Taitus 2:11-15.
Wanpela taim mi raun long hauslain insait long bus na wanpela man i askim mi olsem, “Ol misin i kam sindaun longtaim pinis, tasol mipela no lukim senis i kamap long laip bilong mipela na mipela no lukim senis i kamap long laip bilong ol narapela hauslain – em olsem na olsem wanem senis i no kamap?”
Dispela askim em i wanpela gutpela askim. Ating ol planti pasta bilong lotu ol i save wipim ol manmeri bai ol i lusim stil pasin, na ol i lusim pasin bilong tok giaman, na ol i lusim pasin bilong kros pait, na ol i lusim tok baksait, na ol i lusim pasin bilong katim marit, na ol i lusim kainkain pasin nogut olsem. Em olsem tasol senis i no save kamap tumas long laip bilong ol manmeri.
Na em olsem wanem? Ensa bilong dispela kwesten i olsem….
Gutnius bilong grasia bilong God tasol i ken i senisim laip bilong manmeri.
Tru tumas, ol narapela samting i no inap senisim laip bilong manmeri. Nogat. Gutnius bilong grasia bilong God tasol i ken i senisim laip bilong manmeri. Lukim lain 11-12…. long grasia bilong Em God i kisim bek olgeta kainkain sinmanmeri olsem yu na mi, na grasia bilong God i save trenim yumi long stiaim tingting na pasin bilong yumi bai yumi bihainim olgeta wei bilong God.
Pastaim yumi mas skelim grasia bilong God em i wanem samting? Grasia bilong God em i wanpela bikpela samting, na yumi save lukim grasia bilong God long olgeta hap insait long Baibel. Em olsem tasol grasia bilong God em i wanem samting? Tok “grasia” em i wanpela sotpela toktok bilong diskraibim wanpela bikpela samting – tok “grasia” i save diskraibim olgeta samting God i mekim bilong kisim bek (sevim) sinmanmeri (lain 11).
Tingim….
- Pastaim God i makim planti manmeri bilong kisim bek ol,
- na Em i givim ol long Jisas (Efesus 1:4).
- Bihain Jisas i kam long dispela graun, na long laip bilong Em, na long dai bilong Em long diwai kros, na long kirap bek bilong Em long matmat, Em i mekim ol klin long ai bilong God (Mak 10:45 na Efesus 3:12 na 1 Korin 1:30).
- God Em i adoptim ol (kisim bek ol) na Em i mekim ol i stap femili bilong Em (Efesus 1:5-8).
- Na God i salim tok bilong Em long ol, bai ol i ken i harim gutnius bilong feitful wok bilong Jisas (Rom 10:14-15).
- Na Holi Spirit i kamapim nupela laip long ol, Em i opim ia na bel bilong ol, bai ol i ken i harim gutnius bilong feitful wok bilong Jisas (Efesus 1:13-14 na Efesus 2:1-5).
- Em i givim bilip long ol, bai ol i bilipim na trastim God long kisim bek ol long feitful wok bilong Jisas (Efesus 2:7-8).
- Na God i holimpas ol, bai wanpela samting i no inap rausim ol long han bilong Em na wanpela samting i no inap separetim ol long lavim bilong Em na long wok bilong Jisas (1 Korin 1:8 na Rom 8:31-39).
- Ol bai sindaun wantaim Jisas long heven na amamas oltaim oltaim (Rom 5:2 na Rom 5:10 na Revelesen 7:9-17).
Olgeta dispela samting em i grasia bilong God. Sapos yumi bilipim na trastim God long kisim bek yumi long feitful wok bilong Jisas, orait yumi ken i save olsem, God i bin makim yumi na pasim yumi long Jisas, na Jisas i bin mekim yumi klin long ai bilong God, na Holi Spirit i bin givim laip long yumi na i givim bilip long yumi.
Taim yumi stap sinmanmeri yet, orait God i wokim ol dispela samting bilong yumi (Rom 5:8). Yumi no wokim wanpela samting na God i kisim bek yumi. Nogat. God i wokim olgeta samting bilong kisim bek yumi – long stat tu pinis God i wokim olgeta samting – na long ol dispela wok bilong God, God i soim yumi grasia bilong Em. Yumi nogut manmeri, tasol God i mekim wok bilong kisim bek yumi. Yumi birua long God, tasol God i mekim wok bilong kisim bek yumi – dispela em i grasia bilong God.
Sapos yumi bilipim na trastim God long kisim bek yumi long feitful wok bilong Jisas, orait yumi ken i save olsem, grasia bilong God i sevim yumi – long grasia bilong Em God i kisim bek yumi.
Grasia bilong God i kamapim nupela laip long yumi pinis.
Taim God i kisim bek yumi, orait Em i kamapim laip long yumi. Pastaim yumi no gat laip – sin i holimpas yumi na spirit bilong yumi i no gat laip na yumi no bilipim na trastim God. Tasol God i kamapim laip long yumi – Em i senisim yumi – na long dispela as yumi bilipim na trastim feitful wok bilong Jisas – yumi bilipim na trastim God long kisim bek yumi long feitful wok bilong Jisas. Lukim Efesus 2:4….
4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais.
Grasia bilong God i kirapim laip long yumi – God i mekim wok insait long yumi bilong kirapim laip, bai yumi ken i bilipim na trastim Em. Pastaim yumi no bilipim na trastim God long kisim bek yumi long feitful wok bilong Jisas, tasol taim God (Holi Spirit) i kirapim laip long yumi, orait yumi bilipim na trastim God long kisim bek yumi long feitful wok bilong Jisas.
Long dispela as yumi senis pinis – yumi kamap narapela kain manmeri pinis. Taim yumi bilipim na trastim God long kisim bek yumi long feitful wok bilong Jisas, orait yumi senis pinis – pastaim spirit bilong yumi i no gat laip, tasol nau spirit bilong yumi i gat laip, olsem na, yumi narapela kain manmeri pinis – God i senisim yumi pinis.
Ol manmeri i bilipim na trastim God long kisim bek ol long ol narapela samting (ol samting olsem Sabat o baptais o Lordsapa o lotu pasin o ol gutpela pasin bilong ol yet), orait God i no kirapim laip long ol – ol i no kamap narapela kain manmeri – na long dispela as ol i no lukim senis i kamap long laip bilong ol. Long strong bilong ol yet ol i wok long kamapim laip long ol yet – ol i wok long kamapim senis long laip bilong ol yet – tasol ol i no inap. Ol i tingim olsem ol yet i ken i senisim laip bilong ol na kamap narapela kain manmeri na ol i ken i bilip na sindaun stret. Tasol nogat.
God wanpela tasol i ken i senisim yumi na kirapim nupela laip long yumi. Yumi i bilipim na trastim God long kisim bek yumi long feitful wok bilong Jisas tasol, orait God i kirapim nupela laip long yumi – Em i senisim yumi na yumi bilipim na trastim feitful wok bilong Jisas.
God bai senisim yumi moa.
Holi Spirit i kirapim nupela laip long yumi na Em i stap wantaim yumi bilong senisim yumi moa. Pastaim spirit bilong yumi i no gat laip, tasol Holi Spirit i kirapim laip long yumi, na Em i stap wantaim yumi bilong kirapim yumi moa, bai yumi bihainim olgeta gutpela pasin bilong God.
Lukim Taitus 1:14. Jisas i bin givim Em yet bilong mekim yumi klin long ai bilong God, na God i kisim bek yumi na mekim yumi lain manmeri bilong Em yet. Na Em i mekim olsem “bai ol i gat bikpela laik long olgeta gutpela pasin.” God i kamapim lain bilong Em bai ol i gat bikpela laik long bihainim ol gutpela pasin bilong God.
Em olsem na taim aposel Pol i tokim Taitus olsem, “Grasia bilong God i trenim yumi” (lain 12-13), orait Pol i tok long dispela samting. Taim God i kisim bek yumi, orait grasia bilong God i bin senisim yumi na grasia bilong God bai senisim yumi moa – grasia bilong God bai trenim yumi – grasia bilong God bai senisim yumi – God bai senisim yumi moa – Holi Spirit i stap long yumi bilong senisim yumi moa.
Lukim Filipai 1:3-6….
3Taim mi holim tingting long yupela mi save tok tenkyu long God bilong mi. 4Mi save amamas na prea taim mi mekim prea bilong yupela 5bikos long fes de i kam i kam long nau yupela poroman wantaim mipela long mekim wok bilong gutnius. 6Na mi klia olsem God i bin kirapim gutpela wok insait long laip bilong yupela na Em bai i mekim dispela wok i go i go inap long De bilong Krais Jisas.
Ol sampela manmeri long taun Filipai ol i bilipim na trastim God long kisim bek ol long feitful wok bilong Jisas na ol i tanim bel na bihainim Jisas. Na Pol i klia olsem God i bin kirapim dispela gutpela samting insait long laip bilong ol. Na Pol i klia tu olsem, God bai mekim gutpela wok moa insait long laip bilong ol i go i go inap long Jisas i kisim ol i go long heven o Jisas i kam bek gen.
Grasia bilong God i bin kirapim laip long ol na ol i bilip, na grasia bilong God bai trenim ol i go i go. Wok God i bin statim long ol, orait God bai wokim i go i go na pinisim.
Yumi stap long namel taim (lukim las hap bilong lain 12). Namel taim em i taim namel long God i kisim bek yumi na yumi lukim Em fes tu fes na yumi lukim glori bilong Em. Yumi ken i lukim Em fes tu fes taim yumi lusim dispela graun na yumi go long heven, o yumi ken i lukim Em fes tu fes taim yumi stap yet long dispela graun na Em i kam bek gen. Em olsem na yumi stap long namel taim na yumi wetim taim bilong lukim Em. Long dispela namel taim God i laik yumi bihainim Em (wankain olsem Em i tokim yumi long Taitus 2:1-10).
Pasin bilong bihainim God em i hatpela wok. Tasol God i no larim yumi yet long strong bilong yumi yet long mekim dispela hatpela wok. Nogat. Long grasia bilong Em God bai mekim wok insait long laip bilong yumi. Yumi bai mekim mekim, na God bai wok insait long yumi na senisim yumi, bai yumi bihainim Em long gutpela pasin. Em olsem na long dispela rot trupela senis bai kamap long yumi.
Na taim yumi feil na yumi pundaun, orait yumi bai tingting yet long grasia bilong God bilong kisim bek yumi long feitful wok bilong Jisas, na bai yumi amamas moa long grasia bilong God long yumi. Grasia bilong God em i bikpela tumas na em i antap tru na em i go daun moa na i winim save bilong yumi (Efesus 3:15-19). God i laik yumi mas save moa long grasia bilong Em. Olsem na, taim yumi pundaun, orait bai yumi save moa long fogivim bilong God (fogivim tu em i grasia bilong God) na bai yumi amamas moa long God long grasia bilong Em long yumi sinmanmeri.
Na taim yumi save moa long grasia bilong God na yumi amamas moa long Em, orait bai yumi laik moa long bihainim olgeta gutpela wei bilong God.
Gutnius bilong grasia bilong God tasol i ken i senisim laip bilong manmeri.
Long Taitus 2:15 aposel Pol i tokim Taitus olsem, “Yu mas tokaut klia long ol dispela samting. Yusim namba bilong yu bilong strongim ol na bilong krosim na stretim ol. Yu no ken i larim wanpela man i givim baksait long tok bilong yu.”
Pol i mekim dispela tok, long wanem, gutnius bilong grasia bilong God tasol i ken i senisim laip bilong ol manmeri bilong God. Ol narapela kain “gutnius” i no inap senisim wanpela manmeri. Nogat tru. Gutnius i tokaut long grasia bilong God long feitful wok bilong Jisas tasol em inap senisim laip bilong yumi sinmanmeri. Olsem na, Taitus i mas strong long autim gutnius bilong grasia bilong God long feitful wok bilong Jisas.
Long sios bilong yumi, yumi tu yumi mas bihainim gutnius bilong grasia bilong God long feitful wok bilong Jisas. Nogut yumi tingim olsem yumi ken i senisim laip bilong yumi long strong bilong yumi yet. God yet bai mekim wok insait long laip bilong yumi. Grasia bilong God bai trenim yumi – yumi mekim mekim na God bai wok insait long yumi na senisim yumi, bai yumi bihainim Em long gutpela pasin. Long dispela rot bai yumi lukim trupela senis i kamap long laip bilong yumi.
Yumi man na meri i kamap bikpela pinis, na yumi yangpela man na yangpela meri, na yumi wokman bilong God, na yumi wokboi bilong kampani, yumi olgeta yumi bihainim God olsem God i tokim yumi – yumi mekim mekim na long grasia bilong Em God bai senisim yumi bai yumi bihainim Em long gutpela pasin.
Em tasol.
