God i kisim bek yumi bilong yumi mekim ol gutpela wok God i redim bilong yumi i mekim.

Yumi skelim pinis….

Efesus 2:1-3.

Taim Adam i pundaunim olgeta manmeri insait long sin na dai, orait spirit bilong olgeta manmeri em i dai. Em olsem na, spirit bilong olgeta manmeri em i dai long olgeta samting long sait bilong God, na ol i stap aninit long bel hat bilong God.

Na ol manmeri God i bin givim long Krais (Efesus 1:4) – ol dispela manmeri tu, pastaim, ol i stap olsem. Ol manmeri i stap insait long sios bilong taun Efesus na ol i bilipim na trastim God long kisim bek ol long feitful baim bek wok bilong Jisas long diwai kros, orait pastaim ol dispela manmeri tu ol i bin i stap insait long sin na dai na sin i karamapim ol na ol i stap aninit long bel hat bilong God. Lukim lain 1-3….

• Ol i stap insait long ol kainkain rong na sin.
• Ol i bihainim olgeta pasin bilong dispela graun.
• Ol i bihainim hetman bilong ol spirit bilong pasin nogut.
• Ol i amamas long bihainim sin bilong ol long olpela bel.
• Ol i amamas long bihainim laik nogut bilong ol.

Yu save, dispela em i wanpela bikpela tisim i stap insait long Baibel – olgeta manmeri long olgeta hap i pundaun insait long sin na dai, na spirit bilong ol i no gat laip, na olgeta i stap aninit long bel hat bilong God.

Em olsem na, ol manmeri i stap long sios long taun Efesus, em ol manmeri i bilipim na trastim God long kisim bek ol long feitful wok bilong Jisas long diwai kros – pastaim ol tu ol i stap olsem – ol i bin i stap insait long sin na dai na sin i karamapim ol na ol i stap aninit long bel hat bilong God wantaim olgeta manmeri.

Tasol bihain ol i no stap olsem. Long wanem?….

Efesus 2:4-9.

Taim ol i stap yet insait long ol kainkain rong na sin – taim spirit bilong ol i no gat laip – God Em i bin mekim wok long dai bilong Jisas, na long dispela wok tasol God i kisim ol i kamaut long sin na dai.

Na wankain olsem long olgeta manmeri i bilipim na trastim God long kisim bek ol long feitful wok bilong Jisas – pastaim ol dispela manmeri ol i stap insait long sin na dai. Na taim ol i stap yet olsem – taim spirit bilong ol i no gat laip – orait God Em i mekim wok long dai bilong Jisas, na long dispela wok tasol God i kisim ol i kamaut long sin na dai.

• Long bipo, taim dispela graun i no kamap yet, God i pasim ol planti manmeri long Krais, bai Krais i mekim wok bilong mekim ol i stap holi na i no gat asua long ai bilong Em – God i transferim sin bilong ol i go long Jisas, na Em i transferim stretpela pasin bilong Jisas i go long ol – long dispela rot God i mekim ol dispela manmeri holi na i no gat asua long ai bilong Em – long dispela rot God i kisim bek ol – long dispela rot God i kamautim ol long sin na dai.

Orait, God i mekim wok bilong kamautim ol long sin na dai pastaim, na bihain Em i opim ai na ia na bel bilong ol – Em i givim laip long ol – em i givim nupela laip long ol.

• Holi Spirit i opim ai na ia na bel bilong ol dispela manmeri God i bin givim long Krais na nau ol i luksave long olgeta wok God i bin mekim bilong kisim bek ol, na nau ol i ken i harim tok bilong God, na nau ol i ken i save long God na save long rot bilong Em. Em olsem na, bel bilong ol i senis – bel bilong ol i tanim – God i tanim bel bilong ol na Em i givim bilip long ol na nau ol i amamas long i stap aninit tru long Jisas Krais na bihainim olgeta pasin bilong Em.

Yu save, pastaim ol manmeri God i bin givim Jisas, ol i stap insait long sin na dai na spirit bilong ol i no gat laip na ol i stap aninit long bel hat bilong God – tasol – taim ol i stap yet olsem, God i bin mekim wok long dai bilong Jisas bilong kamautim ol long sin na dai, na Em i givim nupela laip long ol.

Long dispela as tasol, nau ol i no stap olsem ol narapela manmeri. Nogat. Nau ol i bihainim tru Krais Jisas. Olgeta manmeri i bilipim na trastim God long kisim bek ol long feitful wok bilong Jisas long diwai kros na ol i pas long Em, ol dispela manmeri ol i stap olsem ol manmeri bilong sios bilong taun Efesus.

Orait, nau yumi ken i skelim lain 10.

¹⁰God i mekim yumi kamap nupela manmeri long wok bilong Krais Jisas. Em i mekim olsem bilong yumi ken i mekim ol kainkain gutpela wok God i bin redim long bipo bilong yumi ken i mekim.

God i bin mekim wok na Em i kamautim ol long sin na dai na Em i givim nupela laip long ol (em ol manmeri God i bin makim na ol i stap long taun Efesus) – na nau tasol ol i gat laip long ol samting long sait bilong God – nau tasol ol i gat laip bilong mekim ol kainkain gutpela wok God i redim long ol i ken i mekim.

Harim….

Ol manmeri God i bin makim Em i mekim ol i kamap nupela manmeri long wok bilong Krais Jisas pastaim, na bihain long dispela samting ol i mekim ol kainkain gutpela wok God i redim bilong ol i ken i mekim.

God i mekim olgeta wok pinis bilong kisim bek ol – bilong kisim ol i kamaut long sin na dai – bilong givim nupela laip long ol – Em i mekim olsem, bai ol i ken i mekim ol kainkain gutpela wok.

Taim God i kisim bek ol lain bilong Em pinis – taim God i kisim ol i kamaut pinis long sin na dai – taim God i givim nupela laip pinis long ol – orait God i givim ol kainkain gutpela wok long ol na ol i ken i mekim.

Gutpela wok God i redim bilong ol manmeri bilong Em.

Na God i redim wanem kain gutpela wok long ol lain bilong Em na ol i ken i mekim? Dispela gutpela wok em i wanem samting? Misin pasin, a? Ol lotu pasin, a? Nogat!

Gutpela wok God i redim bilong ol lain bilong Em i olsem, ol i bihainim laik bilong Jisas long olgeta samting long laip na sindaun bilong ol. Em olsem na sapos God i opim ai na ia na bel bilong yu na yu bilipim na trastim God long kisim bek yu long feitful wok bilong Jisas, orait maski yu meri i wokim gaden o yu bisnis man o yu mejistret o yu wokman insait long sios o yu waitman o yu blekskin man – maski yu husat, yu bihainim laik bilong Jisas long olgeta samting long laip na sindaun bilong yu.

Orait yumi skelim wanwan manmeri bilong helpim yumi klia long dispela toktok….

Sapos yu wanpela mejistret long ples….

God tasol i putim yu mejistret long ples. Olsem na, gutpela wok God i redim bilong yu long sait bilong kot long ples i olsem….

• yu yet yu bihainim lo bilong gavman olsem Jisas i bin tok.
• yu bihainim pasin bilong God – pasin bilong Baibel – na yu wokim ol gutpela disisen long kot.
• yu ken i hetim pasin nogut na lavim gutpela pasin – yu no ken i fevoritim ol frens bilong yu.

Sapos yu wanpela papa….

God i givim meri long yu na Em i givim ol sampela pikinini long yu na ol i save lukap long yu. Olsem na, gutpela wok God i redim bilong yu long sait bilong femili i olsem….

• yu ken i lavim meri bilong yu na lukautim em gut.
• yu ken i bihainim tok bilong Jisas na soim gutpela rot long ol pikinini.
• yu i ken i skulim ol long tok bilong God.
• na sapos pikinini bilong yu i bikpela pinis, orait yu helpim ol sindaun gut long marit bilong ol. Na sapos sampela i gat trabel long marit, orait helpim ol bihainim gutpela rot bilong God insait long marit bilong ol. Stiaim ol yangpela bois bilong yu bai ol i marit gut na marit long wei God i laikim. Tisim ol long rait wei long marit.

Sapos yu wanpela marit meri….

God i givim man long yu na Em i givim ol sampela pikinini long yu na ol i lavim yu na bihainim yu. Olsem na, gutpela wok God i redim bilong yu i olsem….

• yu ken i lavim man bilong yu na lukautim em gut.
• yu ken i bihainim tok bilong Jisas na soim gutpela rot long ol pikinini.
• yu ken i skulim ol long tok bilong God.

Tasol, sapos yu i stap long marit nogut na man bilong yu save givim hevi long yu, orait gutpela wok God i redim bilong yu i olsem….

• yu no ken i larim pasin nogut bilong man bilong yu i pundaunim yu long Tok bilong God – yu holim strong Tok bilong God na bihainim strong Tok bilong God.
• na wanem sanis God i givim yu, orait yu ken i tok isi long man bilong yu na helpim em klia long Tok bilong God na soim em wei bilong tanim bel.
• yu ken i wok hat long gaden na long kopi na man bilong yu no ken i painim wanpela asua long yu.
• yu ken i mekim gutpela pasin na bihainim wei bilong Jisas long olgeta samting long laip bilong yu na long dispela wei bai yu wokim gutpela eksempel long ol pikinini bilong yu.

Harim. Ol dispela tok mi mekim mi no minim olsem yu mas i stap long man i paitim yu na i bagarapim yu. Nogat. Na tok mi mekim i no minim olsem yu no ken i kotim man bilong yu bilong stopim em long paitim yu na bagarapim yu. Nogat. Sapos yu pret long laip bilong yu, orait yu ranawe long dispela man na yu sindaun wantaim ol papamama lain bilong yu na yu i stap seif.

Sapos yu wanpela yangpela man….

Yu yangpela man tasol na God i bin opim ai na ia na bel bilong yu na yu klia nau olsem, God i kisim yu i kamaut long sin na dai. Em olsem God i bin tanim bel long yu na yu bilipim na trastim na bihainim Jisas nau. Orait, gutpela wok God i redim bilong yu i olsem….

• yu no ken i bihainim wei bilong ples na slip nabaut wantaim ol yangpela meri. Nogat. Yu stap nating tasol na wetim taim bilong marit bilong yu.
• yu ken i painim wanpela meri i bilip olsem yu bilip na yu marit.
• yu ken i mekim wok – maski hambak nabaut olsem sampela yangpela man i save mekim.
• God i givim gutpela sanis long yu long mekim gutpela wok namel long ol bois – olsem na, bihainim gutpela pasin na long dispela wei bai yu stap gutpela eksempel long ol.

Olsem na, mi tok pinis, gutpela wok God i redim bilong ol lain bilong Em i olsem, ol i bihainim laik bilong Jisas long olgeta samting long laip na sindaun bilong ol.

3-pela rong tingting.

Orait, nau mi laik kliaim tingting bilong yumi long 3-pela rong tingting ol planti manmeri i save kisim….

1. Sampela manmeri i tingim olsem, “Sapos yumi mekim ol kainkain gutpela wok, orait God bai laikim yumi na kisim bek yumi.”
2. Sampela manmeri i tingim olsem, “Jisas i mekim gutpela wok pinis bilong helpim yumi, tasol yumi mekim ol kainkain gutpela wok bilong sapotim wok Jisas i bin mekim, na long dispela 2-pela samting God i ken kisim bek yumi.”
3. Sampela manmeri i tingim olsem, “God i givim nupela laip long yumi, na long dispela as nau yumi ken i mekim pasin God i save laikim na God i ken i kisim bek yumi long dispela gutpela pasin yumi yet i mekim.”

Tasol, ol dispela 3-pela tingting i rong olgeta. Yumi klia olsem, God i kisim bek yumi long wok Jisas i bin mekim. Em i no save kisim bek yumi long gutpela wok yumi mekim.

Harim gut dispela tok i stap long Efesus 2:10. God i kamautim ol lain bilong Em long sin na dai pastaim. Em i givim ol nupela laip pastaim. Em i kisim bek ol pastaim. Em i mekim olsem, bai ol i mekim gutpela wok Em i bin redim bilong ol i ken i mekim.

Ol i no mekim gutpela wok, bai God i ken i laikim ol na kisim bek ol. Nogat. Ol i mekim gutpela wok bikos God i bin kisim bek ol pinis. Em i kisim ol i kam insait pinis long femili bilong Em na nau tasol ol i ken i mekim ol gutpela wok God i redim bilong ol i ken i mekim.

Olsem na, yumi manmeri God i kamautim long sin na dai – yumi manmeri God i givim nupela laip – yumi i bilipim na trastim God long kisim bek yumi long feitful baim bek wok bilong Jisas long diwai kros – orait yumi stat nau na mekim ol gutpela wok God i redim bilong yumi long mekim.

Em tasol.