Na yu gat wanem tingting?
Long 4-pela stadi yumi bin skelim ol samting bilong kastem pasin nogut. Taim yumi tok “kastem pasin nogut” yumi makim olgeta kainkain posin sanguma puripuri pasin wantaim olgeta kainkain pasin marila wantaim olgeta kainkain mejik samting yumi save lukim long P.N.G.
Orait na, yu gat wanem tingting long ol dispela toktok yumi bin skelim long ol samting bilong kastem pasin nogut? Yu wanbel o yu les o yu belhat o nogat?
“Satan em i papa bilong ol kainkain kastem pasin nogut, na ol manmeri i wokim ol kainkain kastem pasin nogut ol i wokim long pawa na strong bilong Satan.” Orait na, yu wanbel long dispela toktok o yu tingim olsem kastem pasin nogut em i no samting bilong Satan na em i samting bilong strong bilong manmeri tasol, a?
“Ol sampela samting yumi lukim na yumi kolim kastem pasin nogut, em i no trupela kastem pasin nogut bilong Satan – em i samting bilong paul tudak tingting bilong ol manmeri.” Orait na, yu gat wanem tingting? Yu tingim olsem mi tok stret o yu tingim olsem mi no gat save?
Yu gat wanem tingting? Ol kastem pasin nogut i no nogut samting na i no inap bagarapim yumi, a? Yu tingim olsem yu ken i lainim na bihainim ol dispela samting na yu no inap kisim bagarap long en, a? Yu tingim olsem kastem pasin nogut em i gutpela samting na yu no inap bagarap long en, a?
Na ol dispela toktok i givim belhat long yu, a? Yu belhat long Baibel long i putim ples klia ol paul tudak save bilong ol kastem pasin nogut samting, a? Yu belhat long longwe man i kam na i kapsaitim ol samting tumbuna bilong yu i bilipim na bihainim na ol samting yu tu i bilipim na bihainim na trastim, a?
Ol samting yu bilipim na trastim longtaim pinis – ol samting yu sanap long en – Baibel i kapsaitim na God i daunim dispela samting yu bilipim na trastim na sanap long en. Na dispela kain toktok i ken i kamapim kros, long wanem, yumi manmeri yumi les long ol narapela manmeri i tokim yumi olsem bilip bilong yumi i paul na yumi bihainim samting i no tru.
Bai yu mekim wanem?
Sapos yu skelim pinis ol 4-pela stadi long ol samting bilong kastem pasin nogut, orait nau bai yu mekim wanem? Bai yu daunim ol dispela toktok, a? Bai yu tingim olsem, save bilong ol tumbuna bilong yu na save bilong yu yet i nambawan na i winim olgeta narapela save, a? Ating sampela manmeri bai mekim olsem.
Tasol mi tingim olsem, planti manmeri bai i stap nating tasol. Maski wanem toktok Baibel i mekim, ol planti manmeri bai i stap nating tasol na ol i no inap senisim tingting bilong ol na lusim ol giaman save bilong tumbuna na bihainim tok bilong God. Planti manmeri bai tok, “Tru,” tasol ol i no inap senisim tingting bilong ol na lusim ol samting bilong kastem pasin nogut.
Nau mi laik tok strong long yu olsem, yu no ken pasim tingting bilong yu na i stap nating, long wanem, dispela samting i bikpela bikpela samting tumas. Yu mas skelim na tingting na wokim disisen bilong yu.
Ol hauslain bai bruk bruk.
Sapos yu lusim bilip bilong ol tumbuna na yu lusim ol giaman save bilong ol tumbuna, orait dispela i no liklik samting na ol femili na hauslain bilong yumi bai kros na bruk bruk.
Yumi mas save olsem, taim man i autim trupela tok bilong God, orait sampela manmeri bai harim, na sampela manmeri bai kros na tok nogut long Rot (“Rot” em i narapela nem bilong trupela gutnius i tokaut long God i kisim bek sin manmeri long feitful wok bilong Jisas tasol). Lukim Aposel 19:8-10….
8Na Pol i go long haus lotu bilong ol Juda. Long 3-pela mun olgeta em i strong long autim tok long ol. Em i mekim gutpela tok bilong kliaim tingting bilong ol na em i wok long stiaim tingting bilong ol long ol samting bilong kingdom bilong God. 9Tasol sampela bilong ol i pasim bel na i no laik bilip, na long ai bilong kongregesen ol i tok nogut long Rot. Em olsem na Pol i lusim ol na i kisim ol disaipel i go wantaim em. Na long olgeta de, long haus skul bilong Tiranus, em i mekim gutpela tok bilong kliaim tingting bilong ol manmeri. 10Long 2-pela yia Pol i mekim olsem. Em olsem na olgeta manmeri bilong provins Esia i harim tok bilong BIKPELA, ol manmeri Juda na ol Grik wantaim.
Sampela manmeri ol bilipim na trastim trupela gutnius Pol i autim, na sampela manmeri ol i pasim bel na ol i les long bilipim na trastim tok bilong Pol na ol i mekim tok nogut long tok bilong Pol. Em olsem na, Pol wantaim ol manmeri i bilipim na trastim gutnius ol i lusim ol manmeri i pasim bel – ol i lusim ol na ol i bung long haus bilong Tiranus na ol i harim trupela gutnius bilong God long haus bilong Tiranus. Yu save, trupela tok bilong God i separetim ol – hauslain i bruk.
Yumi mas holim tingting olsem, God yet i save separetim ol manmeri – God yet i save brukim ol hauslain. Sampela manmeri bilong hauslain bai bilipim na trastim God long kisim bek ol long feitful wok bilong Jisas, na ol narapela manmeri bai bilipim na trastim God long kisim bek ol long baptais bilong ol o long Sande na Sabat bilong ol o long ol gutpela pasin bilong ol – na dispela i save separetim ol na mekim hauslain i bruk. Lukim tok bilong Jisas long Jon 3:36….
36Man i bilip long Pikinini, em i gat laip i stap gut oltaim oltaim. Man i no bihainim tok bilong Pikinini, em i no inap kisim laip. Nogat. Belhat bilong God i stap yet long Em.
Na Pikinini (Jisas) i tok wanem? Harim tok bilong Em long Jon 14:6….
6“Mi yet Mi rot, na Mi as bilong Tok i tru, na Mi as bilong laip. Na i no gat wanpela man inap i go long Papa long narapela rot. Nogat. Long Mi tasol.”
Yu save, planti manmeri bilong P.N.G. ol i bilip long God. Tasol em i no samting bilong bilip long God i save separetim na brukim hauslain. Nogat. Em i samting bilong Jisas i save separetim ol manmeri. Sampela manmeri i bilipim na trastim God long kisim bek ol long feitful wok bilong Jisas tasol, na ol sampela manmeri i tingim olsem God bai kisim bek ol long ol narapela samting olsem baptais na Sabat na lotu na gutpela pasin bilong ol yet na ol kainkain samting olsem.
Yumi mas skelim gut – God i kisim bek yumi long feitful wok bilong Jisas tasol o nogat? Wok bilong Jisas em inap o nogat? Yumi mas joinim joinim ol wok bilong yumi wantaim wok bilong Jisas bai God i kisim bek yumi o nogat? Em i ol dispela samting i save separetim ol manmeri (na i separetim ol wanwan lotu na ol wanwan misin).
Sapos wanpela man em i bilipim na trastim God long kisim bek em long feitful wok bilong Jisas tasol na em i tanim bel na bihainim Jisas, orait dispela man em i gat laip i stap gut oltaim oltaim. Tasol sapos narapela man em i tingim olsem God i ken i kisim bek em long ol narapela samting olsem baptais na Sabat na gutpela pasin bilong em yet, orait belhat bilong God i stap yet long em. Em olsem na dispela tupela man i stap separet separet – wanpela i bilipim na bihainim wanpela samting, na narapela i bilipim na bihainim narapela samting – wanpela i gat laip i stap gut oltaim oltaim, na narapela bai lukim belhat bilong God – wanpela bai stap long heven, na narapela bai stap long hel.
Jisas yet Em i rot – Jisas wanpela Em i rot – feitful wok bilong Jisas long diwai kros yet Em i rot – God i kisim bek sin manmeri long feitful wok bilong Jisas tasol – God i no inap kisim bek sin manmeri long ol narapela narapela samting, nogat, long feitful wok bilong Jisas tasol.
Em olsem na God yet i save separetim na brukim manmeri long dispela samting. Manmeri i bilipim na trastim God long kisim bek ol long feitful wok bilong Jisas na ol i tanim bel na bihainim Jisas, orait ol i bilong God na ol i bilong kingdom bilong God. Tasol manmeri i tingim olsem God i ken i kisim bek ol long ol narapela samting olsem Sabat na baptais na misin pasin na ol kainkain samting olsem, orait ol i no bilong God na ol i stap autsait long kingdom bilong God.
Em olsem na sapos yumi pas wantaim long ol manmeri i bilipim na trastim God long kisim bek ol long feitful wok bilong Jisas, orait yumi separet long ol manmeri i bilipim na trastim God long kisim bek ol long ol narapela samting olsem Sabat na baptais na misin pasin na gutpela pasin bilong ol yet na ol kainkain samting olsem. Manmeri i bilipim na trastim God long kisim bek ol long ol narapela samting, ol i lus long yumi i bilipim na trastim God long kisim bek yumi long feitful wok bilong Jisas.
Olgeta hauslain long dispela graun bai bruk long dispela rot. Na hauslain bilong yumi i bruk pinis long dispela rot.
Pastaim mi tok, “Sapos yu lusim bilip bilong ol tumbuna na yu lusim ol giaman save bilong ol tumbuna na yu lusim ol kastem pasin nogut bilong ol tumbuna, orait dispela i no liklik samting na ol femili na hauslain bilong yumi bai kros na bruk bruk.” Ol planti manmeri i les long hauslain i bruk olsem.
Tasol yumi mas save olsem, hauslain bilong yumi i bruk pinis. Long wanem, manmeri i bilipim na trastim God long kisim bek ol long ol narapela samting, ol i lus long yumi i bilipim na trastim God long kisim bek yumi long feitful wok bilong Jisas – ol i stap separet long yumi pinis – yumi stap separet long ol pinis. Feitful wok bilong Jisas i save separetim yumi long ol manmeri i bilipim na trastim God long kisim bek ol long ol narapela samting.
Yumi no ken i pret long lusim ol samting bilong kastem pasin nogut.
Yumi save pinis olsem, yumi mas i stap separet long olgeta samting bilong kastem pasin nogut. Taim ol manmeri i laik toktok planti long ol dispela samting, orait yumi mas lus long ol – yumi mas i stap separet long ol – yumi mas i stap longwe long ol. Taim hauslain i laik pait long ol dispela samting, orait yumi mas lus long ol – yumi mas i stap separet long ol – yumi mas i stap longwe long ol – yumi larim ol tasol.
Na yumi no ken i pret long larim ol. Long wanem, taim yumi tanim bel na yumi bilipim na trastim God long kisim bek yumi long feitful wok bilong Jisas, orait yumi lus long ol pinis – yumi separet long ol pinis – yumi bilong narapela lain pinis – yumi bilong narapela samting pinis. Olsem na, taim ol i laik toktok planti long kastem pasin nogut na pait long dispela samting, orait yumi ken i larim ol na i stap separet long ol dispela samting.
Lukim tok i stap long Aposel 19:11-19….
11Na God i wokim ol narapela kainkain mirakel long han bilong Pol. 12Em olsem na wanem hankisip o laplap i tasim skin bilong Pol, ol i karim i go long ol sikman na sik bilong ol i pinis na ol spirit nogut i lusim ol. 13Na ol sampela Juda, ol i save raun na wok bisnis long rausim ol spirit nogut, ol i traim na kolim nem bilong BIKPELA Jisas bilong rausim ol spirit nogut. Ol i tokim ol spirit nogut, “Pol i tokaut long Jisas, na long nem bilong dispela Jisas mipela tokim yupela, yupela lusim na i go.” 14Na 7-pela pikinini man bilong Skeva i bihainim dispela pasin. Skeva em i wanpela namba wan het pris bilong ol Juda. 15Tasol, spirit nogut i bekim tok bilong ol olsem, “Mi save long Jisas, na mi klia long Pol, tasol yupela husat?” 16Na man we spirit nogut i stap long em, em i kalap long ol na i paitim na winim ol tru. Em i mekim olsem na ol i bagarap nogut tru na ol i lusim haus na ranawe skin nating. 17Bihain, olgeta manmeri bilong taun Efesus, ol Juda na Grik wantaim, olgeta i harim tok long dispela samting na ol i pret. Na ol i rispektim moa nem bilong BIKPELA Jisas. 18Na ol planti bilip manmeri ol i kam na ol i konfesim na autim pasin nogut ol i bin mekim. 19Na sampela manmeri, ol manmeri bilong wokim ol mejik samting, ol i kisim ol buk mejik bilong ol i kam na ol i kukim long ai bilong olgeta manmeri. Ol i kauntim pe bilong ol dispela buk na em i kamap 50,000 silva mani. 20Em olsem na tok bilong BIKPELA i ran i go moa na em i no lus liklik.
Lukluk gut long lain 17-19 na yumi skelim. Ol planti manmeri bilong taun Efesus, em ol manmeri Juda wantaim ol manmeri Grik, pastaim ol i bihainim ol kastem pasin nogut (ol mejik samting). Tasol taim ol i rispektim moa nem bilong BIKPELA Jisas – taim ol i bilipim na trastim God long kisim bek ol long feitful wok bilong Jisas na ol i tanim bel na konfesim sin bilong ol, orait ol i bungim olgeta mejik samting bilong ol na ol i kukim – ol dispela samting i lus long ol na ol i stap separet long ol dispela bipo samting bilong ol.
Na ol i no giaman long kukim ol mejik samting bilong ol. Nogat. Ol i lusim trutru na long dispela as tok bilong BIKPELA i ran i go moa na em i no lus liklik. Tingting long P.N.G. – planti manmeri ol i giaman long kukim ol mejik samting bilong ol – ol i no lusim trutru – na tok bilong God long feitful wok bilong Jisas i lus tumas long P.N.G.
Yumi mas lusim ol kastem pasin nogut – ol dispela mejik samting bilong ol tumbuna bilong yumi – yumi mas lusim trutru. Yumi no ken i giaman long antap skin tasol. Nogat. Trutru yumi mas i stap longwe long ol dispela samting – trutru yumi mas lus long ol dispela samting – trutru yumi mas i stap separet long ol dispela samting.
Yumi no ken i tok olsem, “Dispela i hat tumas.” Yumi no ken i tok olsem, “Ol dispela samting bilong kastem pasin nogut bilong tumbuna bilong yumi i stap longtaim pinis na i hat tru long yumi lusim.” Harim. Ol manmeri bilong taun Efesus i bilipim na trastim God long kisim bek ol long feitful wok bilong Jisas ol i bin lusim. Olsem na, yumi tu yumi ken i lusim. Ol mejik samting bilong ol Efesus i stap longtaim pinis long ol, na i hat long ol i lusim, tasol ol i lusim. Ol i taitim bun na ol i lusim. Ol i no pilai pilai. Nogat. Ol i lusim trutru. Ol i amamas tru long God i kisim bek ol long feitful wok bilong Jisas na dispela i strongim ol long lusim olgeta samting bilong kastem pasin nogut bilong ol.
Kastem pasin nogut i no inap win.
Lukim lain 20. Ol mejik samting bilong ol Efesus i kamap sit bilong paia tasol – ol Efesus ol i kukim ol mejik samting bilong ol na ol dispela samting i kamap sit bilong paia – das samting – samting nating. Tasol tok bilong BIKPELA i no lus liklik. Tok bilong kastem pasin nogut bai lus olgeta na tok bilong God bai i stap strong na i no inap lus liklik.
Planti manmeri i tingim olsem tok bilong kastem pasin nogut i strong yet na i ron i go yet. Long ai bilong yumi bilong dispela graun ol dispela samting i luk olsem em i gat strong. Tasol nogat. Olgeta samting bilong kastem pasin nogut bai pinis olgeta na tok bilong God tasol bai i stap na i ron i go. Kastem pasin nogut i no inap win – em i lus samting pinis.
Em olsem na, nogut yumi pas long samting i lus pinis na i no inap win. Kastem pasin nogut em i olsem sit bilong paia – em i olsem das nating – em i lus samting na i no gat strong. Olsem na yumi no ken i pas long dispela samting. Yumi lusim na yumi pas long BIKPELA na yumi pas long toktok bilong BIKPELA.
Nau em i taim bilong senis bilong yumi.
Yumi mas senis na yumi tanim bel long olgeta samting bilong kastem pasin nogut na yumi putim bilipim na trastim bilong yumi long Jisas wanpela tasol. Yumi mas lusim olgeta narapela rot na yumi kam long rot God yet i bin makim. God i kisim bek sin manmeri long rot bilong feitful wok bilong Jisas long diwai kros tasol. Olsem na yumi pas long dispela rot na yumi lainim na bihainim dispela rot.
Sapos yumi no skelim na yumi no tingim na yumi no pas long Jisas, na yumi no bilipim na trastim God long kisim bek yumi long feitful wok bilong Jisas, orait bai yumi dai long ol sin bilong yumi na yumi lus long God oltaim oltaim.
Tasol sapos yumi skelim na yumi bilipim na trastim Jisas wanpela Em i rot bilong God i kisim bek yumi, na yumi bihainim Em, orait bai yumi stap laip wantaim Jisas na wantaim God oltaim oltaim.
Em tasol.
