Wok bilong Jisas
Mak 10:32.
Mak 15:47.
Jisas Em i husat?
Jisas Em i God i kam daun long dispela graun. Jisas Em i Pikinini Bilong Man bilong visin bilong Daniel. Jisas Em i gat namba i winim olgeta namba na Em i gat glori olsem glori bilong God na Em i king bilong kingdom bilong God.
Na dispela tok i no minim olsem nem Jisas em i narapela nem bilong God tasol. Nogat. God i stap 3-pela man, tasol Em i stap 1-pela God tasol. Em olsem na, Papa i stap, na Jisas i stap, na Holi Spirit i stap, na 3-pela wantaim Em i God. Em olsem na, Papa Em i God, na Jisas Em i God, na Holi Spirit Em i God. Wanpela i no bin karim narapela. Nogat. Olgeta i stap long wanpela level na olgeta i stap God wantaim.
Em olsem na Jisas Em i God, na Em i kam daun long dispela graun.
Long wanem as Jisas i kam?
Long 5-pela taim Jisas i tokim ol disaipel bilong Em long dai bilong Em. Na Jisas i tok long as bilong dai bilong Em na Em i tok, “Mi kam bilong lusim laip bilong Mi bilong baim bek ol planti sin manmeri.” Jisas i tok klia long hau Em bai lusim laip bilong Em – ol lidaman bilong lotu Juda ol bai paitim na solapim Em, na ol bai spetim Em, na ol bai kotim Em long giaman kot, na ol bai kilim Em. Long dispela rot Jisas bai lusim laip bilong Em bilong baim bek ol planti sin manmeri.
Long buk Mak long sapta 1-8 Mak em i tingting long wanpela tingting tasol – Jisas Em i husat? – na em i putim planti evidens bilong soim olsem Jisas Em i God. Na long sapta 9-16 Mak em i diskraibim hau Jisas i wokabaut i go long dai bilong Em. Jisas bai dai long diwai kros bilong lusim laip bilong Em bilong baim bek laip bilong ol planti sin manmeri.
Long Mak 10:32 Mak i stori long Jisas i go long taun Jerusalem. Jisas i statim wokabaut bilong Em i go long Jerusalem, long wanem, long Jerusalem Jisas bai lusim laip bilong Em. Yumi skelim ol wanwan samting bilong stori bilong Jisas taim Em i wokabaut i go long dai bilong Em long diwai kros.
Las kaikai bilong Jisas.
Lukim Mak 14:17-26. Na lukim lain 24 – laip bilong Jisas bai kapsait bilong helpim ol planti manmeri. Na lukim lain 21 – Pikinini Bilong Man bilong visin bilong Daniel Em bai i dai olsem ol profet i bin tok long bipo tru. Yu save, dai bilong Jisas i no kamap nating. Nogat. Dai bilong Jisas i kamap long plen stret bilong God. Lukim Aposel 2:22-23.
22Yupela ol lain Israel, yupela harim tok bilong mi. Jisas Em i man bilong taun Nasaret, na long ai bilong yupela yet God i bin wokim bikpela wok na ol kainkain mirakel na ol kainkain sain long han bilong Em, bai yupela ken i save olsem Em i bilong God. Yupela save pinis long ol dispela samting. 23Na long plen na save bilong God yet, Em i bin givim dispela man Jisas i go long han bilong yupela. Na yupela wantaim ol man i save mekim pasin i no stret, yupela i nilim Jisas long diwai kros na kilim Em i dai.
Ples Getsemani.
Lukim Mak 14:33-36. Jisas Em i save stret long wanem samting Em bai wokim, na Em i pilim hevi nogut tru bilong dispela samting.
Na skelim gut. Jisas Em i save olsem, i no gat narapela rot bilong sin manmeri i ken i pas long God. Nogat. Long rot bilong Jisas i kapsaitim na lusim laip bilong Em, em tasol em i rot bilong Jisas i baim laip bilong sin manmeri na God i kisim bek ol na ol i pas long Em.
Taim Jisas i tok, “Plis rausim dispela kap long Mi,” orait Em i kisim wanpela tok bilong Olpela Testamen na Em i tok. Long Olpela Testamen God i tok piksa na Em i tok long wanpela kap i pulap olgeta long bel hat bilong Em, na Em bai kapsaitim dispela bel hat long ol sin manmeri na ol bai dringim. God i mekim olsem bilong mekim save long sin bilong ol. (Yu ken i lukim Aisaia 51:17-22.) Na taim Jisas i tok, orait Em i tok long dispela kap bilong bel hat bilong God. God bai kapsaitim bel hat bilong Em long Jisas na Jisas bai dringim, na long dispela rot ol planti sin manmeri ol i no inap kisim bel hat bilong God long sin bilong ol.
Em olsem na yumi mas klia olsem, wok bilong Jisas long diwai kros tasol em i rot tasol na i no gat narapela rot.
Kot bilong Jisas.
Lukim Mak 14:55-56 na 62-65. Jisas i no wokim wanpela rong. Olsem na, ol man i kotim Jisas ol i baim ol giaman witnis bilong winim kot. Na taim ol giaman witnis i toktok, orait toktok bilong ol i no pas wantaim. Long wanem, ol i mekim giaman toktok. Harim. Jisas Em i no dai long sin bilong Em yet. Nogat. Long wanem, Jisas i no gat sin.
Na Jisas i mekim trupela tok bilong bekim askim bilong ol man i kotim Em, na Em i tok, “Mi dispela man. Na yupela bai lukim Pikinini bilong Man i sindaun long han sut bilong God i gat olgeta pawa.” Jisas Em i Pikinini bilong God na Jisas Em i Pikinini bilong Man na taim Jisas i tok olsem, orait ol i tingim olsem Jisas Em i bikhet na i mekim fani long ol samting bilong God.
Em olsem na ol i paitim Jisas na ol i spetim Em. Em nau, toktok Jisas i bin tokim ol disaipel i wok long kamap olsem Jisas i bin tok.
Jisas i stap wanpis na Em i dai.
Lukim Mak 15:12-20 na 25 na 31 na 33-38 na 42-47. Ol manmeri, pastaim ol i bin welkamim Jisas, tasol nau ol i singaut long kilim Em i dai long diwai kros.
Na ol disaipel bilong Jisas ol i ranawe pinis. Long ples Getsemani, taim ol sikuriti bilong ol lida bilong lotu Juda i kam arestim Jisas, orait olgeta disaipel ol i pret na ol i ranawe.
Na long diwai kros Papa God i givim baksait long Jisas tu. Lukim lain 34. Jisas i mekim bikmaus na Em i tok, “God bilong mi, God bilong mi, long wanem as Yu lusim mi?” Papa bilong Jisas i lusim Em. Jisas Em i lus long God. Tru tumas, Jisas i stap wanpis na Em i dai.
Na yumi mas save olsem, pe bilong sin em i dispela kain samting. Ol sin manmeri ol i lus long God, na bihain ol bai lus long God oltaim oltaim long kalabus hel. Long hel bai yu i stap wanpis na i no gat wantok i stap na i no gat ol femili i stap bilong prenim yu na bilong sapotim yu. Nogat. Na bikpela hevi tru i olsem, long hel yu no inap lukim God i stap pren bilong yu, na yu no inap lukim wanpela blesim bilong Em. Yu bai lus long God na yu bai lus long olgeta samting bilong God oltaim oltaim.
Taim Jisas i stap long ples Getsemani Em i tingim ol dispela hevi bilong pe bilong sin, em ol dispela hevi Em bai karim long diwai kros – Em i save tru long wanem hevi Em bai kisim – na long dispela as Em i pilim bikpela bikpela hevi stret long bel bilong Em.
Dai bilong Jisas i trupela stori o nogat?
Na yu save, planti manmeri ol i ken i tok olsem, “Dispela stori bilong Jisas i dai long diwai kros em i no trupela histori samting i kamap long dispela graun. Nogat. Dispela stori i giaman stori nating tasol.”
Tasol tingim. Long wanem as ol disaipel i lusim laip bilong ol bilong autim dispela stori bilong baim bek wok bilong Jisas long diwai kros? Sapos dispela stori i no tru, orait ol i no inap tromoi laip bilong ol bilong autim stori. Tasol olgeta ol i tromoi laip bilong ol bilong sapotim na autim stori bilong baim bek wok bilong Jisas long diwai kros.
Na yu skelim narapela samting tu. Mi tok piksa na yu skelim. Taim ol sampela man i stori long Michael Somare, orait yu no tok olsem, “Mi no lukim Michael Somare long ai bilong mi, olsem na, mi no inap bilipim na trastim stori bilong Michael Somare em i wanpela trupela man i stap long gavman bilong PNG.” Tru, yumi no lukim Michael Somare, tasol i gat ol evidens i stap bilong soim olsem Michael Somare em i trupela man i stap olsem ol i tok. Na long dispela as yumi bilipim na trastim olsem, Michael Somare i stap.
Na wankain olsem, i gat planti witnis i stap na planti evidens i stap bilong soim yumi olsem, tru, Jisas i lusim laip bilong Em long diwai kros bilong baim bek laip bilong ol planti sin manmeri bilong dispela graun. Em olsem na yumi no lukim Jisas, tasol yumi ken i bilipim na trastim Em.
Tok bilong God i stap na i no senis. God i lukautim toktok bilong ol ai witnis na dispela tok i stap nau long han bilong yumi. Tru. Taim ol save man i painim na lukim ol olpela olpela hap Tok bilong God insait long hul ston, orait dispela tok i wankain stret olsem Tok bilong God i stap nau long han bilong yumi. Tok win i no gutpela toktok na i save senis nabaut. Tasol Tok bilong God i stap stret na i stap stret nau long han bilong yumi.
Sapos yu bilipim na trastim Jisas……
Sapos yumi bilipim na trastim feitful baim bek wok bilong Jisas long diwai kros, orait yumi ken i save olsem, tru tumas, olgeta pe bilong sin bilong yumi i pinis na i pinis olgeta. Long wanem, Jisas i baim pe bilong sin pinis bilong olgeta sin bilong yumi. Jisas i baim fridom bilong yumi long kalabus bilong i dai na yumi no inap lukim pe bilong sin bilong yumi long kalabus hel. Yumi no lus long God moa na bihain yumi no inap lus long God oltaim oltaim long ples hel. Dispela toktok em i no tok win. Nogat tru. Em i trupela trupela samting.
Na yu gat wanem tingting long dispela? Yu amamas o nogat? Em i gutpela samting long yu o samting nating long yu?
Yumi i bilipim na trastim feitful baim bek wok bilong Jisas, orait Jisas i baim bek yumi pinis na yumi bilong Jisas nau. Na dispela i minim olsem, yumi i lusim rot bilong yumi yet na yumi bihainim Jisas na yumi bihainim tok bilong Jisas.
Pasin bilong bihainim Jisas em i no lotu pasin. Nogat. Lotu pasin em i narapela samting. Pasin bilong bihainim Jisas i olsem, yumi wokabaut long tok bilong Jisas long olgeta de long laip bilong yumi. Long wokabaut bilong yumi na long sindaun bilong yumi na long marit bilong yumi na long bisnis bilong yumi na long wok bilong yumi na long toktok bilong yumi, yumi pas long Jisas na yumi bihainim Em na bihainim tok bilong Em na trastim Em.
Sapos yu no bilipim na trastim Jisas……
Jisas Em i dai long diwai kros na Em i kirap bek gen na i stap laip. Jisas Em i king olsem God i tok. Dispela samting em i trupela samting, maski yumi no lukim long ai bilong yumi. Planti samting yumi no lukim long ai bilong yumi na i stap trupela samting. Yumi no lukim King Jisas long ai bilong yumi, tasol dispela samting em i tru.
Skelim tok bilong King Jisas long Aposel 17:30-31.
30Pastaim God i larim ol manmeri i no gat save na i stap nating. Tasol nau, Em i tok strong long olgeta man long olgeta hap bilong dispela graun olsem, ‘Yupela i mas tanim bel.’ 31Long wanem, Em i bin makim wanpela de we Em bai kotim olgeta manmeri. Em bai mekim olsem long stretpela pasin bilong Em. Na Em i makim wanpela man na Em bai i stap jas bilong dispela kot. Na taim God i kirapim dispela man long matmat Em i soim olgeta manmeri dispela i tru tumas.”
Harim. Yu mas lusim rot bilong yu na yu mas bilipim na trastim feitful baim bek wok bilong Jisas long diwai kros. Bilipim na trastim God long kisim bek yu long feitful baim bek wok bilong Jisas. Sapos yu no mekim olsem, orait yu yet yu mas kisim na dringim pe bilong sin bilong yu yet long kalabus hel. Yu ken i toktok planti, tasol yu no inap abrusim pe bilong sin.
Sapos yu no laik lusim rot bilong yu na kam long rot bilong Jisas na yu bilipim na trastim God long kisim bek yu long feitful baim bek wok bilong Jisas, orait sori tumas, mi no gat narapela tok mi ken i mekim long yu na i no gat narapela samting mi ken i mekim bilong yu. Yu yet nau. Na long de bilong bikpela kot, orait bai yu sanap long ai bilong King Jisas, Jas bilong yu.
Em tasol.
