Moning.
Yumi manmeri bilong dispela graun, yumi bikhet manmeri. Sori, ating sampela manmeri i lukim dispela tok na ol i no inap amamas. Ol i ken i tok olsem, “Mi no bikhet manmeri. Nogat. Mi gutpela manmeri.”
Yu save, planti manmeri i pas long lotu ol i save tok olsem, “Mi gutpela manmeri. Mi harim Tok bilong God na mi sindaun kwait na mi mekim gutpela pasin tasol. Mi no manmeri nogut. Mi gutpela manmeri.”
Ol i kisim dispela kain tingting na ol i mekim kain tok olsem, tasol Tok bilong God i tok klia olsem, “I no gat wanpela manmeri i stretpela, nogat tru. I no gat wanpela manmeri i gat gutpela tingting.” Em olsem na, sapos yu tok olsem, “Mi gutpela man,” orait yu bikhet long God. Long wanem, God i tok pinis olsem, “I no gat wanpela manmeri i save mekim gutpela pasin, tru, i no gat wanpela.” (Yu ken i lukim Rom 3:10-12.)
Sapos yu tingim olsem, “God i ken skelim ol gutpela lotu pasin bilong mi na kisim bek mi long ol gutpela pasin bilong mi yet,” orait, yu bikhet long God. Yu wanpela bikhet manmeri.
Long dispela graun i gat planti manmeri i kisim wankain tingting na ol i tingim olsem, “Mi gutpela manmeri na God i ken i kisim bek mi long ol gutpela pasin mi i save mekim.” Dispela kain tingting na dispela kain bilip em i bikhet pasin. Long wanem, God yet i tok, “I no gat wanpela gutpela na stretpela man i stap.” Dispela pasin i olsem yu tok nogat long God na yu tok, “God Yu rong. Mi wanpela gutpela manmeri na Yu ken i skelim mi na kisim bek mi long gutpela pasin mi yet i mekim.”
Gutnius bilong God, gutnius bilong feitful wok bilong Jisas, i save daunim dispela bikhet bilong yumi. Lukim tok bilong God long Rom 3:27-31.
27 Orait, husat i ken i apim em yet? Em i no gat wanpela manmeri i ken i apim em yet. Long wanem, dispela kain pasin i pinis. Na wanem samting i pinisim dispela kain pasin? Pasin bilong bihainim lo i no pinisim dispela pasin. Nogat. Pasin bilong bilip tasol i pinisim. 28 Long wanem, yumi klia olsem God i no inap kolim yumi “stretpela man” long wok bilong yumi long bihainim lo. Nogat tru. Long rot bilong bilip tasol God i givim stretpela pasin long yumi na kolim yumi “stretpela man”. 29 God Em i no God bilong ol lain Juda tasol. Nogat. God Em i God bilong ol lain Jentail tu. 30 Long wanem, God Em i wanpela tasol. Olsem na, ol manmeri i bilipim na trastim Jisas, dispela wanpela God bai givim stretpela pasin long ol na kolim ol “stretpela man”, maski ol i manmeri Juda o ol i manmeri Jentail. 31 Orait, yumi ken i tok wanem, ol dispela samting i pundaunim lo, a? Nogat tru! Ol dispela samting i sapotim lo.
Tingim. Taim yumi tanim bel na yumi bilipim na trastim God long kisim bek yumi long feitful wok bilong Jisas long diwai kros, orait God i no lukim stretpela pasin bilong yumi na kisim bek yumi. Nogat. Em i lukim olgeta feitful wok bilong Jisas. God i lukim olgeta feitful wok Jisas i bin mekim bilong yumi na Em i kisim bek yumi.
Em olsem na, bai yumi apim yumi long wanem samting? Yumi no ken i tokim God olsem, “God, Yu lukim pasin bilong mi. Mi bihainim olgeta lo bilong Yu, olsem na, Yu ken i kisim bek mi.” Nogat. Yumi no ken i tok olsem. Long wanem? Yumi no bihainim olgeta lo bilong God na God i no kisim bek yumi long pasin yumi mekim long bihainim lo. Nogat. Em i kisim bek yumi long pasin Jisas i mekim long bihainim lo.
Na lo bilong God i tok wanem? Lo bilong God i tok olsem, “Pe bilong sin em i dai.” Orait, God i bihainim lo bilong Em yet na Jisas i kisim pe bilong sin bilong yumi i bilipim na trastim na bihainim Em na Em i dai. Em nau, dispela gutnius bilong feitful wok bilong Jisas i no daunim tok bilong lo. Nogat. Gutnius bilong feitful wok bilong Jisas i sapotim lo na i bihainim tok bilong lo.
Em olsem na, yumi no bihainim ol lo bilong God na God i kisim bek yumi. Nogat. Jisas i bihainim olgeta lo bilong God na Jisas wanpela tasol Em i stretpela man, na God i lukim ol dispela stretpela na gutpela pasin bilong Jisas na Em i kisim bek yumi sin manmeri.
Jisas i wokim olgeta samting bilong God i kisim bek yumi. Olsem na, yumi ken tok tenkyu long God tasol.
Long dispela as yumi no ken i apim yumi yet long wanpela samting. Long wanem, yumi no wokim wanpela samting na God i kisim bek yumi. Nogat. Jisas i wokim olgeta samting bilong God i kisim bek yumi. Olsem na, yumi ken tok tenkyu long God tasol. Yumi ken i daunim yumi yet na tok tenkyu long God i kisim bek yumi long olgeta feitful wok bilong Jisas tasol.
Glenn.
