Long ol stadi bilong yumi, taim yumi tok “kastem pasin nogut”, orait yumi makim ol kainkain samting olsem….
- Ol kainkain mejik pasin bilong putim aut o ol kainkain mejik bilong painim aut.
- Ol kainkain mejik pasin bilong wokim ol sampela samting.
- Ol kainkain pasin bilong opim maus na makim minim bilong wanpela samting.
- Ol kainkain pasin posin (sanguma na puripuri).
- Ol kainkain pasin marila.
- Pasin bilong singautim daiman o toktok long daiman o harim tok bilong daiman o bihainim wanpela samting bilong daiman.
Na tu yumi makim ol kainkain posin pasin na marila pasin na mejik pasin na ol kainkain samting olsem i stap na i hait long ai bilong mi, tasol yupela save long en o yupela harim stori long en. Long ol stadi bilong yumi, taim yumi tok “kastem pasin nogut” orait yumi makim ol dispela samting – olgeta kainkain mejik posin sanguma puripuri marila pasin samting.
Long stadi namba 1 yumi kisim save olsem, God i hetim tru olgeta kainkain kastem pasin nogut na Em i hetim ol manmeri i mekim na bihainim ol dispela samting. God i tokim ol lain manmeri bilong Em long ol i no ken i lainim o bihainim ol dispela kain samting. Buk Revelesen i putim ples klia olsem, ol manmeri i mekim o bihainim ol dispela kain samting, orait ol i no inap i stap long nupela heven na nupela graun bilong bihain. Nogat. Ol bai lus olgeta na ol i no inap sindaun wantaim Jisas long heven.
Na Baibel i tokaut long 3-pela samting long ol dispela kainkain mejik posin sanguma puripuri marila pasin samting (kastem pasin nogut). Long stadi namba 2 yumi bin skelim pinis fes toktok bilong dispela 3-pela samting. Tok yumi skelim pinis i olsem….
1. Ol samting bilong kastem pasin nogut em i samting bilong Satan wantaim ol wokboi bilong em.
Kastem pasin nogut em i no giaman samting, nogat, em i stap, na as bilong en em i Satan – Satan em i papa bilong ol kastem pasin nogut. Ol manmeri i wokim ol kastem pasin nogut ol i wokim long strong bilong Satan wantaim ol wokboi bilong Satan, em ol spirit nogut.
Ol manmeri i wokim ol kainkain kastem pasin nogut ol i no wokim nating, na ol i no wokim long pawa bilong ol yet. Nogat. Ol i mekim na wokim long strong bilong Satan wantaim ol spirit nogut. Maski ol i save long as bilong strong bilong ol o nogat, ol i mekim na wokim long strong bilong Satan.
Orait na long stadi namba 3 yumi bin skelim pinis sekon samting bilong dispela 3-pela samting Baibel i tokaut long en, na i olsem….
2. Sampela taim ol samting bilong kastem pasin nogut em i samting bilong paul tingting bilong manmeri yet.
Yumi klia pinis olsem, i gat ol kastem pasin nogut i stap, i gat ol posin sanguma puripuri samting i stap, na dispela i trupela samting i stap na i kamap long strong bilong Satan wantaim ol spirit nogut. Tasol planti samting yumi lukim long P.N.G. na yumi kolim posin sanguma puripuri samting em i no trupela samting. Nogat. Planti samting yumi lukim long P.N.G. na yumi kolim posin sanguma puripuri samting em i tok tasol, na dispela tok i kamap long giaman save bilong ol tumbuna bilong yumi – ol i bin lusim trupela save God i bin givim ol na ol i kamapim na bihainim giaman save bilong ol yet.
Em olsem na taim wanpela man i kisim sik na em i dai, orait planti manmeri bai tok olsem, “Posin man i wokim posin long em na em i dai.” Tasol ol i no lukim wanpela samting, nogat, ol i tok tasol – ol i mekim dispela tok long giaman save bilong ol tumbuna bilong ol tasol. Baibel i tok olsem, God i putim sik na bagarap na dai i stap, bai olgeta manmeri i dai na i go bek gen long graun. Em olsem na taim ol i lukim man i dai, orait ol i no lukim kastem pasin nogut bilong Satan, nogat, ol i lukim man i dai tasol olsem Baibel i tok.
Orait, nau yumi skelim namba tri tok bilong dispela 3-pela samting Baibel i tokaut long en, na i olsem….
3. Olgeta samting bilong kastem pasin nogut, maski em i samting bilong Satan o em i samting bilong paul tingting, olgeta em i samting bilong bagarapim manmeri.
Yumi mas save olsem, ol kastem pasin nogut i kamap long pawa bilong Satan em i samting bilong bagarapim yumi na samting bilong bagarapim ol manmeri. Strong bilong Satan i winim strong bilong yumi, na sapos yumi pilai pilai long ol dispela samting, orait yumi no ken i tingim olsem yumi bai winim Satan na yumi no inap kisim bagarap. Nogat. Pawa bilong Satan em i trupela samting na em i samting bilong bagarapim yumi, na mobeta yumi larim dispela samting, na yumi stap longwe long dispela samting – mobeta yumi stap longwe tru long ol kastem pasin nogut bilong Satan olsem God i tok.
Tasol yumi tok pinis olsem, em i no olgeta samting yumi makim na yumi kolim kastem pasin nogut em i kamap long strong na pawa bilong Satan. Nogat. Ol sampela samting yumi kolim kastem pasin nogut em i kamap long paul tudak tingting bilong ol tumbuna bilong yumi na em i tok tasol – em i no trupela samting i kamap long pawa bilong Satan, nogat, em i tok tasol. Na ating yumi tingim olsem, dispela samting i no inap bagarapim yumi na i no inap bagarapim ol manmeri, long wanem, em i tok tasol na i no gat kaikai bilong en i stap.
Tru, dispela kain kastem pasin nogut em i tok tasol na em i no kamap long pawa bilong Satan. Nogat. Em i giaman save na paul tudak toktok bilong ol tumbuna. Tasol yumi mas save olsem, dispela samting tu i ken i bagarapim yumi na bagarapim ol manmeri.
Yumi olgeta yumi save long man (o meri) i kisim bagarap long dispela giaman tok bilong kastem pasin nogut. Ol manmeri long ples i bilipim na trastim toktok bilong ol tumbuna ol i ken i makim man (o meri) na ol i sutim tok olsem, “Ol wanwan manmeri bilong ples i dai na yu kilim ol i dai long posin sanguma puripuri pasin bilong yu.” Ol i mekim dispela tok na kirapim belhat bilong ol planti manmeri na ol i kisim bus naip na ol i katim dispela man (o meri) na kilim em i dai.
Na dispela man (o meri) ol i katim, em i no wokim wanpela samting. Nogat. Em i stap nating tasol. Baibel i tok olsem, God i putim sik na bagarap na dai i stap, bai olgeta manmeri i dai na i go bek gen long graun. Em olsem na taim ol i lukim ol manmeri i dai, orait ol i no lukim man (o meri) i wokim posin sanguma puripuri, nogat, ol i lukim manmeri i dai tasol olsem Baibel i tok.
Yu save? Ol manmeri bilong ples ol i larim paul tudak tingting bilong ol tumbuna bilong ol i stiaim tingting bilong ol na ol i kam katim na kilim man (o meri) i dai. Dispela paul tingting na paul toktok na giaman save i bagarapim dispela man (o meri) ol i katim, na i bagarapim femili bilong em, na i bagarapim papamama bilong em na brata susa bilong em, na i bagarapim hauslain wantaim. Em olsem na dispela kain toktok em i no samting nating. Nogat. Em i samting bilong bagarapim yumi na samting bilong bagarapim ol manmeri.
Bikpela bagarap moa.
Yumi save olsem, paul tingting na giaman save bilong tumbuna bilong yumi i ken i bagarapim yumi na bagarapim ol manmeri. Tasol Baibel i tokaut long bikpela bagarap moa i ken i kamap long ol dispela kain toktok. Lukim Esekiel 13:17-19….
17BIKPELA i tok olsem, “Na yu, man bilong dispela graun, yu mas sanap na egensim ol meri bilong lain bilong yu, em ol meri i save mekim tok profet long giaman tingting bilong ol yet. Yu mas mekim tok profet bilong egensim ol, 18na yu mas tok olsem, ‘BIKPELA Bilong Bosim Olgeta Samting i tok olsem: Yupela ol meri i samapim marila paspas bilong ol manmeri i ken i werim long han bilong ol, na yupela ol meri i mekim ol marila laplap bilong ol manmeri i ken i werim long het bilong ol, yupela i bagarapim laip bilong ol. Nau yupela bai kisim bikpela bagarap. Bai yupela bagarapim laip bilong ol lain bilong Mi na sevim laip bilong yupela yet, a? Nogat. 19Long liklik hap bali na long liklik hap bret yupela i bin daunim na mekim nogut long Mi namel long lain bilong Mi. Yupela giamanim ol lain bilong Mi, na ol i harim giaman tok bilong yupela, na long dispela pasin yupela i kilim i dai ol manmeri i no ken i dai, na yupela larim i stap gut ol manmeri i no ken i stap gut.’ ”
Esekiel em i profet bilong God, na God i tokim em long egensim ol manmeri bilong Israel i bin lainim na bihainim ol samting bilong kastem pasin nogut bilong ol lain Kenan – ol lain Kenan em ol lain pastaim ol i stap long graun God i givim ol Israel.
Na God i tokim Esekiel long 2-pela samting….
- Ol kastem pasin nogut bilong ol i bagarapim laip bilong ol manmeri. (Lain 18)
- Ol manmeri i mekim na bihainim ol kastem pasin nogut, ol i no inap eskepim (abrusim) ol bagarap ol i bin kamapim long ol narapela manmeri. (Lain 18)
Na yu save long ol marila samting – em i samting manmeri i ken i werim long han lek bilong em o raunim long nek bilong em. Long tingting bilong ol planti manmeri marila samting i gat kainkain wok bilong en i stap. Sampela taim ol manmeri i yusim marila samting bilong lukautim ol na ol spirit samting i no ken i bagarapim ol long sik. Sampela taim ol sampela meri i yusim marila samting bilong pulim man na man i yusim bilong pulim meri. Em olsem tasol yumi save olsem ol dispela marila samting em i samting bilong paul toktok bilong ol tumbuna tasol – ol i tok olsem dispela samting i gat strong, tasol ol i toktok nating tasol.
Em olsem na ol sampela meri long lain Israel ol i wokim ol sampela marila samting olsem. Ol i samapim paspas samting bilong werim long han na bilong werim long het, na ol i tokim ol manmeri olsem, dispela samting i gat strong – ol i tok olsem, dispela samting em i mejik samting na i gat pawa. Na ol planti manmeri i bilipim na trastim tok bilong meri i wokim marila samting na ol i bihainim tok bilong em.
Na God i tokim Esekiel olsem, ol meri i wokim ol marila samting ol i giamanim ol lain manmeri bilong God (ol lain Israel) na dispela marila giaman i bagarapim laip bilong ol manmeri bilong God (lain 18). Meri i wokim ol marila paspas samting ol maketim na ol manmeri i baim long hap bali (bali em i samting olsem wit bilong wokim bret), na long dispela rot ol i bagarapim laip bilong manmeri bilong God.
Na yumi save lukim dispela kain bagarap long ples bilong yumi. Planti taim tumas yumi lukim ol marila samting i kamapim kros pait namel long ol manmeri. Sapos samting i no wok olsem marila meri (o man) i tok, orait ol manmeri i ken i kros na sampela taim ol i ken i pait. Na sapos ol meri i yusim marila samting bilong pulim man, orait meri bilong man i ken i kros na hauslain i ken i kros pait long dispela samting. Na wankain olsem, sapos man i yusim marila samting bilong pulim meri, orait papamama bilong meri o man bilong meri i ken i kros pait na dispela i bagarapim sindaun bilong ol planti manmeri. Em olsem na dispela giaman marila samting i ken i bagarapim planti manmeri.
Em olsem tasol ating Esekiel i minim olsem, taim ol manmeri i bilipim na trastim tok bilong meri (o man) i wokim marila samting, na ol i bihainim tok bilong em na ol i yusim ol marila paspas samting, orait ol i givim baksait long God, na ol manmeri i givim baksait long God ol bai kisim bikpela bagarap long han bilong God. Taim ol i bilipim na trastim na bihainim ol marila samting, orait ol i givim baksait long God, na ol i stap nau aninit long belhat bilong God, na bai God i mekim save long ol.
God i bin tokim ol lain Israel long ol i mas i stap longwe tru long ol dispela giaman samting – ol i no ken i lainim na bihainim ol dispela giaman marila samting. Tasol ol i givim baksait long tok bilong God na ol i lainim na bihainim ol giaman marila samting, na nau ol bai fesim belhat bilong God – God bai mekim save long ol. Dispela giaman marila samting i kisim bagarap i kam long ol – em i samting bilong bagarapim ol.
Hauslain i bagarap olgeta.
Lukim lain 19. “Yupela giamanim ol lain bilong Mi, na ol i harim giaman tok bilong yupela, na long dispela pasin yupela i kilim i dai ol manmeri i no ken i dai” God i sutim dispela tok long ol manmeri i wokim ol marila samting. Long nogut bilong ol, ol i bagarapim ol lain Israel. God i givim graun long ol lain Israel bai ol i sindaun aninit long Em na kisim laip long han bilong Em. Ol i manmeri bilong kisim laip, tasol nau nogat. Nau ol bai bagarap – God bai mekim save long ol na ol bai lukim belhat bilong God na ol bai bagarap. Long wanem, ol i givim baksait long tok bilong God na ol i bilipim na trastim na bihainim tok bilong ol manmeri i wokim ol marila samting.
Na God i skruim tok olsem, “….na yupela larim i stap gut ol manmeri i no ken i stap gut.” Ol manmeri i wokim ol marila samting ol i manmeri bilong lus – ol i manmeri bilong lukim belhat bilong God. Tasol ol Israel ol i no tingim na ol i sapotim na lukautim ol bai ol i stap gut.
Tingting bilong ol Israel i paul olgeta.
Na yumi save lukim ol dispela kain paul tingting long ples bilong yumi (na long taun tu). Ol manmeri i wokim giaman marila samting ol i manmeri nogut na ol i manmeri bilong bagarapim manmeri long giaman bilong ol, tasol ol planti manmeri bilong ples (na long taun) ol i save harim tok bilong ol na ol i bilipim na trastim na bihainim tok bilong ol.
Ol i save harim tok bilong ol manmeri i wokim giaman marila samting – na ol i save daunim na bagarapim man i autim trupela tok bilong God! * Ol i les long harim trupela tok bilong God na ol i les long ol narapela man i harim trupela tok bilong God. Olsem na ol i save bagarapim man i autim trupela tok bilong God, na long dispela pasin ol i no kisim laip long feitful wok bilong Jisas na ol i stopim ol narapela manmeri i kisim laip long feitful wok bilong Jisas.
( * Trupela tok bilong God i tok klia olsem, God i kisim bek sinmanmeri long feitful wok bilong Jisas tasol, na Em i no inap kisim bek ol long ol narapela samting olsem baptais o Sande na Sabat pasin o gutpela pasin bilong ol manmeri. Nogat. God i kisim bek sinmanmeri long feitful wok bilong Jisas tasol. Na dispela trupela tok i save kamapim laip long ol manmeri i tanim bel na i bilipim na trastim na bihainim).
Ol planti manmeri bilong ples (na long taun tu) ol i pasim tingting bilong ol na pasim ai bilong ol na ol i larim nogut samting i bagarapim ol. Na gutpela samting bilong kisim laip i kam long ol, orait ol i les na ol i bagarapim na daunim.
Tru tumas, tingting bilong ol i paul olgeta.
Baibel i givim woning long yumi.
Yumi mas save olsem, olgeta samting bilong kastem pasin nogut em i samting bilong bagarapim yumi. Ol kastem pasin nogut bilong Satan wantaim ol kastem pasin nogut i giaman tok tasol, olgeta i samting bilong bagarapim yumi. Planti manmeri long ples i bagarap pinis long ol dispela samting – ol dispela samting i save kamapim kros pait na i bagarapim hauslain. Na tu, manmeri i givim baksait long God na ol i harim tok bilong ol kastem pasin nogut, na ol i bilipim na trastim ol dispela samting, orait ol bai fesim belhat bilong God – bai God i mekim save long ol – ol i no inap i stap nating.
Harim. Yumi no ken i tingim olsem yumi ken i go long ol samting bilong kastem pasin nogut na yumi stap orait. Nogat tru. Bai yumi bagarap. Olsem na mobeta yumi lusim na yumi ranawe long ol dispela samting na yumi harim na bihainim na bilipim na trastim olgeta samting God i tokim yumi.
Sapos yumi bilong Jisas – sapos yumi bilipim na trastim God long kisim bek yumi long feitful wok bilong Jisas long diwai kros tasol, na yumi tanim bel na bihainim Em, orait yumi no ken i bihainim ol toktok bilong ol kastem pasin nogut. Nogat. Yumi bilong lait bilong BIKPELA na ol kastem pasin nogut em i samting bilong tudak, na dispela tupela samting i no inap i pas wantaim. Em olsem na, yumi mas wokim disisen bilong yumi, na yumi bihainim wanpela na yumi lusim narapela.
Yumi mas kisim wankain tingting olsem Josua – lukim tok bilong Josua long Josua 24:15….
15Tasol, sapos yupela no laik bihainim BIKPELA, orait yupela yet yupela makim husat yupela bai bihainim. Bai yupela bihainim ol god bilong ol tumbuna bilong yupela taim ol i stap long hapsait long wara, a? O bai yupela bihainim ol god bilong ol lain Amor, graun bilong ol nau yupela sindaun long em, a? Tasol mi wantaim femili bilong mi, mipela bai bihainim BIKPELA.
Em tasol.
