Moning.
Buk Efesus i pulap long ol planti gutpela gutpela toktok! Pastaim, long sapta 1, Aposel Pol em i stori long wok God i bin mekim – Long bipo bipo, taim dispela graun i no kamap yet, God i bin makim ol wanwan manmeri na Em i givim ol long Jisas, bai Jisas i mekim wok bilong mekim ol holi na i no gat asua long ai bilong Em. Long dispela wok God i kisim bek ol – Em i adoptim ol na mekim ol i kamap femili bilong Em.
Na Pol em i bin stori long wok bilong Holi Spirit tu. Holi Spirit i save mekim wok insait long bel bilong ol manmeri God i bin makim na Jisas i mekim holi na i no gat asua long ai bilong God. Holi Spirit Em i mekim wok bilong opim ai na ia na bel bilong ol, na Em i givim bilip long ol. Long dispela as tasol ol i bilipim na trastim feitful wok Jisas i bin mekim bilong ol na ol i stap aninit tru long Em.
Long sapta 2-3 Pol em i stori long sios femili bilong God. Ol manmeri God i bin makim na pasim long Jisas, na Holi Spirit i wok insait long ol na i givim trupela bilip long ol, orait God Em i pasim ol wantaim na Em i kamapim sios femili bilong Em. Sios femili bilong God em i wanpela nupela komyuniti we ol manmeri bilong God i pas wantaim.
Pol i bin mekim ol dispela tok i go i go i go na nau long sapta 4 em i tok olsem, long dispela as yupela – yupela God i singautim i kam, yupela God i bringim i kam – long dispela as yupela mas wokabaut long pasin i gutpela bilong ol manmeri God i singautim na i bringim i kam. Lukim Efesus 4:1-6.
1Long dispela as mi, dispela kalabusman bilong BIKPELA, mi laik tok strong long yupela olsem, God i bin singautim yupela i kam na yupela mas wokabaut long pasin i gutpela bilong ol manmeri God i singautim i kam. 2Yupela mas wokabaut long pasin we yupela no apim yupela yet na long pasin we yupela sindaun isi wantaim. Yupela no ken i bel hat o les hariap. Nogat. Mobeta yupela bihainim wei bilong lavim na yupela stap isi wantaim na lukautim ol narapela. 3Holi Spirit i bin mekim yupela ol wan wan i kamap wanpela. Olsem na, yupela mas wok hat long i stap wanpela na i stap wanbel wantaim. 4I gat wanpela bodi na wanpela Holi Spirit i stap. Na taim God i singautim yupela Em i bin kisim yupela i kam long wanpela bilip we yupela bilipim na trastim na wetim ol samting God i promis long kamapim. 5I gat wanpela BIKPELA na wanpela bilip na wanpela baptais i stap. 6Na i gat wanpela God na Papa bilong yupela olgeta na dispela God Em i antap long yupela olgeta, na Em i wok namel long yupela olgeta, na Em i stap insait long yupela olgeta.
God i mekim planti gutpela gutpela wok bilong kisim bek yumi na Em i bringim yumi wanwan i kam insait long sios femili komyuniti bilong Em, olsem na, long dispela as, yumi mas wokabaut long pasin i gutpela bilong ol manmeri God i singautim na i bringim i kam.
Na wanem pasin i gutpela pasin bilong ol manmeri God i singautim i kam? Lukim lain 2-3 – Pol i tokaut long 6-pela samting….
- Yupela mas wokabaut long pasin we yupela no apim yupela yet.
- Yupela mas sindaun isi wantaim.
- Yupela no ken i belhat.
- Yupela no ken i les hariap.
- Yupela mas bihainim wei bilong lavim.
- yupela mas i stap isi wantaim na lukautim ol narapela manmeri God i singautim i kam.
Ol dispela pasin em i gutpela pasin na em i rait pasin bilong yumi wanwan manmeri bilong Sios bilong God. Dispela pasin i mas stiaim tingting na wokabaut bilong yumi bilong nupela komyuniti bilong God.
Sios i mas i stap wanpela na i stap wanbel wantaim.
Na yumi tingim na skelim. Ol dispela kain pasin em i pasin bilong manmeri i stap wanpela na i pas gutpela wantaim. Ol dispela kain pasin em i pasin i mekim wanbel pasin i stap namel long sios femili bilong God. Em olsem na Pol i mekim dispela tok bai yumi manmeri bilong nupela komyuniti bilong God yumi i stap wanpela na yumi i stap wanbel wantaim. Dispela pasin em i gutpela pasin na em i rait pasin bilong yumi wanwan manmeri bilong Sios bilong God. Em i gutpela na em i rait long yumi sios femili bilong God yumi i stap wanpela na yumi i stap gutpela wantaim.
Wanpela bilong yumi i no winim narapela bilong yumi.
Long lain 3-6 Pol i givim sampela tingting long yumi bilong helpim yumi bihainim pasin i gutpela long yumi sios femili i ken i bihainim – bilong helpim yumi pas wantaim na i stap gutpela na i stap wanbel wantaim.
Long ol komyuniti bilong dispela graun i gat sampela man i winim ol narapela man. Yu save, sampela man i stap bikman na sampela man i stap nating tumas. Long sampela komyuniti bilong dispela graun ol tingim olsem, man i winim meri. Man i bikpela samting na ol meri i no bikpela samting. Yu save, insait long ol komyuniti bilong dispela graun ol sampela manmeri i save luk-daun long ol narapela manmeri.
Tasol, long komyuniti bilong God olgeta manmeri i stap long wanpela level. Wanpela Holi Spirit i bin bringim ol i kam na ol i stap wanpela grup tasol. Wanpela Papa, wanpela Bikpela, wanpela Holi Spirit, wanpela bilip – wanpela God i wok insait long ol na namel long ol na i stap insait long ol. Olsem na, i no gat as long wanpela i apim em yet na luk-daun long narapela. I no gat as long yu bel hat long wanpela o yu les long wanpela. I no gat as long yu tok, “Mi no laik sindaun wantaim dispela manmeri.”
Grasia na lavim bilong God.
Yumi i bilipim na trastim God long kisim bek yumi long feitful wok bilong Jisas, orait yumi klia liklik long olgeta wok God i mekim bilong kisim bek na adoptim yumi na mekim yumi femili bilong Em. Em olsem na yumi save long grasia bilong God long yumi. Yumi save long lavim bilong God long yumi.
Tingim. Olgeta pasin God i tokim yumi sios femili i mas mekim, orait God yet i save mekim long yu na Em i mekim long mi wantaim. Sapos God i apim Em yet, orait Em i no inap sori long yumi na helpim yumi sin manmeri. Sapos God i no sindaun isi wantaim yumi, na God i stap belhat tasol long yumi, na God i les hariap long yumi, na God i no bihainim wei bilong lavim, na God i no stap isi wantaim yumi na lukautim yumi, orait yumi bai olsem wanem? Bai yumi lus olgeta tasol.
Em i dispela wanpela God i mekim ol dispela grasia wok na lavim wok long yumi wanwan, na long dispela as yumi ken i bihainim Papa bilong yumi na yumi mekim pasin namel long yumi yet olsem God i mekim namel long yumi. Sapos yu les, orait ating yu no save tumas long grasia na lavim bilong God long yu.
God i mas kisim biknem.
God i mas kisim biknem long Jisas na long sios femili. Lukim Efesus 3:20-21.
20God i gat strong na dispela strong i save wok insait long yumi. Na maski wanem samting yumi tingim na yumi askim God, God Em inap wokim na Em inap tru long wokim moa moa yet. 21Long dispela God yumi mas givim biknem. God i mas kisim biknem long Krais Jisas na long sios i go i go long olgeta jeneresen oltaim oltaim. Tru tumas.
Yumi ken i askim God long mekim wok insait long yumi na senisim yumi bai yumi ken i stap wanpela na i stap wanbel wantaim ol brata na sista bilong yumi long sios femili. Na taim yumi i stap wanpela na i stap wanbel wantaim ol brata na sista bilong sios, orait long dispela pasin God bai kisim biknem. God bai kisim biknem long feitful wok bilong Jisas bilong kisim bek yumi, na God bai kisim biknem taim sios femili bilong Em i bihainim pasin bilong Em na ol i stap wanpela na i stap wanbel wantaim.
Glenn.
