Yu gat wanem tingting – Mani em i gutpela samting o em i samting nogut? Sampela manmeri i tok olsem, “Mani i no gutpela samting na yumi mas givim baksait long mani na yumi no ken i tingting long kamapim mani, na yumi no ken i mekim wok mani.”
Lukim wanpela K10. Orait, dispela samting yet i gutpela o em i nogut? Yu save, mani yet em i namel samting. Em i pepa samting tasol, em i no gutpela na em i no nogut, em i namel samting tasol.
Sapos yu yusim dispela K10 bilong baim marasin bilong pikinini bilong yu na pikinini i kirap long sik, orait dispela K10 em i gutpela, a? Tasol, sapos yu yusim dispela K10 bilong baim bia na yu spak na rausim klos bilong yu long ai bilong ol manmeri, orait dispela K10 em i no kamapim gutpela samting.
Yu save, mani yet i no gutpela na i no nogut – em i namel samting.
Aposel Pol i tok olsem, “God i givim yumi planti gutpela samting bilong yumi ken i amamas.” (1 Timoti 6:17.) God i givim mani long yumi bilong yumi ken i amamas. God i givim mani wantaim planti kainkain samting long yumi bilong yumi ken i amamas. God i laik yumi kisim amamas na i stap.
Olsem na, yumi no ken i givim baksait long gutpela samting God i givim yumi. Na yumi no ken i tok nogut long gutpela samting God i givim yumi. Yumi no ken i brukim dispela gutpela samting God i givim yumi na tromoi nating. Nogat. Mani yet em i namel samting, tasol God i givim dispela samting long yumi bilong yumi ken i amamas. Yumi i laik bihainim Jisas trutru yumi no ken i tingting nogut na daunim samting God i save givim yumi bilong yumi ken i amamas.
Tasol yumi mas lukaut. Long wanem, sampela taim mani i gutpela long yumi, tasol sampela taim mani i no gutpela long yumi. Mani i gutpela o i nogut long yu dipens long hau yu kisim mani bilong yu, na hau yu holim mani bilong yu, na hau yu yusim mani bilong yu.
Nau mi laik toktok long dispela 3-pela samting. Long wanem? Em i dispela 3-pela samting i ken i paulim yumi long sait bilong mani na spoilim gutpela samting God i givim yumi. Em i dispela 3-pela samting i ken i kamapim asua long yumi long sait bilong mani.
Em olsem na, sapos yumi laik bihainim Jisas long gutpela wei, orait yumi mas lukaut gut long dispela 3-pela samting. Mani i gutpela long yu o em i nogut long yu dipens long hau yu kisim mani bilong yu, na i dipens long hau yu holim mani bilong yu, na i dipens long hau yu yusim mani bilong yu. Na sapos yu wokim stret long dispela 3-pela samting, orait ating mani bai stap i gutpela samting long yu na yu no gat asua long sait bilong mani.
1. Hau yu kisim mani bilong yu.
Sapos yu stilim mani, orait dispela i no gutpela. Yu klia pinis dispela pasin i rong. Na sapos yu stilim mani, orait dispela mani bilong yu i no gutpela na yu gat asua. Long wanem? Yu kisim dispela mani long rong wei. Lukim Efesus 4:28.
Sapos yu giamanim sampela man na yu grisim em long givim sampela mani long yu, orait dispela tu em i no gutpela. Dispela pasin tu em i rong. Sapos yu tokim brata bilong yu olsem, “Mi nidim sampela mani bilong baim marasin bilong pikinini bilong mi.” Tasol yu giaman na yu laik kisim mani bilong pilai kads, em nau, yu wokim pasin nogut na yu kisim mani long rong wei. Lukim Efesus 4:25.
Sapos yu tok strong long wanpela man na em i givim mani long yu, orait yu wokim pasin nogut. Yu mekim rong pasin na yu kisim mani long rong wei. Lukim Efesus 4:28.
Sapos yu tingting long kamap pasta bilong mekim wok mani tasol, orait yu kisim tingting nogut na yu mekim pasin nogut na yu kisim mani long rong wei. Lukim 1 Timoti 6:3-8. Ol samting bilong wei bilong God i no samting bilong kamapim mani. Olsem na, yu no ken i tingting long yusim ol samting bilong wok bilong God bilong kamapim mani bilong yu.
Sapos yu prenim wanpela waitman bilong kisim mani na yu kisim mani long dispela wei, orait yu mekim pasin nogut na yu kisim mani long rong wei. Long wanem? Yu giamanim waitman na yu no pren trutru bilong em. Nogat. Yu tingting long kisim mani tasol na yu prenim em. Na dispela pasin i no stret. Lukim Efesus 4:25, 29.
Sapos yu pilai kads na kisim mani, orait yu mekim pasin nogut na kisim mani long rong wei. Long wanem? Dispela mani yu kisim em i no mani bilong wanpela man, nogat. God i givim mani long em bilong sevim meri bilong em na bilong sevim ol pikinini bilong em na ol i ken i amamas i stap.
Olsem na, taim em i pilai kads na tromoi mani em i tromoi mani bilong meri na pikinini bilong em. Na sapos yu kisim, orait i olsem yu sotim mani bilong ol sampela meri na ol sampela pikinini.
Na yu no ken i tok olsem, “Dispela em i asua bilong manya.” Nogat. Long wanem? Maski manya i kisim tingting nogut na tromoi mani, stil dispela mani em i mani bilong meri pikinini bilong em na em i no mani bilong yu. Na i no rait long yu kisim nating na yusim mani bilong narapela manmeri.
Yu save, i gat planti wei bilong kisim mani long rong wei. Mani yet i no samting nogut, tasol sapos yu kisim mani long rong wei, orait dispela mani em i nogut na yu mekim pasin nogut.
Aposel Pol i tok long Efesus 4:28 olsem, “Ol stilman i no ken i stil moa. Nogat. Nau ol i mas wok. Ol i mas mekim gutpela wok long han bilong ol yet. Na long dispela wei ol i ken i kamapim gutpela samting na ol i ken i helpim sampela manmeri i sot.”
Olsem na, wok em i rait wei bilong kamapim mani. Yumi mas kisim mani long rait wei na yumi ken i amamas na yumi ken i sindaun gutpela aninit long God.
2. Hau yu holim mani bilong yu.
Yu save, sampela manmeri i save lavim mani na ol i amamas long mani. Ol i lavim mani na ol i hangre tru long kisim mani. Na ol i tingim olsem, “Sapos mi gat mani, orait mi ken i baim planti gutpela samting na ol dispela samting mi baim bai kamapim bikpela amamas long mi na mi bai stap gut.” Ol i tingim olsem, “Sapos mi gat mani mi bai kisim biknem na ol manmeri bai lukap long mi na mi bai kisim bikpela amamas na bai mi stap gut tru.”
Yu save, ol i tingim olsem mani yet em i as bilong amamas, na long dispela as ol i lavim mani na ol i amamas long mani na ol i hangre long kisim mani.
Tasol mani i no as bilong trupela amamas. Nogat. God Em i as bilong trupela amamas. God Em i as bilong olgeta samting i gutpela, olsem na, God Em i as bilong trupela amamas. God i givim mani long yumi bilong lukautim yumi, bai yumi tingim God, na yumi tingim gutnius bilong God. Na taim yumi tingim God na tingim gutnius bilong God, orait bai yumi amamas long God na lavim Em.
Harim. Mani i no inap kamapim trupela amamas i stap oltaim oltaim. Nogat. Trupela amamas i stap oltaim oltaim i kamap long rot bilong gutnius bilong God. Trupela amamas i stap oltaim oltaim i kamap long rot bilong feitful wok bilong Jisas long diwai kros.
Trupela amamas i save kamap long manmeri i tanim bel na i bilipim na trastim feitful wok bilong Jisas long diwai kros na i bihainim Em. Olsem wanem? Manmeri i bilipim na trastim na bihainim Jisas, ol i save olsem, God yet i bin singautim ol, na Krais Jisas i bin mekim wok long diwai kros bilong sevim ol, na Holi Spirit i bin opim ai na ia na bel bilong ol na i givim bilip long ol.
Em olsem na ol i klia olsem, ol i sin manmeri, tasol ol i no inap tru long lukim bel hat bilong God long sin na feil bilong ol, long wanem, Jisas i kisim pe bilong sin na feil bilong ol pinis long diwai kros. Taim Jisas i dai long diwai kros, orait Em i kisim bel hat bilong God long sin bilong ol. Em olsem na taim ol i tingim olgeta wok God i bin mekim bilong ol, ol i kisim bikpela amamas, na bikpela tok tenkyu bilong ol i go olgeta long God, Papa bilong gutnius.
Yu save, mani yet i no inap kamapim trupela amamas i stap oltaim oltaim. Nogat. Gutnius bilong God, feitful wok bilong Jisas long diwai kros, i save kamapim trupela amamas – mani i no inap tru.
Sapos yu tingim mani i ken i kamapim amamas, orait yu kisim rong tingting. Lukim 1 Timoti 6:6-10. Mani em i gutpela blesim bilong God, tasol sapos yumi lavim mani, orait yumi bai pundaun na yumi bai go insait long ol kainkain pasin nogut na dispela bai kamapim hevi long yumi tasol. Lukim gut lain 10.
Jisas i tok long Matyu 22:37 olsem, “Yupela mas lavim God, BIKPELA bilong yumi. Yupela mas lavim Em tru long bel bilong yupela na long laip bilong yupela na long tingting bilong yupela.”
Na tu, yumi no ken i tingim olsem yumi ken i lavim God na mani tupela wantaim. Nogat. Jisas i tok long Matyu 6:24 olsem, “Wanpela man em i no inap aninit na bihainim tupela bosman, nogat. Em bai hetim wanpela na lavim narapela, o, em bai aninit long wanpela olgeta na givim baksait long narapela. Yu no inap aninit na bihainim God na mani wantaim.”
Sapos yu lavim mani na yu tingim mani bai kamapim trupela amamas long yu, orait yu mekim pasin nogut na yu holim mani bilong yu long rong wei. Yumi no ken i lavim mani, nogat. Yumi mas lavim God tasol. Na taim God i kamapim sampela mani long yu, orait yu tok tenkyu long God na yu yusim dispela mani long gutpela samting.
3. Hau yu yusim mani bilong yu.
Mani yet i no samting nogut. Tasol, sapos yu yusim long rong wei, orait dispela samting i nogut.
Sapos yu yusim mani bilong yu bilong baim gan bilong pait, orait yu yusim mani long rong wei na dispela i no gutpela.
Sapos yu yusim mani bilong baim bia na spak, orait yu mekim pasin nogut na yu yusim mani long rong wei.
Sapos yu yusim mani bilong baim pamuk meri, orait yu mekim pasin nogut na yu yusim mani long rong wei.
Orait, wanem wei em i gutpela wei bilong yusim mani God i givim yumi?
Jisas i tok olsem, yumi mas lukautim femili bilong yumi. Olsem na, sapos yumi yusim hap mani bilong yumi bilong baim sop na klos na marasin na kaikai bilong femili bilong yumi, orait yumi yusim mani long gutpela wei. Lukim 1 Timoti 5:4 na 8.
Jisas i tok, yumi mas serim mani God i givim yumi wantaim manmeri i nidim tru sampela helpim. Olsem na, yumi ken i yusim hap mani bilong yumi bilong dispela samting. Lukim 1 Timoti 6:18.
Jisas i tok, yumi mas sapotim man i autim trupela tok bilong God. Yumi mas sapotim man i tisim yumi gut long olgeta samting bilong Tok bilong God. Man i stap fultaim long wok bilong God em i no gat gaden na em i mas kisim kaikai long mani tasol. Olsem na, yumi ken i yusim hap mani bilong yumi bilong dispela samting. Lukim 1 Timoti 5:17-18.
Na Jisas i tok, yumi ken i yusim mani bilong kisim amamas. Olsem na, yumi ken i yusim sampela mani bilong yumi bilong baim PMV na go daun long Lae na visitim ol sampela femili bilong yumi na amamas long sindaun liklik wantaim ol. Lukim 1 Timoti 6:17.
Yumi no ken i yusim olgeta mani bilong yumi long wanpela samting, nogat. Yumi mas yusim het na yusim mani long gutpela wei long ol wanwan samting. Na ol dispela wei i gutpela wei bilong yusim mani God i save givim yumi.
Las toktok.
Mani em i wanpela gutpela blesim God i save givim yumi manmeri. I gat planti blesim God i save givim yumi na mani em i wanpela. Tasol, yumi mas lukaut long hau yumi kisim mani na hau yumi holim mani na hau yumi yusim mani.
Yumi no ken i givim baksait long mani, na yumi no ken i lavim mani. Yumi mas kisim long gutpela wei na yusim long gutpela wei. Yumi mas yusim het bilong yumi. Na yumi mas tok tenkyu long God long mani Em i bin givim yumi.
Hau na bai yupela yusim mani bilong yupela? Yu yet yu tingting na skelim. Yu no ken i tingting long hau narapela man i save yusim mani God i givim em, nogat. Yu mas tingting long hau yu save yusim mani God i givim yu.
Em tasol.
