Jisas i Husat – Evidens (3)
Mak 2:10.
Mak 2:23-3:6.
Daniel 7:13-14.
Sapos yu mekim wanpela bikpela toktok, orait yu mas putim evidens bilong yu i kam ples klia na kisim ol ai witnis i kam bilong sapotim tok bilong yu. Planti taim tumas long PNG ol man ol i mekim ol bikpela toktok, tasol ol i no save putim ol evidens i kam ples klia na ol i no kisim ol trupela ai witnis i kam bilong sapotim toktok bilong ol. Nogat. Ol i tok nating. Tasol Mak em i no olsem ol.
Mak em i mekim wanpela bikpela tok olsem, Jisas Em i God i kam long dispela graun. Na Mak i putim ol evidens na ol ai witnis i kam ples klia bilong sapotim dispela bikpela toktok bilong em. Em i no putim wanpela evidens tasol. Nogat. Em i putim planti evidens i kam ples klia. Em olsem na Mak em i no laik yumi pasim ai na pasim tingting na yumi bilipim na trastim Jisas. Nogat. Em i laik yumi yusim het bilong yumi na yumi skelim ol evidens na yumi bilipim na trastim Jisas.
Long stadi 2 na stadi 3 yumi bin skelim 2-pela evidens Mak i putim bilong sapotim tok bilong em. Na em i kisim ai witnis na ai witnis i sapotim tok bilong em. Jisas i bin makim ol disaipel, bai ol i ken i raun wantaim Em na witnisim olgeta samting bilong Em. (Mak 3:14-15 na Aposel 1:8.) Na Pita em i wanpela disaipel bilong Jisas, na Mak i kisim ai witnis bilong Pita na em i raitim buk Mak.
Evidens namba 1:
Long bipo God i bin tokim profet Aisaia olsem, God bai kam i stap namel long manmeri, na taim God i kam, orait ol manmeri bai lukim ol sain na ol bai save olsem, God i kam i stap namel long ol. Em olsem na ol bai lukim aipas man i lukluk, na iapas man i harim, na mauspas man i toktok, na lek nogut man i wokabaut. Ol dispela sain Jisas i wokim na dispela i soim olsem, Jisas Em i God i kam i stap namel long ol manmeri.
Evidens namba 2:
God tasol i ken i rausim na fogivim sin. Long wanem, taim yumi manmeri yumi mekim sin, orait yumi mekim sin long God. Em olsem na, God wanpela tasol i ken i rausim na fogivim ol sin yumi wokim long Em. Na tu, long tingting bilong God, pasin bilong tekewe sin na pasin bilong tekewe hevi bilong sin (olsem sik bilong lek nogut man) tupela i pas wantaim. Em olsem na, taim Jisas i stretim lek bilong lek nogut man, orait dispela i soim olsem, Jisas i gat namba bilong rausim na fogivim sin. Long dispela rot Jisas i soim olsem, Em i God. Long wanem, God tasol i ken i rausim na fogivim sin.
Nau yumi bai skelim ol tok Jisas yet i mekim long ol samting bilong Em yet. Mak i mekim tok olsem, “Jisas Em i God.” Tasol Jisas yet i tok wanem? Em i tok, “Yes, Mi God i kam i stap namel long yupela,” o nogat?
Evidens namba 3 bilong Mak i olsem – Jisas yet i tok, “Mi God”.
Mak i laik soim yumi olsem, Jisas yet i tok olsem, Mi God i kam i stap namel long manmeri. Na tu, ol planti samting Jisas i mekim, orait Em i mekim olsem Em i God.
Taim Jisas i yusim nem “Pikinini Bilong Man”, orait Em i yusim dispela nem bilong makim Em yet na ol manmeri ol i ken i save olsem, Em i God i kam i stap namel long ol. Long buk Mak Jisas i yusim nem “Pikinini Bilong Man” 13-pela taim. Lukim na skelim.
- Mak 2:10 na 28
Mak 8:31 na 38
Mak 9:9 na 12-13 na 31
Mak 10:33 na 45
Mak 13:26
Mak 14:21 na 41 na 62.
Jisas i yusim nem “Pikinini Bilong Man” 13-pela taim bilong makim Em yet. Nau yumi bai skelim 2-pela. Yumi skelim Mak 2:10 na Mak 2:23-28.
Long Mak 2:10 Jisas i tok olsem, “Pikinini Bilong Man i gat namba long dispela graun bilong tekewe sin.” Na yumi save olsem, Jisas yet i stretim lek bilong lek nogut man bilong soim olsem Em i gat namba bilong tekewe sin. (Long stadi namba 3 yumi bin skelim dispela samting pinis.) Long dispela pasin Jisas i makim Em yet Em i Pikinini Bilong Man.
Na long Mak 2:28 Jisas i tok olsem, “Pikinini Bilong Man Em i BIKPELA bilong de Sabat tu.” Na bilong soim ol manmeri olsem, Em i Pikinini Bilong Man na Em i gat namba bilong bosim de Sabat, orait Jisas i stretim han bilong wanpela han nogut man long de Sabat. Na dispela pasin bilong Jisas i kirapim bel nogut bilong ol lida bilong lotu Juda. Long wanem, ol i klia olsem namba bilong Jisas i winim namba bilong ol. (Mak 3:1-6.)
Orait, dispela nem “Pikinini Bilong Man” em i wanem samting na i gat wanem minim bilong em i stap? Bilong kisim save long dispela samting yumi skelim ol sampela tok i stap long Olpela Testamen. Yumi skelim wanpela visin Daniel i bin lukim. Dispela em i fes taim nem “Pikinini Bilong Man” i kamap insait long Baibel.
Daniel i lukim visin na em i stori long ol samting em i lukim. Pastaim em i stori olsem, God Bilong Oltaim Oltaim Em i kam sindaun long sia king long heven na ol tausen tausen tausen manmeri ol i sanap na ol i lukluk i stap. Orait long Daniel 7:13-14 Daniel i diskraibim ol narapela samting em i lukim.
13Mi lukim dispela samting long visin long nait:
Mi lukim wanpela i kam, na i luk olsem em i olsem pikinini bilong man,
na em i kam wantaim ol klaut bilong heven.
Em i kam long God Bilong Oltaim Oltaim,
na ol i kisim em i kam stret long Em.
14Na God Bilong Oltaim Oltaim i givim namba long Em bilong bosim olgeta samting, na i givim glori long Em, na i givim kingdom long Em,
bai olgeta manmeri bilong olgeta kantri na bilong olgeta tok ples bai i stap aninit long Em.
Na Em bai bosim olgeta samting oltaim oltaim; namba bilong em i no inap pinis,
na kingdom bilong Em i no inap lus. Daniel 7:13-14.
Taim Daniel i tok, “Mi lukim wanpela i kam, na i luk olsem em i olsem pikinini bilong man,” orait em i minim olsem, em i lukim wanpela i kam na em i luk olsem em i man olsem mipela i man. Dispela man Daniel i lukim, i luk olsem em i wanpela man bilong dispela graun.
Tasol, long ai bilong ol tausen tausen tausen manmeri God i putim ples klia olsem, dispela pikinini bilong man, dispela man i stap olsem man bilong dispela graun, em i narapela kain man. Lukim lain 14 na yumi skelim 3-pela samting God i putim ples klia bilong dispela “pikinini bilong man”……
- Em i gat wankain glori olsem God yet.
- Em i gat namba olsem God bilong bosim olgeta samting bilong olgeta hap bilong dispela graun.
- Kingdom bilong God em bilong Em. Em i king na oana na bos bilong kingdom bilong God.
Taim Jisas i yusim nem “Pikinini Bilong Man” bilong makim Em yet, orait i olsem Jisas i tok, “Mi dispela man. Mi gat wankain glori olsem God yet. Mi gat namba olsem God bilong bosim olgeta samting bilong olgeta hap. Kingdom bilong God em bilong Mi. Mi king na oana na bos bilong kingdom bilong God.”
Jisas Em i Pikinini Bilong Man. Jisas i stap long wanpela level wantaim God. Olgeta samting bilong God em bilong Jisas tu. Glori bilong God em i glori bilong Jisas. Namba bilong God em i namba bilong Jisas. Pawa bilong God em i pawa bilong Jisas. Kingdom bilong God em i kingdom bilong Jisas. Em olsem na, yumi ken i save olsem, Jisas Em i God.
Skelim tok bilong Stiven tu long Aposel 7:54-56.
54Ol i harim olgeta tok Stiven i autim na ol i bel hat nogut tru na ol i skrapim tit bilong ol. 55Tasol, Holi Spirit i pulap long Stiven, na em i lukluk strong long heven na em i lukim glori bilong God na em i lukim Jisas i sanap long han sut bilong God. 56Na Stiven i tok, “Lukim, mi lukim heven i op na Pikinini Bilong Man i sanap long han sut bilong God.” Aposel 7:54-56.
Man i sanap long han sut bilong God Em i stap long wanpela level wantaim God. Stiven i lukim Jisas Em i Pikinini Bilong Man na i stap long wanpela level wantaim God. Em i lukim Jisas i stap God.
Orait, nau yumi save olsem, i olsem Jisas yet i tokaut olsem, “Mi God”. Jisas Em God na Em i gat namba bilong rausim na fogivim sin. Jisas Em i God na Em i gat namba bilong rausim hevi bilong sin long bodi bilong manmeri. Jisas Em i Pikinini Bilong Man bilong visin bilong Daniel. Em olsem na Jisas i gat namba na glori na pawa olsem God. Jisas Em i God.
Yumi mas harim tok bilong Pikinini Bilong Man.
Jisas Em i Pikinini Bilong Man Daniel i bin lukim long visin bilong em. Em i gat wankain glori olsem God yet. Em i gat namba bilong bosim olgeta samting bilong olgeta hap bilong dispela graun. Kingdom bilong God em i bilong Em. Em i king na oana na bos bilong kingdom bilong God. Long dispela as yumi mas harim tok bilong Jisas long olgeta samting.
Na yumi mas harim tok bilong Jisas long olgeta samting bilong rausim na fogivim sin. Long wanem, manmeri i gat sin ol i no inap i go insait long kingdom bilong God. Tasol, sapos God i rausim na fogivim sin bilong ol, orait ol i ken i go insait long kingdom bilong God. Na Jisas Em i save long olgeta samting bilong kingdom bilong God. Olsem na Em i save long olgeta samting bilong rausim na fogivim sin.
Ol Farisi ol i lukim Pikinini Bilong Man i rausim hevi bilong sin na i rausim na fogivim sin. Ol i lukim na ol i harim, tasol ol i les long i stap aninit long Em na bihainim Em na trastim Em. Ol i les long Jisas na ol i wokim plen bilong kilim Em i dai.
Na yu? Bai yu wokim wankain pasin olsem ol Farisi? Sapos yu givim baksait long Jisas, orait yu wokim wankain pasin olsem ol Farisi. Yu save, ol Farisi ol i les long Jisas i bosim olgeta samting bilong laip bilong ol na bilong lotu bilong ol, olsem na ol i laik rausim Jisas long ples. Sapos yu givim baksait long Jisas na yu les long Jisas i bosim olgeta samting long laip bilong yu na long lotu bilong yu, orait yu wokim wankain pasin olsem ol Farisi, na i olsem yu laik rausim Jisas.
Planti manmeri bilong PNG ol i lotu manmeri na ol i tok, “Mipela bihainim Jisas.” Tasol planti bilong ol i les long Jisas i bosim laip bilong ol na ol i les long Jisas i bosim lotu bilong ol. Ol yet ol i laik bosim laip na lotu bilong ol. Em olsem na ol i laik bosim rot bilong God i kisim bek ol.
Jisas i tok, “Mi yet Mi rot, na Mi as bilong Tok i tru, na Mi as bilong laip. I no gat wanpela man inap i go long Papa long narapela rot. Nogat. Long Mi tasol.” Long dispela tok Jisas i rausim olgeta narapela rot. Tasol ol planti lotu manmeri i tingim olsem, baptais em i rot, na pasin bilong lukautim Sabat o Sande em i rot, na pasin bilong stretim laip em i rot. Taim ol i makim kainkain rot olsem, orait ol i givim baksait long Pikinini Bilong Man, na i olsem ol i les long Jisas.
Na taim ol i rausim man i autim tok bilong Jisas olsem, “Wok bilong Jisas tasol em i rot bilong God i kisim bek sin manmeri,” orait i olsem ol i rausim Jisas na ol i les long Jisas.
Na yu? Bai yu mekim wankain pasin olsem ol Farisi o nogat? Bai yu givim baksait long Jisas o nogat? Sapos yu givim baksait long Jisas, orait yu givim baksait long King bilong kingdom bilong God na yu givim baksait long rot bilong sin manmeri i ken i go insait long kingdom bilong God. Em olsem na yu no gat rot.
Yumi i pas long Jisas, yumi ken i sanap strong.
Na sapos yu tanim bel pinis na yu lusim ol narapela rot, na yu bilipim na trastim Jisas wanpela Em i rot bilong God i kisim bek yu, orait yu ken i save olsem, yu kam long rait rot stret. Yu no paul olsem ol sampela lotu manmeri i tokim yu. Nogat. Yu kam long rait rot stret. Yu kam long rot bilong God stret. Em olsem na maski ol manmeri bilong ples i mekim planti toktok bilong daunim yu. Long wanem, yu kam long rot bilong Pikinini Bilong Man.
Yumi i pas long King bilong kingdom bilong God yumi no ken i harim ol pret toktok bilong ol sampela lotu manmeri, na yumi no ken i harim ol bipo tok bilong ol tumbuna bilong yumi. Na maski yumi bihainim wei bilong ples. Yumi bilong King bilong kingdom bilong God, na yumi harim na bihainim tok bilong Em tasol. Yumi sanap strong na yumi amamas. Long wanem, yumi pas long rait Man stret na long rait rot stret.
“Dispela man em i husat tru na win na wara i save harim tok bilong Em?” (Mak 4:41.) Yu yet yu skelim ol evidens, na yu brukim skru na yu bilipim na trastim na bihainim Jisas tasol.
Em tasol.
