Moning.
Yumi i pas long Jisas, em yumi i bin konfesim sin bilong yumi na yumi bilipim na trastim God long kisim bek yumi long feitful wok bilong Jisas tasol na yumi tanim bel na bihainim Em, orait yumi ken i save olsem yumi stap long namel taim. Namel taim em i taim namel long God i kisim bek yumi na yumi lukim Em fes tu fes.
Na Holi Spirit i stap long yumi bilong senisim yumi. Pastaim Holi Spirit i kirapim laip long yumi, Em i senisim yumi na yumi bilipim na trastim God long kisim bek yumi long feitful wok bilong Jisas, na nau yumi stap long namel taim na Holi Spirit i stap yet wantaim yumi bilong senisim yumi moa. Em i senisim yumi bai yumi sindaun gutpela wantaim long femili bilong God (Taitus 2:1-10).
Long Taitus 3:1-8 aposel Pol i stori long hau yumi sindaun wantaim ol manmeri i no bilipim na trastim feitful wok bilong Jisas na ol i stap autsait long femili bilong God. Em i tok olsem, yumi mas i stap aninit long hetman na gavman bilong yumi, na yumi mas rispektim ol manmeri i no bilipim na trastim feitful wok bilong Jisas, na yumi mekim gutpela pasin long ol. Na bilong helpim yumi mekim olsem, orait aposel Pol i tokim yumi long holim tingting long hau yumi i stap long bipo. Lukim Taitus 3:1-8….
1Yu mas tokim ol manmeri bai ol i holim tingting na ol i stap aninit long hetman na gavman, na ol i harim toktok bilong ol, na ol i redi long mekim ol gutpela wok. 2Ol i no ken i mekim tok nogut bilong wanpela man, na ol i no ken i tok pait, na ol i mas i stap bel isi na mekim gutpela long narapela manmeri, na ol i mas mekim gutpela pasin bilong rispektim olgeta manmeri. 3Long wanem, bipo yumi tu yumi bin i stap longlong olsem ol, na yumi i stap manmeri bilong sakim tok, na yumi paul long trupela rot, na yumi i stap slev bilong ol kainkain pasin bilong dispela graun na bilong mekim amamas bilong bodi, na yumi bin yusim taim bilong yumi long mekim ol pasin nogut long ol narapela manmeri na long mekim ol jelas pasin, na ol manmeri i bin hetim yumi na yumi bin hetim ol. 4Tasol, taim God Bilong Sevim yumi i putim gutpela wok na lavim bilong Em i kamap ples klia, 5orait Em i bin sevim yumi. Em i no kisim bek yumi long stretpela pasin bilong yumi. Nogat. Em i kisim bek yumi long marimari bilong Em yet. Em i bin wasim yumi bilong mekim yumi kamap nupela gen, na Holi Spirit i kamapim nupela laip long yumi. 6Long wok bilong Jisas Krais Bilong Sevim yumi, God i kapsaitim Holi Spirit moa yet long yumi. 7Na long grasia bilong God, God i givim stretpela pasin long yumi na kolim yumi “stretpela man”, bai yumi ken i kisim ol gutpela samting i pas long hop bilong laip i stap oltaim oltaim. 8Dispela tok i stap na yu ken i trastim, na mi laik yu tokaut strong long ol dispela toktok, bai ol manmeri i bilipim God ol i ken stiaim tingting gut na pas olgeta long mekim ol gutpela pasin. Ol dispela samting i gutpela samting tru na i save helpim ol manmeri.
Na i gat 2-pela gutpela as bilong yumi ken i holim tingting long pasin pastaim yumi bihainim….
1. Taim yumi holim tingting long pasin pastaim yumi bihainim, orait yumi ken i sori long manmeri i no save long grasia bilong God long feitful wok bilong Jisas.
Yumi ken i holim tingting olsem, pastaim yumi stap olsem ol na yumi longlong, na yumi manmeri bilong sakim tok, na yumi paul long trupela rot, na yumi wokboi bilong ol kainkain pasin bilong dispela graun na bilong mekim amamas bilong bodi, na yumi yusim taim bilong yumi bilong mekim ol pasin nogut long ol narapela manmeri, na yumi yusim taim bilong yumi bilong mekim jelas pasin, na pasin bilong hetim i makim sindaun bilong yumi.
Em olsem na taim yumi lukim ol sampela manmeri i no naispela, na i no gat save, na i tok baksait, na i mekim pasin nogut, na i bagarapim ol manmeri, na i no tok tenkyu long wanpela samting, taim yumi lukim dispela kain manmeri, orait yumi mas tingim olsem, “Pastaim mi stap olsem em. Sapos God i no kirapim nupela laip long mi, orait mi inap i stap olsem dispela man.”
Taim yumi lukim ol bois (ol yangpela man) i smokim marawana (spak brus), na yumi lukim ol i mekim tok nogut, na yumi lukim ol i tok baksait na daunim ol narapela manmeri, na yumi lukim ol i westim taim bilong ol long pilai kas na spak long SP, orait yumi no ken i tingim olsem yumi winim ol. Nogat. Yumi mas tingim olsem, sapos Holi Spirit i no kam na kirapim laip long yumi, orait yumi inap i stap olsem ol.
Taim yumi lukim ol sampela manmeri i kam sindaun long lotu bilong yumi na ol i sindaun nating, na ol i no harim tok, na ol i no skelim gutnius bilong feitful wok bilong Jisas na ol i kam nating tasol, orait yumi no ken i daunim ol. Nogat. Yumi mas tingim olsem, sapos Holi Spirit i no opim ai na ia na bel bilong yumi, orait yumi tu yumi no inap skelim na bilipim gutnius bilong feitful wok bilong Jisas.
Pastaim yumi stap wankain olsem ol dispela kain manmeri. Na i no long strong bilong yumi yet yumi stretim tingting bilong yumi na yumi tanim bel na bilipim na trastim gutnius bilong feitful wok bilong Jisas. Nogat. God tasol i holim yumi na long grasia bilong Em God i senisim yumi na i givim laip long yumi na i givim bilipim na trastim long yumi long feitful wok bilong Jisas long diwai kros.
2. Taim yumi holim tingting long pasin pastaim yumi bihainim, orait yumi ken i klia olsem gutnius bilong feitful wok bilong Jisas i gutpela tru, na yumi tenkyu long God.
Lukim lain 4-7 na yumi holim tingting long ol samting God i bin wokim bilong yumi….
- God i sevim (kisim bek) yumi long feitful wok bilong Jisas – Em i no kisim bek yumi long feitful wok bilong yumi. Na dispela i gutpela, long wanem, wok bilong yumi i no feitful o gutpela tumas.
- God i mekim yumi klin (stretpela) long ai bilong Em long feitful wok bilong Jisas long diwai kros.
- Long wok bilong Holi Spirit God i givim nupela laip long yumi, bai yumi harim na bilipim na trastim feitful wok bilong Jisas.
- God i kapsaitim Holi Spirit long yumi bilong senisim yumi moa – taim God i kisim bek yumi, orait Holi Spirit i bin senisim yumi na kamapim nupela laip long yumi, na Em i stap bilong senisim yumi moa – sapos Holi Spirit i no stap long yumi, orait yumi no inap senis liklik.
- God i givim stretpela pasin bilong Jisas long yumi bilong kolim yumi “stretpela manmeri”. Em i mekim olsem bilong kisim bek yumi (adoptim yumi) na mekim yumi femili bilong Em.
Gutnius bilong God i kisim bek sinmanmeri long feitful wok bilong Jisas tasol i gutpela gutpela gutpela tru! Yumi mas holim tingting na yumi tok tenkyu long God long mekim ol dispela wok bilong sevim yumi.
Maski yumi lukdaun long manmeri i no save gut long gutnius bilong feitful wok bilong Jisas. Yumi sori long ol na yumi wok long helpim ol save long dispela gutnius yumi bilipim na trastim. Prea long God na askim Em long wokim wankain samting Em i bin wokim long yumi long ol pren bilong yumi.
Dispela tok nau yumi kisim na skelim em i stap bilong helpim yumi sios femili bilong God wokabaut long gutpela wei bilong God (lukim lain 8). Dispela tok i stap bilong helpim yumi wokabaut gutpela long dispela namel taim nau yumi stap long en. Holi Spirit i stiaim yumi long wokabaut long gutpela wei bilong God long dispela namel taim. Na i no longtaim na yumi bai lukim Jisas fes tu fes.
Glenn.
