Moning.
Ista em i wanem samting?
Ating planti manmeri i tingim olsem Ista em i taim we ol manmeri bilong taun i save go bek long ples na lukim ples na sindaun liklik wantaim ol hauslain bilong ol. Na sampela manmeri i tingim olsem Ista em i taim bilong lukim pilai na amamas i stap. Tru, ol dispela kain pasin i stap long taim bilong Ista, tasol ol dispela samting i no as bilong Ista. Nogat.
Ista em i taim bilong holim tingting long dai na kirap bek bilong Jisas. Long bipo, samting olsem 2000 yia ago, Jisas bilong taun Naseret long ples Juda Em i dai long diwai kros. Em i dai long Fraide klostu long 3 klok na ol i planim Em long seim de (dispela em i kastem pasin bilong ol Juda). Na long Sande moning Jisas i bin kirap bek gen long matmat na Em i stap laip. Na nau Em i stap laip yet. Em i no dai gen. Nogat. Em i stap laip nau na Em bai i stap laip oltaim oltaim olgeta.
Stori bilong kirap bilong Jisas i tru o nogat?
Ating planti manmeri ol i tingim olsem stori bilong kirap bek bilong Jisas em i stori nating bilong ol waitman. Tasol i gat planti witnis i bin lukim ol dispela samting. Yumi ken i harim witnis toktok bilong ol long Baibel na long ol narapela histori buk nabaut tu.
Pastaim ol sampela meri i bin lukim Jisas i kirap long matmat (Mak 15:33-16:8), na bihain ol disaipel i bin lukim, na aposel Pol i bin lukim Jisas taim Pol i wokabaut long rot i go long Damaskus, na long wanpela taim 500 manmeri i bin lukim Jisas (1 Korin 15:3-8).
Planti witnis i bin lusim laip bilong ol.
Na planti manmeri i bin witnisim dai na kirap bek bilong Jisas i lusim laip bilong ol long dispela samting. Na yu tingim. Sapos ol i giaman na ol i no lukim, orait ol i no inap lusim laip bilong ol bilong holim na strongim dispela toktok. Ol i no inap lusim laip bilong ol nating. Nogat. Ol i lusim laip bilong ol bikos ol i save olsem, tru tumas Jisas i bin i stap na Em i dai na long Sande Em i kirap bek gen na Em i stap laip.
Long wanem as Jisas Em i lusim laip bilong Em na kisim bek gen?
Bai mi larim aposel Pol i toktok:
“God i bin salim Krais Jisas i kam, na Krais Jisas i kisim pe bilong sin na Em i dai, na blut bilong Em i kapsait bilong tekewe bel hat bilong God long sin bilong manmeri i bilipim na trastim Krais Jisas.” Rom 3:23-25.
“God i bin givim Jisas, bai Jisas i dai bilong sin bilong yumi. Na God Em i kirapim Jisas gen bilong Em i ken i kolim yumi “stretpela man”.” Rom 4:25
Yumi ken i mekim wanem?
Tok bilong God i tokim yumi olsem:
“Taim God i makim i kamap pinis, na Kingdom bilong God i kam klostu. Yupela tanim bel na bilipim dispela gutnius.” Mak 1:15.
“Tasol nau, God Em i tok strong long olgeta man long olgeta hap bilong dispela graun olsem, “Yupela mas tanim bel.” Aposel 17:30.
“Olsem na, tanim bel na kam bek long God. Na Em bai rausim olgeta sin bilong yu.” Aposel 3:19.
God i givim woning long yumi sin manmeri.
Harim nek bilong Jisas:
“Sapos yupela no bilip long Mi, Mi olsem Mi bin tokim yupela, orait yupela bai dai insait long sin bilong yupela.” Jon 8:24.
“Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap yet long em.” Jon 3:36.
Na harim nek bilong God long maus bilong aposel Pol:
“God bai mekim save long olgeta manmeri i no save long God na i no bihainim gutnius bilong BIKPELA Jisas bilong yumi. Ol bai kisim bagarap olsem: ol bai i stap autsait na ol i no inap lukim BIKPELA na ol i no inap lukim lait bilong strong bilong Em, na ol bai bagarap i go i to olgeta oltaim oltaim.” 2 Tesalonaika 1:8-9.
Na sapos yu no laik bilip?
Harim tok God i mekim long maus bilong Luk:
“Pastaim God i larim ol manmeri i no gat save na i stap nating. Tasol nau, Em i tok strong long olgeta man long olgeta hap bilong dispela graun olsem, ‘Yupela i mas tanim bel.’ Long wanem, Em i bin makim wanpela de we Em bai kotim olgeta manmeri. Em bai mekim olsem long stretpela pasin bilong Em. Na Em i makim wanpela man na Em bai i stap jas bilong dispela kot. Na taim God i kirapim dispela man long matmat Em i soim olgeta manmeri dispela i tru tumas.” Aposel 17:30-31.
Bai yu amamas o bai yu pret?
Yumi i bilipim na trastim feitful wok bilong Jisas long diwai kros yumi ken i amamas long dai na kirap bilong Jisas. Long wanem? Em i dai bilong tekewe kot bilong sin bilong yumi. Em i dai bilong tekewe bel hat bilong God long sin bilong yumi. Na taim Em i kirap bek, orait Em i soim yumi olsem Em i winim pe bilong sin na yumi bai stap laip olsem Jisas i stap laip.
Tasol sapos yu no laik tanim bel, orait Ista i save soim yu olsem, sapos yu no tanim bel hariap, orait dispela man i kirap long matmat long Ista Sande Em bai i stap jas long yu na salim yu i go bilong kisim pe bilong sin bilong yu yet.
Long mipela i tanim bel pinis na i save bilipim na trastim feitful wok bilong Jisas long diwai kros, orait mipela no inap lukim pe bilong sin bilong mipela, long wanem Jisas i bin kisim na pinisim pinis pe bilong sin bilong mipela. Long dispela as mipela amamas long harim gen ol wok God i bin wokim long dai na kirap bek bilong Jisas long Ista taim.
Glenn.
