Efesus 2:4-9.
Long stadi bilong Efesus 2:1-3….
Yumi bin stori long hau fes man Adam i pundaunim olgeta manmeri insait long sin na dai. Em i bin pundaunim olgeta manmeri – yes, olgeta manmeri bilong olgeta hap bilong dispela graun. Em i pundaunim olgeta manmeri bilong sios Efesus, na em i pundaunim yu na mi tu – em i pundaunim olgeta manmeri insait long sin na dai.
Olsem na, long Efesus 2:1-3 Pol i tokim ol manmeri bilong sios long Efesus olsem, “Bipo, yupela i stap insait tru long olgeta kainkain rong na sin. Bipo, spirit bilong yupela i no gat laip. Bipo, bel na tingting bilong yupela i dai pinis long olgeta samting long sait bilong God. Bipo, yupela i stap insait long sin na dai.”
Na yumi mas save, Adam em i no pundaunim ol manmeri long liklik samting. Nogat. Sin i karamapim olgeta manmeri olgeta. Yumi lain manmeri yumi stap dip tru insait long sin na dai. Spirit bilong yumi – bel na tingting bilong yumi – i dai pinis long olgeta samting long sait bilong God. Bel na tingting bilong yumi i stap laip long olgeta samting long sait bilong sin, tasol long olgeta samting long sait bilong God bel na tingting bilong yumi i dai pinis.
Em olsem na, yumi bihainim olgeta pasin bilong dispela graun. Yumi bihainim olgeta kastem pasin na olgeta wei bilong ples. Yumi bihainim na amamasim laik bilong yumi yet – yumi no tingting long bihainim wei bilong God na yumi no tingting long mekim pasin God i laik yumi mekim. Nogat. Fultaim yumi tingting long bihainim na amamasim laik na bel bilong yumi yet. Na yumi tingim olsem yumi bihainim laik bilong yumi yet, tasol nogat, Satan i giamanim tingting bilong yumi na yumi bihainim olgeta wei bilong em tasol.
Yumi no gat wanwan sin tasol. Nogat. Yumi no save mekim wanwan mistek tasol. Nogat. Yumi stap insait tru long sin na dai. Sin i karamapim yumi. Em olsem na, yumi olgeta manmeri yumi no stap aninit long amamas bilong God. Nogat tru. Yumi stap aninit long bel hat bilong God.
Taim Adam i pundaunim olgeta manmeri insait long sin na dai, spirit bilong ol i dai pinis long olgeta samting long sait bilong God na ol i stap aninit long bel hat bilong God. Na ol manmeri i stap long sios bilong taun Efesus na ol i bihainim tru Krais Jisas, long bipo – pastaim – ol tu ol i stap olsem.
Tasol God….
Lukim lain 4. Taim ol dispela lain bilong God i stap yet insait long sin na dai na sin na dai i karamapim ol – taim ol i stap yet insait long ol kainkain rong na sin na spirit bilong ol i dai pinis long olgeta samting long sait bilong God, orait God i kamapim laip long ol na nau ol i stap laip wantaim Krais. Ol manmeri God i bin makim na pasim long Krais, pastaim ol tu ol i stap insait long sin na dai. Na taim ol i stap yet insait long sin na dai, orait God i kamapim laip long ol.
Pol i tok, “God i bin kamapim laip long ol.” Em i tok wanem? Yumi skelim 2-pela samting….
1. Taim ol manmeri bilong God i stap yet insait long ol kainkain rong na sin – taim spirit bilong ol i no gat laip – God Em i mekim wok long dai bilong Jisas, na long dispela wok tasol God i kisim ol i kamaut long sin na dai.
Mi laik mekim tok piksa bilong helpim yumi klia long ol dispela samting God i bin mekim….
- Yumi tok pinis, olgeta manmeri i stap insait long sin na dai – sin i karamapim ol olgeta, na ol i stap aninit long bel hat bilong God.
Orait, mi yusim bilum bilong mekim tok piksa. Mi pulimapim bilum long kaukau – mi putim ol planti kaukau dip insait long bikpela bilum bilong mi na mi pasim maus bilong bilum na olgeta kaukau i kalabus long bilum. Na wankain olsem kaukau i stap dip tru insait long bilum na i stap kalabus dip tru insait long bilum, orait yumi olgeta i stap dip tru insait long sin na dai, yumi olgeta i kalabus dip tru insait long sin na dai.
Orait, yumi larim bilum i stap nating pastaim na yumi go long narapela toktok….
- Na taim ol i stap yet insait long sin na dai, God i mekim wok long dai bilong Jisas long diwai kros.
Long bipo, taim dispela graun i no kamap yet na wanpela manmeri i no bon yet, orait God i bin makim ol planti planti manmeri bilong kisim bek. Em bai adoptim ol na mekim ol i kamap femili bilong Em. (Yu ken lukim Efesus 1:4-5.) God i makim ol na Em i pasim ol long Krais – Em i givim ol long Krais – na Krais Jisas i mekim wok bilong ol.
Na Krais Jisas i mekim wanem wok long ol? Krais i kam daun long dispela graun na Em i kamap man na Em i bihainim olgeta laik bilong Papa bilong Em. Long taim Em i bebi i stap i kam i kam i kam inap long taim Em i dai, Em i bihainim olgeta tok bilong Papa bilong Em. Olsem na, Em i wokim na kamapim stretpela pasin God i save laikim tumas.
Orait na God i kisim olgeta sin bilong olgeta manmeri God i bin makim na pasim long Krais, na Em i transferim ol dispela sin bilong ol i go long Jisas, na Jisas i kisim pe bilong sin bilong ol – Jisas Em i dai long sin bilong ol. Taim Jisas i dai long diwai kros, orait Jisas i kisim kot bilong ol – Jisas i kisim bel hat bilong God long sin bilong ol – Jisas i kisim hel bilong ol – Em i pinisim pinis ol dispela samting bilong ol.
Na ol stretpela pasin Jisas i bin mekim na God i laikim tumas, orait i olsem God i transferim ol dispela stretpela pasin i go long ol manmeri God i bin makim na pasim long Krais. Em i mekim olsem na God i kolim ol “stretpela manmeri” nau. Ol i no stretpela manmeri tru long laip na wokabaut bilong ol. Nogat. Tasol, long ai bilong God na long sait bilong kot bilong God, God i kolim ol “stretpela manmeri.”
God i mekim ol dispela samting pinis, orait nau Em i kisim bek ol. Em i adoptim ol na putim ol i kam insait long femili bilong Em.
Na yumi mas holim tingting – taim God i mekim ol dispela wok ol dispela manmeri i stap yet insait long sin na dai na God i mekim ol dispela wok bilong ol bilong kisim bek ol.
Orait, em wanpela samting – Taim ol manmeri God i bin makim ol i stap yet insait long ol kainkain rong na sin – taim spirit bilong ol i no gat laip……God i bin mekim wok bilong kisim bek ol.
Nau God i mekim narapela wok long ol….
2. Taim ol i stap yet insait long ol kainkain rong na sin – taim spirit bilong ol i no gat laip – God i kamautim ol long sin na dai na Em i opim ai na ia na bel bilong ol – Em i givim laip long ol.
God i mekim olgeta wok pinis long han bilong Krais Jisas, orait nau Em i singautim ol wanwan. Em i mekim wok pinis bilong kamautim ol long sin na dai, orait nau Em i kisim ol i kamaut.
Yumi tingim bilum i pulap long kaukau na yumi larim i stap long graun. Yumi kisim ol wanwan kaukau i kamaut long bilum. Em olsem na wankain olsem yumi kisim ol wanwan kaukau i kamaut long bilum, orait God i kisim ol lain bilong Em i kamaut long sin na dai. Ol manmeri God i kisim i kamaut long kalabus bilong sin na dai, em ol manmeri Em i bin makim na givim long Krais. Krais Jisas i bin mekim wok bilong stretim ol, bai God i adoptim ol na mekim ol pikinini bilong Em long femili bilong Em.
Em olsem na…. Holi Spirit i opim ai na ia na bel bilong ol – Em i givim laip long ol – Em i kirapim nupela laip long ol. God i bin mekim wok bilong kamautim ol long sin na dai na Holi Spirit i givim nupela laip long ol.
Holi Spirit i givim nupela laip nau long ol. Em olsem na, nau bel bilong ol i no pas long olgeta sin na dai samting. Nogat. Nau ol i pas long ol samting bilong Krais Jisas. Ol i gat nupela bel – nupela laip – na i olsem bel bilong ol i tanim na i kamap narapela – ol i kisim nupela tingting long bel bilong ol na ol i bilipim na trastim feitful wok bilong Jisas long diwai kros. Ol i klia olsem na ol i bilip olsem, God i kisim bek ol long feitful wok bilong Jisas tasol. Na ol i lavim na bihainim Jisas nau.
Em olsem na, nau ol i stap autsait long sin na dai. Ol i gat nupela laip – ol i gat laip long ol samting long sait bilong God nau. Em olsem na, ol i bilipim na trastim na lavim na bihainim Jisas tasol.
Long feitful baim bek wok bilong Jisas long diwai kros God i bin stretim ol lain bilong Em long taun Efesus. Na God, long rot bilong Holi Spirit, taim ol i stap yet insait long ol kainkain rong na sin, Em i kamapim laip long ol. Em olsem na Em i opim ai na ia na bel bilong ol, bai ol i luksave long wok bilong God long feitful baim bek wok bilong Jisas long diwai kros na ol i tanim bel na ol i bilipim na trastim God na bilipim na trastim na bihainim Jisas.
Orait, lukim lain 4 gen na yumi ritim. Nau yumi – mi tok long yumi i tanim bel na i bilipim na trastim na lavim na bihainim Jisas wankain olsem ol lain bilong God long Efesus i mekim – nau yumi save long minim bilong dispela toktok. Taim yumi stap yet insait long ol kainkain rong na sin – taim spirit bilong yumi i no gat laip – God i bin givim laip long yumi – Em i bin mekim wok long dai bilong Jisas, na long dispela wok tasol God i kisim yumi i kamaut long sin na dai.
Em i opim ai na ia na bel bilong yumi – Em i givim nupela laip long yumi, na nau yumi stap laip long ol samting long sait bilong God. Em olsem na….
1. Long tingting bilong God i no gat kwesten mak long yumi – bai yumi sindaun wantaim Krais long heven.
Lukim lain 6 na yumi ritim. Long dispela ves Pol i no tok olsem, “Bai God i kirapim yumi wantaim Krais, na bai God i sindaunim yumi wantaim Krais long heven.” Long tingting bilong God, God kirapim yumi pinis na sindaunim yumi pinis wantaim Krais long heven. Yumi no go yet, tasol God i bin wokim olgeta wok pinis, olsem na, long tingting bilong Em, i olsem Em i sindaunim yumi pinis wantaim Jisas long heven.
Taim God i kirapim Jisas, orait i olsem Em i kirapim yumi – Em i kirapim yumi na kamautim yumi long sin na dai na givim nupela laip long yumi. Na taim God i sindaunim Jisas long heven, orait i olsem God i sindaunim yumi long heven wantaim Krais.
God i no save lukim pasin yumi mekim na Em i tingim olsem, “Bai mi kisim bek ol o bai mi larim ol….” Nogat. Em i wokim wok pinis – wok i pinis – i olsem God i kirapim yumi pinis na sindaunim yumi pinis wantaim Jisas long heven. Olsem na i no gat wanpela kwesten mak long tingting bilong God nau long yumi – i olsem God i putim yumi pinis insait long heven.
2. Na i no gat as long yumi apim yumi yet long wanpela liklik samting.
Lukim lain 8-9 na yumi ritim. God i wokim olgeta wok bilong kisim bek yumi – na bilip tu God i bin givim yumi – i no yumi yet i kamapim. Olsem na, i no gat as tru long yumi apim yumi yet long wanpela liklik samting.
Yu save, planti manmeri i tok olsem, “Mi gutpela man – mi save mekim ol gutpela pasin, olsem na, God i ken i kisim bek mi long dispela naispela wok bilong mi.” Ol manmeri i bihainim dispela kain tingting ol i apim ol yet long ai bilong God.
Tasol, yumi God i bin opim ai na ia na bel bilong yumi na yumi klia olsem, God i mekim olgeta wok bilong kisim bek yumi long sin na dai, orait yumi no inap litimapim nem bilong yumi. Nogat. Yumi klia olsem yumi no mekim wanpela samting na God i kisim bek yumi. Nogat. God tasol i bin mekim olgeta wok tasol bilong kisim bek yumi. Olsem na, yumi mas litimapim nem bilong God tasol.
Grasia bilong God i gutpela tumas!
Nau mi laik givim wanpela askim na yumi skelim….
Long wanem as God i bin mekim ol dispela samting long yumi?
Em i mekim ol dispela samting long yumi bikos grasia bilong God i bikpela na gutpela moa moa yet.
Lukim lain 5 na lain 7. God i mekim ol dispela wok bilong Em bilong soim grasia bilong Em. Yumi bin mekim nogut long God. Yumi bin givim baksait long God. Yumi bin pulim nus long God. Yumi bin les long God. Tasol God i mekim planti gutpela wok bilong stretim ol dispela trabel (sin na dai) yumi kamapim long yumi yet, na Em i mekim wok bilong kisim bek yumi na adoptim yumi na mekim yumi pikinini bilong Em.
God i mekim ol dispela samting bikos God Em i God bilong mekim grasia. Sapos God i no kain God olsem, orait yumi bai i stap insait long sin na dai i go i go i go i go olgeta oltaim oltaim. Sapos God i no God bilong grasia, orait yumi bai safa i go i go i go olgeta long hel bilong sin bilong yumi.
Olsem na, yumi God i bin opim ai na ia na bel bilong yumi pinis, orait yumi lavim dispela God tasol na tok tenkyu long Em. Trupela God bilong yumi Em i wanpela gutpela gutpela God stret na grasia bilong Em i bikpela na gutpela moa moa yet. Olsem na, lavim dispela God, lavim Krais Jisas, na tok tenkyu long Em na litimapim nem bilong Em tasol, na bihainim Em.
Em tasol.
