Holim tingting.

Moning.

Ating, yumi manmeri bilong dispela graun, yumi no save holim tingting tumas – yumi save lusim tingting hariap na dispela em i pasin bilong yumi olgeta manmeri bilong dispela graun.

Na yumi i save pinis long feitful baim bek wok bilong Jisas long diwai kros na yumi bilipim na trastim God long kisim bek yumi long dispela feitful wok bilong Jisas na yumi bihainim Em, ating yumi tu yumi no save holim tingting tumas na yumi lusim tingting hariap.

Aposel Pol i tokim ol manmeri bilong God long taun Efesus, em ol manmeri i save pinis long feitful wok bilong Jisas na ol i bilipim na trastim na bihainim Em, Pol i tokim ol long holim tingting. Lukim Efesus 2:11-13.

¹¹Olsem na, yupela manmeri i bon long sait bilong ol Jentail na ol lain i katim skin i save kolim yupela “manmeri i no katim skin” – yu save, katim skin em i samting ol man i mekim long bodi – orait yupela holim tingting. ¹²Yupela holim tingting olsem, taim yupela no bilip, yupela i stap separet long Krais, na yupela stap autsait long kingdom bilong ol Israel na autsait long ol promis bilong kontrak, na yupela no gat wanpela gutpela samting yupela wetim na i laik kamap bihain, na God i no stap wantaim yupela. ¹³Bipo yupela i stap longwe tru. Tasol nau, long wok bilong Krais yupela i stap klostu. Blut bilong Krais i bin bringim yupela i kam long God.

Pol i laik ol manmeri bilong sios Efesus i holim tingting – na em i laik yumi tu i holim tingting. Dispela tok em i Tok bilong God. Olsem na, yumi ken i save olsem, God i laik yumi mas holim tingting!

Orait, God i laik yumi mas holim tingting long 2-pela samting.

1. Pastaim, taim yumi no bilip, orait yumi i stap longwe long God.

• “Yupela stap separet long Krais.”

Wankain olsem ol lain Efesus taim yumi no tanim bel na yumi no bilipim na trastim God long kisim bek yumi long feitful baim bek wok bilong Jisas, orait yumi no save long Krais na yumi no save long wok bilong Krais – yumi i stap separet long Krais na dispela i minim olsem yumi i stap separet long trupela laip. Long wanem, Jisas Krais Em wanpela Em i rot bilong trupela laip. (Yu ken i lukim Jon 14:6.) Em olsem na yumi stap long narapela rot na yumi wokabaut long rot bilong i dai tasol.

• “Yupela stap autsait long kingdom bilong ol Israel na autsait long ol promis bilong kontrak.”

God i mekim kontrak promis long ol Israel olsem, “Bai Mi i stap God bilong yupela na yupela bai i stap ol manmeri bilong Mi, na bai Mi blesim yupela na fogivim olgeta sin bilong yupela.” (Jeremaia 31:31-34 na Hebru 8:8-12.) Taim yumi no save na yumi no bilipim na trastim God long kisim bek yumi long feitful wok bilong Krais, orait yumi stap autsait long kontrak promis bilong God na yumi stap autsait long femili bilong God na autsait long olgeta blesim God i bin promisim ol lain bilong Em.

• “Yupela no gat wanpela gutpela samting yupela wetim na i laik kamap bihain.”

Ol manmeri bilong God ol i save tingim kontrak promis bilong God na ol i wetim taim we ol bai sindaun wantaim God insait long olgeta blesim bilong heven. Taim yumi no save long Jisas na yumi no save long wok bilong Jisas long diwai kros na yumi i stap separet long Krais, orait yumi i stap autsait long ol kontrak promis bilong God na i no gat as long yumi tingim olsem yumi bai lukim wanpela gutpela samting long bihain.

• “God i no stap wantaim yupela”

Taim ol manmeri bilong sios Efesus ol i no tanim bel yet, na ol i no save long feitful wok bilong Jisas yet, na ol i no bilipim na trastim wok bilong Jisas yet, na ol i no stap aninit na bihainim Jisas yet, long dispela taim ol i stap separet long Krais, na ol i stap autsait long femili bilong God, na ol i stap autsait long olgeta blesim God i bin promisim ol manmeri bilong Em, na ol i no inap lukim wanpela gutpela samting long bihain, na God i no stap wantaim ol.

Bipo, ol lain Efesus i bin i stap olsem. Yumi i bilipim na trastim feitful wok bilong Jisas nau, orait bipo yumi bin i stap olsem. Na yupela i no tanim bel na bilipim na trastim feitful wok bilong Jisas yet, orait nau yupela i stap yet olsem.

2. Blut bilong Krais i bringim yumi i kam long God.

Pastaim olgeta manmeri i stap long sios bilong Efesus ol i stap longwe long God, tasol blut bilong Jisas Krais tasol i bringim ol i kam long God.

Planti manmeri bilong ples na bilong taun ol i tingting olsem, “Yumi no stap longwe long God. Yumi no separet tumas long Krais. Na sapos yumi lavim God na lavim ol manmeri na harim lotu, em nau, yumi kam klostu long God. Lotu pasin i save kisim mipela i kam insait long olgeta blesim bilong heven.” Planti manmeri i holim dispela kain tingting.

Ol i senisim nabaut tok bilong God. Tasol God i no bin senisim Tok bilong Em. Nogat tru. Samting i kisim ol lain Efesus i kam long God, orait em i dispela seim samting i kisim yumi i kam long God, na em i dispela seim samting i ken i bringim yupela i no kam yet i kam long God. Na dispela samting em i blut bilong Jisas – dispela samting em i wok bilong Jisas long diwai kros.

Holim tingting na amamas na tok tenkyu.

Pastaim, taim yumi no save long feitful wok bilong Jisas na yumi no tanim bel na bilipim na trastim feitful wok bilong Jisas na yumi no i stap aninit long Em na bihainim Em, orait long dispela taim yumi i stap separet long Krais, na yumi i stap autsait long femili bilong God na autsait long ol promis bilong God, na yumi no inap lukim ol gutpela blesim bilong heven, na God i no stap wantaim yumi……..Tasol, blut bilong Krais i kisim yumi i kam. Wok bilong Krais long diwai kros i kisim yumi i kam long God na long olgeta blesim bilong heven.

Em olsem na holim tingting na amamas na tok tenkyu. Long wanem, blut bilong Jisas i kisim yumi i kam long God na yumi no separet moa long Em na yumi no separet moa long ol blesim bilong ol kontrak promis bilong God.

Glenn.