Habakuk
Prea bilong Habakuk.
3
1Dispela em i prea bilong profet Habakuk.
2BIKPELA, mi bin harim tok bilong ol gutpela samting Yu bin mekim long bipo.
Olsem na, mi pret long Yu, BIKPELA.
Olsem na, mi laik Yu kamapim ol dispela gutpela samting gen long mipela.
Na mi laik Yu kamapim ol dispela gutpela samting nau na ol manmeri ol i ken i save long pasin bilong Yu.
Nau Yu bel hat long mipela, tasol holim tingting long pasin marimari.
3God Em i bin lusim dispela hap Teman na Em i kam.
Dispela Stretpela Stretpela Man Em i lusim maunten Paran na Em i kam.
Na taim Em i kam olgeta bikpela na gutpela samting bilong God em i bin pulap long skai.
Na biknem bilong God em i bin pulap long graun.
4Bilas bilong Em i bin stap wan kain olsem san i kamap.
Na strong bilong Em i stap long han bilong Em,
na long han bilong Em i gat bikpela lait i sut i go nabaut nabaut.
5Na trabel em i bin go paslain long Em,
na em i kam bihain long Em tu.
6Na Em i bin sanap, na Em i mekim graun i guria.
Na Em i sanap na lukluk, na olgeta lain manmeri ol i bin skin guria.
Na ol maunten bilong bipo tru ol i bin bruk nabaut,
na ol liklik maunten bilong bipo ol i surik i go daun.
Na God Em i no save senis, nogat.
7Mi bin lukim ol lain bilong Kusan na ol lain bilong Midian ol i bin kisim bagarap nogut tru.
8BIKPELA, Yu bin bel hat long ol bikpela wara, a?
Yu bin bel hat long ol liklik wara tu, a?
Yu bin bel hat long ol solwara samting, a?
Long wanem as Yu bin kam wantaim ol ami bilong Yu?
9Yu bin redim banara bilong Yu,
na Yu tromoi planti spia.
Na Yu bin salim ol wara bilong brukim graun nabaut.
10Na taim ol maunten ol i bin lukim Yu ol i surik i go daun olgeta.
Na Planti wara em i bin kapsait,
na bikpela wara em i mekim bikpela pairap
na em i solap i go antap stret.
11Taim Yu bin sutim ol spia bilong Yu em i spit i go kain olsem lait bilong klaut.
Na san na mun i lukim dispela samting na tupela i stop.
12Yu bin kisim bel hat na Yu bin go i kam long dispela graun na paitim ol lain manmeri nabaut.
13Yu bin mekim olsem bilong helpim ol lain bilong Yu yet.
Na Yu bin mekim olsem bilong helpim ol dispela lain Yu bin makim.
Yu bin krungutim hetman bilong ol lain bilong mekim pasin nogut.
Na Yu bin daunim em olgeta.
14Ol ami bilong dispela man ol i bin kam hariap bilong pinisim mipela.
Na mipela i no gat strong, tasol ol i amamas long kam na bagarapim mipela.
Tasol long dispela taim Yu bin sutim het bilong em long spia bilong em yet.
15Na Yu bin krungutim solwara long ol ami bilong Yu,
na wara em i tanim tanim nabaut.
16Mi harim pinis tok bilong BIKPELA na lewa bilong mi em i pam,
na maus bilong mi em i guria.
Ol bun bilong mi i lus na mi no gat strong,
na lek bilong mi em i guria.
Tasol, mi bai stap na wetim dispela samting nogut i laik kamap long ol i laik bagarapim mipela.
17Sapos ol diwai fik i no karim pikinini,
na ol diwai wain i no karim prut.
Na sapos ol diwai oliv i no karim gut ol kaikai,
na ol gaden i no kamapim kaikai.
Na sapos mipela i no gat sipsip i stap,
na mipela i no gat bulmakau i stap.
18Em i orait, mi bai amamas long BIKPELA.
Na mi bai amamas long dispela God bilong helpim mi.
19BIKPELA Bilong Bosim Olgeta Samting Em bai strongim mi.
Em save mekim lek bilong mi i stap strong na mi no ken i pundaun.
Em save strongim mi na litimapim mi.
Dispela em i bilong man i bosim musik, na em i ken i yusim ol musik samting i gat string na mekim song.
