Aposel 4:1-12.
Bilong harim (Audio)
Taim mipela i laik lusim Australia na kam long P.N.G. ol sampela manmeri ol i tokim mipela olsem, “Larim ol, na ol i holim wanem kain bilip na ol i bihainim wanem kain pasin, orait larim ol long dispela bilip na pasin bilong ol – ol i amamas i stap na yupela larim ol tasol.” Ol i minim olsem, mipela no ken i go long P.N.G. na pulim yupela long bihainim bilip na lotu na pasin bilong mipela.
Na planti manmeri bilong P.N.G. i holim wankain tingting. Ol i tingim olsem, Baibel em i samting bilong ol waitman – ol i tingim olsem, ol stori bilong Baibel em i stori bilong ol waitman tasol, na em i no samting bilong ol manmeri bilong P.N.G. Sampela manmeri bilong P.N.G. ol i tingim olsem, i no gutpela long mipela i kam long P.N.G. bilong tanim yupela na yupela kisim ol bilip na lotu samting bilong mipela ol wait.
Wanpela taim mi go long Mosipi, na long haus mi slip long en mi bungim wanpela man, na tingting bilong em i paul nabaut. Yu save, long P.N.G. i gat planti lotu i stap na planti bilong ol i tok olsem, “Lotu bilong mipela i trupela lotu na ol narapela lotu i giaman.” Na i gat ol narapela kain lotu i stap tu, kain olsem Muslim na Baha’i na Buda na ol i save autim na bihainim narapela kain tok olgeta. Em olsem na man mi bungim long Mosipi em i tingting planti na em i askim mi olsem, “Hau na bai mi save wanem lotu i trupela lotu? Mi skelim na skelim na het bilong mi pen.”
Ating sampela taim yumi tu yumi ken i kisim tingting olsem dispela man. Em olsem na, hau na bai yumi save, husat i autim trupela tok long trupela rot bilong God i kisim bek yumi sinmanmeri?
Long Aposel 4:1-12, taim ol pris wantaim bosman bilong ol sikuriti bilong tempel na ol Sadyusi ol i arestim Pita na Jon, orait Pita i mekim tok long ol na dispela tok i ken i helpim yumi klia long trupela rot bilong God i kisim bek yumi sinmanmeri. Pita i bin stretim lek bilong wanpela lek nogut man na ol hetman na ol bikman bilong lotu Juda na ol tisa bilong lo (bilong Moses) na hetpris na ol pris bilong hetpris lain, ol i laik save long wanem pawa na long wanem nem na long wanem namba Pita i bin wokim dispela samting. Bekim bilong Pita i ken i stiaim tingting bilong yumi na yumi save long trupela rot bilong God i kisim bek sinmanmeri.
Tasol pastaim yumi holim tingting long stori bilong lek nogut man na yumi ken i klia long ensa bilong Pita.
- Long Aposel sapta 3 yumi lukim stori bilong Pita na Jon tupela i wokabaut i go long tempel. Na wanpela lek nogut man i sindaun i stap na em i wok long singaut bilong kisim mani. Tasol Pita i tokim lek nogut man olsem, “Mi nogat mani bilong givim yu, tasol mi gat narapela samting bilong givim yu.” Tasol i no Pita i gat narapela samting bilong givim em, nogat, em i Jisas i gat samting bilong givim em. Em olsem na long han bilong Pita Jisas i oraitim lek bilong lek nogut man.
- Pita na Jon i go insait long tempel na lek nogut man i kalap kalap na i bihainim tupela. Ol planti manmeri ol i lukim lek nogut man i kalap kalap na ol i ran i kam long tripela. Long wanem, ol i laik save olsem, lek nogut man i kalap na wokabaut olsem wanem.
- Na Pita i tok klia long ol olsem, Yupela no ken i tingim olsem, long strong bilong mitupela yet, o long lotu pasin bilong mitupela yet, dispela lek nogut man i wokabaut. Nogat. Long nem (namba) bilong Jisas tasol dispela lek nogut man i orait na em i wokabaut. Dispela man Jisas, yupela i bin kilim i dai na God i kirapim, orait em i dispela man i oraitim lek bilong lek nogut man.
- Pita i skruim tok na em i tokim ol long God i givim sanis long ol bilong tanim bel long pasin bilong givim baksait long Jisas. Na sapos ol i tanim bel na bilipim na trastim Jisas, orait na long rot bilong feitful wok bilong Jisas long diwai kros God i ken i fogivim sin bilong ol na kisim bek ol. Na long De bilong BIKPELA, ol i no inap lukim belhat bilong God, nogat, ol bai kisim win na sindaun gutpela long nupela heven na nupela graun wantaim Jisas.
- Em olsem na Pita i tokim ol long blesim bilong God. God i salim Jisas i kam long ol long rot bilong gutnius i tokaut long God i kisim bek sinmanmeri long feitful wok bilong Jisas, bai ol i no bihainim moa pasin nogut bilong ol (pasin bilong givim baksait long Jisas). God i blesim ol na givim sanis long ol long tanim bel na bilipim na trastim Jisas, na long feitful wok bilong Jisas orait God i ken i fogivim sin bilong ol na ol i kisim laip long nupela heven na nupela graun.
Pita i mekim ol dispela tok pinis na ol pris wantaim bosman bilong ol sikuriti bilong tempel na ol Sadyusi ol i kam long Pita na Jon na ol i arestim tupela. Lukim Aposel 4:1-2. Ol i arestim tupela na tromoi tupela long sel (kalabus). Long wanem, Pita na Jon i tokaut long ol samting bilong Jisas, na ol bikman bilong lotu ol i les tru long harim dispela kain tok.
Long neks de, long moning taim (lukim lain 5-7), olgeta bikman bilong lotu Juda (Israel) ol i bung wantaim bilong kotim Pita na Jon. Ol i sutim kwesten (askim) long tupela olsem, “Long wanem pawa na long wanem nem yutupela i bin mekim dispela samting?”
Lain 8-12 i tokim yumi long ensa (bekim) bilong Pita long dispela kwesten bilong ol bikman bilong lotu Juda.
Na Holi Spirit i pulap long Pita. Lukim lain 8-9. Yumi mas save olsem, Pita em i no bekim askim bilong ol bikman bilong lotu long tingting na save bilong em yet. Nogat tru! Holi Spirit i pulap long Pita, na Pita i kisim maus bilong Holi Spirit tasol na em i toktok. Lukim tok Jisas i mekim long ol disaipel bilong Em long Mak 13:11….
11Na taim ol i arestim yupela na kisim yupela i go long kot, orait yupela no ken i tingting planti long toktok yupela i ken i mekim long kot. Wanem toktok i kamap long yupela, orait mekim dispela toktok. Long wanem? Em i no yupela i toktok, nogat, Em i Holi Spirit i toktok.
Yumi ken i save olsem, toktok Pita i mekim em i tok bilong God. Yumi ken i trastim toktok Pita i mekim.
Na Pita (Holi Spirit) i mekim strongpela toktok. Lukim lain 10. Em i no laik ol bikman bilong lotu ol i paul long husat tru i oraitim lek nogut man, olsem na em i makim Jisas stret na em i tok, “Long nem bilong Jisas Krais bilong taun Nasaret, Em yupela i kilim long diwai kros na God i kirapim Em long matmat, long strong bilong Em dispela lek nogut man i kamap gutpela na nau em i sanap long ai bilong yupela.”
Ol bikman bilong lotu, ol i bin kilim Jisas i dai long diwai kros. Ol i kilim Jisas olsem Jisas Em i wanpela man nogut. Tasol BIKPELA God i kirapim Em na nau Em i stap laip. Na bilong soim olgeta manmeri Em i stap laip na i stap, orait Jisas i wokim mirakel long han bilong Pita na lek nogut man i kamap gutpela. Daiman long matmat i no inap wokim dispela kain samting. Na man nating olsem Pita em i no inap wokim dispela kain samting. Nogat. Jisas tasol Em inap wokim mirakel – long pawa na strong na namba (nem) bilong Jisas lek nogut man i kamap gutpela. Na ol bikman bilong lotu ol i lukim lek nogut man i kamap gutpela. Ol i klia olsem mirakel i bin kamap.
Na Pita i skruim tok. Lukim lain 11. Pita, long strong bilong Holi Spirit, em i sutim tok long ol lida bilong lotu Juda. Em i sutim dispela kain tok long ol, “Yupela tingim olsem yupela ol gutpela wokman bilong kingdom bilong God, tasol nogat. Yupela bin skelim Jisas na yupela tingim olsem Jisas Em i man nogut na Em i samting nating, na yupela kilim Em i dai long diwai kros. Yupela tromoi Jisas. Tasol yupela tromoi As Ston bilong kingdom bilong God. Yupela tromoi nambawan samting bilong kingdom bilong God. Yupela tromoi Jisas, As Ston bilong kingdom bilong God, orait yupela tromoi rot bilong yupela bilong i go insait long kingdom bilong God.”
Long lain 12 Pita i pinisim tok bilong em olsem, “Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.” BIKPELA God Em i no makim narapela rot bilong kisim bek sinmanmeri na ol i stap insait long kingdom (femili) bilong Em. Nogat. Long rot bilong feitful wok bilong Jisas tasol. Sinmanmeri i no inap kisim laip long narapela samting. Nogat. Long Jisas tasol – long feitful wok bilong Jisas tasol sinmanmeri i ken i kisim laip na i stap insait long kingdom (femili) bilong God.
Long Jon 14:6 Jisas yet i tok….
6Mi yet Mi rot, na Mi as bilong Tok i tru, na Mi as bilong laip, na i no gat wanpela man inap i go long Papa long narapela rot. Nogat. Long Mi tasol.
Yumi mas klia olsem, God i no givim narapela nem long yumi, na Em i no givim nem bilong narapela samting long yumi, na bai God i kisim bek yumi na yumi i stap insait long kingdom (femili) bilong God. Nogat. God i tokim yumi long Jisas tasol. God i fogivim sin na kisim bek sinmanmeri long feitful wok bilong Jisas tasol. Long feitful wok bilong Jisas tasol sinmanmeri i ken i stap insait long femili bilong God.
Olgeta manmeri, maski ol i manmeri Juda (Israel), o ol i manmeri Australia, o ol i manmeri America, o ol i manmeri India, o ol i manmeri Korea, o ol i manmeri Japan, o i manmeri China, God i givim wanpela nem tasol long ol, God i givim nem bilong wanpela man tasol long ol, na bai ol i kisim laip long Em, na nem bilong dispela man em i Jisas. Na God i givim wanpela nem tasol, God i givim nem bilong wanpela man tasol, long olgeta manmeri bilong Papua Niugini na bai ol i kisim laip long Em, na nem bilong dispela man em i Jisas.
Dispela man Jisas, Jisas bilong taun Nasaret long distrik Galili long ples bilong ol Juda (Judia), dispela Jisas ol i kilim i dai long diwai kros, na God i kirapim Em na Em i stap laip, God i givim nem bilong dispela man long yumi olgeta manmeri bilong dispela graun bai yumi ken i kisim laip long feitful wok bilong Em.
Dispela Jisas God i bin kirapim Em long matmat na ol planti manmeri i lukim, na ol aposel i lusim laip bilong ol bilong difenim, God i givim nem bilong dispela man long yumi olgeta manmeri bilong dispela graun, bai yumi ken i kisim laip long feitful wok bilong Em. (Na tingim. Ol bikman i kotim Pita na Jon, sapos Jisas i no kirap long matmat, orait ol i ken i rausim ston long maus bilong matmat na putim det bodi bilong Jisas long ples klia, na long dispela pasin ol i ken i kapsaitim na winim toktok bilong tupela. Tasol ol i no mekim olsem, long wanem, det bodi bilong Jisas i no stap long matmat. God i kirapim Em na Em i stap laip olsem ol planti manmeri na ol aposel i tok.)
Ol brata na sista, ol Muslim na ol Baha’i na ol Buda na ol narapela kain lotu olsem, ol i toktok planti na makim nem bilong ol narapela man na ol narapela samting na ol i tok olsem, “Dispela man na dispela samting em i rot bilong God i kisim bek yumi.” Tasol nogat. Taim ol i makim ol narapela man na ol narapela samting, orait ol i tromoi pinis As Ston bilong kingdom bilong God – ol i tromoi pinis rot bilong ol bilong i go insait long kingdom (femili) bilong God.
Na wankain olsem, ol lotu i makim nem baptais na Sabat na gutpela pasin na lotu pasin na ol i tok olsem, long nem bilong ol dispela samting na long rot bilong ol dispela samting God i ken i kisim bek yumi, orait ol tu ol i tromoi pinis As Ston bilong kingdom bilong God – ol i tromoi pinis rot bilong ol bilong i go insait long kingdom bilong God. Long wanem, God i givim wanpela nem tasol long yumi, God i givim nem bilong wanpela man tasol long yumi, na long nem na long rot bilong dispela man tasol God i fogivim sin bilong yumi na kisim bek yumi na yumi lukim trupela laip wantaim Em long heven long femili bilong Em.
Harim. God yet i givim nem Jisas long yumi. God yet i givim nem bilong dispela man Jisas long yumi. God yet i tok olsem, Jisas wanpela tasol Em i rot bilong God i fogivim na kisim bek sinmanmeri. Holi Spirit bilong God i givim tok long Pita na Pita i tok, “Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.”
Long dispela as tasol mipela i kam long yupela bilong Papua Niugini na mipela autim nem bilong dispela man tasol long yupela. God i fogivim na kisim bek sinmanmeri long feitful wok bilong Jisas tasol – i no gat narapela rot na i no gat nem bilong narapela samting na God i fogivim na kisim bek sinmanmeri, nogat, long Jisas tasol.
Ol brata na sista, yupela mas save olsem, mi no karim tok bilong mi yet i kam long yupela. Mi yet mi no makim Jisas Em i rot bilong God i kisim bek sinmanmeri. Nogat. Mi tokim yupela long tok bilong God tasol, na God tasol i makim Jisas Em i rot bilong God i kisim bek sinmanmeri.
Mi yet mi kam pinis long dispela rot, na yu tu yu mas kam long dispela rot. Mi lusim olgeta narapela rot pinis na mi pas long Jisas tasol, na yu tu yu mas mekim olsem. Mi tanim bel pinis na mi bilipim na trastim God long fogivim sin bilong mi long feitful wok bilong Jisas tasol, na yu tu yu mas tanim bel na bilipim na trastim God long fogivim sin bilong yu long feitful wok bilong Jisas tasol.
Baptais na Sabat na gutpela pasin na lotu pasin, Baibel i mekim ol sampela toktok long ol dispela samting, tasol Baibel i no tok olsem ol dispela samting em i rot bilong God i fogivim na kisim bek yumi. Baibel, Tok bilong God, i tokaut klia olsem, God i fogivim na kisim bek sinmanmeri long feitful wok bilong Jisas tasol. Em olsem na, yumi no ken i paul. Yumi bihainim na trastim feitful wok bilong Jisas tasol, olsem God i tok.
Ol planti lotu manmeri bai grisim yupela na ol bai tok olsem, “Tru, Jisas i dai long diwai kros bilong rausim sin bilong yumi, tasol yumi mas kisim baptais na lukautim Sabat na wokim ol gutpela pasin na bihainim ol lotu pasin, bai God i ken i amamas long yu na kisim bek yu.” Planti manmeri bai tokim yu long ol dispela kain tok, tasol yu mas sanap strong na yu no ken i harim o bihainim dispela kain toktok. Long wanem, ol i kapsaitim tok bilong God na ol i makim ol narapela samting na ol i givim nem bilong ol narapela samting long yu.
Ol manmeri i tingim olsem, baptais na Sabat na lotu pasin em i rot, ol i tromoi As Ston (Jisas) pinis. Lukim tok i stap long Galesia 5:4….
4Sapos yupela i laik bihainim lo [bilong Moses na ol lotu samting] na long dispela pasin yupela i laik God i kolim yupela stretpela man [kisim bek yupela], orait yupela i lusim Krais pinis. Yupela i lusim pinis grasia bilong God.
Ol brata na sista, nogut yumi trastim ol narapela samting na yumi lusim Jisas, As Ston bilong kingdom bilong God, na yumi lus long kingdom bilong God. Mobeta yumi tanim bel na bilipim na trastim God long kisim bek yumi long feitful wok bilong Jisas tasol – long nem bilong dispela man, long feitful wok bilong dispela man, yumi no inap lus long kingdom bilong God.
Em tasol.
