Long stadi namba 1 yumi bin stori long ol kainkain kastem pasin nogut. Yumi holim tingting long wanem samting i kastem pasin nogut na yumi klia long wanem samting yumi stori long en….
- Ol kainkain mejik pasin bilong putim aut o ol kainkain mejik bilong painim aut.
- Ol kainkain mejik pasin bilong wokim ol sampela samting.
- Ol kainkain pasin bilong opim maus na makim minim bilong wanpela samting.
- Ol kainkain pasin posin (sanguma na puripuri).
- Ol kainkain pasin marila.
- Pasin bilong singautim daiman o toktok long daiman o harim tok bilong daiman o bihainim wanpela samting bilong daiman.
Na i gat planti kainkain posin pasin na marila pasin na mejik pasin na ol kainkain samting olsem i stap na em i hait long ai bilong mi, tasol yupela save long en o yupela harim stori long en. Long ol stadi bilong yumi, taim yumi tok “kastem pasin nogut” orait yumi makim ol dispela samting – olgeta kainkain mejik posin sanguma puripuri marila pasin samting.
Na long stadi namba 1 yumi kisim save olsem, God i hetim tru olgeta kainkain mejik posin sanguma puripuri marila pasin samting na Em i hetim ol manmeri i mekim na bihainim ol dispela samting. God i tokim ol lain manmeri bilong Em long ol i no ken i lainim o bihainim ol dispela kain samting. Buk Revelesen i putim ples klia olsem, ol manmeri i mekim o bihainim ol dispela kain samting, orait ol i no inap i stap long nupela heven na nupela graun bilong bihain. Nogat. Ol bai lus olgeta na ol i no inap sindaun wantaim Jisas long heven.
Orait na Baibel i tokaut long 3-pela samting long ol dispela kainkain mejik posin sanguma puripuri marila pasin samting. Nau yumi skelim 1-pela samting na long stadi namba 3 na 4 bai yumi skelim ol narapela 2-pela samting. Orait fes samting yumi makim Baibel i tokim yumi long ol dispela samting i olsem….
1. Ol samting bilong kastem pasin nogut em i samting bilong Satan wantaim ol wokboi bilong em.
Lukim Aposel 13:4-12….aposel Pol wantaim Barnabas i raun long hap Saiprus na tupela i autim tok bilong God….
4Em olsem na Holi Spirit i salim tupela i go na tupela i go daun long taun Selusia. Long Selusia ol i kalap long sip na sip i kisim tupela i go long ailan Saiprus. 5Na taim tupela i kamap long taun Salamis, tupela i wok long autim tok bilong God long ol haus lotu bilong ol lain Juda. Na Jon i stap wantaim tupela bilong helpim tupela. 6Na taim tupela i bin raun long olgeta hap bilong Saiprus na i kamap long taun Pafos, tupela i mitim wanpela man bilong wokim mejik. Em i wanpela giaman profet bilong ol lain Juda, nem bilong em Bar-Jisas, 7na em i stap wantaim gavana Sergius Paulus. Na dispela gavana, em i gat gutpela save, na em i singautim Barnabas na Sol. Long wanem, em i laik harim tok bilong God. 8Tasol dispela man bilong wokim mejik, narapela nem bilong em Elimas, em i wok long daunim tupela, bai gavana i no ken i kisim bilip. 9Tasol Sol, em i gat narapela nem Pol, Holi Spirit i pulap long em na em i lukluk strong long Elimas, 10na em i tok, “Yu pikinini bilong Satan. Yu birua bilong olgeta stretpela pasin. Olgeta pasin bilong giaman na pasin nogut i pulap long yu. Yu no laik lusim dispela pasin we yu wok long brukim na tanim stretpela rot bilong BIKPELA. 11Harim. Han bilong BIKPELA i holim yu pinis na bai yu i stap aipas na longpela taim liklik yu no inap lukim san.” Na wantu ai bilong em i pas na tudak i kamap long em, na em i go nabaut na askim ol man long holim han bilong em bilong lidim em i go kam. 12Na taim gavana i lukim ol dispela samting, em i bilip. Long wanem, em i kirap nogut long tisim bilong BIKPELA.
Long lain 10 aposel Pol i makim man i mekim pasin mejik na Pol i kolim em “pikinini bilong Satan” – man i mekim mejik em i yusim pawa bilong Satan bilong strongim ol wok bilong Satan. Olsem Satan dispela man em i mekim ol kainkain giaman pasin bilong trikim ol manmeri. Olsem Satan dispela man em i birua bilong olgeta samting i gutpela samting na em i save strongim olgeta kainkain pasin nogut. Olsem Satan dispela man em i tanim nabaut tok bilong God bilong paulim ol manmeri na bagarapim ol (lukim lain 6 – em i wanpela giaman profet – na lukim lain 10 wantaim – em i laik paulim trupela rot bilong God). Em olsem na Pol i kolim em “pikinini bilong Satan” – em i mekim na bihainim pasin bilong “papa” bilong em.
Na Pol yet i no skelim na tokaut olsem. Nogat. Holi Spirit i pulap long em na em i tokaut – em i Holi Spirit i makim dispela man na kolim em “pikinini bilong Satan”.
Em olsem na yumi mas save na yumi mas klia olsem, man i mekim mejik em i no mekim samting nating na em i no mekim samting long strong na pawa bilong em yet. Nogat. Em i mekim samting long pawa na strong bilong Satan. Ol samting ol mejik posin sanguma puripuri marila manmeri i mekim ol i mekim long pawa na strong bilong Satan. Ol samting bilong kastem pasin nogut em i samting bilong Satan.
Satan em i papa bilong kastem pasin nogut na long dispela as tok bilong God i tokim yumi long yumi mas i stap longwe tru long ol dispela samting. Yumi no ken i lainim o bihainim ol dispela samting. God i hetim ol dispela samting na Em i hetim ol manmeri i mekim na bihainim ol dispela samting. Satan em i papa bilong kastem pasin nogut na yumi manmeri i bilipim na trastim na bihainim Jisas yumi mas i stap longwe tru long olgeta kainkain kastem pasin nogut.
Tasol i no olgeta samting em i samting bilong Satan.
Sampela taim ol manmeri i tokaut long sampela samting i mejik samting, tasol i no mejik samting trutru. Sampela taim ol i tokaut long sampela samting i posin sanguma puripuri marila samting, tasol i no posin sanguma puripuri marila samting trutru. Tasol, maski samting ol manmeri i lukim em i kastem pasin nogut trutru o ol i tok nating tasol, orait yumi mas i stap longwe long ol dispela samting – yumi no ken i bihainim na yumi no ken i pas long toktok bilong ol na yumi no ken i skruim toktok bilong ol.
Yumi mas tingting na skelim gut.
Tingim. Husat i tokim ol mausman na ol i putim ol samting i hait i kam ples klia? Husat i tokim ol na ol i putim stil man i kam ples klia? Husat i tokim ol lapun manmeri na em i makim minim bilong wanpela pisin i krai? Husat i kontrolim smok bilong makim man i wokim posin sanguma puripuri samting? Husat i givim pawa na strong long ol marila samting bilong stopim man i kisim nupela meri? Husat i givim strong long ol manmeri i wokim ol mejik samting – ol i kisim pawa na strong bilong ol we? Yumi mas klia olsem, Satan wantaim ol wokboi bilong em i tokim ol na i givim pawa na strong long ol bilong wokim ol samting bilong kastem pasin nogut.
Sampela taim ol dispela manmeri bilong wokim ol mejik samting ol i save pinis long as bilong strong bilong ol na ol i haitim. Tasol sampela taim ol i wokim tasol na ol i no save long as bilong strong bilong ol – ol i tingim olsem ol i strong nating tasol o ol i tingim olsem ol spirit bilong tumbuna bilong ol i givim pawa long ol. Tasol nogat. Ol i kisim na yusim strong na pawa bilong Satan tasol.
Tumbuna bilong yumi i giamanim yumi.
Ol tumbuna i tokim yumi olsem, “Taim yu putim sit long graun, orait yu mas mekim ol sampela kain toktok long ol spirit samting nabaut na ol kaikai bilong yu bai kamap gutpela”. Ol i tokim yumi olsem, na ol i skulim yumi long ol kainkain samting olsem, tasol ol i no tok klia olsem, ol i lidim yumi i go long ol samting bilong Satan wantaim ol wokboi bilong em.
Taim wanpela man i kamap narapela kain na ai bilong em i tanim na raun, na wanpela spirit samting i mekim toktok long maus bilong dispela man, orait husat i toktok? Tingim. Husat tru i mekim tok? Taim ol lip na smok na stik samting i makim ol posin sanguma manmeri, orait husat i kontrolim dispela samting bilong makim ol? Smok na lip na stik i no gat strong na pawa bilong wokim dispela samting – olsem na husat i kontrolim smok na lip na stik na i makim ol posin man?
Yumi mas holim tingting, Satan em i papa bilong olgeta tok giaman na olgeta samting giaman – yumi no ken i trastim em taim em i yusim lip na smok na stik bilong makim ol posin man. Em i man bilong giaman tasol. Em i ken i trikim yumi na yumi go bagarapim narapela man nating. Satan em i no tingting long kamapim gutpela samting. Nogat. Em i laik bagarapim yu na bagarapim olgeta manmeri. Em i no man bilong stretim ol samting. Nogat. Em i man bilong bagarapim ol samting.
Spirit bilong manmeri i dai pinis i no inap mekim wanpela samting long yumi.
Na yumi no ken i tingim olsem ol spirit bilong man i dai pinis i kontrolim smok na lip na ol stik samting. Nogat. Na yumi no ken i tingim olsem ol spirit bilong man i dai pinis i kontrolim wanpela man na mekim toktok bilong makim ol posin man. Nogat.
Lukim Saveman 12:5 na 7….
5…. Na ol manmeri bai dai na i go long ples bilong oltaim oltaim bilong ol. Na manmeri long taun bilong ol, bai ol i kraikrai na singsing sori…. 7Na bodi bilong ol bai kamap graun gen, na laip God i bin givim ol bai go bek long God.
Taim manmeri i dai pinis, orait ol i no stap moa long hia long dispela graun. Nogat. Ol i go pinis long ples bilong oltaim oltaim – ol i go pinis long heven o long hel – i no gat narapela ples i stap na ol i sindaun long en. Bodi bilong ol i kamap graun gen, na laip bilong ol i go pinis long God, na God i skelim ol i go long heven o long hel.
Lukim tok bilong Jisas long Luk 23:43….
43Na Jisas i bekim tok bilong em olsem, “Mi tok tru long yu, nau bai yu stap wantaim Mi long heven.”
Wanpela man ol i hangamapim long diwai kros wantaim Jisas em i bilipim na trastim God long kisim bek em long feitful wok bilong Jisas, na Jisas i tokim em olsem, “Mi tok tru long yu, nau bai yu stap wantaim Mi long heven.” Ol i planim dispela man na bodi bilong em i kamap graun gen, tasol laip (spirit) bilong em i go pinis long heven na i stap wantaim Jisas – long seim taim em i dai, orait em i go long heven wantaim spirit bilong Jisas.
Na wankain olsem long ol spirit na laip bilong ol tumbuna. Laip na spirit bilong ol i no stap nabaut na mekim toktok long yumi o kontrolim ol smok lip stik samting. Nogat. Ol i go pinis long ples oltaim oltaim bilong ol. Sapos ol i bin bilipim na trastim God long kisim bek ol long feitful wok bilong Jisas na ol i pas long Jisas, orait ol i stap pinis wantaim Jisas long heven. Sapos ol i no bin bilipim na trastim Jisas, orait ol i go pinis long hel. Olsem na ol i no inap mekim wanpela samting bilong tokim yumi o bilong kontrolim ol sampela samting bilong makim posin man. Nogat. Em i Satan wantaim ol wokboi bilong em i mekim ol dispela mejik samting – i mekim ol dispela kastem pasin nogut samting.
Yumi no ken i pilai pilai long ol kastem pasin nogut.
Taim yumi pilai pilai long ol dispela kainkain mejik posin sanguma puripuri marila pasin samting – ol dispela kastem pasin nogut samting – orait yumi pilai pilai long samting i bikpela samting tumas – samting i strong tumas long yumi manmeri bilong dispela graun. Em olsem na mobeta yumi no lainim na yumi no bihainim na yumi no stap klostu na yumi no pilai pilai long ol dispela samting.
Long Aposel 13:4-12 i gat 2-pela samting moa mi laik makim na soim yu….
- Man i wokim pasin mejik em i wok long daunim tok bilong God, bai gavana i no ken i kisim bilip. (Lukim lain 8.)
Yu save, dispela em i pasin bilong Satan – Satan em i les tru long manmeri i harim tok bilong God, long wanem, em i les tru long manmeri i bilipim na trastim trupela gutnius i tokaut long God i kisim bek sin manmeri long feitful wok bilong Jisas tasol. Satan em i no tingim yumi, na em i no tingting long helpim yumi. Nogat. Em i tingting tasol long paulim yumi na yumi no ken i tanim bel na bilipim na trastim feitful wok bilong Jisas na bihainim Jisas. Man i wokim mejik em i mekim pasin olsem Satan wantaim ol wokboi bilong em. Lukim lain 10 na skelim pasin bilong dispela man.
Em olsem na yumi mas save olsem, ol kastem pasin nogut bilong ples em i stap bilong stopim manmeri i tanim bel na bihainim trupela tok bilong God. Ol dispela samting i stap bilong daunim trupela bilip long feitful wok bilong Jisas. Ol kastem pasin nogut i stap bilong yumi no ken i bilipim na trastim God long kisim bek yumi long feitful wok bilong Jisas tasol.
Kastem pasin nogut em i samting bilong giaman na samting bilong paulim tok bilong God na samting bilong bagarapim manmeri bai ol i no ken i kisim laip long feitful wok bilong Jisas.
- Pawa na strong bilong God i winim pawa na strong bilong Satan. (Lukim lain 11.)
God yet i holimpas dispela man i wokim mejik na Em i mekim em i kamap aipas man. Aposel Pol i no mekim wanpela samting. Nogat. God i mekim, long wanem, pawa na strong bilong God i winim pawa na strong bilong Satan.
Na yumi i pas long Jisas – yumi i bilipim na trastim God long kisim bek yumi long feitful wok bilong Jisas long diwai kros – yumi i bihainim Jisas – yumi save olsem, God i yusim pawa na strong bilong Em bilong mekim ol gutpela gutpela samting long yumi.
Lukim Rom 8:28-29….
28Na yumi save pinis, God i save bosim olgeta samting bilong mekim gut long ol manmeri i lavim Em, em ol manmeri God i singautim long laik na plen bilong Em. 29Bipo tru God i save tru long lain bilong Em, na Em i bin makim ol bilong mekim ol i kamap wankain olsem Pikinini bilong Em na bai dispela Pikinini i stap fesbon bilong planti brata.
Na lukim Efesus 1:19-23….
….19na yupela ken i klia olsem, strong bilong God i winim olgeta strong na God i save yusim dispela strong bilong helpim yumi i bilip. Na dispela strong i bikpela strong tru na em i olsem strong 20God i bin yusim taim Em i kirapim Jisas long matmat na sindaunim Em long han sut bilong Em long heven. 21God i mekim Krais i stap antap tru long olgeta hetman na long olgeta man i gat namba bilong bosim ol sampela samting na long olgeta gavman na king na long olgeta man i gat nem. Krais i stap antap long olgeta nau na Em bai stap antap long olgeta long bihain taim tu. 22God i putim olgeta samting aninit long lek bilong Krais, na Em i mekim Krais i stap het tru bilong olgeta samting, na Em i mekim dispela hetman het bilong sios, 23na sios em i bodi bilong Krais. Na Krais Em i pulimapim sios na Em i pulimapim olgeta samting.
Satan i yusim pawa na strong bilong em bilong stopim manmeri long bilipim na trastim na bihainim Jisas, tasol pawa na strong bilong God i winim pawa na strong bilong Satan, na God i yusim pawa na strong bilong Em bilong kisim yumi i kam insait long femili bilong Em. God Em i pasim yumi long Jisas bilong mekim yumi holi na i no gat asua long ai bilong Em. Na Em i opim ai ia bel bilong yumi bai yumi tanim bel na yumi bilipim na trastim God long kisim bek yumi long feitful wok bilong Jisas long diwai kros. Holi Spirit i kirapim nupela laip long yumi bai yumi lusim ol samting bilong dispela graun na yumi bihainim Jisas tasol.
Harim. Sapos yumi harim tok bilong God na yumi pas long Jisas – yumi bilipim na trastim God long kisim bek yumi long feitful wok bilong Jisas long diwai kros na yumi pas long Em – orait yumi no ken i pret long wanpela samting bilong ol kastem pasin nogut bilong Satan – yumi mas i stap longwe long ol kastem pasin nogut na yumi no ken i lainim o bihainim ol kastem pasin nogut – tasol yumi no ken i pret long pawa na strong bilong en. Long wanem, Jisas i winim Satan – pawa na strong bilong Jisas i winim pawa na strong bilong Satan – na Jisas i save yusim pawa na strong bilong Em bilong sevim laip bilong ol manmeri i pas long Em.
Em tasol.
