Moning.
“God i kapsaitim grasia bilong Em moa moa long yumi.” Lukim Efesus 1:7-8….
7-8Dispela Man, long blut bilong Em, Em i baim pe bilong sin bilong yumi na yumi stap fri nau. Long dispela wei God i fogivim yumi long sin bilong yumi. Na dispela i soim yumi olsem God i kapsaitim grasia bilong Em moa moa long yumi. Na wantaim dispela Em i givim trupela save na tingting bilong Em long yumi.
Dispela tok “grasia” em i wanpela bikpela bikpela tok insait long Tok bilong God. Planti saveman bilong Tok bilong God ol i tok olsem, “Grasia em i namba wan tok i stap insait long Tok bilong God.” Ol i tok, “Grasia em i paslain long olgeta narapela tok i stap insait long Tok bilong God.”
Na grasia em i wanem samting?
Bai mi mekim 3-pela tok bokis bilong helpim yumi klia long dispela samting….
- Mi bungim wanpela man na mi givim em K50 – dispela K50 em i bekim bilong dinau mi bin kisim long em. Taim mi bekim dispela K50, orait mi mekim wanem kain pasin? Yu save, mi bekim dinau tasol. Mi mekim stretpela pasin long em na mi bekim dinau. Dispela pasin em i stretpela pasin, dispela pasin em i gutpela pasin, tasol dispela pasin em i no grasia pasin na em i no marimari pasin.
- Orait, mi bungim narapela man. Dispela man i no gat gutpela klos na em i hangre nogut tru. Na mi no save long dispela man em i husat, tasol mi pilim sori long em na mi givim em K50 bilong baim kaikai na ol sampela klos. Taim mi givim dispela mani long em, orait mi mekim wanem kain pasin? Yu save, mi mekim marimari pasin long em. Mi pilim sori long dispela man i stap nogut na mi helpim em na mi givim K50 nating long em. Em olsem mi marimari long em.
- Orait na mi bungim narapela man. Em tu em i no gat gutpela klos na em i hangre nogut tru. Tasol mi save long dispela man. Em i bin mekim pasin nogut long mi. Long bipo liklik em i bin hansapim mi long rot na em i stilim hanwas bilong mi na ol kago bilong mi. Em i pretim meri bilong mi na ol pikinini bilong mi. Na tu, em save raun long ples na em save mekim tok nogut long mi. Em save daunim nem bilong mi na bagarapim mi. Em olsem na taim mi bungim em na em i hangre nogut tru na klos bilong em i no gutpela, orait mi helpim em na mi givim K50 nating long em. Orait mi mekim wanem kain pasin long em? Mi mekim grasia pasin long em. Em i bin mekim birua pasin long mi tasol mi bin helpim em. Em i bin mekim pasin nogut long mi, tasol mi mekim gutpela pasin long em na mi helpim em. Dispela kain pasin em i grasia pasin.
Long fes man, mi bekim dinau. Long sekon man, mi mekim marimari pasin long em – em i stap nogut na mi sori long em tasol na mi helpim em na mi givim sampela mani nating long em. Long namba 3 man, mi mekim grasia pasin long em. Em i bin mekim pasin nogut long mi na em i mekim birua pasin long mi na em i save tok baksait na daunim mi na em i egensim mi. Em i man nogut tru na em i birua bilong mi, tasol mi helpim em. Mi mekim grasia long em.
Em i dispela pasin God i bin mekim long yumi – tasol grasia bilong God i moa moa yet! Efesus 1:7-8 i tok olsem, “God i kapsaitim grasia bilong Em moa moa long yumi.” God Em i kapsaitim grasia bilong Em.
Yumi mekim birua long God.
Yumi mas klia olsem, yumi olsem dispela namba 3 man mi tok bokis long em. Yumi bin mekim birua pasin long God. Yumi bin givim baksait long Em na yumi mekim pasin nogut long em. Yumi bin tok bilas long Em na yumi bin bagarapim nem bilong Em.
Yumi bin sakim tok bilong God. Yumi bin mekim pasin God i save hetim. Yumi amamas long yusim olgeta samting bilong God, tasol yumi no tok tenkyu long Em. Long strong bilong God yet yumi stap laip, tasol yumi bin pulim nus long God na yumi tingim olsem, “Long strong bilong mi yet mi stap.” Yumi bin rausim God long tingting bilong yumi na long laip bilong yumi. Yumi bin rausim God na yumi putim kastem pasin na tumbuna pasin i stap, na yumi bihainim ol dispela samting tasol. Pasin nogut i pulap long tingting bilong yumi. Yumi save long tok God i bin mekim, tasol yumi bin sakim na yumi bihainim tok bilong yumi yet.
Na taim yumi mekim ol kainkain pasin olsem, orait i olsem yumi tok, “God Em i samting nating.” Yumi putim yumi yet i go antap na yumi daunim God na God i stap olsem samting nating tasol long laip bilong yumi. Yumi manmeri i save egensim God.
Na i stretpela long God i ken i belhat long yumi.
Yumi mas klia olsem, i stretpela long God i ken i bel hat long yumi long ol dispela pasin yumi bin mekim. Em i rait long God i makim pe bilong sin em i dai na lus long hel. Yumi mas klia olsem, pe bilong ol dispela kain pasin yumi bin mekim em i no heven. Nogat tru! Pe bilong ol dispela pasin bilong yumi em i dai na lus long hel.
God Em i save long olgeta pasin nogut bilong yumi. God Em i klia hau yumi save kapsaitim Em na daunim nem bilong Em. Tasol Em i bin makim yumi bilong sevim yumi. Dispela em i grasia bilong God. Em i bin pasim yumi long Krais bai yumi stap holi na i no gat asua long ai bilong Em. Dispela em i grasia bilong God. Em i bin adoptim yumi na mekim yumi pikinini bilong Em. Dispela em i grasia bilong God.
God i givim dispela Pikinini Em i lavim tumas bilong baim pe bilong sin bilong yumi bilong God i ken i fogivim yumi. Blut bilong Jisas i kapsait bilong baim pe bilong ol dispela pasin nogut yumi mekim, na long dispela rot God i save fogivim olgeta sin bilong yumi. Dispela em i grasia bilong God.
Grasia bilong God i moa yet!
Tasol, wantaim ol dispela samting God i givim trupela save na tingting bilong Em long yumi. (Lukim lain 7-8 gen.) God Em i givim trupela save na tingting bilong Em long yumi – Em i givim bilip long yumi. Em i bin mekim wok insait long laip bilong yumi na Em yet i kamapim bilip na tanim bel na trastim long yumi.
Em olsem na, sapos yu bilipim na trastim God long kisim bek yu long feitful wok bilong Jisas long diwai kros na yu tanim bel na yu lavim Em na bihainim Em, orait yu mas klia olsem, God i bin mekim grasia long yu na Em i givim dispela bilip long yu, na long dispela as nau yu bilipim na trastim na lavim Em.
Tru tumas, Grasia bilong God em i bikpela bikpela samting stret! Harim. Pasin bilong God bilong kisim bek yumi sinmanmeri em grasia pasin bilong God “long stat tu pinis.” Olsem na, maski yumi apim yumi yet long ai bilong God. Yumi mas ai klia long grasia bilong God – long olgeta samting God i mekim bilong kisim bek yumi – na yumi tok tenkyu long Em long grasia bilong Em, na yumi litimapim nem bilong Em, na yumi lavim Em na bihainim Em.
Glenn.
