Aposel 1:12-26.
Luk i raitim dispela buk yumi kolim “Aposel”. Em i raitim bilong wanpela man nem bilong em Tiofilus. Luk i laik Tiofilus i mas save long wok Jisas i mekim i go yet bihain long dai na kirap bek bilong Em na bihain long Em i go bek long heven.
Long sapta 1 Luk i tokim yumi olsem, Jisas i givim wok long ol aposel bilong witnisim Em long Judia na Samaria, na long olgeta 4-kona bilong dispela graun. Long wanem? Long rot bilong witnisim Jisas, Jisas bai singautim ol lain manmeri bilong Em (em ol manmeri God i bin givim Em na Em i dai bilong sevim) – Jisas bai kisim ol i kam long Em na ol bai stap wantaim aninit long bosim bilong Jisas na i stap lain manmeri bilong Em.
Ol manmeri Jisas i bin lusim laip bilong Em bilong kisim bek, em ol manmeri God i bin givim Em bilong sevim, orait Jisas bai singautim ol na kisim ol i kam long Em na bungim ol. Taim ol aposel i witnisim dai na kirap bek bilong Jisas, orait ol manmeri God i bin makim bilong kisim bek ol bai harim na ol bai kam long Jisas na ol bai bilipim na trastim God long kisim bek ol long feitful wok bilong Jisas, na wantaim ol bai bihainim Em na i stap aninit long bosim bilong Em.
Buk Aposel em i stori bilong Jisas i yusim ol aposel bilong singautim na kisim ol manmeri bilong Em i kam na ol i bilipim na trastim feitful wok bilong Em long diwai kros, na ol i kisim laip oltaim oltaim long dispela feitful wok bilong Em. Holi Spirit i givim strong long ol bilong witnisim Jisas, bilong autim tok bilong feitful wok na kirap bek bilong Jisas. Long dispela rot Jisas i kisim i kam ol manmeri God i bin givim Em bilong sevim, na ol i stap wantaim aninit long bosim bilong Em insait long femili bilong God.
Jisas bai i go, na Holi Spirit bai i kam.
Long Aposel 1:1-11 Luk i tok olsem, Jisas bai i go, tasol Holi Spirit bai i kam. Jisas bai go bek long heven, na Holi Spirit bai kam long ol aposel bilong givim strong long ol na ol i mekim wok Jisas i givim ol long mekim. Ol i no ken i go aut nabaut na mekim wok long strong na laik bilong ol yet. Nogat. Ol i mas i stap na Holi Spirit i kam, na long pawa bilong Holi Spirit ol aposel bai go nabaut na mekim wok Jisas i givim ol long mekim.
Long Aposel 2:1-47 Luk em i stori long Holi Spirit i kam pinis olsem Jisas i tok, na em i stori long ol samting i kamap long pawa bilong Holi Spirit – em i stori long strong i kamap long ol aposel na ol i witnisim dai na kirap bek bilong Jisas. Na long namel long dispela 2-pela stori – stori bilong Holi Spirit bai kam na stori bilong Holi Spirit i kam pinis – orait i gat stori bilong ol aposel i makim Matias bilong kisim ples bilong Judas (Aposel 1:12-26).
Taim Jisas i lusim ol aposel na Em i go bek long heven, orait ol aposel ol i go bek long Jerusalem, na wantaim ol narapela disaipel, em ol manmeri i bilipim na trastim na bihainim Jisas, ol i bung wantaim long wanpela antap rum bilong wanpela haus (lukim lain 12-14). Luk i tok olsem, ol i stap wantaim na ol i wanbel wantaim na mekim prea wantaim. Em olsem na ol i stap femili bilong God wantaim long Jerusalem (lain 14).
Na taim ol i stap wantaim long dispela antap rum, orait Pita i kirap na em i stori long dai bilong Judas, na em i tok long ol i mas makim narapela man bilong kisim ples bilong Judas na ol i stap 12-pela aposel.
Pastaim yumi skelim stori bilong Matias i kisim ples bilong Judas, na bihain yumi bai skelim long wanem as dispela stori i kamap namel long stori bilong Holi Spirit bai kam na Holi Spirit i kam pinis.
Pita i tokim ol aposel wantaim ol disaipel long holim tingting long bipo Tok bilong God.
Yumi skelim lain 16-17 pastaim. Pita i tokim ol aposel wantaim ol disaipel long ol i mas holim tingting long Tok bilong God. Bipo tru (klostu 1000 yia long bipo) God i bin givim Tok bilong Em long king Devit na dispela tok i kamap tru long ai bilong ol aposel. Na Pita i tok klia olsem, “Long maus bilong Devit Holi Spirit i bin tokaut…” Holi Spirit i kisim Tok bilong God i kam long maus bilong Devit.
Em olsem na Holi Spirit i bin tok olsem, Judas bai “stiaim ol man i kam arestim Jisas” (lukim lain 16). Ol aposel wantaim ol disaipel ol i lukim dispela tok i kamap tru – ol i lukim na witnisim Judas i stiaim ol man i kam arestim Jisas.
Long lain 18-20 Pita em i stori long ol samting i bin kamap long Judas. Long mani Judas i kisim bilong stiaim ol man i kam arestim Jisas, orait Judas i baim wanpela hap graun. Long dispela graun Judas em i dai na bel bilong em i bruk na olgeta insait bilong em i kapsait long graun. Ol sampela saveman i tok olsem, long pasin nogut bilong Judas ol i arestim Jisas na Jisas i dai na blut bilong Jisas i kapsait, na long mani bilong dispela pasin nogut bilong Judas ol i baim graun, na long dispela as ol i kolim graun “Graun bilong Blut”. Na ol narapela saveman i tok olsem, graun Judas i baim i kamap matmat bilong ol man nogut olsem Judas – ol i save planim ol manmeri nogut i kapsaitim blut bilong ol gutpela manmeri, na long dispela as ol i kolim nem bilong graun “Graun bilong blut”.
Long lain 20 Pita i tokim ol disaipel long holim tingting long tok Holi Spirit i mekim long bipo tru. Holi Spirit i tok pinis olsem, graun Judas i dai long en mas i stap nating na ol manmeri ol i no ken i kamapim gaden o wokim haus na sindaun long en. Em olsem na olgeta tok Holi Spirit i bin mekim long bipo tru i kamap olsem Holi Spirit i tok, na ol aposel na ol disaipel i witnisim olsem, olgeta samting i kamap olsem Holi Spirit i tok.
Na dispela i kirapim narapela tingting long Pita long bipo tok bilong God. Pita i holim tingting long tok Holi Spirit i mekim long narapela man i mas kisim ples bilong Judas (lukim lain 20 gen). Na ol aposel i mekim wanem? Ol i bihainim tok bilong Holi Spirit na ol i makim Matias bilong kisim ples bilong Judas na Matais i kamap wanpela bilong ol 12-pela aposel.
Orait na yumi mas skelim long wanem as Luk i autim dispela stori namel long stori bilong Holi Spirit bai kam na stori bilong Holi Spirit i kam pinis. Yumi save olsem dispela tok bilong Luk em i Tok bilong God. Olsem na yumi ken i tok, long wanem as God i putim dispela stori i stap namel long stori bilong Holi Spirit bai kam na stori bilong Holi Spirit i kam pinis? Dispela 2-pela stori i tokaut long Holi Spirit, na yumi ken i save olsem stori i stap long namel i tokaut long Holi Spirit tu. Luk em i no go long narapela stori, nogat, em i stori yet long samting bilong Holi Spirit. Dispela namel stori i tokaut klia olsem, Holi Spirit Em i pawa bilong God yet.
Holi Spirit Em i pawa bilong God yet.
Olgeta tok God i mekim long bipo i kamap olsem God i tok – olgeta tok God i mekim long bipo i kamap tru. Long lain 16 Pita i tok, “….Tok bilong God i kamap tru. Long maus bilong Devit Holi Spirit i bin tokaut long Judas i stiaim ol man i kam arestim Jisas.” Holi Spirit Em i pawa bilong Tok bilong God. Holi Spirit i bin kisim Tok bilong God i kam long Devit, na em i Holi Spirit i kamapim ol samting God i tokaut long en. Holi Spirit i save go kam bilong mekim olgeta tok bilong God i kamap olsem God i tok. Em olsem na, yumi ken i save olsem, Holi Spirit Em i pawa bilong God yet – long pawa bilong God olgeta tok bilong God i save kamap olsem God i tok.
Long dispela as tasol Judas i stiaim ol man i kam arestim Jisas. Long dispela as tasol Judas em i dai na ol i planim em olsem God i tok. Na Long dispela as tasol Matias i kisim ples bilong Judas olsem God i tok. Em i Holi Spirit i mekim olgeta samting i kamap olsem God i tok – Holi Spirit Em i pawa bilong God yet na Em i mekim olgeta samting i kamap olsem God i tok.
Na yumi mas klia olsem, em i dispela Holi Spirit Jisas bai salim i kam long ol aposel. Holi Spirit i save mekim olgeta samting bilong God i kamap olsem God i tok, na Holi Spirit bai mekim olgeta samting bilong Jisas i kamap olsem Jisas i tok. Holi Spirit bai givim strong long ol aposel bilong witnisim Jisas, na long rot bilong witnisim Jisas, ol manmeri God i bin givim Jisas bilong sevim ol bai harim na kam na i stap wantaim aninit long bosim bilong Jisas insait long femili bilong God. Holi Spirit Em i pawa bilong God, na olgeta samting bai kamap olsem God i tok.
Long Aposel 16:6-7 Luk em i stori long Holi Spirit na i kolim Em “Spirit bilong Jisas”. Pol na Sailas na Timoti ol i laik go long provins Esia bilong witnisim Jisas, na Luk i tok olsem, “Holi Spirit i tambuim ol long autim tok long provins Esia. Na taim ol i kamap klostu long distrik Misia, ol i laik i go insait long provins Bitinia, tasol Spirit bilong Jisas i stopim ol.” Holi Spirit Em i Spirit bilong Jisas tu, na Em i pawa bilong Jisas tu bilong mekim olgeta samting bilong Jisas i kamap olsem Jisas i tok. Em olsem na Jisas i laik Pol na Sailas na Timoti i go long Masedonia bilong witnisim Em long dispela hap. Long wanem, God i bin givim Lidia wantaim femili bilong em long Jisas, na Jisas i dai long diwai kros bilong sevim ol. Olsem na Holi Spirit, Spirit bilong Jisas, i stiaim Pol na Sailas na Timoti i go long Masedonia, ples bilong Lidia, bai ol Lidia femili i harim na i kam na i stap wantaim aninit long bosim bilong Jisas na i stap femili bilong God (Aposel 16:9-16).
Holi Spirit Em i pawa bilong God yet, na Em i pawa bilong Jisas, na dispela i minim olsem, wanpela samting i no inap stopim Jisas long singautim ol lain bilong Em i kam. Ol manmeri God i bin givim Jisas bilong sevim, ol i stap nabaut long olgeta 4-kona bilong dispela graun, na long strong (pawa) bilong Holi Spirit Jisas bai singautim na kisim ol i kam, na ol bai sindaun wantaim aninit long bosim bilong Jisas insait long femili bilong God – long ol wanwan hauslain long olgeta 4-kona bilong dispela graun ol bai sindaun wantaim aninit long Jisas.
Jisas bai mekim wok bilong Em long han bilong ol aposel, tasol ol aposel ol i mas save olsem, Jisas i no mekim wok bilong Em long strong bilong ol aposel. Nogat. Jisas bai mekim wok bilong Em long strong bilong Holi Spirit bilong Em. Holi Spirit Em i pawa bilong God – pawa bilong Jisas – na long strong bilong Holi Spirit Jisas bai singautim ol lain bilong Em i kam na ol bai sindaun wantaim aninit long bosim bilong Em insait long femili bilong God.
Yumi no ken i tingim olsem yumi ken i mekim wok bilong Jisas long strong bilong yumi yet.
Holi Spirit Em i pawa bilong God, Holi Spirit Em i pawa bilong Jisas, na Jisas bai mekim na pinisim wok bilong Em long pawa bilong Holi Spirit. Ol aposel ol i no ken i tingim olsem ol i ken i
mekim wok bilong Jisas long strong bilong ol yet. Ol disaipel ol i no ken i tingim olsem ol i ken i mekim wok bilong Jisas long strong bilong ol yet. Ol manmeri bilong sios ol i no ken i tingim olsem ol i ken i mekim wok bilong Jisas long strong bilong ol yet. Na yumi tu yumi no ken i tingim olsem yumi ken i mekim wok bilong Jisas long strong bilong yumi yet. Nogat. Ol aposel ol i mas save, na yumi tu yumi mas save olsem, Jisas bai singautim na kisim ol lain manmeri bilong Em i kam long strong bilong Holi Spirit tasol.
Yumi no ken i tingim olsem Holi Spirit i stap bilong mekim wok bilong yumi.
Holi Spirit i save mekim wok bilong Jisas. Em i save harim tok bilong Jisas na i mekim tok bilong Jisas i kamap tru – Holi Spirit i wok long mekim tok bilong Jisas i kamap olsem Jisas i tok. Holi Spirit i no stap bilong harim tok bilong yumi na bilong mekim tok bilong yumi i kamap olsem yumi tok. Nogat. Sampela manmeri ol i bikhet tumas na ol i tingim olsem ol i ken i bosim Holi Spirit – ol i tingim olsem ol i ken i tokim Holi Spirit na Em bai bihainim tok bilong ol na mekim samting i kamap olsem ol i tok. Tasol nogat. Ol i kisim rong tingting. Holi Spirit bai harim tok bilong God tasol – Em bai harim tok bilong Jisas tasol.
Sios femili bilong yumi em i no samting nating.
Sapos yumi stap long wanpela trupela sios femili bilong God – manmeri bilong trupela sios femili bilong God ol i save bilipim na trastim God long kisim bek ol long feitful wok bilong Jisas long diwai kros tasol, na ol i stap wantaim aninit long bosim bilong Jisas – sapos yumi stap long wanpela sios femili olsem, orait yumi mas save olsem, Holi Spirit i stap wantaim yumi. Jisas i go pinis long heven, tasol Holi Spirit i kam pinis long yumi, na long strong bilong Em Jisas i singautim yumi na Em i opim ai na ia na bel bilong yumi na yumi bilipim na trastim God long kisim bek yumi long feitful wok bilong Jisas long diwai kros. Long strong bilong Holi Spirit Jisas i kisim yumi i kam na yumi stap wantaim na yumi aninit long bosim bilong Jisas.
Em olsem na sios femili bilong yumi em i no samting nating. Maski em i liklik tumas, em i no samting nating. Long wanem, long strong bilong Holi Spirit Jisas i singautim yumi i kam long Em na yumi stap aninit long bosim bilong Em. Sios femili bilong yumi em i no kamap long strong bilong ol sampela man. Nogat. Em i kamap long wok bilong Jisas long strong bilong Holi Spirit.
Yumi no ken i pret long ol manmeri.
Long dispela as yumi no ken i pret long ol manmeri i sutim giaman tok long yumi bilong daunim yumi. Pawa bilong God yet i kisim yumi i kam long Jisas, na long dispela as yumi bilipim na trastim feitful wok bilong Jisas. Pawa bilong God yet – Holi Spirit yet – i wok insait long yumi na i wok long lukautim yumi.
Sapos yu no bilipim na trastim feitful wok bilong Jisas yet….
Tasol, sapos yu lukim dispela toktok na yu no kam yet long Jisas – yu no kam yet long bilipim na trastim God long kisim bek yu long feitful wok bilong Jisas long diwai kros tasol (na yu bilipim na trastim ol narapela samting olsem baptais na Lordsapa na Sabat na lotu samting), orait nau yu ken i tanim long ol dispela samting na yu bilipim na trastim God long kisim bek yu long feitful wok bilong Jisas tasol. Nau yu ken i konfesim sin bilong yu long Jisas na askim Em long fogivim yu, na yu kisim nupela laip long feitful wok bilong Jisas – trastim God long kisim bek yu long feitful wok bilong Jisas. Na yu stap wantaim mipela long sios femili bilong God na yumi wantaim yumi aninit long bosim bilong Jisas na yumi i stap femili bilong God.
Em tasol.
