Moning.
Buk Efesus em i wanpela pas aposel Pol i bin raitim na i salim i go long ol manmeri bilong God i stap long taun Efesus. Ol manmeri bilong God em ol manmeri i bin harim tok bilong feitful wok bilong Jisas long diwai kros (gutnius), na ol i tanim bel, na ol i bilipim na trastim God long fogivim sin bilong ol na kisim bek ol long feitful wok bilong Jisas tasol.
God i bin givim olgeta blesim bilong heven long ol manmeri bilong God long taun Efesus. Em olsem na Pol i tokim ol long ol i ken i amamas na litimapim nem bilong God! Lukim Efesus 1:3.
3Litimapim nem bilong God, Papa bilong BIKPELA bilong yumi Jisas Krais. Em i bin givim olgeta blesim bilong heven long yumi i bilong Krais.
Na yumi tu yumi ken i amamas na litimapim nem bilong God! Sapos yumi tanim bel na yumi bilipim na trastim God long fogivim olgeta sin bilong yumi na kisim bek yumi long feitful wok bilong Jisas, orait yumi tu yumi manmeri bilong Krais, na God i givim olgeta blesim bilong heven long “yumi i bilong Krais.”
Blesim bilong God.
Na aposel Pol i laik ol manmeri bilong God ol i mas klia long wanem samting God i bin givim ol. Em olsem na long Efesus 1:4 aposel Pol i stat na em i tokaut long ol wanwan blesim God i bin givim “yumi i bilong Krais” . Pastaim em i tok olsem, long bipo bipo tru, taim dispela graun i no kamap yet, taim yumi no harim gutnius yet na yumi no bilip yet, orait God i bin makim yumi na Em i pasim yumi long Krais, bai Krais i mekim yumi holi na i no gat asua long ai bilong Em. Lukim Efesus 1:4.
4Long bipo, taim God i no kamapim dispela graun yet, Em i bin makim yumi na pasim yumi long Krais bai yumi i stap holi na i no gat asua long ai bilong Em. Em i bin lavim yumi.
God i pasim yumi long Jisas bilong mekim yumi holi na i no gat asua long ai bilong Em. Nais! Yumi no wokim sampela kain samting na yumi mekim yumi yet i kamap holi na i no gat asua long ai bilong God. Nogat! God i pasim yumi long Krais bilong mekim yumi holi na i no gat asua long ai bilong God.
Tingim. Long laip bilong yumi, yumi no holi na yumi no stretpela long ai bilong God. Yumi gat asua tasol long ai bilong God. Yumi gat rong long ai bilong God. Yumi nogut long ai bilong God. Long wanem, yumi sinmanmeri long bel bilong yumi na long tingting bilong yumi na long wokabaut bilong yumi na long sindaun bilong yumi na long marit bilong yumi na long lotu bilong yumi na long femili bilong yumi na long ples bilong yumi na long wok bilong yumi – yumi sinmanmeri long olgeta samting long laip bilong yumi.
Tasol God i wokim wanpela gutpela samting bilong yumi – Em i makim na pasim yumi long Jisas. Taim God i pasim yumi long Jisas, orait olgeta samting bilong yumi em bilong Jisas, na olgeta samting bilong Jisas em bilong yumi. Em olsem na, olgeta sin bilong yumi i go long Jisas, na God i mekim save long Jisas long ol dispela sin bilong yumi. Pe bilong sin em i dai, na long dispela as Jisas Em i dai long diwai kros. Em i kisim pe bilong sin bilong yumi. Long dispela rot nau yumi (yumi God i bin pasim long Jisas) yumi no gat asua long ai bilong God. Lukim 2 Korin 5:21….
21Krais yet i no save liklik long sin. Tasol, bilong helpim yumi, God i mekim Em i kamap sin samting. God i mekim olsem bai yumi, long wok bilong Krais, i ken i kamap stretpela manmeri bilong God.
Yumi tok pinis olsem, taim God i pasim yumi long Krais, orait olgeta samting bilong yumi em bilong Jisas, na olgeta samting bilong Jisas em bilong yumi. Em olsem na olgeta stretpela na gutpela bilong Jisas em bilong yumi – olgeta holi bilong Jisas em bilong yumi. Em olsem na long dispela rot yumi holi long ai bilong God. Yumi yet yumi no holi, tasol nau holi bilong Jisas em i holi bilong yumi, na long dispela rot nau yumi holi long ai bilong God. Lukim 1 Korin 1:30….
30God yet Em i as tru bilong laip bilong yumi i pas long Krais Jisas, na bilong yumi God i mekim Krais Jisas i kamap trupela save bilong Em. Em olsem na Krais Jisas Em i stretpela pasin bilong yumi, na long wok bilong Em yumi kamap holi manmeri bilong God, na Em i rot bilong God i kisim bek yumi.
Sipsip bilong God.
Na Jisas yet i stori long ol dispela samting. Lukim tok bilong Jisas long Jon 10:27-29….
27Ol sipsip bilong Mi i save harim maus bilong Mi, na Mi save long ol, na ol i bihainim Mi. 28Mi givim laip i stap gut oltaim oltaim long ol, na ol bai i no inap lus. Wanpela man i no inap tru long rausim ol long han bilong Mi. 29Papa bilong Mi i bin givim ol long Mi, Em i winim olgeta samting, na wanpela man i no inap tru long rausim ol long han bilong Papa bilong Mi.
Husat i sipsip bilong Jisas? Ol sipsip bilong Jisas em ol manmeri God i bin makim na givim long Jisas. Papa i bin givim ol sipsip long Jisas, na Jisas i givim laip i stap gut oltaim oltaim long ol. Jisas i mekim ol sipsip holi na i no gat asua long ai bilong Papa, na long dispela rot Papa i kisim bek ol na ol i no inap lus. Papa i fogivim sin bilong ol na Em i kisim bek ol na ol i stap seif long han bilong Em oltaim oltaim – wanpela i no inap lus.
Em olsem na, taim God i makim yumi na pasim yumi long Krais, orait Em i bin wokim gutpela samting tru long yumi na yumi ken i amamas moa moa yet long dispela gutpela gutpela wok bilong dispela gutpela gutpela God. Yumi no ken i tubel, long wanem, God i pasim yumi long Krais longtaim pinis, na Krais i mekim wok longtaim pinis bilong pinisim pe bilong sin bilong yumi na bilong mekim yumi holi long ai bilong God – Em i mekim olsem bilong kisim yumi i kam insait long femili bilong God.
Lavim bilong God.
God i lavim yumi (Efesus 1:4). God i lavim yumi pastaim na Em i pasim yumi long Jisas na Jisas i mekim wok long diwai kros bilong mekim yumi holi na i no gat asua long ai bilong God. Na Holi Spirit i opim ai na ia na bel bilong yumi, bai yumi ken i save long ol dispela gutpela blesim bilong God long yumi – bai yumi ken i harim maus bilong Jisas (Jon 10:27). Long dispela as tasol yumi tanim bel na yumi bilipim na trastim God long kisim bek yumi long feitful wok bilong Jisas – yumi sipsip na yumi bin harim maus bilong Jisas na yumi tanim bel na yumi bilipim na trastim na bihainim Em.
God i bin lavim yumi na Em i pasim yumi long Jisas! Dispela blesim i gutpela blesim stret! Em olsem na yumi amamas na litimapim nem bilong God na tok tenkyu long Em!
Glenn.
