Aposel 2:1-13.
Longpela taim dispela tok long Aposel 2:1-13 i kirapim planti toktok namel long ol planti lotu. Mi laik putim ples klia 4-pela samting bilong helpim yumi skelim gutpela dispela hap bilong Tok bilong God. Pastaim mi bai putim ples klia 3-pela samting bilong stretim ol sampela rong tingting. Long namba 4 mi bai putim ples klia as bilong tok i stap long Aposel 2:1-13.
Orait, fes samting mi laik putim ples klia i olsem….
1. Ol aposel na ol disaipel ol i no kisim Holi Spirit i kam.
Lukim lain 1-4. Ol aposel wantaim ol sampela disaipel (em ol manmeri i bilipim na trastim God long kisim bek ol long feitful wok bilong Jisas long diwai kros na ol i aninit long bosim bilong Jisas na bihainim Jisas) ol i stap long wanpela haus long Jerusalem taun. Namba bilong ol, ol aposel wantaim ol disaipel, ol i kamap 120 manmeri olgeta (Aposel 1:13-15).
Ol i stap wantaim na em i de Pentikos. De Pentikos em i wanpela de Sande ol tumbuna bilong ol lain Juda ol i bin makim bilong mekim amamas long God long lukautim bilong Em. Gaden bilong ol i save karim gutpela kaikai na olgeta yia long de Pentikos ol i tok tenkyu long God long kaikai God i givim ol bilong lukautim ol.
Orait na ol aposel wantaim ol disaipel ol i stap wantaim long wanpela haus na wantu wanpela nois i kamap, na dispela nois i wankain olsem nois bilong strongpela win, na dispela nois i pulimapim haus. Haus i no pulap long win. Nogat. Haus i pulap long nois i wankain olsem nois bilong strongpela win (lukim lain 2).
Na ol i lukim samting olsem paia. Ol i no lukim paia. Nogat. Ol i lukim samting olsem paia. Na dispela samting i bruk na ol liklik hap bilong dispela samting i go sindaun antap long olgeta manmeri wanwan (lukim lain 3).
Orait na Holi Spirit i pulimapim ol aposel wantaim ol disaipel na olgeta i stat long mekim toktok long ol narapela narapela tokples, na ol i mekim toktok inap long Holi Spirit inapim ol. Em i Holi Spirit inapim ol long mekim toktok. (Lukim lain 4.)
Ol dispela samting i kamap wantu – Holi Spirit i kam wantu long ol aposel wantaim ol disaipel. Ol i no singaut long Holi Spirit na Em i kam. Nogat. Na ol i no mekim wanpela samting bilong kisim Holi Spirit i kam. Nogat.
Holim tingting – Jisas i bin tokim ol long ol i mas i stap long Jerusalem na wetim promis bilong God – ol i mas i stap na wetim Holi Spirit (lukim Aposel 1:4). Jisas bai salim Holi Spirit i kam na ol i mas i stap na wetim kam bilong Holi Spirit tasol. Em olsem na ol aposel wantaim ol disaipel ol i harim tok bilong Jisas na ol i wetim i stap na Holi Spirit i kam olsem Jisas i tokim ol.
Yumi mas kisim stretpela tingting na yumi mas klia olsem, Jisas i salim Holi Spirit i kam (Jon 15:26) – ol aposel na ol disaipel ol i no mekim wanpela samting na Holi Spirit i kam. Nogat. Jisas i salim Em i kam. Ating sampela manmeri long ples bilong yumi i tingim olsem ol i ken i singautim Holi Spirit na mekim Em i kamap namel long lotu bilong ol. Ol i tingim olsem ol i ken i kontrolim Holi Spirit. Tasol nogat. Ol aposel ol i no inap kontrolim Holi Spirit, na yumi tu yumi no inap kontrolim Holi Spirit. Holi Spirit Em i no bihainim bosim bilong yumi. Nogat. Em i bihainim bosim bilong God tasol, bosim bilong Jisas tasol.
2. Ol aposel na ol disaipel ol i spikim trupela tokples bilong ol sampela hauslain.
Lukim lain 5-11. Taim Holi Spirit i kamap long ol, orait ol aposel wantaim ol disaipel ol i mekim toktok long trupela tokples bilong ol sampela manmeri nabaut long dispela graun.
Long de Pentikos ol planti manmeri bilong ol wanwan longwe ples ol i kam bung i stap long Jerusalem taun (lukim lain 5 wantaim lain 9-11). Na taim ol i harim ol aposel wantaim ol disaipel i mekim toktok, orait ol i harim wanwan tokples bilong ol yet. Ol aposel ol i spikim ol wanwan tokples bilong ol dispela manmeri bilong ol wanwan longwe ples. Em olsem na ol dispela manmeri i tanim het na ol i tok, “…mipela i harim ol i autim tok long olgeta tokples bilong mipela yet…”
Long 3-pela taim Luk i stori long ol aposel wantaim ol disaipel i autim tok long tokples bilong ol manmeri bilong wanwan longwe ples. Lukim lain 6 wantaim lain 7-8 wantaim lain 11. Long lain 11 yumi ken i save olsem ol dispela longwe manmeri i harim tok bilong ol klia long maus bilong ol aposel. Long wanem, ol i makim ol aposel wantaim ol disaipel na ol i tokaut olsem, “…ol i tok long ol gutpela wok God i mekim.”
Ol dispela longwe manmeri ol i no harim ol nois nating i kamaut long maus bilong ol aposel na ol disaipel. Nogat. Ol i harim ol wanwan tokples bilong ol yet, na long dispela as ol i klia olgeta long toktok ol aposel na ol disaipel i mekim. Ol i klia olsem ol aposel na ol disaipel “…ol i tok long ol gutpela wok God i mekim.”
Na em i Holi Spirit inapim ol aposel na ol disaipel na ol i autim tok bilong God long tokples bilong ol wanwan longwe hauslain. Ol aposel na ol disaipel ol i no lainim pastaim na ol i autim tokples bilong ol narapela hauslain. Nogat. Holi Spirit i kam wantu long ol na wantu ol i autim tok bilong God long tokples bilong ol wanwan narapela hauslain.
Sampela manmeri long ples bilong yumi ol i tingim olsem ol i ken i mekim wankain pasin olsem ol aposel i mekim long de Pentikos. Tasol taim ol dispela manmeri i mekim, orait ol i no mekim trupela tokples bilong sampela hap. Nogat. Taim ol i tok, orait tok bilong ol i olsem nois nating na yumi no save long ol i autim wanem kain tok. Yumi paul olgeta long toktok bilong ol.
Taim Holi Spirit inapim ol aposel, orait ol i autim tok bilong God long trupela tokples bilong ol wanwan manmeri na ol i harim klia olgeta. Em olsem na, taim ol sampela manmeri long ples bilong yumi i tingim olsem ol i mekim wankain pasin olsem ol aposel i mekim long de Pentikos, orait yumi ken i save olsem ol i mekim narapela samting tasol. Yumi no ken i pret long yusim het bilong yumi na yumi givim baksait long nois nating toktok bilong ol. Long wanem, ol i no mekim wankain pasin olsem ol aposel i mekim long de Pentikos.
3. Ol aposel na ol disaipel ol i no yusim pawa bilong Holi Spirit bilong apim ol yet.
Taim Holi Spirit inapim ol aposel na ol disaipel na ol i autim tok long wanwan tokples, orait ol i autim tok bilong “ol gutpela wok God i mekim”. Lukim lain 11. Holi Spirit inapim ol bilong witnisim ol gutpela wok bilong God. Ol i bin raun wantaim Jisas na ol i lukim ol gutpela wok bilong God long han bilong Jisas, na ol i harim tok bilong ol gutpela wok bilong God long tisim bilong Jisas, na ol i witnisim ol gutpela wok bilong God long dai na kirap bek bilong Jisas. Em olsem na Holi Spirit inapim ol long witnisim (autim) ol dispela gutpela wok bilong God.
Holi Spirit inapim ol aposel na ol disaipel na ol i mekim ol kainkain tokples bilong ol wanwan hap, tasol ol i no yusim dispela samting bilong apim ol yet. Ol i no apim ol yet na tok, “Mipela gutpela manmeri na Holi Spirit i wokim samting long mipela.” Ol i no apim ol yet na tok, “Mipela singautim Holi Spirit na Em i kam strongim mipela.” Ol i no apim ol yet na tok, “Mipela kontrolim Holi Spirit.” Ol i no mekim kainkain tok olsem. Nogat. Ol i witnisim na tokaut long ol gutpela wok God i mekim long feitful wok bilong Jisas bilong kisim bek sinmanmeri. Ol i no apim ol yet. Nogat. Ol i daunim ol yet na apim ol gutpela wok bilong God.
Em olsem na yumi no ken i yusim Holi Spirit bilong apim yumi yet, na yumi no ken i yusim ol gutpela wok bilong God long feitful wok bilong Jisas bilong kisim biknem bilong yumi yet.
Orait, nau yumi skelim as bilong dispela tok long Aposel 2:1-13….
4. Holi Spirit i kam bilong strongim wok bilong Jisas bilong kisim ol lain manmeri bilong Em i kam long Em.
Long lain 12 Luk i tok olsem, taim ol aposel na ol disaipel i autim tok long ol gutpela wok God i mekim, orait ol planti manmeri ol i kirap nogut na ol i tanim het na ol i tok, “Ol dispela samting i gat wanem kain minim bilong en i stap?” Na i tru ol sampela manmeri i tok bilas olsem, “Ol i spak…” Tasol ol i no spak. Nogat. Holi Spirit tasol i kam long ol na Em i strongim ol na Em i stiaim ol na ol i autim tok long ol gutpela wok bilong God long feitful wok bilong Jisas. Long strong na stia bilong Holi Spirit ol i autim tok long ai bilong planti manmeri na ol i no pret. Planti manmeri ol i save olsem ol aposel ol i no spak. Olsem na ol i tingim olsem, ol dispela samting i gat wanem kain minim bilong en i stap.
Orait, yumi skelim minim bilong ol dispela samting. Lukim Aposel 2:14. Taim ol manmeri i kirap nogut na ol i laik save long minim bilong ol dispela samting, orait Pita i sanap na em i autim tok long ol samting bilong Jisas – em i witnisim olgeta samting bilong feitful wok bilong Jisas.
Na taim Pita i autim olgeta tok bilong em pinis, orait wanem samting i kamap? Lukim Aposel 2:41. God i joinim 3000 (tri tausen) manmeri long ol lain manmeri i bilip. Pastaim i gat 120 manmeri i bilipim na trastim God long kisim bek ol long feitful wok bilong Jisas long diwai kros. Tasol God i joinim 3000 manmeri moa long dispela 120 manmeri i bilip. God i yusim Pita (wantaim ol aposel na ol disaipel) bilong joinim dispela 3000 manmeri long ol lain manmeri i bilip.
Na yumi holim tingting long tok Jisas i mekim long samting bilong Holi Spirit. Lukim Aposel 1:8. Jisas i tokim ol aposel long Holi Spirit bai kam na ol bai kisim pawa bilong witnisim Jisas long olgeta 4-kona bilong dispela graun.
Na olsem wanem Holi Spirit bai givim pawa long ol aposel bilong witnisim Jisas long olgeta 4-kona bilong dispela graun? Long rot bilong witnisim Jisas, Jisas bai kisim ol lain bilong Em i kam. Jisas bai yusim ol aposel wantaim ol disaipel bilong singautim na kisim i kam ol manmeri God i bin givim Em bilong sevim. Jisas i dai long diwai kros – Em i kisim pe bilong sin bilong ol manmeri God i givim
Em – na long dispela rot Jisas i sevim laip bilong ol. Na Jisas i yusim ol aposel wantaim ol disaipel bilong singautim ol. Jisas i givim Holi Spirit long ol aposel wantaim ol disaipel bilong givim strong long ol long witnisim Em, na long strong bilong Holi Spirit Jisas i kisim ol lain manmeri bilong Em i kam long Em na ol i stap aninit long bosim bilong Em na i stap femili bilong Em.
Em olsem na, taim Holi Spirit i kam, orait ol dispela samting i kamap olsem. Ol aposel i kisim strong bilong witnisim Jisas – ol i kisim strong bilong autim tok bilong olgeta wok bilong God long feitful wok bilong Jisas long diwai kros, na long dispela rot Jisas i singautim na kisim i kam 3000 manmeri moa i kam long Em na ol i stap wantaim ol 120 manmeri i kam pinis, na wantaim ol i stap aninit long bosim bilong Jisas na i stap femili bilong Em.
Dispela tok long Aposel sapta 2 i soim olsem Holi Spirit i kam bilong helpim ol aposel witnisim Jisas – Holi Spirit i kam bilong mekim wok bilong Jisas bilong kisim ol manmeri God i bin givim Jisas i kam long Em na ol i stap wantaim aninit long bosim bilong Jisas na i stap femili bilong Em.
Na yumi long ples na long taun yumi ken i kisim wanem tingting? Pastaim yumi mas save olsem, wok bilong Jisas i no senis na wok bilong Holi Spirit i no senis. Jisas i wok yet long singautim ol manmeri God i bin givim Em i kam long Em. Na Holi Spirit i wok yet long strongim ol disaipel bilong Jisas, em ol manmeri i bilipim na trastim God long kisim bek ol long feitful wok bilong Jisas, na ol i witnisim Jisas – ol i autim tok bilong feitful wok bilong Jisas long diwai kros. Long dispela rot Jisas i joinim ol sampela manmeri moa wantaim ol manmeri Jisas i kisim i kam pinis.
Holi Spirit i stap bilong helpim yumi witnisim Jisas na bilong kisim ol manmeri bilong Jisas i kam long Jisas, bai ol i stap aninit long bosim bilong Em na i stap femili bilong God long ol wanwan hauslain na ol wanwan taun nabaut.
Ating sampela manmeri i laik lukim “samting olsem win” na “samting olsem paia” olsem ol aposel i bin lukim. Ating sampela manmeri i laik spikim ol kainkain tokples olsem ol aposel i bin spikim. Ol i hangre tumas long lukim ol dispela kain samting, na ol i no tingting tumas long witnisim Jisas na autim tok bilong feitful wok bilong Jisas long diwai kros. Ol i laik kisim namba long ol dispela samting, na kisim biknem long ol dispela samting, tasol ol i no tingting long witnisim feitful wok bilong Jisas.
Yumi no ken i bihainim ol dispela kain pasin. Nogat. Yumi amamas long Jisas i bin singautim yumi i kam long Em. Yumi amamas na askim God long strongim yumi long Holi Spirit bai yumi ken i witnisim ol gutpela wok bilong God long feitful wok bilong Jisas long diwai kros. Askim Jisas long yusim yumi bilong singautim ol sampela manmeri bilong Em moa i kam long Jisas, na ol i stap wantaim yumi aninit long bosim bilong Jisas na i stap femili bilong Em long ples bilong yumi.
Na sapos yumi lukim “samting olsem win” na “samting olsem paia” na wantu yumi ken i spikim tokples bilong ol sampela hauslain olsem ol aposel i mekim long de Pentikos, em gutpela. Tasol, yumi lukim o yumi no lukim, em i no gat samting. Long wanem, wok bilong Jisas i no senis na wok bilong Holi Spirit i no senis. Jisas i bisi long kisim ol lain bilong Em i kam, na Holi Spirit i bisi long strongim yumi long witnisim feitful wok bilong Jisas, maski ol kainkain win paia tokples samting i kamap o nogat. Tingim. Bihain long de Pentikos ol aposel ol i no lukim dispela samting tumas. Tasol yet i klia olsem Jisas i yusim ol long singautim na kisim ol lain bilong Em i kam long Em, na ol i stap wantaim aninit long bosim bilong Em na ol i stap femili bilong God.
Jisas Em i bisi long singautim ol lain bilong Em i kam. Na Holi Spirit i bisi long strongim ol lain bilong Jisas bilong witnisim olgeta gutpela wok bilong God long feitful wok bilong Jisas. Yumi amamas long Jisas i singautim yumi i kam pinis long Em, na yumi amamas long witnisim Jisas na tokaut long God i kisim bek yumi long feitful wok bilong Jisas tasol.
Em tasol.
