Aposel 2:14-21.
Pastaim yumi skelim wanpela samting – taim Baibel i tokaut long “taim bilong las de” orait em i tokaut long wanem samting? Planti manmeri i toktok long “taim bilong las de”, tasol ol i tok long wanem samting? Na samting ol i toktok long en em i wankain olsem samting profet Joel i toktok long en na Pita i toktok long en long Aposel 2:14-21 o nogat?
Yumi save pinis olsem, Holi Spirit i kam long ol aposel na long ol disaipel bilong inapim ol (givim strong long ol) bilong witnisim Jisas long Jerusalem na long Judia na long Samaria na long olgeta 4-kona bilong dispela graun (Aposel 1:8). Long de Pentikos ol wanwan longwe manmeri i kam bung long Jerusalem taun, na taim Holi Spirit i kam long ol aposel na long ol disaipel, orait ol i autim tok long ol wanwan tokples bilong ol dispela longwe manmeri. Long tokples bilong ol longwe manmeri ol aposel na ol disaipel i tokaut long ol gutpela wok God i mekim long feitful wok bilong Jisas long diwai kros (Aposel 2:1-13).
Na ol longwe manmeri i harim ol aposel na ol disaipel i spikim tokples bilong ol na ol i harim ol i autim tok bilong ol gutpela wok bilong God, orait ol i kirap nogut na ol i tok, “Ol dispela samting i gat wanem minim bilong em i stap?” Sampela bilong ol, ol i tok bilas na ol i tok olsem, “Ol i spak..” Tasol planti bilong ol, ol i laik save long trupela minim bilong ol dispela samting ol i bin lukim na harim.
Orait Pita em i sanap na long bikmaus bilong em, em i bekim dispela askim bilong ol manmeri (lain 14-16). Pastaim Pita i bekim ol manmeri i tok bilas na em i tok klia olsem, “Yupela tingim ol dispela man i sanap wantaim mi ol i spak, tasol nogat, em i 9 klok long moning tasol.”
Na Pita i skruim tok, na em i tok olsem, ol dispela samting nau ol i lukim na harim, orait ol dispela samting profet Joel i tokaut long en longtaim pinis. Profet Joel i tok olsem, long taim bilong las de Holi Spirit bai kam, na em i dispela samting ol manmeri i kam long Jerusalem ol i lukim na witnisim. Ol i lukim na witnisim tok bilong Joel i kamap tru olsem Joel i tok (lain 17). Long dispela tok Pita i toksave olsem, taim bilong las de i kamap pinis – ol i lukim stat bilong taim bilong las de.
Na taim Jisas i kam bek (De bilong BIKPELA), orait dispela i makim pinis bilong taim bilong las de. Long lain 20 Joel i tok olsem, ol samting bilong taim bilong las de i mas kamap pastaim na bihain long taim bilong las de, orait De bilong BIKPELA bai kamap. De bilong BIKPELA i makim pinis bilong taim bilong las de.
Em olsem na taim Baibel i tokaut long “taim bilong las de”, orait em i no tokaut long de bilong kambek bilong Jisas na em i no tokaut long ol wanwan de klostu long de bilong kambek bilong Jisas. Nogat. Taim Baibel i tokaut long “taim bilong las de”, orait em i tokaut long taim namel long 2-pela kam bilong Jisas. Tok “taim bilong las de” em i makim olgeta yia na olgeta mun na olgeta de i stap namel long taim Jisas i kam dai long diwai kros na taim Em i kambek gen long dispela graun. Tok “las de” i makim olgeta yia mun de i stap namel long taim Jisas i kam dai long diwai kros bilong sevim laip bilong olgeta manmeri God i givim Em na taim Jisas i kam bek gen long dispela graun. Taim bilong las de em i taim i stap namel long fes kam bilong Jisas na sekon kam bilong Jisas.
Na long dispela namel taim Jisas i wok long singautim i kam long Em olgeta lain manmeri Em i bin lusim laip bilong Em bilong sevim. Taim bilong las de em i wanpela taim long histori bilong dispela graun we Jisas i wok long kisim ol lain bilong Em i kam na ol i stap aninit long bosim bilong Em long femili bilong Em.
Holi Spirit i givim strong long ol aposel wantaim ol narapela disaipel bilong Jisas bilong witnisim na autim tok long olgeta gutpela wok bilong God long feitful wok bilong Jisas long diwai kros. Na taim ol manmeri Jisas i bin lusim laip bilong Em bilong sevim ol i harim dispela tok, orait Holi Spirit i opim bel bilong ol na ol i singaut long BIKPELA – ol i askim na trastim God long kisim bek ol long feitful wok bilong Jisas – na God i kisim bek ol long feitful wok bilong Jisas na ol i kisim laip. Long dispela rot Jisas i wok long singautim na kisim i kam ol manmeri Em i bin lusim laip bilong Em bilong sevim. Na Jisas i mekim dispela wok i go yet long dispela taim nau yumi i stap long en.
Ol aposel i bin i stap long taim bilong las de na Jisas i mekim wok bilong singautim na kisim ol lain bilong Em i kam. Na yumi tu yumi stap yet long dispela taim bilong las de, na Jisas i mekim wok bilong Em i go yet bilong singautim na kisim ol lain bilong Em i kam i stap aninit long bosim bilong Em. Taim bilong las de i stat long taim Jisas i kam dai long diwai kros na i kam i kam na i stap yet.
Na taim Jisas i singautim na kisim ol lain bilong Em i kam pinis, taim Jisas i kisim i kam pinis long Em olgeta manmeri Em i bin lusim laip bilong Em bilong sevim, orait Em bai kam bek long dispela graun na taim bilong las de bai pinis.
Orait na Joel i tokaut long 3-pela samting i ken i kamap long taim bilong las de. Yumi skelim….
1. God bai kapsaitim Holi Spirit bilong Em long olgeta manmeri bilong Em.
Lukim lain 17 na 18. God i bin tokim Joel olsem, “Long taim bilong las de, Mi bai kapsaitim Spirit bilong Mi long olgeta manmeri.” Dispela tok i no minim olsem, God bai kapsaitim Holi Spirit long olgeta manmeri long olgeta hap bilong dispela graun. Nogat. Dispela tok i minim olsem, God bai kapsaitim Holi Spirit long olgeta manmeri bilong God. Ol manmeri bilong God em ol manmeri Jisas i bin lusim laip bilong Em bilong sevim laip bilong ol – em ol manmeri i bilipim na trastim God long kisim bek ol long feitful wok bilong Jisas long diwai kros. God bai kapsaitim Spirit bilong Em long olgeta dispela manmeri. God bai kapsaitim Holi Spirit bilong Em long olgeta manmeri bilong Em – long ol man na meri wantaim, long manmeri i gat namba na manmeri nating wantaim, long yangpela manmeri na lapun manmeri wantaim, long pikinini man na pikinini meri wantaim – long olgeta manmeri Jisas i bin dai long diwai kros bilong sevim.
Na taim God i salim Holi Spirit i kam, orait Holi Spirit bai inapim olgeta manmeri bilong God na ol bai autim tok olsem ol profet. Ol bai tokaut long ol gutpela wok God i mekim long dai bilong Jisas bilong kisim bek sinmanmeri bilong Em. Tingting bilong ol bai pulap olgeta long ol gutpela samting bilong God, na dispela tingting bai kirapim ol visin long tingting bilong ol na long driman bilong ol. Ol bai amamas na tingting long olgeta gutpela samting God i bin mekim long dai bilong Jisas bilong sevim ol, na dispela bai stiaim driman bilong ol na visin bilong ol long tingting bilong ol.
Olgeta wokman bilong God bai mekim olsem. Ol wokman em ol manmeri Jisas i dai long diwai kros bilong kisim bek na Em i singautim ol na ol i kam long Jisas na i stap aninit long bosim bilong Jisas. Ol man wantaim ol meri bai tokaut long olgeta gutpela wok bilong God olsem ol profet i bin autim. Ol manmeri i gat namba wantaim ol manmeri nating bai tokaut long olgeta gutpela wok bilong God. Ol pikinini man wantaim ol pikinini meri bai tokaut long olgeta gutpela wok bilong God long dai bilong Jisas long diwai kros.
Ol aposel wantaim ol disaipel ol i manmeri nating bilong distrik Galili (Aposel 2:7). Tasol ol i kisim strong bilong tokaut long olgeta gutpela wok bilong God long feitful wok bilong Jisas. Long wanem, Holi Spirit inapim ol – Holi Spirit i givim strong long ol.
2. Ol kainkain trabel na hevi bai kamap long taim bilong las de.
Lukim lain 19-20. Long taim bilong las de ol kainkain trabel na hevi bai kamap. Joel i tok, “blut na paia na bikpela smok bai kamap. Na bai san i kamap tudak na mun i kamap retpela olsem blut.” Ating long dispela tok Joel i makim ol kainkain samting i save kamap long graun, samting olsem maunten i pairap na paia na smok i sut i go antap, na dispela i ken i mekim tudak i kamap na mun i kamap retpela olsem blut. Na tu, graun i ken i guria, na wara na solwara i ken i tait, na paia i ken i kamap na kukim bus. Ol dispela samting i ken i givim trabel na hevi long yumi manmeri bilong dispela graun. Na Joel i tok olsem, God i mekim ol dispela samting i kamap long taim bilong las de (lukim lain 17 wantaim lain 19).
Long taim bilong las de ol dispela kainkain samting bai kamap. Ol aposel wantaim ol disaipel i lukim ol wanwan samting olsem, na yumi tu yumi lukim ol wanwan samting olsem. Sampela taim yumi lukim long ai bilong yumi yet, na sampela taim yumi lukim long niuspepa na long EMTV nius.
Ol kainkain trabel na hevi bai i stap long dispela graun i go i go inap long taim Jisas i kam bek (lukim lain 20). Taim Jisas i kam, orait De bilong BIKPELA bai kamap na taim bilong las de i pinis.
3. Olgeta manmeri i singaut long BIKPELA bai BIKPELA i kisim bek ol.
Lukim lain 21. Husat bai singaut long BIKPELA? Olgeta manmeri i save olsem God i kisim bek sinmanmeri long feitful wok bilong Jisas long diwai kros tasol (na i no long ol gutpela pasin bilong ol yet), orait ol bai singaut long BIKPELA. “Singaut long BIKPELA” i minim olsem, ol bai askim BIKPELA long kisim bek ol long feitful wok bilong Jisas. Na God bai harim singaut (askim) bilong ol na Em bai kisim bek ol long feitful wok bilong Jisas na ol bai kisim laip. Dispela em i wanpela bikpela mak bilong taim bilong las de.
Long buk Rom aposel Pol i kisim dispela maus bilong profet Joel (wantaim maus bilong profet Aisaia). Lukim Rom 10:13-15….
13….“Olgeta manmeri i singaut long BIKPELA bai kisim laip.” (Joel 2:32) 14Tasol, hau na bai ol i singaut long BIKPELA sapos ol i no bilipim na trastim Em? Na hau na bai ol i bilipim na trastim Em sapos ol i no bin harim tok bilong Em? Na hau na bai ol i harim tok bilong Em sapos wanpela man i no bin autim tok long ol? 15Na hau na bai wanpela man i autim tok long ol sapos BIKPELA i no bin salim em i go bilong autim tok long ol? Buk bilong God i mekim dispela tok, “Lek bilong ol man i kam autim gutnius i naispela tru!” (Aisaia 52:7)
Ol manmeri God i bin makim na givim long Jisas na Jisas i lusim laip bilong Em bilong sevim laip bilong ol, orait ol bai singaut long BIKPELA na ol bai kisim laip – ol bai askim BIKPELA long kisim bek ol long feitful wok bilong Jisas na God bai harim askim (singaut) bilong ol na Em bai kisim bek ol long feitful wok bilong Jisas na ol bai kisim laip.
Tasol ol i no inap singaut long BIKPELA nating. Nogat. Pastaim BIKPELA bai salim man i go bilong autim tok long ol, bilong witnisim feitful wok na kirap bek bilong Jisas, na taim ol i harim tok, orait ol bai bilipim na trastim feitful wok bilong Jisas, na ol bai tanim bel na singaut long Jisas bilong kisim laip – ol bai konfesim sin bilong ol na askim Jisas long sevim ol – na ol bai kisim laip. Jisas yet i bin tok olsem long Jon 10:27-28….
27Ol sipsip bilong Mi ol i save harim maus bilong Mi, na Mi save long ol, na ol i bihainim Mi. 28 Mi givim laip i stap gut oltaim oltaim long ol, na ol bai i no inap lus.
Long Aposel 16:11-15 yumi ken i lukim ol dispela samting i kamap olsem. Pol i autim tok long Lidia, na Lidia i harim tok Pol i autim. “Na BIKPELA i opim bel bilong Lidia bilong Lidia i ken i kisim dispela tok Pol i autim.” Em olsem na Lidia i bilipim na trastim God long kisim bek em long feitful wok bilong Jisas, na long rot bilong feitful wok bilong Jisas Lida i kisim laip.
Long taim bilong las de Jisas i wok long singautim na kisim ol lain bilong Em i kam long Em na ol i stap aninit long bosim bilong Em.
Long taim bilong las de, long taim namel long 2-pela kam bilong Jisas, ol kainkain trabel na hevi bai i stap, ol kainkain samting bai kamap, tasol ol dispela samting i no inap stopim wok bilong Jisas na i no inap daunim strong bilong Holi Spirit. Jisas bai wok yet long singautim na kisim ol lain bilong Em i kam long Em na ol i stap aninit long bosim bilong Em.
Planti kainkain samting i ken i kamap long taim bilong las de, tasol wok bilong Jisas bai ron i go yet. Ol manmeri God i givim Jisas na Jisas i dai bilong sevim laip bilong ol, ol bai harim tok bilong feitful wok bilong Jisas long diwai kros, na ol bai singaut long BIKPELA – ol bai konfesim sin bilong ol na askim na trastim God long kisim bek ol long feitful wok bilong Jisas – na ol bai kisim laip. Na long ol wanwan ples na long ol wanwan taun, ol bai bung i stap aninit long bosim bilong Jisas.
Pita i tokim ol manmeri long Jerusalem taun olsem, dispela samting Joel i tokaut long en, orait em i kamap pinis na em i dispela samting yupela lukim. Holi Spirit i kam long olgeta manmeri bilong Jisas, long ol aposel wantaim olgeta manmeri i bilipim na trastim God long kisim bek ol long feitful wok bilong Jisas. Na Holi Spirit i givim strong long ol bilong tokaut long olgeta gutpela wok bilong God long feitful wok bilong Jisas. Na long dispela rot Jisas i wok long kisim ol lain manmeri bilong Em i kam long Em yet na ol i stap aninit long bosim bilong Jisas.
Ol aposel ol i stap wantaim Jisas 3-pela yia na Jisas i skulim ol long planti samting long ol gutpela wok bilong God. Na taim Jisas i kirap bek pinis, orait long 40-pela de Jisas i skulim ol aposel long olgeta gutpela wok bilong God long feitful wok bilong Jisas long diwai kros. Em olsem na Holi Spirit i strongim ol aposel long autim ol dispela samting. Ol samting ol i lukim na ol samting ol i bin lainim long maus bilong Jisas, orait ol dispela samting Holi Spirit i strongim ol long autim.
Yumi i bilipim na trastim God long kisim bek yumi long feitful wok bilong Jisas, yumi tu yumi mas kisim skul long olgeta gutpela wok bilong God long feitful wok bilong Jisas long diwai kros. Jisas i givim Holi Spirit long yumi na Em bai strongim yumi long autim ol dispela samting. Yumi skelim Tok bilong God na yumi kisim skul long olgeta gutpela wok bilong God long feitful wok bilong Jisas long diwai kros, na Holi Spirit bai strongim yumi bilong witnisim na autim ol dispela samting. Long dispela rot BIKPELA Jisas i yusim yumi bilong kisim ol sampela manmeri bilong Em moa i kam long Em, na wantaim yumi stap aninit long bosim bilong Em.
Yumi stap yet long taim bilong las de, na yumi mas pas long wok Jisas i pas long en na Holi Spirit i pas long en long taim bilong las de. Em olsem na, long strong bilong Holi Spirit yumi tokaut long olgeta gutpela wok bilong God long feitful wok bilong Jisas, na Jisas i yusim dispela rot bilong singautim na kisim ol manmeri bilong Em i kam long Em, na olgeta i sindaun aninit long bosim bilong Jisas.
Em tasol.
