Moning.
Grasia bilong God em i wanpela bikpela samting, na yumi save lukim grasia bilong God long olgeta hap insait long Baibel. Em olsem tasol grasia bilong God em i wanem samting? Tok “grasia” (Tok Inglis “grace”) em i wanpela sotpela toktok bilong diskraibim wanpela bikpela samting – tok “grasia” i save diskraibim olgeta samting God i mekim bilong kisim bek (sevim) sinmanmeri.
Tingim….
- Pastaim God i makim planti manmeri bilong kisim bek ol,
- na Em i givim ol long Jisas. Lukim Efesus 1:4.
4Long bipo, taim God i no kamapim dispela graun yet, Em i bin makim yumi na pasim yumi long Krais bai yumi i stap holi na i no gat asua long ai bilong Em. Em i bin lavim yumi.
- Bihain Jisas i kam long dispela graun, na long laip bilong Em, na long dai bilong Em long diwai kros, na long kirap bek bilong Em long matmat, Em i mekim ol klin (stretpela) long ai bilong God. Lukim Efesus 3:12 na 1 Korin 1:30 (na yu ken i lukim Mak 10:45).
12Yumi ken i kam bek long God na yumi no inap sem o pret bikos Krais i bin feitful long mekim wok.
30God yet Em i as tru bilong laip bilong yumi i pas long Krais Jisas, na bilong yumi God i mekim Krais Jisas i kamap trupela save bilong Em. Em olsem na Krais Jisas Em i stretpela pasin bilong yumi, na long wok bilong Em yumi kamap holi manmeri bilong God, na Em i rot bilong God i kisim bek yumi.
- God Em i adoptim ol (kisim bek ol) na Em i mekim ol i stap femili bilong Em. Lukim Efesus 1:5-8.
5Na long dispela as Em bin i makim yumi bilong adoptim yumi na mekim yumi kamap pikinini bilong Em long wok Jisas Krais i mekim. Na God i bihainim amamas na laik bilong Em yet na Em i mekim ol dispela samting. 6Na ol dispela samting i save givim biknem long grasia i bikpela na gutpela tumas bilong God. Na dispela grasia i fri olgeta na i kam long yumi long wok bilong dispela Man God i lavim tumas. 7-8Dispela Man, long blut bilong Em, Em i baim pe bilong sin bilong yumi na yumi stap fri nau. Long dispela wei God i fogivim yumi long sin bilong yumi. Na dispela i soim yumi olsem God i kapsaitim grasia bilong Em moa moa long yumi.
- Na God i salim tok bilong Em long ol, bai ol i ken i harim gutnius bilong feitful wok bilong Jisas. Lukim Rom 10:14-15.
14Tasol, hau na bai ol i singaut long BIKPELA sapos ol i no bilipim na trastim Em? Na hau na bai ol i bilipim na trastim Em sapos ol i no bin harim tok bilong Em? Na hau na bai ol i harim tok bilong Em sapos wanpela man i no bin autim tok long ol? 15Na hau na bai wanpela man i autim tok long ol sapos BIKPELA i no bin salim em i go bilong autim tok long ol? Buk bilong God i mekim dispela tok, “Lek bilong ol man i kam autim gutnius i naispela tru!”
- Na Holi Spirit i kamapim nupela laip long ol, Em i opim ia na bel bilong ol, bai ol i ken i harim gutnius bilong feitful wok bilong Jisas. Lukim Efesus 1:13-14 na Efesus 2:4-5 (na yu ken i lukim Efesus 2:1-3).
13Na yupela tu i pas long ol dispela samting bilong Krais taim yupela i harim tok i tru tumas. Dispela tok i tru tumas em i gutnius i tokaut long wok God i mekim long Krais bilong sevim yupela. Na taim yupela bilip God i givim wanpela mak long yupela bilong soim olsem Em i bin pasim yupela long Krais. Na dispela mak em i Holi Spirit God i bin promisim. 14Holi Spirit i olsem diposit bilong olgeta samting Krais i bin kisim bilong yumi na bihain yumi bai lukim. Em olsem na Holi Spirit bai i stap wantaim yumi manmeri bilong God inap long taim God i kisim bek yumi na yumi stap fri wantaim Em. Na God i mekim ol dispela samting bilong apim nem bilong Em i bikpela na gutpela tumas.
4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais. Na God i mekim olsem bikos God Em i God bilong marimari na bikos God i lavim yumi. Yes, God i mekim grasia na Em i sevim yumi.
- Em i givim bilip long ol, bai ol i bilipim na trastim God long kisim bek ol long feitful wok bilong Jisas. Lukim Efesus 2:7-8.
7Na God i bin mekim ol dispela samting bilong soim olgeta jeneresen olsem, grasia bilong Em i bikpela na gutpela moa moa yet. Na dispela grasia i kamap ples klia taim God i mekim gutpela pasin long yumi long wok bilong Krais Jisas. 8God i mekim grasia na Em i sevim yumi long rot bilong bilip. Yumi yet yumi no kamapim bilip bilong yumi. Nogat. God i bin givim bilip long yumi.
- Na God i holimpas ol, bai wanpela samting i no inap rausim ol long han bilong Em na wanpela samting i no inap separetim ol long lavim bilong Em na long wok bilong Jisas. Lukim 1 Korin 1:8 (na yu ken i lukim Rom 8:31-39).
8Na God bai holim na lukautim yupela tu i go i go inap long pinis bilong olgeta samting, bai yupela i no gat asua long de bilong BIKPELA bilong yumi Jisas Krais.
- Ol bai sindaun wantaim Jisas long heven na amamas oltaim oltaim. Lukim Rom 5:2 na Rom 5:10 (na yu ken i lukim Revelesen 7:9-17).
2BIKPELA Jisas Krais, long wok bilong Em, Em i kisim yumi i kam insait long grasia bilong God, na long rot bilong bilip nau yumi i stap insait long dispela grasia. Na yumi save amamas. Long wanem, nau yumi klia olsem yumi bai lukim glori bilong God.
10Bipo yumi birua bilong God. Tasol nau long dai bilong Pikinini bilong God Em i mekim yumi pren bilong Em. Em olsem na, nau Krais Em i stap laip na tru tumas yumi tu bai i stap laip.
Olgeta dispela samting em i grasia bilong God. Sapos yumi bilipim na trastim God long kisim bek yumi long feitful wok bilong Jisas, orait yumi ken i save olsem, God i bin makim yumi na pasim yumi long Jisas, na Jisas i bin mekim yumi klin long ai bilong God, na Holi Spirit i bin givim laip long yumi na i givim bilip long yumi.
Taim yumi stap sinmanmeri yet, orait God i wokim ol dispela samting bilong yumi (Rom 5:8). Yumi no wokim wanpela samting na God i kisim bek yumi. Nogat. God i wokim olgeta samting bilong kisim bek yumi – long stat tu pinis God i wokim olgeta samting – na long ol dispela wok bilong God, God i soim yumi grasia bilong Em. Yumi nogut manmeri, tasol God i mekim wok bilong kisim bek yumi. Yumi birua long God, tasol God i mekim wok bilong kisim bek yumi – dispela em i grasia bilong God.
Sapos yumi bilipim na trastim God long kisim bek yumi long feitful wok bilong Jisas, orait yumi ken i save olsem, grasia bilong God i sevim yumi – long grasia bilong Em God i kisim bek yumi.
Glenn.
