Moning.
Long mi yet mi tingim olsem nambawan tok stret i olsem,
4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais. Efesus 2:4.
Aposel Pol i makim em yet wantaim ol manmeri bilong God long taun Efesus na em i mekim dispela toktok. Tasol dispela tok i makim mi tu, long wanem, mi stap olsem ol. Em olsem na taim mi stap yet insait long ol kainkain rong na sin, na tingting na bel bilong mi i no gat laip, na mi no tingim God na mi no bihainim Em trutru na mi mekim birua pasin long Em, orait God Em i kamapim laip long bel na tingting bilong mi, bai mi ken i save long wok God i mekim long feitful baim bek wok bilong Jisas long diwai kros bilong kisim bek mi.
Long dispela as mi save amamas tru long dispela toktok. Mi no gutpela man, na mi no fit long stretim mi yet, tasol taim mi stap yet long nogut pasin bilong mi, orait God yet i wokim wok bilong kisim bek mi, na Em i wokim wok bilong opim ai na ia na bel bilong mi bai mi ken i save long ol gutpela wok Em i bin mekim long mi long feitful wok bilong Jisas long diwai kros. Dispela tok long Efesus 2:4 i gutpela tumas olgeta!
Na olsem wanem God i wokim wok long dai bilong Jisas bilong kisim bek mi? Lukim Efesus 2:4-9.
4-5Tasol, taim yumi stap yet insait long ol kainkain rong na sin, na spirit bilong yumi i no gat laip, orait God Em i kamapim laip long yumi na nau yumi stap laip wantaim Krais. Na God i mekim olsem bikos God Em i God bilong marimari na bikos God i lavim yumi. Yes, God i mekim grasia na Em i sevim yumi. 6God i bin pasim yumi long Krais Jisas, na long dispela as God i kirapim yumi wantaim Krais na Em i sindaunim yumi wantaim Krais long heven. 7Na God i bin mekim ol dispela samting bilong soim olgeta jeneresen olsem, grasia bilong Em i bikpela na gutpela moa moa yet. Na dispela grasia i kamap ples klia taim God i mekim gutpela pasin long yumi long wok bilong Krais Jisas. 8God i mekim grasia na Em i sevim yumi long rot bilong bilip. Yumi yet yumi no kamapim bilip bilong yumi. Nogat. God i bin givim bilip long yumi. 9Na yumi no mekim wok na God i givim bilip long yumi. Nogat. Olsem na, yumi no ken i litimapim nem bilong yumi yet.
God i mekim wok long mi long dai bilong Jisas, na Em i mekim wok long olgeta lain bilong Em long dai bilong Jisas, bai grasia bilong God i kamap bikpela samting moa long ai bilong olgeta manmeri long olgeta jeneresen. Em i mekim ol dispela wok long mipela bai mipela i lusim pasin bilong litimapim nem bilong mipela yet na mipela litimapim nem bilong God tasol.
Litimapim nem bilong God!
Lukim lain 8-9. God i wokim olgeta wok bilong kisim bek mipela – na bilip tu God i bin givim mipela – i no mipela yet i kamapim. Olsem na, i no gat as tru long mipela apim mipela yet long wanpela liklik samting.
Yu save, planti manmeri ol i apim ol yet taim ol i tok olsem, “Mi gutpela man – mi save mekim ol gutpela pasin, olsem na, God i ken i kisim bek mi long dispela naispela wok bilong mi.” Ol manmeri i bihainim dispela kain tingting ol i apim ol yet long ai bilong God.
God i bin opim ai na ia na bel bilong mipela na mipela klia olsem, taim mipela stap yet insait long olgeta rong na sin na taim bel na tingting bilong mipela i no gat laip, God yet i bin mekim olgeta wok pinis long mipela na God yet i bin kisim mipela i kamaut long sin na dai na God yet i bin givim nupela laip long mipela na givim bilip long mipela. Em olsem na, mipela no ken i litimapim nem bilong mipela. Nogat. Mipela no mekim wanpela samting na God i kisim bek mipela. Nogat. God tasol i bin mekim olgeta wok tasol bilong kisim bek mipela. Olsem na, mipela amamas na litimapim nem bilong God tasol.
Marimari na grasia.
Sapos wanpela man i stap nogut na yumi sori long em na yumi helpim em, orait yumi mekim pasin marimari long em. Na sapos wanpela man i mekim birua long yumi na i daunim yumi na i mekim nogut long yumi na i pulim nus long yumi na i bagarapim yumi na i les long yumi na i mekim ol kainkain pasin olsem long yumi na em i stap nogut na yumi lavim em na helpim em, orait yumi mekim pasin grasia long em. Yu save, pasin marimari em i gutpela pasin, tasol pasin grasia em i bikpela bikpela samting moa. Wanwan taim yumi ken i mekim pasin marimari, tasol ating yumi no save mekim pasin grasia tumas, a?
Grasia bilong God i gutpela tumas!
Lukim lain 5 na lain 7. God i mekim ol dispela wok bilong Em bilong soim grasia bilong Em. Yumi bin mekim nogut long God. Yumi bin givim baksait long God. Yumi bin pulim nus long God. Yumi bin les long God. Tasol, God Em i mekim planti gutpela wok bilong stretim ol dispela trabel (sin na dai) yumi kamapim long yumi yet, na Em i mekim wok bilong kisim bek yumi na adoptim yumi na mekim yumi pikinini bilong Em.
God i mekim ol dispela samting bikos God Em i God bilong mekim grasia. Sapos God i no kain God olsem, orait yumi bai i stap insait long sin na dai i go i go i go i go olgeta oltaim oltaim. Sapos God i no God bilong grasia, orait yumi bai safa i go i go i go olgeta long hel bilong sin bilong yumi.
Olsem na, yumi God i bin opim ai na ia na bel bilong yumi pinis, orait yumi lavim dispela God tasol na tok tenkyu long Em. Trupela God bilong yumi Em i wanpela gutpela gutpela God stret na grasia bilong Em i bikpela na gutpela moa moa yet. Olsem na, lavim dispela God, lavim Krais Jisas, na tok tenkyu long Em na litimapim nem bilong Em tasol, na bihainim Em.
Glenn.
