Moning.
Yu save, planti manmeri i mekim tok olsem, “God i ken i kisim bek yumi.” Na yumi tu yumi save mekim wankain tok olsem. Planti taim yumi tok, “God i ken i kisim bek yumi long feitful wok bilong Jisas.” Tru, God i ken i kisim bek yumi long feitful wok bilong Jisas long diwai kros, tasol tok “kisim bek” i olsem wanem? Taim God i kisim bek wanpela man o wanpela meri, orait Em i mekim wanem kain pasin?
Tingim. Sapos meri bilong yu i lusim yu na em i paul nabaut wantaim ol man na em i mekim 2-kina meri pasin na em i save marit marit long ol narapela narapela man, orait, bai yu wanbel long kisim em bek gen o nogat? Em i mekim pasin nogut tumas long yu na em i semim yu na em i no naispela meri. Em olsem na, bai yu wanbel long kisim em bek gen na em i ken i stap meri bilong yu o nogat? Bai yu kisim em bek gen na lavim em na mekim gutpela long em o nogat? Ating yumi bai les long kisim bek dispela kain meri. Yumi no inap wanbel long kisim bek kain meri olsem.
Meri bilong Hosea i meri nogut.
Long Olpela Testamen i gat stori i stap bilong wanpela profet, nem bilong em i Hosea. Na meri bilong Hosea em i no gutpela meri na em i lusim Hosea na em i raun na i mekim pasin bilong 2-kina meri na em i paul wantaim ol planti man nabaut. Na dispela pasin i givim bikpela sem long profet Hosea.
Tasol God i tokim Hosea long kisim bek dispela meri na em mas i stap meri bilong em stret. God i tokim Hosea long kisim bek meri bilong em na lavim em na mekim gutpela pasin long em. Em olsem na Hosea i bihainim tok bilong God na em i kisim bek meri bilong em na em i lavim em na em i lukautim em na em i mekim gutpela pasin long em.
Na God i tokim Hosea olsem, dispela em i olsem wanpela tok piksa. Hosea i kisim bek 2-kina pamuk meri bilong em i olsem tok piksa long God i kisim bek sinmanmeri. Ol sinmanmeri ol i olsem 2-kina pamuk meri bilong Hosea. Na wankain olsem Hosea i kisim bek meri nogut bilong em, orait God i save kisim bek ol lain nogut bilong Em na Em i lavim ol na lukautim ol na i mekim gutpela pasin long ol. (Yu ken i ritim stori bilong Hosea long buk Hosea long Olpela Testamen.)
Papa i kisim bek pikinini nogut.
Na Jisas i bin stori long wanpela papa na em i kisim bek wanpela nogut pikinini man bilong em. Wankain olsem meri bilong Hosea dispela pikinini man bilong papa i bin mekim pasin nogut long papa na em i bin semim papa na em i daunim papa long ai bilong ol manmeri.
Tasol, olgeta taim papa i wetim pikinini nogut bilong em bilong kisim bek em. Na taim pikinini i kam bek gen long papa, orait papa i amamas long kisim bek pikinini nogut bilong em na i mekim em i stap pikinini bilong em gen.
Na dispela stori tu em i tok piksa. Papa bilong stori em i tok piksa long Papa God, na pikinini nogut em i tok piksa long yu na mi ol sinmanmeri. (Yu ken i lukim dispela stori long Luk 15:1-32.)
Em olsem na pamuk meri bilong Hosea em i tok piksa bilong yu na mi ol sinmanmeri. Long ai bilong God yumi olsem pamuk meri bilong Hosea. Na long ai bilong God yumi olsem pikinini man bilong papa. Yumi bin lusim God na yumi raun long laik na save bilong yumi yet na yumi semim Papa God na yumi mekim pasin nogut long Em.
God Em i God bilong kisim bek manmeri nogut.
Tasol God Em i God bilong kisim bek sinmanmeri na mekim sinmanmeri i stap pikinini bilong Em. Em i save adoptim manmeri nogut bilong mekim ol i stap pikinini bilong Em long femili bilong Em. Tingim. God Em inap bel hat long yumi na lusim yumi. Tasol nogat. Em i wok long kisim bek sinmanmeri olsem yu na mi. Yumi bin lusim Em, tasol Em i ken i kisim bek yumi.
God i no kisim bek yumi nating.
God Em i God bilong kisim bek sinmanmeri, tasol yumi mas klia olsem, taim God i kisim bek yumi, orait Em i no kisim bek yumi nating. Nogat. God i kisim bek yumi sinmanmeri long hatpela wok bilong Jisas long diwai kros. God yet i wokim rot bilong kisim bek sinmanmeri, na dispela rot em i hatwok bilong Jisas long diwai kros. Long diwai kros Jisas i pinisim pe bilong sin bai yumi sinmanmeri yumi no ken i kisim. God i pinisim pe bilong sin long Jisas long diwai kros bai God i kisim bek yumi na mekim yumi i stap pikinini bilong Em long femili bilong Em.
Em olsem na, sapos yu tanim bel na givim bel bilong yu long God na yu trastim God long kisim bek yu long hatwok bilong Jisas long diwai kros, orait yu ken i amamas. Yu ken i amamas bikos God Em i God bilong kisim bek sinmanmeri na Em i kisim bek yu. Yumi olsem meri bilong Hosea na yumi olsem pikinini bilong papa long tok piksa stori Jisas i bin autim. Tasol tenkyu tru long Papa God – Em i God bilong kisim bek sinmanmeri. Em i kisim bek sinmanmeri i bilipim na trastim feitful wok bilong Jisas long diwai kros.
[Krais Jisas] Em i rot bilong God i kisim bek yumi. Long dispela as, na Tok bilong God i tok pinis olsem, “Sapos yu laik litimapim na trastim nem bilong wanpela samting, orait yu litimapim na trastim nem bilong BIKPELA tasol.” 1 Korin 1:30-31.
Tok tenkyu long Papa, Em i wokim rot long feitful wok bilong Jisas long diwai kros bilong kisim bek yumi na bilong adoptim yumi bilong mekim yumi pikinini bilong Em long femili bilong Em.
Glenn.
