Jisas i Husat – Evidens (4)
Mak 5:1-13.
Mak 5:21-43.
Jisas Em i husat? Dispela kwesten em i no samting nating. Nogat. Dispela kwesten em i wanpela bikpela kwesten na yumi mas traim na skelim ensa bilong em.
Na i gat planti kainkain toktok i stap long dispela man Jisas. Sampela manmeri i tok olsem, Jisas Em i no trupela samting. Ol i tingim olsem, ol manmeri ol i kirapim toktok nating na stori bilong Jisas em i giaman stori bilong ol manmeri tasol. Tasol, ol dispela kain manmeri ol i no gat save na ol i paul. Long wanem, i gat planti evidens i stap bilong soim olsem, tru, Jisas i trupela man i kamap long dispela graun. Stori bilong Jisas em i trupela samting long histori bilong dispela graun. Em olsem na yumi mas skelim kwesten olsem, Jisas Em i husat?
Na dispela skelim i bikpela samting. Long wanem, Jisas i bin mekim bikpela bikpela toktok. Em i mekim bikpela tok olsem….
“Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Bel hat bilong God i stap long Em.” Jon 3:36.
“Sapos yupela no bilip long Mi, Mi olsem Mi bin tokim yupela, orait yupela bai dai insait long sin bilong yupela.” Jon 8: 24.
Em olsem na, yumi mas skelim olsem, Jisas Em i husat na tok bilong Em i trupela tok o nogat? Long wanem, sapos Jisas i stap olsem Em yet i tok, na tok bilong Em i tru, orait yumi mas harim gut olgeta tok bilong Em. Tasol, sapos Jisas i no olsem Em i tok na tok bilong Em i no trupela tok, orait yumi ken i lusim Tok bilong God na yumi raun long laik bilong yumi yet.
Sapos tok bilong Jisas i tru, orait yumi mas i stap aninit long Jisas na yumi trastim Em na lavim Em. Tasol, sapos tok bilong Jisas i no tru, orait yumi ken i stap aninit long ol tumbuna bilong yumi na yumi ken i harim na bihainim tok bilong ol.
Yumi mas skelim Jisas – Jisas Em i God o Jisas Em i wanpela giaman man nating. Long wanem, ensa bilong dispela kain kwesten bai stiaim bilip bilong yumi. Em olsem na, sapos Jisas Em i God, orait yumi bai bilipim na trastim na bihainim Jisas. Na sapos Jisas Em i wanpela giaman man nating, orait yumi bai bilipim na trastim na bihainim ol tok na kastem pasin ol tumbuna i givim yumi.
Long buk bilong em Mak em i helpim yumi skelim Jisas, bai yumi ken i save long Jisas Em i husat. Mak em i kisim ai witnis toktok bilong Pita bilong helpim yumi skelim na kisim save long Jisas.
Evidens namba 1:
Pastaim Mak em i stori long wanpela tok God i bin mekim long profet Aisaia. God i tokim Aisaia olsem, “Mi bai kam, na taim Mi kam, orait ol manmeri bai lukim ol sain olsem, aipas man i lukluk, na iapas man i harim, na mauspas man i toktok, na lek nogut man i wokabaut. Em olsem na, Mak i tok olsem, Jisas i bin wokim ol dispela kain samting. Long dispela tok Mak em i makim Jisas Em i God i kam olsem Aisaia i tok.
Evidens namba 2:
Na Mak i putim ol sampela evidens moa bilong sapotim tok bilong em. Olgeta manmeri ol i save olsem, God wanpela tasol i ken i rausim na fogivim sin. Long wanem, taim wanpela man i mekim sin, orait em i rongim God, na sapos God i laik rausim na fogivim sin, orait Em wanpela i gat rait long mekim olsem. Em olsem na, Jisas Em i rausim na fogivim sin bilong wanpela lek nogut man. Sin na hevi bilong sin tupela i pas wantaim, na taim Jisas i rausim hevi bilong sin, orait dispela i soim olsem Jisas i rausim na fogivim sin. Jisas i gat pawa bilong rausim sin na hevi bilong sin wantaim. Long dispela as lek nogut man i kirap na i wokabaut.
Evidens namba 3:
Long stadi namba 4 yumi bin skelim tok bilong Jisas yet. Jisas yet i tok save olsem, Mi Pikinini Bilong Man bilong visin bilong Daniel. Long visin Daniel i lukim God Bilong Oltaim Oltaim i sindaun long sia king bilong Em. Na em i lukim wanpela i kam, na i luk olsem em i olsem pikinini bilong man. Na God Bilong Oltaim Oltaim i givim namba long Em bilong bosim olgeta samting, na i givim glori long Em, na i givim kingdom long Em, bai olgeta manmeri bilong olgeta kantri na bilong olgeta tok ples bai i stap aninit long Em. Na Em bai bosim olgeta samting oltaim oltaim; namba bilong em i no inap pinis, na kingdom bilong Em i no inap lus. (Daniel 7:13-14.)
Em olsem na, taim Jisas i yusim nem “Pikinini Bilong Man” bilong makim Em yet, orait i olsem Jisas i tok, Mi Pikinini Bilong Man bilong visin bilong Daniel. Mi gat namba bilong bosim olgeta samting, na Mi gat glori olsem God i gat glori, na Mi i stap King bilong kingdom bilong God.
Na yumi mas save olsem, dispela tok bilong Jisas em i wanpela bikpela bikpela tok stret, na yumi mas skelim. Jisas Em i Pikinini Bilong Man olsem Em i tok o Em i longlong tasol na Em i mekim tok nating? Yumi no ken i pasim tingting. Nogat. Long wanem, sapos Jisas Em i Pikinini Bilong Man olsem Em i tok, orait yumi mas harim tok bilong Em. Tasol, sapos Jisas Em i longlong tasol na Em i tok nating tasol, orait yumi ken i givim baksait long Em, em i no gat samting.
Yumi save pinis olsem, long histori bilong dispela graun Jisas Em i trupela man i kamap na i stap. Ol planti saveman bilong histori i sapotim dispela toktok. Tasol Jisas Em i husat? Jisas i stap olsem wanem? Em i Pikinini Bilong Man o Em i longlong? Em i God o Em i giaman?
Evidens namba 4 bilong Mak i olsem – Jisas i gat namba bilong planti samting.
Orait, long buk bilong em Mak i putim ol wanwan evidens moa bilong soim olsem, Jisas Em i no longlong, nogat, Jisas i Pikinini Bilong Man olsem Em i tok. Taim Jisas i raun long dispela graun wantaim ol disaipel, orait Em i mekim ol wanwan samting bilong soim pawa bilong Em na bilong soim namba bilong Em. Yumi skelim….
- Jisas i gat namba na pawa bilong autim tok. (Mak 1:17 na Mak 1:21-21 na Mak 2:25-27 na Mak 3:20-30, 30-15 na Mak 4:1-34 na Mak 7:14.)
- Jisas i gat namba na pawa bilong rausim ol kainkain sik. (Mak 1:29-31 na Mak 1:40-42 na Mak 2:1-12 na Mak 3:1-6 na Mak 5:25-34 na Mak 6:53-56 na Mak 7:31-37 na Mak 8:22-26.)
- Jisas i gat namba na pawa bilong bosim ol samting bilong dispela graun. (Mak 4:35-41 na Mak 6:45-52.)
- Jisas i gat namba na pawa bilong bosim kaikai. (Mak 6:30-44 na Mak 8:10.)
- Jisas i gat namba na pawa bilong bosim na kontrolim ol spirit nogut. (Mak 1:21-28 na Mak 3:7-12 na Mak 5:1-13 na Mak 7:24-30.)
- Jisas i gat namba na pawa bilong rausim na fogivim sin. (Mak 2:1-12.)
- Jisas i gat namba na pawa bilong bosim laip na dai. (Mak 5:35-42.)
Ol disaipel i lusim laip bilong ol bilong bihainim Jisas.
Jisas Em i narapela kain man olgeta. Long wanem, i no gat narapela man long histori bilong dispela graun i mekim ol kainkain samting olsem Jisas i mekim. Nogat. Ol disaipel i lukim olgeta samting Jisas i bin mekim, ol i ai witnisim olgeta samting Jisas i mekim, na ol i givim laip bilong ol bilong bihainim Jisas na bilong autim tok bilong Jisas. Sapos Jisas i no wokim olgeta samting olsem Mak i tok, orait i no gat as long ol disaipel i givim laip bilong ol bilong bihainim Jisas.
Na yu tingim, bihain, ol disaipel ol i lusim laip bilong ol bilong difenim Jisas na bilong difenim olgeta tok bilong Jisas. Sapos Jisas i no olsem Mak i tok, orait ol disaipel ol i no inap lusim laip bilong ol bilong difenim ol giaman samting. Nogat. Olsem na, yumi ken i save olsem, ol i lukim trupela samting na ol i lusim laip bilong difenim samting i tru, i tru olgeta.
Na sapos Jisas Em i no olsem Em yet i tok na Em i longlong, orait Em i no inap mekim ol samting olsem Em i bin mekim. Man nating i no inap mekim ol samting Jisas i mekim. Longlong man i no inap mekim ol samting Jisas i mekim. Nogat tru. Em olsem na yumi ken i save olsem, Jisas i stap olsem Em yet i tok. Jisas Em i Pikinini Bilong Man. Jisas Em i God.
Ol birua bilong Jisas ol i ai witnisim Jisas.
Yu tingim. Ol birua bilong Jisas ol tu ol i ai witnisim ol samting bilong Jisas. Na i no gat wanpela bilong ol i tok, “Yupela giaman, Jisas i no wokim wanpela samting.” Nogat. Ol i lukim Jisas i wokim ol kainkain samting na ol i no gat toktok long dispela. Tasol, ol i jelas long ol samting Jisas i wokim na ol i tok, Jisas i yusim namba na pawa bilong Satan na Em i wokim. (Lukim Mak 3.22-30.) Ol samting Jisas i mekim i stap ples klia tasol na i no gat toktok. Ol birua i komplen long as bilong namba na pawa bilong Jisas tasol. Long wanem, ol i les long tanim bel na bilipim na trastim na bihainim Jisas.
Taim Jisas i mekim ol kainkain mirakel samting, orait Em i soim olsem, Em i Pikinini Bilong Man Daniel i bin lukim long visin bilong em. Tru tumas, Jisas i gat namba na pawa bilong bosim na kontrolim olgeta samting na wanpela samting i no lus long namba na pawa na bosim na kontrolim bilong Jisas. Ol dispela samting em i mak bilong Pikinini Bilong Man. (Na em i no mak bilong namba na pawa bilong Satan olsem ol birua bilong Jisas i tok.)
Jisas Em i husat?
Orait. Nau yumi skelim gen Mak 8:27-30. Jisas i putim planti samting bilong Em long ples klia long ai bilong ol disaipel na long ai bilong ol manmeri. Jisas i putim namba na pawa bilong Em long ples klia long olgeta manmeri. Ol i lukim planti samting na ol i mas wokim disisen bilong ol.
Em olsem na, ol i gat wanem tingting long Jisas Em i husat?
- Sampela manmeri ol i tingim olsem Jisas Em i Jon bilong baptais i kirap bek.
- Sampela manmeri ol i tingim olsem Jisas Em i Elaija.
- Sampela manmeri ol tingim olsem Jisas Em i wanpela bipo profet i kirap bek.
Tasol Jisas i tokim ol disaipel olsem, “Na yupela? Yupela tingim olsem Mi husat?”
Na Pita i kisim maus bilong olgeta disaipel na em i tok olsem, “Yu Krais.” Pita em i skelim olgeta samting Jisas i bin mekim, olgeta samting em i lukim na witnisim, na em i klia olsem, Jisas Em i God i kam i stap namel long ol na Jisas Em i Pikinini Bilong Man Daniel i bin lukim long visin bilong em. Pita i klia olsem, Jisas Em i Krais ol profet i bin promisim. (Nem “Krais” i minim olsem “Man God i makim”.)
Orait, nau yu mas tingim na skelim, Jisas Em i husat? Mi laik givim wanpela stia tok long yu pastaim. Plis, yu no ken i tok, “Yes, Jisas Em i God i kam,” na yu stap nating na yu givim baksait long Jisas.
Mi tok piksa long wanpela man. Em i sindaun long haus bilong em na kunai bilong haus i paia. Na ol manmeri ol singaut singaut olsem, “Haus bilong yu i paia!” Em olsem na man i sindaun long haus, em i harim singaut bilong ol, na em i tingim olsem, “Ating ol i mekim trupela tok.” Tasol em i no kirap na ron i go autsait, nogat, em i givim baksait long singaut bilong ol na em i sindaun i stap tasol.
Plis, yu no ken i stap olsem dispela man. Yu no ken i tok olsem, “Ating ol i mekim trupela tok – Jisas Em i God i kam – tasol yu no kirap na yu stap nating tasol.
Sapos yu skelim tok bilong Mak na yu bilip olsem, Jisas Em i God i kam, orait yu mas harim tok bilong Em na yu mas bihainim Em. Yu mas lusim ol toktok i no pas long tok bilong Jisas. Yu mas lusim ol lotu i no save harim na bihainim tok bilong Jisas. Na yu mas lusim ol bilip samting bilong tumbuna na bilong ples na yu mas harim tok bilong Jisas na bihainim Em. I no gat narapela rot.
Jisas yet i tok, “Mi yet Mi rot. Wanpela manmeri i no inap i go long Papa long narapela rot. Nogat. Long Mi tasol.” Em olsem na, yumi mas bilipim na trastim tok bilong Jisas.
Na yumi i bilipim na trastim na bihainim Jisas pinis, orait yumi no ken i seksek moa. Long wanem, yumi bihainim na yumi pas na yumi bilipim na trastim King bilong kingdom bilong God. Jisas Em i gat namba na Em i gat pawa na Em i save long trupela rot bilong God. Em olsem na, yumi i pas long Em, orait yumi pas long trupela trupela rot olgeta na i no gat as long yumi lusim na i go long ol narapela rot.
Em tasol.
