Long 4-pela wik nau yumi bin skelim tok bilong Jisas long ol wanwan samting bilong helpim yumi bihainim Jisas long ol gutpela wei.
Yumi no wok long bihainim Jisas bai Jisas i ken i laikim yumi na kisim bek yumi. Nogat tru! Yumi bihainim Jisas bikos Jisas i bin mekim olgeta wok inap pinis bilong God i ken i kisim bek yumi. Olsem na, taim Holi Spirit i opim ai na ia na bel bilong yumi na yumi klia long feitful wok bilong Jisas na yumi tanim bel na bilipim na trastim feitful wok bilong Jisas, em nau, long dispela taim, God i kisim bek yumi pinis na Em i kisim yumi kam insait pinis long femili bilong God. Long dispela as tasol nau yumi lavim Jisas na yumi amamas long bihainim Jisas long ol gutpela wei.
Nau yumi bai skelim Tok bilong Jisas long sait bilong marit. Jisas i tok wanem long ol samting long sait bilong marit?
Na fes samting mi laik tokim yupela long sait bilong marit em i olsem….
Marit na marit pasin em i gutpela samting God yet i bin kamapim.
Em i no tumbuna bilong yumi i kamapim marit. Nogat. Na ol waitman ol i no kamapim marit. Nogat. Marit na marit pasin em i gutpela samting God yet i kamapim. God yet i kamapim dispela samting.
Tingting i go bek long Jenesis sapta 1 na 2. Yu save, God yet i wokim man na God yet i wokim meri. Na God i wokim tupela narapela kain narapela kain, na God i pasim tupela long marit. God i wokim manmeri olsem na Em i laik manmeri i mas sindaun olsem.
Taim ol Farisi i laik traim Jisas long ol toktok long sait bilong marit, Jisas i bin makim dispela toktok bilong Jenesis 1 na 2. Lukim tok bilong Jisas long Mak 10:6-8.
6 Tasol, taim God i bin kamapim olgeta samting Em i bin wokim ‘man na meri yet.’ (Jenesis 1:27) 7-8 ‘Na long dispela as, wanpela man em bai lusim papa bilong em na mama bilong em, na em bai go pas wantaim meri bilong em. Na tupela bai pas olgeta.’ (Jenesis 2:24) Olsem na, tupela i no tupela moa, nogat. Tupela i kamap wanpela tasol.
God i wokim man narapela kain na Em i wokim meri narapela kain, na God i wokim tupela olsem bilong tupela bai lusim papamama na tupela i pas long marit.
Long lain 8 Jisas i tok olsem, taim tupela i pas long marit, orait tupela bai pas olgeta – tupela bai kamap wanpela – bodi bilong tupela bai pas. Jisas i tok long marit pasin. Taim tupela i pas pinis long marit, orait tupela i kamap wanpela pinis. Long dispela as tasol, tupela bai pasim bodi bilong tupela long marit pasin na tupela bai i stap wanpela bodi.
Olsem na, yumi tok pinis olsem, marit na marit pasin em i aidia bilong God. God yet i tingim dispela gutpela samting na kamapim dispela gutpela samting. Em i no samting ol manmeri yet i bin kamapim. Nogat. God i bin kamapim.
God tasol Em i rait man bilong tokim yumi long olgeta samting bilong marit.
God yet i kamapim marit na marit pasin, olsem na, God Em i save long rait wei bilong marit. Em yet i kamapim, olsem na, Em yet i ken i tokim yumi long rait wei bilong yumi ken i marit. God tasol Em i rait man bilong tokim yumi long olgeta samting long sait bilong marit. God yet i kamapim dispela samting, na God yet i gat save long dispela samting. Na God yet i mas tokim yumi na stiaim tingting bilong yumi bilong dispela samting.
Olsem na, yumi i laik bihainim Jisas long gutpela wei long sait bilong marit bilong yumi, orait yumi mas harim gut tok God i mekim na tok Jisas i mekim long dispela samting. Yumi no ken i kisim ol tingting bilong ol tumbuna na ol manmeri bilong ples long dispela samting. Nogat. Ol i no save gut long dispela samting. God tasol i save gut bikos God yet i bin kamapim marit.
Orait God i tok wanem? Jisas i tok wanem long ol samting long sait bilong marit?
1. Wanpela man na wanpela meri tasol i ken i pas long marit.
Lukim gen Mak 10:6-8. Jisas i tok klia olsem, God i wokim man na meri yet, na Em i pasim tupela long marit. Em i wokim wanpela man na wanpela meri, na long dispela as wanpela man bai lusim papamama, na wanpela meri bai lusim papamama, na dispela wanpela man na dispela wanpela meri bai pas long marit, na tupela i kamap wanpela.
Jisas i no tok, wanpela man bai pas wantaim 2-pela meri na ol 3-pela i ken i pas long marit na 3-pela i ken i kamap wanpela. Nogat. Wanpela man na wanpela meri i ken i pas long marit na bodi bilong tupela i ken i pas na tupela i kamap wanpela.
Dispela wei em i wei bilong God long sait bilong marit. God i no gat narapela wei. Olsem na, taim wanpela man i kisim tupela meri, orait em i wokim pasin i no pas long wei bilong God. Em i sakim wei bilong God na em i no bihainim wei bilong God.
Na tu, dispela toktok i pasim pasin bilong ol yangpela manmeri we ol i save mekim marit pasin autsait long marit. Ol i no marit na ol i mekim marit pasin.
Wanpela man na wanpela meri, tupela bai lusim papamama bilong tupela pastaim, na tupela bai pas pastaim long marit na kamap wanpela long marit pastaim. Na taim tupela i pas pinis long marit, orait tupela ken i pas olgeta long bodi na kamap wanpela bodi.
Olsem na, sapos yu no marit, orait yu no ken i pasim bodi bilong yu long narapela. Dispela pasin em i bilong man na meri i pas wantaim long marit. Em i no bilong ol yangpela manmeri i no pas long marit. Yupela mas wet, na taim yupela marit pinis wantaim, orait yupela ken i pasim bodi bilong yupela wantaim.
Tok bilong Jisas i tambuim pasin bilong man i pasim bodi bilong em long meri i no meri bilong em, na i tambuim pasin bilong meri i pasim bodi bilong em long man i no man bilong em, na i tambuim pasin bilong pasim bodi long ol 2 kina meri, na i tambuim pasin bilong paulim meri na paulim man bilong ol narapela manmeri. God i hetim ol dispela kain pasin. Marit pasin em bilong man na meri i pas pinis long marit tasol. Em i no bilong ol narapela manmeri.
Yumi i laik bihainim Jisas, orait yumi mas bihainim wei bilong God tasol, na yumi pasim bodi bilong yumi long man bilong yumi na long meri bilong yumi insait long marit tasol.
2. Yumi no ken i katim marit.
Lukim Mak 10:9. Jisas i pinisim tok bilong Em long ol Farisi.
9 Olsem na, samting God i bin pasim, orait wanpela man i no ken i katim.
Tok bilong Jisas i klia olgeta long dispela samting. Jisas i tok, “Samting God i bin pasim, orait wanpela man i no ken i katim.”
Yumi mas save olsem, taim wanpela man na wanpela meri i marit, orait tupela i pas na tupela i marit long ai bilong God. God i kamapim marit na Em i pasim man na meri long marit. Olsem na, samting God i pasim, yumi no ken i katim. Yumi no ken i katim marit bikos God Em i pasim man na meri long marit.
Aposel Pol i kisim maus bilong God na em i bin tokaut long dispela samting tu.
Lukim 1 Korin 7:10-11.
10 Orait, mi givim wanpela lo nau long ol marit manmeri. Em i no mi i givim, Em i BIKPELA i givim. Na dispela lo i olsem, meri em i no ken i lusim man bilong em. 11 Tasol, sapos em i lusim man bilong em pinis, orait em mas i stap singel o em i ken i go bek long man bilong em na oraitim marit bilong em, na em tasol. Na man em i no ken i katim marit na rausim meri bilong em.
Olsem na, Tok bilong God em i klia long sait bilong katim marit – yumi no ken i katim. Yumi mas marit long wanpela meri na long wanpela man i go i go olgeta. Yumi no ken i katim marit bilong yumi.
3. Sapos yu katim marit pinis, orait yu no ken i maritim narapela.
Lukim Mak 10:10-12.
10 Bihain, taim Jisas i stap insait long haus, ol disaipel bilong Em i askim Em gen long dispela tok bilong katim marit. 11 Na Jisas i tokim ol olsem, “Sapos wanpela man i katim marit na rausim meri bilong em, na em i go marit long narapela meri, orait em i mekim pasin pamuk, na dispela pasin pamuk i rongim fes meri bilong em. 12 Na sapos meri i lusim man bilong em, na em i go marit long narapela man, orait em i mekim pasin pamuk tu.”
Sapos wanpela man i katim marit na em i go maritim narapela meri, orait i olsem dispela man i mekim pasin pamuk. Na long dispela pasin em i rongim fes meri bilong em. Na wankain olsem, sapos meri i go maritim narapela man, orait i olsem dispela meri i mekim pasin pamuk, na long dispela pasin em i rongim fes man bilong em.
Pol tu i mekim wankain toktok. Lukim gen 1 Korin 7:10-11. Sapos yu katim marit, orait tupela mas i stap singel tasol. Tupela no ken i go na marit gen long ol narapela. Long wanem? Long ai bilong God marit bilong tupela i no kat. Nogat. Tupela i stap separet tasol.
Olsem na, tupela no ken i go na maritim narapela man na maritim narapela meri. Nogat. Tupela ken i stap separet na i stap singel o tupela ken i stretim marit bilong tupela na pas gen long marit. Tasol tupela no fri bilong i go na maritim narapela man o meri.
Olsem na, ol manmeri i katim marit na marit gen long narapela, ol i sakim tok bilong God na ol i mekim pasin nogut tasol. Yumi i laik bihainim Jisas, yumi no ken i katim marit. Tasol, sapos marit bilong yumi i nogut na yumi laik i stap separet, orait yumi ken i stap separet tasol yumi no ken i marit gen. Nogat. Sapos yu laik i stap marit, orait yu mas stretim rong bilong marit bilong yu na yu go bek gen long man bilong yu, na yu go bek gen long meri bilong yu, na yu pas long em tasol.
4. Manmeri i bilip long trupela gutnius ol i mas marit long manmeri i bilip long trupela gutnius.
Yumi lukim 2 Korin 6:14-15. Pol i tokim ol manmeri i bilipim na trastim Jisas olsem, “Yupela no ken i pas wantaim ol manmeri i no bilip. Long wanem? Stretpela pasin na pasin i no stret i no inap poroman. Na tulait na tudak i no inap pas wantaim. Na Krais i no inap wanbel wantaim Satan. Na olsem wanem manmeri i bilip i ken i pas wantaim manmeri i no bilip?”
Na lukim 1 Korin 7:39. Na gen Pol i mekim tok long ol manmeri i holim trupela bilip. Em i tok, “Marit i pasim meri long man bilong em i go i go olgeta. Tasol, sapos man bilong em i dai pinis, orait em i fri long maritim wanem man em i laik maritim, tasol em i mas maritim man i pas long BIKPELA.”
Pol i tok long manmeri i tanim bel pinis na i bilipim na trastim feitful wok bilong Jisas pinis na ol i laik marit. Olsem na, yumi bilip manmeri, yumi mas maritim manmeri i tanim bel pinis na i bilipim na trastim feitful wok bilong Jisas olsem yu save bilipim na trastim. Yumi no ken i maritim manmeri i no bilip olsem yumi bilip. Yumi no fri long maritim manmeri i no bilipim na trastim feitful wok bilong Jisas. Nogat. Yumi mas maritim manmeri i holim wankain bilip yumi save holim.
Em nau. Yumi klia liklik long 4-pela toktok Jisas (Tok bilong God) i bin mekim long sait bilong marit. Olsem na, yumi i laik bihainim Jisas yumi mas bihainim ol dispela tok bilong Jisas long sait bilong marit.
Yumi ken i pilim hevi long ol dispela tok bilong God long ol samting bilong marit.
Ol dispela Tok bilong God long sait bilong marit em i hatpela tok long yumi manmeri bilong dispela graun. Long wanem, yumi sin manmeri na sin bilong yumi i save spoilim marit bilong yumi na planti bilong yumi i katim marit pinis na yumi marit gen. Planti bilong yumi i feil pinis long Tok bilong God long sait bilong marit. Olsem na, yumi olsem wanem nau?
Olgeta taim yumi mas tingim, Jisas Em i pren bilong sin manmeri. Jisas i bin mekim wok long diwai kros bilong stretim kot bilong sin bilong sin manmeri, na yumi i bilipim na trastim na bihainim feitful wok bilong Jisas pinis, orait yumi ken i save olsem, Jisas i stretim kot bilong sin na feil bilong yumi pinis.
Yumi feil pinis long marit bilong yumi. Yumi olgeta i feil pinis long marit bilong yumi. Yumi olgeta i nidim Jisas long stretim kot bilong yumi long sin na feil bilong marit bilong yumi wankain olsem yumi nidim Jisas long stretim kot bilong ol narapela sin na feil bilong yumi.
King Devit i bin feil long marit bilong em na em i mekim pasin nogut long marit bilong em. Tasol, Devit i save olsem, God Em i God bilong stretim feil manmeri, na bihain, taim em i tingim God na tingim pasin God i mekim bilong kisim bek em, orait Devit i mekim dispela tok (yu ken i lukim long Rom 4:7-8),
7 “Manmeri i kisim amamas tru,
ol i manmeri God i fogivim olgeta rong bilong ol
na Em i karamapim olgeta sin bilong ol.
8 Man i kisim amamas tru,
em i man BIKPELA i no tingting moa
long sin bilong em.” (Buk Song 32:1,2)
Yumi sin manmeri, maski wanem kain sin yumi i bin mekim, yumi i bilipim na trastim feitful wok bilong Jisas yumi ken i amamas bikos God i save fogivim olgeta rong bilong yumi na Em i karamapim olgeta sin bilong yumi na Em i no tingting moa long sin bilong yumi.
Sapos i gat rot bilong stretim feil bilong yumi long marit bilong yumi, orait yumi stretim. Tasol sampela taim i no gat rot bilong stretim feil bilong yumi. Em olsem na, sapos i no gat rot bilong stretim feil bilong yumi long marit bilong yumi, orait yumi larim dispela feil i stap long han bilong God. Na long rot bilong feitful wok bilong Jisas, God bai fogivim yumi na Em i no inap tingting moa long feil bilong yumi.
Las Toktok.
Wei bilong God em i bes wei. Wei bilong God em i gutpela wei. God yet i kamapim marit na God i klia gut long wanem wei em i nambawan wei bilong marit. Olsem na, God i no givim ol dispela lo long yumi long sait bilong marit bilong mekim sindaun bilong yumi i nogut. Nogat tru. God i givim ol dispela lo bilong marit bikos God Em i klia olsem ol dispela wei bilong God em i nambawan wei bilong marit na dispela wei bilong God em i nambawan wei bilong kamapim gutpela amamas long marit.
Olsem na, yumi no ken i bel nogut long wei bilong God long sait bilong marit. Nogat. Yumi mas amamas long bihainim wei bilong God long sait bilong marit bikos yumi klia olsem God i givim ol dispela lo bilong marit bilong kamapim gutpela marit long yumi na kamapim amamas bilong yumi insait long marit. Olsem na, yumi ken i wanbel olgeta long ol dispela tok bilong God long sait bilong marit.
Em tasol.
