Las wik yumi bin skelim tok bilong Jisas long sait bilong marit. (Lukim “Jisas i tok wanem long Marit (1)”). Nau dispela wik mi laik tokaut moa long tok bilong Jisas long ol samting long sait bilong marit.
Las wik yumi bin skelim ol sampela lo bilong God long sait bilong marit. Nau long dispela wik yumi bai skelim tok bilong Jisas long sait bilong sindaun bilong marit manmeri.
Orait, Jisas i tok wanem long sindaun bilong marit manmeri? Mi laik tokim yupela long 3-pela samting…
1. Tupela marit i mas kamap bes pren.
Las wik yumi bin lukim tok bilong Jisas long Mak 10:6-8. Jisas i bin tok olsem,
6 Tasol, taim God i bin kamapim olgeta samting Em i bin wokim ‘man na meri yet.’ (Jenesis 1:27) 7-8 ‘Na long dispela as, wanpela man em bai lusim papa bilong em na mama bilong em, na em bai go pas wantaim meri bilong em. Na tupela bai pas olgeta.’ (Jenesis 2:24) Olsem na, tupela i no tupela moa, nogat. Tupela i kamap wanpela tasol.”
Wei bilong God long sait bilong marit i olsem, man i mas lusim papamama, na meri i mas lusim papamama, na tupela i pas long marit na pas olgeta insait long marit bilong tupela, na tupela i kamap wanpela. Taim tupela i marit, orait tupela i no tupela moa. Nogat. Tupela i wanpela nau.
Em olsem na, sapos tupela i stap wanpela, orait tupela bai stap wantaim na mekim wok wantaim na slip wantaim na kamapim pikinini wantaim na raun wantaim na amamas wantaim. Long wanem? Tupela i no tupela moa. Nogat. Tupela i wanpela nau. Tupela i no ken i stap separet. Nogat. Tupela i wanpela nau. Tupela mas pas olgeta. Tupela mas i stap bes pren.
Na yumi save long pasin bilong bes pren. Taim tupela yangpela man i stap bes pren, na taim tupela yangpela meri i stap bes pren, orait tupela i save holim han o putim han antap long solda bilong narapela, na tupela i save raun wantaim na stori wantaim na lap wantaim na amamas wantaim. Yu save, tupela i pas olgeta na i stap bes pren.
Olsem na, taim wanpela man i lusim papamama na wanpela meri i lusim papamama na tupela i pas long marit, orait tupela i no tupela moa, nogat, tupela i wanpela. Tupela mas pas olgeta na i stap bes pren. God i pasim tupela long marit bilong tupela i ken i stap bes pren.
Long ples, ol man i save tingim olsem, meri em i samting bilong wokim gaden tasol, na bilong pikim kopi, na bilong mekim wok, na bilong slip wantaim, na bilong kamapim pikinini. Na ol i no tingim olsem meri em i bes pren bilong em. Ol i no klia gut long wei bilong God long marit na ol i stap tasol long pasin bilong ples long sait bilong marit.
Em olsem na, man i save raun olgeta taim wantaim ol mets bilong em. Em i save bes pren wantaim ol mets bilong em. Na tu meri i save bes pren wantaim ol sampela meri pren bilong ol tasol. Olsem na, tupela marit i stap separet tumas na tupela i no wanpela trutru. Tupela i stap tupela yet. Tupela i marit, tasol tupela i no pas tumas na i stap wanpela. Nogat. Tupela i no stap bes pren wantaim.
Na mi laik sutim sampela toktok long yupela……
Sapos yu lusim meri bilong yu long ples na yu go sindaun long Mosipi, orait hau na bai yutupela i kamap bes pren? Sapos yutupela i stap separet tumas, orait hau na bai yutupela kamap bes pren?
Na sapos yu save sindaun wantaim ol mets bilong yu na pilai kas na meri i save go long gaden na mekim wok, orait hau na bai yutupela i kamap bes pren? Yutupela no inap.
Yu save, sapos yu laik kamap bes pren wantaim meri bilong yu, na yu laik kamap bes pren wantaim man bilong yu, orait yu mas i stap wantaim em na raun wantaim em na wok wantaim em na amamas wantaim em. Yutupela marit yutupela no tupela nau. Nogat. Yutupela i wanpela nau. Olsem na, yutupela mas i stap wantaim na i stap wanpela. Na sapos yutupela i stap wantaim, orait pasin bilong bes pren bai kamap.
Yumi i laik bihainim Jisas yumi mas senis na wok hat long kamap bes pren wantaim meri na man bilong yumi. Dispela em i wei bilong God long sait bilong marit. God i wokim man na meri bilong kamapim bes pren wantaim insait long marit.
2. Man i mas lavim meri bilong em.
Lukim Efesus 5:22-33 na skelim lain 25 na 28 na 32.
22 Yupela meri i laik bihainim Bikpela, yupela mas i stap aninit long man bilong yupela. 23 Long wanem, man em i het bilong meri bilong em kain olsem Krais Em i het bilong sios. Sios em i bodi bilong Krais na Krais i bin mekim wok na sevim sios. 24 Na wankain olsem sios i save stap aninit long Krais, orait meri i mas i stap aninit long man bilong em long olgeta samting.
25 Na yupela man, yupela mas lavim meri bilong yupela olsem Krais i bin lavim sios. Em i bin lusim laip bilong Em yet bilong sevim sios. 26 Em i bin mekim olsem bilong mekim sios i kamap holi. Krais i bin wasim sios long wara na long tok bilong Em bilong mekim sios i kamap klin. 27 Em i mekim olsem bilong mekim sios i kamap naispela tru na i no gat mak nogut i stap long em na i no gat skin i slek na i no gat wanpela samting i spoilim em, na em i stap holi olgeta na em i no gat wanpela asua i stap. Krais i mekim sios i kamap naispela tru na Em i kisim sios i kam long Em yet. 28 Na long dispela seim wei man i mas lavim meri bilong em olsem meri em i bodi bilong em yet. Man i lavim meri bilong em i olsem em i lavim em yet. 29 Yupela save olsem, wanpela man i no inap hetim bodi bilong em yet. Nogat. Em save givim kaikai na lukautim bodi bilong em wankain olsem Krais i mekim long sios. 30 Na yumi memba bilong bodi bilong Krais. 31 “Na long dispela as, wanpela man bai lusim papa na mama bilong em, na em bai pas wantaim meri bilong em. Na tupela bai pas olgeta.” (Jenesis 2:24) 32 Dispela tok i dip tumas, tasol mi tok nau long Krais na sios bilong Em. 33 Na yupela tu yupela mas lavim meri bilong yupela olsem yupela lavim yupela yet. Na meri i mas rispektim man bilong em.
3-pela taim Pol i tokim ol manmeri long sios bilong taun Efesus olsem, “Yupela man, yupela mas lavim meri bilong yupela.” Na lavim em i wanem kain pasin? Lukim lain 25 gen. Man i mas lavim meri bilong em olsem Krais i bin lavim sios bilong Em na Em i lusim laip bilong Em bilong helpim sios.
Krais i no tingim Em yet. Nogat. Em i bin tingim ol narapela manmeri. Em i no tingim sindaun bilong Em yet. Nogat. Em i tingim sindaun bilong ol narapela manmeri na Em i lusim gutpela sindaun long heven na Em i kam hia long dispela graun na Em i kisim hat laip bilong helpim ol lain manmeri God i bin makim na givim Em.
Krais i no tingim nem bilong Em yet. Nogat. Em i kisim nem nogut long ai bilong ol lotu manmeri na Em i kisim nem nogut long ai bilong olgeta manmeri taim ol i nilim Em long diwai kros. Jisas i gat biknem, tasol Em i no kea long nem bilong Em yet. Nogat. Em i kea long ol manmeri Em bai sevim taim Em i dai long diwai kros.
Krais i no tingim amamas bilong Em yet. Nogat. Em i kisim pen na hevi tasol long dispela graun. Sampela taim Krais Em i pilim bikpela hevi tumas na Em i sindaun na krai tasol. Na taim Em i dai long diwai kros Em i kisim bikpela pen na hevi bilong ol manmeri bilong Em. Em i kisim hel bilong ol lain manmeri God i bin givim Em.
Na Krais i no tingim laip bilong Em yet. Nogat. Em i lusim laip bilong Em bilong sevim laip bilong ol lain manmeri God i bin makim na givim Em.
Krais Em i no tingim Em yet. Em i no selfis na tingim Em yet. Nogat. Em i tingim ol manmeri God i bin givim Em (sios) na Em i lusim laip bilong Em bilong kisim bek laip bilong sios bilong Em.
Lavim em i dispela kain pasin. Na yumi man, yumi mas lavim meri bilong yumi olsem. Lukim lain 28 gen. Yu no ken i kea long ol samting bilong yu yet. Nogat. Yu mas kea long ol samting bilong meri bilong yu.
Yu no ken i kea na wok hat bilong kamapim gutpela sindaun bilong yu. Nogat. Yu mas kea na wok hat bilong kamapim gutpela sindaun bilong meri bilong yu. Yu no ken i kea na wok hat bilong kamapim na lukautim gutpela nem bilong yu. Nogat. Yu mas kea na wok hat long kamapim na lukautim gutpela nem bilong meri bilong yu. Yu no ken i kea na wok hat bilong kamapim gutpela amamas bilong yu. Nogat. Yu mas kea na wok hat na kamapim gutpela amamas long meri bilong yu. Yu no ken i kea na wok hat bilong kamapim gutpela laip bilong yu. Nogat. Yu mas kea na wok hat bilong kamapim gutpela laip long meri bilong yu. Yu mas lavim meri bilong yu.
Na man i no lavim meri bilong em olsem Krais i lavim ol pipel bilong Em, orait dispela man i sakim tok bilong God na em i no bihainim Jisas. Yumi man i laik bihainim Jisas, yumi mas lavim meri bilong yumi olsem Jisas i bin lavim yumi na i lusim laip bilong Em bilong sevim laip bilong yumi.
Mi laik stretim wanpela samting planti man i save paul long em….
Planti man i tingim olsem ol i het bilong meri. Na ol i yusim dispela tok bilong bosim meri bilong ol na mekim nogut long meri bilong ol. Ol i yusim dispela tok bilong daunim meri bilong ol na apim ol yet.
Na ol i tingim dispela tok i minim olsem meri i mas bihainim olgeta laik bilong man na meri i mas tingting tasol long amamasim man bilong em. Ol i tingim dispela tok i mekim ol i kamap nambawan samting na meri bilong ol na pikinini bilong ol i mas baudaun (brukim skru) long ol.
Mi laik tokim yu olsem, ol i kisim paul tingting olgeta. Man i save bosim meri bilong em olsem, orait em i no bihainim Tok bilong God. Nogat. Em i bihainim pasin bilong ples tasol. Em i bihainim pasin i nogut olgeta.
Lukim Efesus 5:22-23. Yumi no ken i sotim Tok bilong God na stopim tok long namel. Nogat. Yumi mas pinisim toktok na yumi ken i klia long as na minim bilong tok.
Man em i het bilong meri olsem Krais Em i het bilong sios. Na Krais Em i het bilong sios olsem wanem? Em i bin lavim sios. Em i lavim ol dispela manmeri God i bin givim Em na Em i lusim laip bilong Em bilong sevim ol – bilong sevim sios. Long dispela as Krais Em i het bilong sios. Long dispela wei Krais Em i het bilong sios.
Olsem na, sapos yu laik i stap het bilong meri bilong yu, orait yu mas lavim meri bilong yu olsem Krais i lavim sios. Sapos yu laik i stap het bilong meri bilong yu, orait yu ken i lusim laip bilong yu bilong sevim laip bilong meri bilong yu. Mi minim olsem, yu ken i lusim tingting long olgeta samting bilong laip bilong yu na yu mekim gutpela long olgeta samting long laip bilong meri bilong yu.
Yu no ken i stap het bilong meri bilong yu olsem kastem pasin bilong yu. Nogat. Yu no ken i stap het bilong meri bilong yu olsem ol man long ples i mekim. Nogat.
Sapos yu bilong Jisas na yu laik bihainim Jisas, orait yu mas i stap het olsem Krais i stap het bilong ol pipel bilong Em. Sapos yu laik stap het long meri bilong yu, orait yu mas lavim em olsem Krais i bin lavim ol manmeri God i bin givim Em. Yu ken i lusim laip bilong yu bilong kamapim gutpela laip long meri bilong yu.
Meri em i no wokboi nating bilong yu. Nogat. Planti man i save tingim meri em i wokboi nating tasol bilong wokim gaden na pikim kopi na kamapim pikinini. Dispela i rong tingting olgeta. God i bin givim meri bilong yu long yu bilong yu ken i pas wantaim em na yu ken i lavim em na yutupela i stap bes pren olgeta.
Dispela em i wei bilong God. Yumi man, yumi mas tingting gut long dispela toktok. Yumi mas lusim olpela wei bilong kastem pasin bilong ples, na yumi kisim na bihainim wei bilong God long marit bilong yumi. Yumi mas lavim meri bilong yumi.
3. Meri i mas rispektim man bilong em.
Lukim Efesus 5:22 na 24 na 33. God i tok klia olsem, meri i mas aninit long man bilong em na rispektim em. Man i mas lavim meri bilong em olsem Krais i lavim ol manmeri God i givim Em, na meri i mas rispektim lavim bilong man bilong em na i stap aninit long man bilong em.
Meri i no fri long kapsaitim man bilong em na bikhet long man bilong em na bosim man bilong em. Nogat. Meri i mas rispektim man bilong em na i stap isi aninit long man bilong em.
Tasol dispela i no minim olsem, meri i mas bihainim olgeta tok bilong man bilong em. Nogat. Dispela i no minim olsem meri i mas pasin maus bilong em na bihainim olgeta tok bilong man bilong em. Nogat.
Sapos man i tokim meri long mekim sampela pasin nogut, orait meri i no ken i bihainim dispela tok. Meri i no ken i bihainim tok nogut bilong man bilong em. Long wanem? Krais Em i bikpela het bilong meri.
Yu save, Krais Em i bikpela het bilong yumi olgeta. Em i het bilong sios bilong Em – man na meri wantaim. Yes, man em i het bilong meri insait long marit bilong em, tasol Krais Em i het bilong tupela wantaim.
Olsem na, meri i mas i stap aninit long man bilong em, tasol pastaim em i mas i stap aninit long Krais. Long dispela as, meri i no ken i bihainim tok nogut bilong man bilong em. Sapos man i tokim meri long mekim sampela pasin Krais i bin tok ‘yu no ken i mekim’, orait meri i mas sakim tok bilong man bilong em na bihainim tok bilong Krais. Tok bilong Krais em i paslain long ol narapela tok.
Tasol, yupela meri mas skelim gut dispela samting. Yupela no ken i yusim dispela toktok bilong sakim olgeta tok bilong man bilong yu na givim baksait long em. Yu no ken i tok olsem, “Man bilong mi em i man nogut, olsem na, mi no inap rispektim em na bihainim tok bilong em.”
God i tok pinis olsem, “Yu mas rispektim man bilong yu na stap aninit long man bilong yu.” Yu ken i sakim tok nogut bilong man bilong yu, tasol stil yu mas i rispektim em na stap aninit long em na bihainim olgeta narapela tok bilong em.
Sapos yupela meri yupela laik bihainim Jisas, orait yupela mas rispektim man bilong yu na stap gutpela aninit long man bilong yu na bihainim em gut. Dispela wei em i wei bilong God long sait bilong marit.
Las toktok.
Nau yumi klia liklik long wei bilong God long sait bilong sindaun bilong tupela marit.
Tupela mas i stap bes pren wantaim. Man em i mas lavim meri bilong em. Na meri em i mas rispektim man bilong em.
Yumi i pas long Jisas na i laik bihainim Jisas, yumi mas bihainim Em olsem. Yumi i bilipim na trastim God long kisim bek yumi long feitful wok bilong Jisas long diwai kros, orait nau em i taim bilong yumi long givim baksait long wei bilong ples long sait bilong marit na bihainim wei bilong God.
Em tasol.
