Moning.
Yumi manmeri bilong PNG yumi save pinis long Jisas. Yumi harim pinis stori bilong Jisas i dai long diwai kros bilong tekewe pe bilong sin bilong yumi sinmanmeri. Na yumi save olsem, sapos yumi laik lukim ples bilong God, orait yumi mas bilip long Jisas. Em olsem na planti manmeri bilong PNG ol i tok olsem, “Mi bilip long Jisas.”
Planti manmeri ol i bilip long Jisas i dai long diwai kros bilong tekewe pe bilong sin, tasol ol i no save trastim Jisas na ol i no trastim wok bilong Jisas na ol i no bihainim Jisas.
Long Buk Aposel 4:11-12, aposel Pita i bin tokim ol Juda lotu manmeri long Jisas. Em i tok olsem….
11 Dispela man Jisas, Em i ston yupela ol wokman i bin lusim, tasol nau Em i kamap as ston. 12 Na i no gat narapela man i stap na bai mipela i kisim laip long em. Long wanem, long olgeta hap long dispela graun God i no givim narapela nem long mipela na bai mipela i kisim laip long em.”
Taim Pita i mekim dispela toktok, orait ol lida bilong lotu bilong ol Juda ol i bin kwestenim Pita na Jon. Em olsem na, taim Pita i kirap na mekim toktok, orait em i makim ol lida bilong lotu bilong ol Juda na em i tok, “Dispela man Jisas, Em i ston yupela ol wokman i bin lusim, tasol nau Em i kamap as ston.” Em ol lida bilong lotu bilong ol Juda i bin lusim Jisas na ol i trastim na bihainim ol narapela samting bai God i ken i kisim bek ol. Jisas Em i as Ston bilong wok bilong God bilong kisim bek sinmanmeri, tasol ol i bin lusim Jisas na ol i bilipim na trastim na bihainim ol narapela samting.
Na wankain olsem, planti manmeri bilong nau ol i lusim Jisas na ol i putim bilipim na trastim bilong ol long ol narapela samting. Tru, ol i no tok olsem, “Jisas Em i man nating”, olsem ol lida bilong lotu bilong ol Juda i bin mekim. Tasol wankain olsem ol lida bilong ol Juda ol i no putim bilipim na trastim bilong ol i go long Jisas na long wok Jisas yet i bin mekim. Nogat. Ol i putim bilipim na trastim bilong ol long ol lotu samting na ol i bihainim ol lotu samting.
Em olsem na ol i bilipim na trastim misin bilong ol, na ol i bilipim na trastim ol gutpela wok bilong ol yet, na ol i bilipim na trastim baptais bilong ol na Lordsapa bilong ol na Sabat bilong ol na misin pasin bilong ol. Ol i bilipim na trastim na bihainim ol kainkain samting olsem.
Planti manmeri i ripitim nating tok bilong Baibel na ol i tok, “Jisas i dai long diwai kros bilong tekewe sin bilong mipela.” Long wanem, ol i save makim ol wanwan narapela samting na ol i putim bilipim na trastim bilong ol long ol dispela narapela samting na bihainim. Ol i tingim olsem, God bai lukim ol dispela samting na Em bai amamas na kisim bek mipela.
Taim Pita i mekim tok, orait em i no Pita yet i mekim. Nogat. Aposel 4:8 i tokaut olsem, Holi Spirit i pulap long Pita na Pita i toktok.
8 Orait, Holi Spirit i pulap long Pita na em i tokim ol …. Aposel 4:8.
Em olsem na Holi Spirit bilong God i makim Jisas tasol i rot bilong God i kisim bek sinmanmeri na ol i kisim laip. Wok bilong Jisas long diwai kros tasol em i rot bilong God i kisim bek sinmanmeri na bai ol i kisim laip wantaim God long heven. Long nem bilong Jisas tasol, long wok bilong Jisas long diwai kros tasol, God i ken i kisim bek yumi na fogivim sin bilong yumi na givim laip long yumi long heven.
Long dispela as yumi no ken i tingim olsem, yumi ken i kisim laip long nem bilong misin bilong yumi, na yumi no ken i tingim olsem, yumi bai kisim laip long nem bilong baptais o long nem bilong Lordsapa o long nem Sabat o long nem bilong ol wanwan misin pasin o long nem bilong ol kainkain samting olsem. Nogat. God i no givim ol dispela nem long yumi bai yumi ken i kisim laip long em.
God i givim wanpela nem tasol na bai yumi lukim trupela laip wantaim God long heven. Em i givim nem Jisas tasol. Long dispela man Jisas tasol, long feitful wok bilong Em long diwai kros tasol, bai yumi lukim laip. God i save kisim bek yumi sinmanmeri long nem bilong Jisas tasol.
Em olsem na, yumi sinmanmeri, yumi mas putim bilipim na trastim bilong yumi long feitful wok bilong Jisas wanpela tasol, na maski yumi bilipim na trastim na bihainim ol narapela samting moa. Trastim Jisas tasol. Trastim wok bilong Jisas tasol. Trastim rot God yet i makim bilong kisim bek sinmanmeri olsem yu na mi. Bilipim na trastim na bihainim Jisas tasol, na bai yu lukim laip.
Glenn.
