Habakuk

¹Habakuk em i wanpela profet na em i bin kisim dispela toktok
bilong God.

Komplen bilong Habakuk.

²O BIKPELA, hamas taim mi bin singaut long Yu bilong kisim helpim bilong Yu,
tasol Yu no save harim.
Mi save krai na tokim Yu long ol pasin nogut i save bagarapim sindaun bilong ol manmeri,
tasol Yu no save helpim.
³Long wanem as Yu larim ol giaman samting i kamap na mi lukim?
Long wanem as Yu larim ol pasin nogut i stap?
Pasin bilong bagarapim sindaun bilong ol manmeri na bilong bagarapim haus na gaden na ol samting i stap long ples klia.
Kros na pait em i kamap bikpela samting stret.
⁴Olsem na, lo em i stap olsem samting nating,
na ol trupela samting em i no save kamap strong.
Ol man nogut ol i save daunim ol gutpela man,
na ol i save paulim ol samting i stret.

BIKPELA i bekim tok bilong Habakuk.

⁵“Lukluk gut long ol lain bilong narapela kantri nabaut,
na bai yupela kirap nogut tru.
Long wanem, Mi bai mekim narapela kain samting i kamap namel long yupela.
Na sapos sampela man ol i kam na tokaut long dispela samting
yupela bai tingim olsem ol i giaman.
⁶Nau Mi bai kirapim na strongim ol lain Babilon.
Yu save, ol dispela lain ol i save kros pait hariap na ol i save bagarapim ol manmeri.
Ol i save go nabaut long olgeta hap long dispela graun,
na ol i save kisim ol samting bilong ol narapela lain.
⁷Olgeta manmeri ol i pret nogut tru na ol i skin guria long dispela lain.
Ol dispela lain ol i save bihainim tingting bilong ol yet na dispela em i lo bilong ol.
Na ol i tingting tasol long mekim nem bilong ol i kamap bikpela.
⁸Ol hos bilong ol i save spit moa yet,
na kros pait bilong ol i narapela kain olgeta.
Pastaim ol man ol i kalap long hos na ol i stap longwe,
tasol ol bai givim sikisti na kam hariap.
Ol bai kam hariap tru na wantu ol i ken i kamap long ples bilong yupela na pait.
⁹Na taim ol i kam ol i tingting tasol long bagarapim olgeta samting bilong yupela.
Na ol dispela lain ol i save kam olsem wanpela strongpela win,
na ol i save karim planti manmeri i go.
¹⁰Ol i save tok bilas long ol king nabaut,
na ol i save daunim ol bikpela man long ples.
Na taim ol i lukim ol strongpela banis bilong lukautim ples ol i save lap,
na ol i hipim graun na kalap long banis na winim ol.
¹¹Ol i save winim ol hariap na wantu ol i spit i go long narapela ples olsem win.
Ol i lain nogut tru, na strong bilong ol em i olsem giaman god bilong ol.”

Namba 2 komplen bilong Habakuk.

¹²O BIKPELA, bipo Yu bin i stap na Yu save stap olsem i kam inap long nau.
Yu Stretpela Stretpela Man na Yu God bilong mi, olsem na mipela no inap lus.
O BIKPELA, Yu bin makim ol lain Babilon bilong skelim pe bilong rong bilong mipela.
Yu Strongpela Ston na Yu bin makim ol bilong mekim save long mipela.
¹³Yu stretpela man tumas na Yu no inap tru long tanim pes bilong Yu i go long ol samting nogut,
na Yu no inap larim ol pasin nogut.
Olsem na, long wanem as Yu larim ol lain we ol i save mekim kainkain pasin i no stret?
Long wanem as Yu no gat toktok long dispela lain nogut taim ol i laik bagarapim ol lain i gutpela liklik?
¹⁴Yu bin mekim ol manmeri i kamap olsem fis tasol.
Ol i kamap olsem fis we ol i no gat wanpela bikman bilong lukautim ol.
¹⁵Ol lain Babilon ol i save pulim ol manmeri olsem man i save tromoi huk na pulim fis.
Ol i save banisim ol manmeri olsem man i save tromoi umben na banisim ol fis.
Olsem na, taim ol i banisim na winim ol manmeri ol i amamas.
¹⁶Long strong bilong umben bilong ol, ol i kisim ol planti samting,
na ol i save kaikaim ol planti gutpela gutpela kaikai.
Na long dispela as ol i save lotu long umben bilong ol,
na ol i aninit long dispela samting tasol.
¹⁷Mi laik askim Yu olsem, “Yu bai larim ol lain Babilon na ol i ken i bagarapim ol narapela lain i go i go yet, a?”