habakuk i tingim olsem, “Em nau, wankain samting i laik kamap long mipela na God bai helpim na sevim na lukautim mipela i aninit long Em.”
Na i luk olsem long lain 11-15 Habakuk i holim tingting long taim God i bin yusim strong bilong Em bilong daunim ol lain Isip na kisim ol lain Israel i kamaut long kalabus Isip. Em i tingting long taim God i brukim solwara na ol Israel i go long hapsait long solwara na ol ami bilong ol lain Isip i kam na ol i laik pinisim ol lain Israel, tasol taim ol i laik brukim solwara olsem Israel i bin brukim, orait God i karamapim ol long solwara na solwara i tanim tanim na ol Isip i lus long solwara.
Em olsem na, Habakuk i holim tingting long hau God i bin yusim strong bilong Em bilong daunim birua bilong Israel, na em i holim tingting long hau God i bin yusim strong bilong Em bilong helpim na sevim na lukautim ol lain bilong Em yet. Olsem na, dispela tingting bilong Habakuk i strongim em na em i tingim olsem, “God bai helpim mipela lain bilong Em olsem.”
Taim ol hevi i kamap long yumi, orait yumi mas holim tingting long ol samting God i bin wokim pinis bilong helpim na sevim na lukautim yumi.
Ating planti taim, taim sampela hevi i kamap long yumi, orait yumi save lusim tingting long ol samting God i bin wokim bilong yumi ol lain bilong God, em yumi i bilipim na trastim God long kisim bek yumi long feitful wok bilong Jisas long diwai kros tasol na yumi aninit long Em. Yu save, yumi save larim ol hevi i pulimapim tingting bilong yumi na yumi lusim tingting long ol samting God i bin wokim bilong sevim yumi. Em olsem na, taim hevi i kamap yumi save givap na lusim tok bilong God hariap.
Dispela i no gutpela. Taim sampela hevi i kamap, orait yumi i pas long Jisas yumi mas holim tingting long dispela wok God i bin mekim long dai bilong Jisas long diwai kros bilong helpim yumi. Yumi no ken i kros na tok olsem, “God Yu no save helpim mipela.” Nogat. God i bin mekim bikpela wok pinis long dai bilong Jisas long diwai kros bilong helpim yumi i trastim God long kisim bek yumi long feitful wok bilong Jisas. Olsem na, yumi mas holim tingting long dispela. Na dispela bai helpim yumi strong long bihainim God i go yet na ol hevi i no ken i pundaunim yumi.
Habakuk i save trastim God.
Lukim lain 16-19.
Habakuk i tingting gen long toktok God i bin mekim long em na Habakuk i pret nogut tru. Tasol, em i no ranawe na em i no givap. Nogat. Em i trastim God tasol.
Na Habakuk i tok olsem, maski ol samting bilong sindaun bilong mipela i no kamap, orait em inap. Mi bai trastim God i go yet. Sapos ol lain Babilon i kam na bagarapim olgeta samting bilong sindaun bilong mi, em i orait, stil mi bai trastim God na amamas long Em.”
Habakuk i kisim trupela bilip long God. Em i trastim God trutru. Olsem na, maski wanem samting i laik kamap long em, orait stil em bai trastim God na bihainim Em. Yu save, God bai strongim em na lukautim Habakuk na Habakuk i trastim God long ol dispela samting. Habakuk i lavim God trutru na em i aninit long God trutru.
Long Nupela Testamen aposel Pol i stori long sampela samting olsem. Lukim Rom 8:28-29….
28Na yumi save pinis, God i save bosim olgeta samting bilong mekim gut long ol manmeri i lavim Em, em ol manmeri God i singautim long laik na plen bilong Em. 29Bipo tru God i save tru long lain bilong Em, na Em i bin makim ol bilong mekim ol i kamap wankain olsem Pikinini bilong Em na bai dispela Pikinini i stap fesbon bilong planti brata.
God i bin makim ol wanwan manmeri bilong kisim bek. God i save singautim ol long laik na plen bilong Em, na ol i save lavim God.
Bipo tru God i bin makim ol wanwan manmeri na Em i pasim ol long Jisas, na Jisas i mekim wok long diwai kros bilong rausim pe bilong sin bilong ol, bai God i kisim bek ol (Efesus 1:4-8). Holi Spirit i opim ai ia bel bilong ol na ol i tanim bel na ol i bilipim na trastim feitful wok bilong Jisas – ol i bilipim na trastim God long kisim bek ol long feitful wok Jisas tasol. Ol i save olsem, ol yet ol i no fit long wokim wanpela stretpela samting na kamap stretpela manmeri long ai bilong God na God i kisim bek ol. Nogat. Ol i save long rot God yet i kamapim bilong stretim ol na kisim bek ol, na ol i amamas long Em na ol i lavim Em na ol i tok tenkyu long Em long feitful wok bilong Jisas long diwai kros.
Gutpela samting na ol hevi i kamap bilong senisim yumi.
Na i klia olsem, God i kisim bek ol bilong senisim ol, bai ol i senis na kamap kain man olsem Jisas yet – bai ol i lainim na bihainim olgeta pasin bilong Jisas. God i save bosim na kontrolim olgeta samting long dispela graun bilong senisim ol, na moa na moa ol i senis na kamap olsem Jisas long laip bilong ol long hia long dispela graun. Na dispela i gutpela tru – olgeta samting God i kisim i kam long laip bilong yumi em bilong givim tingting long yumi, bai yumi senisim pasin bilong yumi na yumi lusim pasin bilong ples na yumi kisim nupela pasin i wankain olsem pasin bilong Jisas.
Dispela em wanpela bikpela toktok bilong buk Habakuk. God i bosim na kontrolim olgeta samting (ol lain Babilon) bilong senisim ol lain Juda na ol i tanim bel na kam bek long God na bilipim na trastim na bihainim God. God i bosim na kontrolim olgeta samting bilong senisim Habakuk na tingting bilong Habakuk i senis na em i save moa long God na em i lavim God na trastim God moa.
Em olsem na maski gutpela samting i kamap long laip bilong yumi o hevi i kamap long laip bilong yumi, orait ol dispela samting God i bosim na kontrolim bilong senisim yumi – bilong mekim yumi senis na yumi kisim ol pasin bilong Jisas long sindaun na wokabaut bilong yumi. Na dispela i gutpela gutpela samting tru.
Ating planti taim tumas yumi tingim olsem, God i amamas long yumi na Em i kamapim ol gutpela samting long laip bilong yumi. Na planti taim tumas yumi tingim olsem, God i belhat long yumi na Em i kamapim ol hevi long laip bilong yumi. Tasol dispela 2-pela kain tingting i paul olgeta. God i no amamas long yumi na Em i kamapim gutpela samting long yumi, na God i no belhat long yumi na Em i kamapim hevi long laip bilong yumi. Nogat! God i kamapim ol gutpela samting long laip bilong yumi bilong senisim yumi. Na wankain olsem, God i kamapim hevi long laip bilong yumi bilong senisim yumi. God i bosim na kontrolim olgeta samting – ol gutpela samting na ol hevi samting wantaim – bilong senisim yumi, bai yumi wok long kisim tingting na pasin bilong Jisas long laip bilong yumi.
Em olsem na bai yumi trastim God olsem Habakuk i bin trastim God, a? Bai yumi trastim bosim na kontrolim bilong God – maski Em i kamapim gutpela samting long yumi o Em i kamapim hevi long yumi – bai yumi trastim God long yusim ol dispela samting bilong senisim yumi na mekim yumi lavim Em moa, na mekim yumi sanap strong long feitful wok bilong Jisas moa na yumi kisim na bihainim pasin bilong Em moa?
Em tasol.
