Jenesis
Bikpela tait em i kamap.
6
1Taim ol manmeri ol i kamap planti long graun, na taim ol i karim meri, 2 long dispela taim ol lain bilong God ol i lukim ol meri bilong ol lain bilong dispela graun, na ol i tingim olsem ol dispela meri ol i naispela tru. Na ol lain bilong God, long laik bilong ol yet, ol i kisim ol dispela meri na maritim ol. 3Na BIKPELA Em i tok olsem, “Spirit bilong Mi i no inap tokim na stretim ol man i go i go, nogat. Ol i strong tumas long bihainim ol samting bilong dispela graun tasol. Na long dispela as Mi bai sotim laip bilong ol manmeri na ol bai i stap inap long 120 yia tasol.”
4Ol lain bilong God ol i kisim ol meri bilong ol lain bilong dispela graun na ol i kamapim pikinini long ol. Na long dispela taim – na bihain tu – ol lain Nefiliam ol i stap long graun. Ol man ol i amamas long dispela lain na ol dispela lain ol i kisim biknem stret.
5BIKPELA Em i klia olsem ol manmeri long graun ol i save mekim pasin i no stret, na dispela pasin bilong ol em i kamap bikpela samting tru. Olgeta taim ol lain, long het bilong ol na long bel bilong ol, ol i tingting tasol long mekim ol pasin i no stret. 6Na BIKPELA Em i bel hevi, na Em i sori Em i bin wokim ol lain manmeri bilong dispela graun. BIKPELA, long bel bilong Em, Em i pilim na Em i sori tru. 7Olsem na long dispela as BIKPELA Em i tok olsem, “Mi sori Mi bin wokim ol lain manmeri, olsem na, ol dispela lain Mi bin wokim Mi bai rausim ol long dispela graun. Mi bai rausim ol manmeri wantaim ol kainkain animal, na ol liklik animal i save raun long graun na ol kainkain pisin ol i pulap long skai, olgeta Mi bai rausim.” 8Tasol Noa, em i stap gutpela long ai bilong BIKPELA.
9Na dispela stori em i stori bilong Noa.
Noa em i wanpela stretpela man long ai bilong God. Olgeta manmeri ol i save mekim pasin i no stret, tasol Noa nogat. Em i save aninit long lek bilong God. 10Noa em i gat 3-pela pikinini man, nem bilong 3-pela em i Siem na Ham na Jafet.
11Na long ai bilong God ol manmeri bilong dispela graun ol i no stretpela, nogat tru. Ol i save pait na bagarapim ol meri, na ol i save mekim kain pasin olsem. 12God Em i klia olsem pasin nogut bilong olgeta manmeri em i kamap bikpela samting tru na ol i save mekim pasin i no stret. 13Na God Em i tokim Noa olsem, “Olgeta manmeri ol i save mekim pasin i no stret na pasin bilong pait na pasin bilong bagarapim ol meri na ol kain pasin olsem. Na dispela pasin em i pulap long dispela graun. Na long dispela as Mi bai pinisim laip bilong olgeta manmeri bilong dispela graun. Tru tumas, Mi bai pinisim laip bilong ol wantaim olgeta samting bilong dispela graun. 14Olsem na yu mas kisim ol diwai saiprus na wokim wanpela sip. Wokim planti rum long em na penim em long kolta. Yu mas penim autsait na insait bilong dispela sip. 15Yu mas wokim sip olsem – long bilong em mas 130 mita, na narapela sait bilong em mas 22 mita, na antap bilong em mas 13 mita. 16Na taim yu wokim rup bilong sip, em mas i stap antap liklik na tulait em bai kam insait. Wokim wanpela dua long sait bilong sip, na wokim 3-stori long em, wanpela daunbilo na wanpela namel na wanpela antap.”
17God Em i tok, “Mi bai mekim bikpela tait i kamap long graun bilong pinisim laip bilong olgeta samting i gat laip i stap long graun. Olgeta samting bilong dispela graun bai lus. 18Tasol, Mi bai mekim kontrak long yu, olsem na, yu bai go insait long sip. Yu wantaim ol pikinini man bilong yu, na meri bilong yu, na ol meri bilong ol pikinini man bilong yu, yupela olgeta bai go insait long sip. 19Yu mas kisim man na meri bilong olgeta samting i gat laip i stap. Yu mas kisim ol i go insait long sip na ol bai i stap laip wantaim yu. 202-pela bilong olgeta kain pisin, na 2-pela bilong olgeta kain animal i stap, na 2-pela bilong olgeta liklik animal i save raun long graun, 2-pela bilong olgeta samting bai kam long yu na ol bai i stap laip wantaim yu. 21Na yu mas kisim na bungim olgeta kain kaikai inap long yu na inap long ol.”
22Orait, Noa em i bihainim olgeta tok God Em i mekim long em.
