Jenesis
1Olsem na long dispela wei olgeta samting antap na olgeta samting long dispela graun, olgeta samting, i kamap olsem.
2Taim de namba 7 i kamap, ol dispela wok bilong God em i pinis olgeta. Olsem na God Em i malolo long de namba 7. 3Na God Em i blesim dispela de namba 7 na Em i mekim em i stap de holi. Long wanem, God Em i pinisim wok bilong Em olgeta na Em i malolo.
Adam na Ivi i stap long ples Iden.
4God Em i wokim samting antap na Em i wokim dispela graun, na dispela stori em i stori bilong ol dispela samting.
Taim BIKPELA God Em i wokim dispela graun na olgeta samting antap, 5-6long dispela taim ol kainkain samting long bus i no kamap yet long graun. BIKPELA God Em i no mekim ren i pundaun long graun, olsem na em i no save ren long dispela taim. Tasol, wara i save kamap long aninit long graun bilong givim wara long olgeta samting long graun. Na tu, wanpela manmeri em i no kamap yet bilong mekim wok long graun. 7Na BIKPELA God Em i kisim na redim sampela graun na Em i wokim wanpela man long graun. BIKPELA God Em i pulim win na Em i winim win bilong laip i go insait long nus bilong dispela man. Olsem na dispela man em i kamap man i gat laip i stap.
8Na BIKPELA God Em i wokim pinis wanpela ples, na dispela ples em i stap long ples Iden, long sait bilong san i kamap. Na dispela man BIKPELA God i bin wokim, Em i putim em long ples Iden. 9Long dispela ples, BIKPELA God i mekim ol kainkain diwai i kamap long graun. Em i kamapim planti gutpela diwai na planti diwai i gat gutpela kaikai i stap long em. Na long namel long dispela ples i gat tupela narapela kain diwai i stap. Wanpela em i diwai bilong givim laip, na narapela em i diwai bilong givim save long ol gutpela samting na ol samting nogut.
10Wanpela wara em i stap long ples Iden bilong givim wara long olgeta samting long ples. Na dispela wara em i gat 4-pela han wara i stap. 11-12Nem bilong namba 1 han wara em i Pison, na em i save go kam long olgeta hap bilong Havila. Long hap bilong Havila em i gat gutpela gol i stap. Na em i gat wanpela diwai, na wara bilong diwai em i gat gutpela smel. Na tu, wanpela ston i stap na nem bilong ston em i kanilian. 13Nem bilong namba 2 han wara em i Gihon, na em i save go kam long olgeta hap bilong Kus. 14Nem bilong namba 3 han wara em i Taigris, na em i save go kam long sait bilong hap bilong Asiria. Na nem bilong namba 4 han wara em i Yufretis.
15Na BIKPELA God Em i kisim dispela man Em i bin wokim na Em i putim em long ples Iden, bai em i wok na lukautim dispela ples. 16Na BIKPELA God Em i tok strong long dispela man na Em i tok, “Yu ken i kaikaim frut bilong olgeta kainkain diwai i stap long dispela ples. 17Tasol, wanpela diwai bilong givim save long ol gutpela samting na ol samting i nogut, long dispela diwai yu no ken i kaikai. Sapos yu kaikai long dispela diwai, tru, yu bai dai.”
18Na BIKPELA God Em i tok, “Dispela man em i stap wanpela tasol, olsem na dispela em i no gutpela. Bai Mi wokim wanpela meri, na em bai inap tru long pas wantaim dispela man na helpim em.”
19Orait, BIKPELA God Em i bin kisim graun na Em i wokim pinis olgeta kainkain animal na Em i wokim pinis olgeta kainkain pisin. Na BIKPELA God Em i kisim olgeta i kam long man bilong man i ken givim nem long ol. Na wanem nem man i givim ol, orait dispela em i nem bilong ol. 20Olsem na man em i givim nem long olgeta animal long ples na long olgeta pisin na long olgeta animal long bus.
Tasol yet, Adam em i no lukim wanpela samting em inap tru long pas wantaim em na helpim em. 21Em olsem na BIKPELA God Em i mekim Adam i slip i dai tru. Taim Adam em i slip yet, BIKPELA God Em i kisim wanpela bun long banis bilong Adam, na Em i kisim skin na Em i pasim banis bilong Adam. 22Orait, BIKPELA God Em i wokim wanpela meri long dispela bun bilong man, na Em i kisim meri i kam long man.
23Adam em i tok,
“Em nau, bun bilong em i kamap long bun bilong mi,
na skin bilong em i kamap long skin bilong mi.
Bai ol i kolim em ‘meri.’
Long wanem, Em i kamap long rot bilong man.”
24Na long dispela as, wanpela man em bai lusim papa na mama bilong em, na em bai i go pas wantaim meri bilong em. Na tupela bai pas olgeta.
25Dispela man na meri bilong em, tupela i no putim klos bilong karamapim skin bilong tupela. Tasol tupela i no kisim sem.
