Moning.
Yumi save pinis olsem, God i no inap daunim yumi i pas long Krais Jisas. (Lukim Sande Baibel Toktok “God i no save daunim yumi i pas long Jisas” wantaim “Tupela kain lo i stap”.) Tasol, hau na bai yumi save olsem yumi pas long Krais Jisas? Sapos yumi lukim wok bilong Holi Spirit insait long laip bilong yumi, orait yumi ken save olsem Holi Spirit i stap insait long yumi, na dispela i minim olsem, God i bin pasim yumi long Krais Jisas. Skelim tok bilong Aposel Pol long Rom 8:5-11.
5 Manmeri i wokabaut long laik bilong olpela bel ol i gat strongpela tingting long bihainim laik bilong olpela bel. Tasol manmeri i wokabaut long laik bilong Holi Spirit ol i gat strongpela tingting long bihainim laik bilong Holi Spirit. 6 Tingting bilong sin manmeri em i tingting bilong i dai. Tasol tingting bilong manmeri Holi Spirit i bosim em i tingting bilong laip na bel isi. 7 Tingting bilong sin manmeri em i pait long God. Long wanem, em i no laik i stap aninit long lo bilong God, na tu, em i no inap i stap aninit long lo bilong God. 8 Ol manmeri we olpela bel i save bosim ol, ol i no inap tru long mekim pasin God i save laikim.
9 Tasol olpela bel i no save bosim yupela. Nogat. Holi Spirit i save bosim yupela, sapos Spirit bilong God i stap long yupela. Na manmeri i no gat Spirit bilong Krais i stap long em, orait em i no bilong Krais. 10 Tasol Krais i stap insait long yupela. Sin i bin wok insait long yupela na long dispela as bodi bilong yupela bai i dai. Tasol God i mekim wok pinis bilong kolim yupela “stretpela man”, na long dispela as Holi Spirit i kamapim laip long yupela. 11 God i bin kirapim Jisas long dai, na Spirit bilong dispela God i stap insait long yupela. Em olsem na dispela God i bin kirapim Jisas, Em bai givim laip long bodi bilong dai bilong yupela. Em bai mekim olsem long strong bilong Spirit bilong Em i stap pinis insait long yupela. Rom 8:5-11.
Holi Spirit i no save kam i stap long laip bilong manmeri na sindaun nating, nogat. Holi Spirit i gat wok, na taim Em i kam i stap insait long laip bilong manmeri, orait Em i save mekim wok bilong Em.
Holi Spirit i save kamapim laip long manmeri.
Na bikpela wok bilong Holi Spirit insait long laip bilong manmeri i olsem, Em i save kamapim laip long ol (lukim lain 10). God i bin mekim wok pinis long feitful wok bilong Jisas long diwai kros bilong mekim sin manmeri i kamap stretpela manmeri long ai bilong God. Em olsem na, Holi Spirit i save kamapim laip long manmeri bai manmeri i ken i save long dispela samting God i bin wokim bilong ol long feitful wok bilong Jisas. Dispela i minim olsem, Holi Spirit i save opim ai na ia na bel bilong manmeri na Em i givim bilip long manmeri, bai manmeri i ken i save na manmeri i ken i bilipim na trastim tru dispela wok Jisas i bin mekim long diwai kros bilong stretim ol long ai bilong God.
Holi Spirit i save kamapim trupela bilip long manmeri.
Olsem na, sapos Holi Spirit i bin mekim wok insait long yumi olsem, orait yumi no inap trastim wok yumi yet i save mekim, nogat. Yumi bai trastim wok God i bin mekim long feitful wok bilong Jisas Krais long diwai kros. Holi Spirit i wok insait long laip bilong yumi bilong kamapim trupela bilip we yumi save trastim God long kisim bek yumi long feitful wok Jisas Krais i bin mekim bilong yumi.
Holi Spirit i save kamapim nupela pasin long manmeri.
Na taim Holi Spirit i kamapim laip long yumi na Em i senisim tingting bilong yumi na Em i givim nupela tingting na nupela bilip long yumi, orait dispela nupela laip na tingting na bilip i wok long kamapim nupela pasin long laip bilong yumi, na dispela nupela pasin em i pasin God i save laikim (lukim lain 5-8).
Dispela nupela pasin i kamap long laip bilong yumi em i no mekim yumi i stap stret long ai bilong God bai God i ken i kisim bek yumi. Nogat tru! Wok Jisas i wokim i mekim yumi i stap stret long ai bilong God na God i kisim bek yumi long wok Jisas i bin wokim bilong yumi. Em olsem na nupela pasin i kamap long laip bilong yumi em i hanmak bilong Holi Spirit na em i pasin God i laik lukim long laip bilong yumi i pas long Krais Jisas.
God i pasim yumi long Krais Jisas.
Jisas i bin wokim wok bilong mekim yumi i stap stretpela long ai bilong God, na Holi Spirit i opim ai na ia na bel bilong yumi bai yumi bilipim na trastim feitful wok bilong Jisas. Taim yumi bilipim na trastim feitful wok bilong Jisas, taim yumi bilipim na trastim God long kisim bek yumi long feitful wok bilong Jisas, orait nupela pasin i wok long kamap long laip bilong yumi, em ol pasin God i laik lukim long laip bilong ol manmeri i pas long Krais Jisas.
Sapos yumi lukim hanmak bilong Holi Spirit long laip bilong yumi olsem, orait yumi ken i save olsem, God i bin pasim yumi long Krais Jisas, na long dispela as yumi pas long Krais Jisas.
Yumi i pas long Jisas yumi ken i amamas.
Sapos Holi Spirit i stap insait long laip bilong yumi olsem, orait yumi ken i amamas. Long wanem? Yumi save olsem, yumi pas trutru long Krais Jisas, na God i no inap daunim yumi i pas long Krais Jisas. Wok bilong Jisas i mekim yumi fri olgeta long lo bilong sin na dai na long dispela as God i no inap daunim yumi. (Rom 8:1-2. ) Tok tenkyu long God (Papa God, Jisas na Holi Spirit) na litimapim nem bilong Em!
Glenn.
