Efesus 4:7-13.
Yumi save pinis long sios femili bilong God. Ol manmeri God i bin makim na pasim long Jisas, na Jisas i mekim wok na mekim ol holi na i no gat asua long ai bilong God, na Holi Spirit i wok insait long ol na i givim trupela bilip long ol, orait God Em i pasim ol wantaim na Em i kamapim sios femili bilong Em. Sios femili bilong God em i wanpela nupela komyuniti we ol manmeri bilong God i pas wantaim.
Em olsem na yumi i bilipim na trastim God long kisim bek yumi long feitful wok bilong Jisas long diwai kros – yumi i bilipim na trastim na bihainim Jisas – orait yumi sios femili bilong God.
Olgeta manmeri i pas long Krais na i pas long sios femili ol i presen Jisas i givim sios.
Na long Efesus 4:7-13 aposel Pol em i stori long presen Krais i givim sios femili bilong God. Na dispela presen em i wanem samting? Jisas i givim wanem kain presen long sios femili bilong Em?
Pastaim yumi ken i tok olsem, Krais i givim strong (grasia) long yumi olgeta wanwan manmeri bilong sios femili bilong God, bai yumi ken i mekim gutpela wok namel long sios komyuniti. (Lukim lain 7 wantaim lain 12.) Long rot bilong grasia Jisas i givim strong long yu na long mi bai yumi mekim ol gutpela wok – yu mekim gutpela wok long mi na mi mekim gutpela wok long yu – yumi mekim ol gutpela wok long ol manmeri i pas long sios femili bilong God.
Na strong Krais i givim yumi manmeri bilong sios femili bilong God em i narapela narapela. Jisas i no givim wankain strong – seim kain strong – long yumi wanwan. Nogat. Em i givim narapela narapela kain strong long yumi narapela narapela manmeri. (Lukim lain 7.)
Em olsem na yumi tingim – Krais i givim kainkain strong long yumi wanwan manmeri, bai yumi manmeri i mekim gutpela wok namel long manmeri bilong God. Jisas i givim yu long mi na mi long yu – Em i givim yumi long yumi – Em i givim grasia na kainkain strong long yu na long mi wantaim bai yumi wantaim yumi mekim gutpela wok namel long sios femili manmeri bilong God.
Em olsem na, yumi ken i tok olsem, presen Krais i givim sios em i ol wanwan kainkain manmeri. Krais i givim ol wanwan kainkain manmeri long yumi bilong mekim gutpela wok namel long yumi, bai wok bilong Jisas long laip bilong yumi wanwan i ken i kamap strong. (Lukim lain 12-13.)
Wanpela bilong yumi i no winim narapela bilong yumi.
Long narapela stadi yumi bin skelim lain 1-6 na yumi save olsem, wanpela bilong yumi i no winim narapela bilong yumi. Yumi olgeta yumi stap long seim level – long wanpela level – olsem na, i no gat as long wanpela bilong yumi i apim em yet namel long sios femili.
Tasol dispela i no minim olsem yumi olgeta i gat seim kain strong bilong mekim seim kain wok. Nogat. Pol i tokaut klia olsem, ol manmeri insait long sios ol i stap long wanpela level – em olsem na lukim stat long lain 7 – Pol i skruim tok olsem, Tasol Krais i bin skelim na tilim strong long yumi wanwan manmeri bilong sios bilong yumi mekim wok. Na i no seim kain strong bilong mekim seim kain wok. Nogat. Em i narapela narapela kain strong bilong mekim kainkain wok. Krais i givim kainkain strong bilong mekim kainkain wok long olgeta kainkain manmeri i pas wantaim long sios femili.
Lukim lain 8-10….
Pol i tok nau long husat i givim ol dispela kainkain strong bilong mekim wok – em i tokaut long Het bilong sios – Jisas Krais. Bihain long dai bilong Em, Krais i bin go antap long heven. Pastaim Em i kam daun long dispela graun we sin i pulap long em, na Em i mekim wok bilong kisim bek ol manmeri God i bin givim Em ( “bikpela lain kalabusman” ), na taim Em i dai na ol i putim Em insait long graun (long matmat) – taim Em i pinisim wok bilong Em, orait Em i kirap na Em i go antap. Em i dispela Man i givim wanwan manmeri long yumi long sios femili ( “Em i givim presen long ol manmeri” ), bai ol i mekim ol kainkain wok inap long strong Krais i givim ol.
Lukim lain 12-13….
Jisas i bin givim ol aposel na ol profet long sios (ol i as ston bilong sios). Na Em i givim ol wanwan evanselis na ol wanwan pasta na tisa. Na Em i givim ol long sios bilong helpim ol manmeri Krais i givim sios, bai ol i redi long mekim ol gutpela gutpela wok namel long sios komyuniti bilong God.
Olsem na, mi tok pinis….
Olgeta manmeri i pas long Krais na i pas long sios femili ol i presen Krais i givim sios. Ol i no wankain, na strong bilong ol i no wankain, na wok bilong ol i no wankain. Nogat. Ol i narapela narapela, na ol i gat narapela narapela kain strong, bilong mekim ol narapela narapela kain wok, namel long yumi sios femili. Olgeta ol i presen Krais i givim sios femili.
Na yu tingim – dispela tok i minim olsem….
Krais i givim yu long mipela, bai yu helpim mipela manmeri bilong Krais.
Yu holim dispela tingting na yumi skruim toktok – yumi skelim wanem kain man na wanem kain wok Krais i givim sios femili bilong God.
Pastaim, Krais i givim ol aposel na ol profet long yumi sios femili.
Ol aposel na ol profet ol i as ston bilong sios (lukim Efesus 2:20). Ol aposel na profet, em i ol dispela bipo man i stap wantaim Jisas na ol lukim Jisas na Jisas i givim tok bilong Em long ol na ol i raun na autim trupela gutnius bilong Krais, na ol i raitim olgeta tisim bilong Jisas, na nau ol dispela tisim i stap long wanpela buk yumi kolim Nupela Testamen.
Olsem na, long dispela rot, Krais i givim ol aposel na profet long yumi manmeri i stap long nau – ol i as ston bilong sios bilong yumi na bilong olgeta trupela sios bilong Krais. Pol i no minim olsem, ol sampela manmeri nau ol i aposel na profet. Nogat. Em i minim olsem ol aposel na profet olsem Pol na Pita na ol dispela lain bilong bipo – Krais i givim ol long sios na ol i stap as ston bilong sios – olgeta tisim bilong ol em i as ston bilong sios.
Krais i givim sios ol wanwan evanselis.
Na tu, Krais i givim sios femili ol wanwan evanselis, na ol i kisim tok bilong ol aposel na ol profet na ol i raun na autim dispela tok, na long wok bilong ol evanselis ol wanwan trupela sios i save kamap. Evanselis em i man i raun na autim trupela gutnius bilong Krais – ol i save autim seim kain tok ol aposel na ol profet i bin autim.
Krais i givim sios ol wanwan pasta na tisa.
Na wantaim ol wanwan evanselis Krais i givim pasta na tisa long sios. Na ol i mekim wanem kain wok? Lukim lain 12-13 gen.
Ol pasta na tisa ol i mekim wok bilong redim ol manmeri bilong sios na bai olgeta manmeri bilong sios i ken i mekim gutpela wok namel long sios. Wok bilong pasta na tisa i olsem, ol i wok long helpim ol manmeri bilong sios i mekim ol wanwan wok Krais i givim ol long mekim. Wok bilong pasta na tisa, em bilong trenim na helpim ol manmeri bilong kongregesen i mekim ol wanwan gutpela wok namel long sios femili.
Na wantaim ol aposel na ol profet na ol evanselis na ol pasta na tisa Krais i givim ol wanwan manmeri long sios – ol manmeri i bin tanim bel na i bilipim na trastim wok bilong Jisas na ol i stap aninit long Em, Krais i givim ol dispela manmeri long sios, bai ol tu i mekim wok namel long sios.
As bilong olgeta wok bilong olgeta manmeri bilong sios.
Na as bilong ol dispela wok bilong olgeta manmeri long sios i olsem, (lukim lain 12-13)….
“bodi bilong Krais i ken kamap strong inap long yumi olgeta i stap wanbel long bilip na i stap wanpela tasol long save bilong wok bilong Krais, na yumi olgeta i kamap man tasol na kisim olgeta tingting na pasin bilong Krais.”
Dispela as tasol – dispela toktok tasol – em mas stiaim olgeta wok yumi mekim namel long sios. Krais i bin givim yu long sios femili, na Em i givim sampela strong long yu na sampela wok long yu bilong helpim sios i kamap olsem.
Yu save, planti manmeri i laik kamap pasta tasol, o dikon tasol, na ol i tingim ol narapela wok em i pipia wok. Tasol nogat. I gat planti kainkain wok i ken i helpim sios – pasta wok em i wanpela kain wok tasol – na sampela man i ken i holim dispela wok – tasol i gat planti wok moa i stap bilong olgeta manmeri long sios i ken i mekim.
Tingim ol dispela – mi givim sampela tingting long yupela long ol sampela wok yupela ken i mekim – na taim yu laik wokim ol sampela wok, orait yu holim tingting long as bilong dispela wok – wok yu mekim i mas helpim “bodi bilong Krais i ken kamap strong inap long yumi olgeta i stap wanbel long bilip na i stap wanpela tasol long save bilong wok bilong Krais, na yumi olgeta i kamap man tasol na kisim olgeta tingting na pasin bilong Krais.”
Orait skelim ol wanwan wok ol wanwan manmeri i ken i mekim….
- Sapos yu ken i rit na rait, orait yu helpim ol narapela manmeri na ol i ken i rit na rait na ol i ken i skelim Tok bilong God na kisim strong inap long yumi olgeta i kisim olgeta tingting na pasin bilong Krais.
- Sapos yu save pinis long sampela Tok bilong God, orait yu helpim ol narapela manmeri na ol i ken i save tu na ol i ken i kisim strong inap long yumi olgeta i kisim olgeta tingting na pasin bilong Krais.
- Sapos yu lukim man i mekim nogut long meri bilong em, orait yu sapotim mama na lukautim em na helpim em kisim strong inap long yumi olgeta i kisim olgeta tingting na pasin bilong Krais.
- Sapos yu lukim kros i kamap, orait yu toktok isi wantaim ol na helpim ol stretim kros bilong ol, bai ol i kisim strong inap long yumi olgeta i kisim olgeta tingting na pasin bilong Krais.
- Sapos yu lukim wanpela bilong sios femili i stap wanpis, orait yu visitim na prenim em bai em i no ken i stap wanpis na em i ken i kisim strong inap long yumi olgeta i kisim olgeta tingting na pasin bilong Krais.
- Sapos yu lukim ol sampela pikinini i distebim bung bilong sios femili, orait yu helpim ol mama long lukautim ol pikinini na ol i ken i kisim strong inap long yumi olgeta i kisim olgeta tingting na pasin bilong Krais.
- Sapos yu i gat ol pikinini, orait yu tisim pikinini bilong yu na ol femili bilong yu na ol i ken i kisim rot bilong Krais na stap insait long sios na ol i ken i kisim strong inap long yumi olgeta i kisim olgeta tingting na pasin bilong Krais.
- Sapos yu lukim wanpela long sios femili i kisim sik na i sot long mani bilong baim marasin, orait yu helpim ol long mani na helpim ol i go long haus sik na long dispela rot ol i ken lukim lavim bilong Krais long helpim bilong yu na ol i kisim strong inap long yumi olgeta i kisim olgeta tingting na pasin bilong Krais.
- Sapos yu lukim ol sampela bois bilong yumi i no sindaun gutpela tumas, orait yu sindaun wantaim ol na yu helpim ol i mas sirias long Tok bilong God na long dispela rot ol i ken i kisim strong inap long yumi olgeta i kisim olgeta tingting na pasin bilong Krais.
- Sapos yu meri, orait yu ken i skulim ol meri long rot bilong Krais, na sapos yu man, orait yu ken i skulim ol man long rot bilong Krais, na long dispela pasin ol i ken i kisim strong inap long yumi olgeta i kisim olgeta tingting na pasin bilong Krais.
Olgeta manmeri i pas long Krais na i pas long sios femili ol i presen Krais i givim sios. Ol i no wankain, na strong bilong ol i no wankain, na wok bilong ol i no wankain. Nogat. Ol i narapela narapela, na ol i gat narapela narapela kain strong, bilong mekim ol narapela narapela kain wok, namel long yumi long sios femili. Tasol, olgeta ol i presen Krais i givim sios femili.
Na mi laik yu tingim….
Krais i givim yu long mipela – mipela nidim yu – sios femili i nidim wok bilong yu – maski em i liklik wok long ai bilong ol manmeri o em i bikpela wok long ai bilong ol manmeri – mipela nidim yu na mipela nidim wok bilong yu.
Krais i givim yu long mipela – bai yu helpim mipela sios bilong Krais o nogat? Yu yet yu skelim wanem wok yu gat strong long mekim na yu mekim tasol. Na taim yu mekim, yu tingting tasol long helpim sios i kisim save long olgeta wei bilong Krais na yu tingting long helpim sios i stap wanbel na i stap long wanpela trupela bilip na i bihainim olgeta tingting na pasin bilong Krais.
Em tasol.
