Ating i no gutpela bilong yumi i lavim Jisas yumi giaman nabaut long bihainim Em, a?
Ol dispela Baibel toktok mi kolim “Jisas i tok wanem long….” i stap bilong helpim yumi manmeri i bilipim na trastim feitful wok bilong Jisas. Yumi bilipim na trastim God long kisim bek yumi long feitful wok bilong Jisas tasol, na nau yumi laik bihainim Em. Em olsem na ol dispela toktok yumi wok long harim em bilong helpim yumi klia long hau yumi ken i bihainim Jisas.
Ol dispela toktok em bilong helpim yumi yusim het bilong yumi na yumi ken i skelim gut ol wanwan samting, na yumi ken i wokim gutpela na rait disisen long ol wanwan samting, na yumi mekim pasin Jisas i laikim. Long dispela wei yumi ken i bihainim Jisas long gutpela wei.
Na yumi no wok long bihainim Jisas bai Jisas i ken i laikim yumi na kisim bek yumi. Nogat tru! Yumi bihainim Jisas bikos Jisas i bin mekim olgeta wok inap pinis bilong God i ken i kisim bek yumi. Olsem na, taim Holi Spirit i bin opim ai na ia na bel bilong yumi na yumi klia long feitful wok bilong Jisas na yumi tanim bel na bilipim na trastim feitful wok bilong Jisas, em nau, long dispela taim, God i kisim bek yumi pinis na Em i kisim yumi kam insait pinis long femili bilong God. Long dispela as tasol nau yumi lavim Jisas na yumi laik wok hat long bihainim Jisas long ol gutpela wei.
Long maus bilong yumi, yumi ken i tok tenkyu long God, long Papa na Jisas na Holi Spirit. Yumi ken i tok tenkyu long olgeta wok Em i bin mekim bilong kisim bek yumi. Tasol tu, yumi ken i soim tenkyu bilong yumi long laip bilong yumi. Yumi ken i soim tenkyu bilong yumi long pasin bilong yumi. Olsem na, yumi i laik tok tenkyu na soim tenkyu bilong yumi long God, yumi save wok hat long bihainim olgeta tok God i bin givim yumi long Baibel.
Pasin bilong pilai kas.
Pilai kas em i bikpela samting long PNG long olgeta haus lain bilong yumi olgeta. Sampela manmeri i tok olsem, “Pasin bilong pilai kas i no gutpela.” Na sampela i tok olsem, “Pilai kas em i no samting nogut.”
Yumi i bihainim Jisas, yumi no manmeri bilong harim tok bilong ol manmeri long ples. Nogat. Yumi bilong Krais nau, na long dispela as bai yumi harim tok bilong Krais tasol. Olsem na, nau yumi bai skelim Tok bilong God, tok bilong Krais, long dispela samting.
Jisas i tok wanem long pasin bilong pilai kas?
Yu save, sampela manmeri i tok olsem, “Pasin bilong pilai kas em i sin pasin.” Na sampela manmeri i tok olsem, “Kas yet em i samting nogut.” Sampela taim ol i tok olsem, “Kas yet em i samting bilong Satan.” Na sampela taim ol i tok olsem, “Satan i save stap insait long kas.”
Na ol i tok tru o nogat?
Lukim ol sampela kas. Ol dispela kas yet em i sin samting o nogat? Em i samting bilong Satan o nogat? Satan i stap insait long em o nogat? Hau na bai yumi save? Orait, yumi sekim Tok bilong God.
Sapos God i tokim yumi olsem, “Kas yet em i samting nogut,” orait yumi ken i klia olsem kas em i samting nogut. Sapos God i tokim yumi, “Kas em i samting bilong Satan,” orait yumi ken i klia olsem kas em i samting bilong Satan. Sapos God i tokim yumi, “Satan i stap insait long kas,” orait yumi ken i klia olsem Satan i stap insait long kas. Tasol, sapos God i no mekim wanpela tok olsem, orait yumi ken i tok olsem, kas i no dispela kain samting.
Orait, God i tok wanem? Mi ken i tokim yu olsem, God i no tok olsem pilai kas em i sin samting. God i no tok olsem, kas em i samting bilong Satan o Satan i stap insait long kas. Nogat. God i no mekim tok olsem, olsem na, yumi no ken i tok olsem.
Tasol, dispela i no minim olsem God i no gat toktok.
God i bin mekim planti toktok long ol kainkain pasin i save kamap wantaim pasin bilong pilai kas.
Insait long Tok bilong God, God i no makim pasin bilong pilai kas na i mekim sampela toktok long dispela samting. Nogat. Tasol, God i bin makim ol wanwan pasin i save kamap wantaim pasin bilong pilai kas na God i gat bikpela toktok long ol dispela samting.
Yumi tok pinis, God i no makim pasin bilong pilai kas na i mekim sampela toktok long dispela samting. Olsem na, yumi ken i tok olsem, pilai kas yet em i namel samting.
Tasol, God i gat toktok long pasin i kamap wantaim pasin bilong pilai kas. Em i dispela pasin i kamap wantaim pilai kas i mekim pilai kas i stap gutpela samting o i stap samting nogut. Olsem na, sapos pilai kas i kamapim gutpela pasin, orait pilai kas i gutpela samting. Tasol, sapos pilai kas i save kamapim pasin nogut, orait pilai kas i no gutpela samting.
Na mi laik askim yu, “Taim yu pilai kas, pilai kas i kamapim gutpela pasin o em i kamapim pasin nogut?”
Yumi tok pinis, sapos pilai kas i kamapim gutpela pasin long yumi na long komyuniti bilong yumi, orait pilai kas em i gutpela samting na yumi ken i pilai kas. Tasol, sapos pilai kas i save kamapim pasin nogut, orait yumi i pas long Krais yumi no ken i pilai kas.
Yumi skelim ol wanwan tok Jisas i mekim long maus bilong aposel Pol long ol lain bilong God i stap long taun Efesus.
- Yumi bilong Krais, yumi no ken i stil.
“Ol stilman i no ken i stil moa. Nogat. Nau ol i mas wok. Ol i mas mekim gutpela wok long han bilong ol yet, na long dispela wei ol i ken i kamapim ol gutpela samting na ol i ken i helpim sampela manmeri i sot.” Efesus 4:28
Mi bin harim wanpela stori na mi laik tokim yupela. Wanpela meri i hat wok na i kamapim kaikai na em i maketim sampela kaikai bilong em na kamapim K20. Na em i makim dispela K20 bilong baim skul fi bilong pikinini bilong em. Tasol, man bilong em, em i man bilong pilai kas, na wanpela taim meri i stap long gaden man bilong em i kam na sekim haus na em i stilim dispela K20 na em i go tromoi dispela mani long pilai kas.
Yu save? Pasin bilong pilai kas bilong manya i kamapim stil pasin. Olsem na, sapos pasin bilong pilai kas i kamapim stil pasin, orait yumi i laik bihainim Jisas yumi no ken i pilai kas. Long wanem? Nogut yumi sapotim stil pasin bilong ol narapela man taim yumi pilai kas wantaim ol. Sapos yumi pilai kas wantaim ol, orait ating yumi sapotim stil pasin bilong ol, na dispela i no gutpela. Na tu, nogut pilai kas i kamapim stil pasin long yumi yet!
- Yumi bilong Krais, yumi mas wok.
“Ol stilman i no ken i stil moa. Nogat. Nau ol i mas wok. Ol i mas mekim gutpela wok long han bilong ol yet, na long dispela wei ol i ken i kamapim ol gutpela samting na ol i ken i helpim sampela manmeri i sot.” Efesus 4:28
Yu save long pasin bilong ol man i save pilai kas. Ol i no save wok tumas. Ol i no save helpim meri bilong ol long mekim wok. Ol i save sindaun nating tumas long pilai kas na ol i no wok. Ol i les lain tru. Olsem na, meri na pikinini bilong ol i save sot long sop mani na mani bilong marasin na sot long gutpela klos na sot long ol sampela stoa kaikai na sot long mani bilong PMV bilong raun na kisim marasin o liklik sopim bilong ol long taun.
Yumi bilong Krais, nogut yumi kamap olsem ol na nogut yumi sapotim dispela pasin bilong ol. Olsem na, mobeta yumi no pilai kas na yumi stap longwe long les pasin.
- Yumi mas wok bilong kamapim mani bilong yumi.
“Ol stilman i no ken i stil moa. Nogat. Nau ol i mas wok. Ol i mas mekim gutpela wok long han bilong ol yet, na long dispela wei ol i ken i kamapim ol gutpela samting na ol i ken i helpim sampela manmeri i sot.” Efesus 4:28
Sapos yu kisim mani long pilai kas, orait yu kisim mani bilong yu long rong wei na dispela i no gutpela. Long wanem? Wok em i rait wei bilong kisim mani.
Na tu, mani yu kisim long pilai kas em i no mani bilong wanpela man, nogat. God i givim mani long em bilong helpim meri na pikinini bilong em. Olsem na, taim em i pilai kas, oriat em i tromoi mani bilong meri na pikinini bilong em. Na taim yu win na kisim mani bilong em, orait yu kisim mani bilong meri na pikinini bilong em.
Na yu no ken i tok olsem, “Dispela em i asua bilong manya.” Nogat. Long wanem? Maski manya i kisim tingting nogut na tromoi mani bilong meri na pikinini bilong em, stil dispela mani em bilong meri na pikinini bilong em. Na i no rait long yu kisim na yusim mani bilong meri na pikinini bilong em.
Olsem na, sapos pilai kas i save kamapim dispela kain pasin, orait mobeta yumi ranawe olgeta long pasin bilong pilai kas.
- Yumi bilong Krais, yumi no ken i mekim toktok nogut.
“Yupela no ken i larim ol kainkain tok nogut i kamap long maus bilong yupela. Nogat. Yupela mas mekim gutpela toktok tasol bilong strongim ol narapela manmeri i sot long sampela strong. Long dispela wei toktok yu mekim bai helpim ol manmeri i harim tok bilong yupela.” Efesus 4:29
“Na tu, yupela no ken i mekim doti toktok na stupit toktok na pilai toktok i doti. Dispela kain toktok i no gutpela long yumi i mekim. Mobeta yumi yusim toktok bilong yumi bilong tok tenkyu long God.” Efesus 5:4
Yumi save pinis, pasin bilong sindaun na pilai kas i save kamapim kainkain toktok nogut. Ol i save stori nogut long ol narapela manmeri, na ol i save diskas long ol sampela samting na putim tingting bilong ol na giaman toktok bilong ol antap long dispela samting na pulim toktok i go long ol narapela samting, na long dispela wei ol i paulim planti samting na kamapim planti tok nogut na pasin nogut.
Olsem na, sapos pasin bilong pilai kas i save kamapim kainkain pasin nogut, orait yumi i laik bihainim Jisas, yumi no ken i mekim. Nogat. Mobeta yumi stap longwe long dispela samting.
- Yumi no ken i kros pait.
“Yupela mas rausim i go longwe long yupela olgeta pasin bilong bel nogut na kros na belhat na bikmaus nogut na tok bilas na olgeta kain tingting we yu laik mekim nogut long ol narapela manmeri. Efesus 4:31
Planti taim pilai kas i kamapim kros na pait na tok bilas na kain pasin olsem. Planti taim mi lukim kas i bruk i stap long rot. Olsem wanem? Ol i pilai kas na sampela kros i kamap long dispela na ol i kirap na brukim kas na mekim toktok nogut na tok bilas na lusim i go nabaut.
Olsem na, sapos pilai kas i save kamapim dispela kain pasin, orait mobeta yumi no pilai kas.
- Yumi no ken i poroman wantaim ol manmeri i mekim pasin nogut.
3 Namel long yupela, pasin pamuk na olgeta kain pasin i doti na pasin bilong mangalim ol samting bilong narapela manmeri i no ken i kamap. Long wanem, dispela kain pasin i no rait pasin bilong holi manmeri bilong God. 4 Na tu, yupela no ken i mekim doti toktok na stupit toktok na pilai toktok i doti. Dispela kain toktok i no gutpela long yumi i mekim. Mobeta yumi yusim toktok bilong yumi bilong tok tenkyu long God. 5 Na yupela mas klia gut olsem, ol manmeri i mekim pasin pamuk na pasin i doti na mangal pasin, ol i save lotuim ol dispela pasin nogut bilong ol, na ol dispela kain manmeri i no inap lukim kingdom bilong Krais na God. 6 Nogut sampela manmeri i giamanim yupela long tok gris. Long wanem, ol manmeri i sakim tok bilong God bai pilim bel hat bilong God. 7 Olsem na, yupela no ken i poroman wantaim ol dispela kain manmeri. Efesus 5:3-7
Aposel Pol i tok olsem, ol manmeri i save mekim stupit toktok na doti toktok na pilai toktok i doti na ol manmeri i mekim pamuk pasin na paul pasin na ol dispela kainkain pasin nogut, ol i no inap lukim kingdom bilong Krais na bilong God.
Yumi mas lukaut. Nogut yumi poroman wantaim ol man i save pilai kas. Long wanem? Nogut ol i mekim pasin nogut na hevi bilong ol i kam long yumi tu. Olsem na, mobeta yumi no poroman wantaim ol na pilai kas, na mobeta yumi no sindaun nabaut wantaim ol taim ol i pilai kas, na mobeta yumi no sanap na lukluk long ol i pilai kas. Nogut ol i grisim yu na yu poroman wantaim ol na asua bilong ol i kam long yu tu.
Man i kisim amamas tru
em i man i no save wokabaut long toktok bilong ol manmeri nogut,
na em i no save sanap long pasin bilong ol sin manmeri,
na em i no save sindaun wantaim ol manmeri i tok bilas long God.
Em i save amamas long bihainim ol lo bilong BIKPELA,
na em i save tingim ol lo bilong BIKPELA long san i go tudak. Buk Song 1:1-2
Las toktok.
Bilong yumi i laik bihainim Jisas, pilai kas em i gutpela pasin bilong yumi o nogat?
Yumi tok pinis, pilai kas yet em i namel samting. Sapos gutpela pasin i save kamap taim yumi pilai kas, orait pilai kas i orait long yumi. Tasol, sapos yumi pilai long mani o sapos kainkain pasin nogut i kamap taim yumi pilai kas, orait pilai kas i no gutpela bilong yumi.
Yumi i laik bihainim Jisas, yumi mas skelim gut ol dispela toktok, na wokim gutpela disisen.
Em tasol.
