Wok Bilong Jisas
Mak 8:27-31.
Mak 9:12-13 na 30-31.
Mak 10:32-33 na 45.
Long stadi namba 1-5 yumi bin skelim bikpela toktok bilong Mak. Na bikpela toktok bilong Mak i olsem, Jisas Em i God i kam daun long dispela graun. Na yumi bin skelim ol evidens Mak i putim bilong sapotim bikpela toktok bilong em.
Na Jisas Em i Pikinini bilong Man Daniel i bin lukim long visin bilong em. Jisas Em i King bilong kingdom bilong God. Ol mirakel Jisas i bin wokim, na ol pawa bilong Jisas bilong bosim na kontrolim olgeta samting bilong dispela graun, i stap evidens na i soim olsem, Jisas i gat namba bilong Pikinini bilong Man bilong visin bilong Daniel.
Na ol planti manmeri i bin ai witnisim ol mirakel na pawa bilong Jisas, na planti bilong ol i lusim laip bilong ol bilong difenim Jisas. Long wanem? Ol i klia olsem, Jisas Em i God i kam daun long dispela graun.
Orait, yumi save olsem, Jisas Em i God. Tasol nau yumi mas skelim long wanem as Jisas i kam. Long wanem as God i kam daun long dispela graun? Long wanem as Pikinini bilong Man i kam. Pikinini bilong Man i kam long dispela graun bilong mekim wanem?
Jisas i kam bilong mekim wanem?
- Sampela manmeri i tok olsem, Jisas i kam tasol bilong soim yumi stretpela pasin na hau yumi ken i mekim stretpela pasin long wokabaut na sindaun bilong yumi.
- Na sampela manmeri tingim olsem, Jisas i soim yumi ol gutpela pasin yumi ken i mekim bai God i amamas long yumi na kisim bek yumi.
- Sampela manmeri i pilim olsem, Jisas i kam bilong autim tok bilong God tasol, Em i wanpela prisa man tasol.
- Na sampela manmeri i bilip olsem, Jisas i kam tasol bilong stretim sik bilong ol manmeri na bilong soim lavim bilong Em long ol manmeri.
Na ol disaipel wantaim ol lain Israel ol tu ol i gat sampela tingting long wok bilong Krais. Pikinini Bilong Man bilong visin bilong Daniel Em i Krais – nem Krais i minim olsem “Man God i makim”. God i makim Pikinini Bilong Man na Em i King bilong kingdom bilong God. Na ol lain Israel i tingim olsem Pikinini Bilong Man (Krais) i kam bilong rausim ol birua bilong ol na mekim Israel i kamap nambawan na i winim olgeta kantri nabaut. Em olsem na ol i tingim olsem Krais bai i stap King bilong ol long hia long dispela graun.
Orait tasol yumi skelim toktok bilong Jisas yet – Jisas i tok wanem long as na minim bilong kam bilong Em. Na yumi ken i save long toktok bilong Jisas, long wanem, Mak i bin kisim ai witnis toktok bilong Pita na em i raitim long buk Mak, em dispela buk nau yumi holim long han bilong yumi.
Mak 8:27-31 – Ol disaipel i klia pinis Jisas i husat. Nau Jisas i stat na autim tok bilong as bilong kam bilong Em. Na Em i tok olsem, Pikinini bilong Man i kam bilong i dai. Jisas i kam bilong lusim laip bilong Em.
Mak 9:12-13, 30-31 – Na wankain olsem, Jisas i skulim ol disaipel bilong Em olsem, Pikinini bilong Man i mas kisim hevi na Em i mas i dai. Jisas bai safa na Em bai i dai.
Mak 10:32-33, 45 – Nau Jisas i putim as bilong safa na dai bilong Em long ples klia. Jisas i kam bilong mekim wok bilong givim laip bilong Em yet bilong baim bek ol “dispela planti manmeri”.
Jisas bai i dai bilong baim bek ol dispela planti manmeri.
Taim ol disaipel bilong Jisas i klia olsem, Jisas Em i Pikinini bilong Man, Jisas Em i Krais, orait Jisas i stat na Em i skulim ol long as bilong kam bilong Em. 5-pela taim Jisas i skulim ol disaipel bilong Em long as bilong kam bilong Em. Em olsem na Jisas i skulim ol olsem, Pikinini Bilong Man bai safa long han bilong ol bikman na ol hetpris na ol tisa bilong lo, na ol bai kilim Em. Na as bilong dai bilong Pikinini bilong Man, as bilong dai bilong Jisas i olsem, Jisas bai lusim laip bilong Em bilong baim bek laip bilong ol planti manmeri.
Na Jisas i no tok “kisim bek”. Nogat. Em i tok “baim bek”. Laip bilong Jisas yet i olsem pe bilong baim fridom bilong ol planti manmeri bai ol i stap fri.
Na yu save long dispela tok baim bek. Sapos wanpela man i stap na em i no baim kot fain bilong rong bilong em, orait ol polis bai holim em long kalabus. Em olsem na, sapos ol femili bilong em i gat tingting, orait ol i ken i bungim mani bilong baim bek man i stap long kalabus na em i ken i stap fri. Ol i ken i baim fridom bilong kalabus man na em i ken i stap fri.
Tok bilong God i toksave long pe bilong ol rong bilong yumi.
Ol mejistret ol i save long Luksave Buk bilong Viles Kot. Long dispela buk ol mejistret ol i ken i save long wanem pe i stap bilong ol wanwan rong. Ol gavman i raitim buk, na long buk ol i makim pe bilong ol wanwan rong. Ol viles kot mejistret ol i ken i lukim na tilim pe inap long rong manmeri bilong ples i wokim. Luksave Buk bilong Viles Kot i stap bilong toksave long wanem pe i stap bilong ol wanwan rong.
Long Baibel God i toksave long wanem pe i stap bilong rong yumi mekim long God. Ol rong yumi mekim long God Baibel i kolim sin. Lukim Rom 1:28-32 wantaim Rom 6:23. God i makim sin bilong yumi na Em i makim pe bilong sin bilong yumi.
28Ol dispela manmeri ol i no laik holimpas trupela save bilong God. Na long dispela as God Em i larim ol i stap long tingting nogut na long mekim pasin i no stret. 29Olsem na, ol kainkain pasin nogut, na pasin i rong olgeta, na pasin we ol i tingting tasol long kisim ol planti samting, na pasin we tingting nogut i stiaim ol, na ol jelas pasin, na pasin bilong kilim man i dai, na pasin bilong kros pait, na pasin bilong giaman, na pasin bilong mekim nogut long ol narapela manmeri, ol dispela kain pasin i pulap long ol. Ol i save tok baksait na daunim narapela manmeri, 30na ol i save tok giaman bilong bagarapim ol narapela manmeri, na ol i save hetim God, na ol i save bikhet na apim ol yet, na ol i save kamapim ol nupela wei bilong mekim pasin i rong olgeta, na ol i save sakim tok bilong papamama bilong ol. 31Ol i no yusim het, na ol i no save bihainim tok bilong ol yet, na ol i no save sori long narapela manmeri, na ol i no save tingting taim ol i bagarapim ol narapela manmeri. 32Na ol dispela kain lain ol i klia pinis long stretpela tok bilong God. God i tok, “Manmeri i mekim ol dispela kain pasin nogut, pe bilong ol em i dai.” Em olsem tasol ol i no lusim pasin nogut. Nogat. Ol i mekim i go yet, na tu ol i save sapotim ol narapela manmeri i laik mekim olsem. Rom 1:28-32.
23 ….Pe bilong sin em i dai. Tasol presen bilong God em i laip i stap oltaim oltaim. Na dispela laip em i kamap long wok bilong Krais Jisas, Bikpela bilong yumi. Rom 6:23.
God i toksave olsem, pe bilong sin em i dai. Na yumi no inap tru long mekim na wokim ol sampela samting bilong rausim yumi yet long pe bilong sin. Nogat. Yumi mekim sin pinis. Na Bikpela Mejistret i toksave pinis.
Sampela manmeri i tingim olsem, “Bihain God bai skelim pasin bilong yumi na wokim disisen bilong Em.” Tasol nogat. God i skelim pasin bilong yumi pinis na Em i toksave pinis olsem, “Pe bilong sin em i dai.” Em olsem na, yumi save pinis long disisen bilong God long sin bilong yumi – Pe bilong sin bilong yumi em i dai.
Tok dai em i narapela rot bilong tokaut long yumi lus long God. Yumi sin manmeri pinis, olsem na, yumi lus pinis long God, na bihain, taim yumi lusim dispela graun, orait bai yumi lus long God oltaim oltaim long kalabus hel. Yumi mas klia olsem, yumi sinmanmeri yumi manmeri i lus long God pinis na bai yumi lus long God oltaim oltaim long kalabus hel.
Husat i ken i baim bek yumi long pe bilong sin?
Long kot sistem bilong PNG, long ol sampela rong, ol femili bilong yumi ol i ken i bungim mani na baim bek yumi long kalabus na yumi i stap fri. Manmeri i stap long kalabus ol i no inap baim bek narapela manmeri i stap long kalabus. Nogat. Manmeri i stap autsait long kalabus ol i ken i baim bek manmeri i stap insait long kalabus.
Yumi sin manmeri pinis, na dispela i minim olsem, yumi lus pinis long God – dai i kalabusim yumi pinis – pe bilong sin i kalabusim yumi pinis. Yumi olgeta yumi kalabusman pinis. Na husat i ken i baim bek yumi long dispela kalabus bilong i dai? Yu no fit long baim bek mi. Na mi no fit long baim bek yu. Na yu no fit long baim bek yu yet, na mi no fit long baim bek mi yet. Long wanem, yumi wantaim yumi i stap insait long kalabus bilong i dai. Yumi wantaim yumi lus long God, na bihain, yumi wantaim yumi bai lus long God oltaim oltaim long kalabus hel.
Yumi olgeta manmeri bilong dispela graun yumi i stap aninit long toktok bilong Bikpela Mejistret God na yumi olgeta i stap pinis kalabusman bilong i dai.
Pikinini Bilong Man tasol i ken i baim bek yumi long kalabus bilong i dai.
Yumi mas save olsem, Pikinini Bilong Man tasol i ken i baim bek yumi long kalabus bilong i dai. Pikinini Bilong Man bilong visin bilong Daniel, Jisas, Em i lusim laip bilong Em yet bilong baim bek laip bilong ol planti manmeri. Dai bilong Jisas Em i pe bilong rausim sinmanmeri long kalabus bilong i dai. Pe bilong sin em i dai, na Jisas Em i dai bilong baimaut pe bilong sin bilong sinmanmeri, bai ol i stap fri long kalabus bilong i dai na ol i no ken i lus long God oltaim oltaim long kalabus hel.
Jisas i no lusim laip bilong Em bilong sevim laip bilong olgeta manmeri. Nogat. Em i lusim laip bilong Em, Em i dai, bilong sevim laip bilong ol planti manmeri, em ol dispela planti manmeri Jisas i makim long Mak 10:45.
Jisas i kam long dispela graun bilong lusim laip bilong Em yet bilong baim bek laip bilong ol narapela manmeri.
Mobeta yumi i stap aninit long Jisas.
Sapos nau em i fes taim yu bin skelim ol dispela samting na yu klia olsem, Jisas i kam long dispela graun bilong lusim laip bilong Em bilong baim bek laip bilong sinmanmeri, na yu klia olsem yu wanpela sin manmeri, orait mobeta nau yu tanim bel na yu putim yu yet aninit long Jisas. Mobeta yu putim yu yet long han bilong Jisas, na yu bilipim na trastim Em long baim bek laip bilong yu.
Ol sampela manmeri ol i harim lotu tasol na ol i no bilipim na trastim feitful wok bilong Jisas i baim bek ol. Sapos yu stap olsem, orait ating nau em i gutpela taim bilong yu senisim tingting bilong yu, senisim bilipim na trastim bilong yu, na yu tanim i kam na yu bilipim na trastim dai bilong Jisas i baim bek yu long kalabus bilong sin na dai.
Planti taim tumas yumi save trastim save bilong yumi yet long ol samting bilong kingdom bilong God. Nau yumi mas senisim tingting bilong yumi na yumi putim bilipim na trastim bilong yumi long feitful baim bek wok bilong Jisas long diwai kros. Trastim God long kisim bek yu long feitful baim bek wok bilong Jisas.
Mi laik mekim 2-pela tok bilong pinisim toktok:
1.. Jisas Em i no baim bek yumi bilong yumi ken i stap long laik bilong yumi yet na bihainim ol samting bilong tumbuna bilong yumi.
Mi save long wanpela draiva. Em save draivim wanpela olpela ka nogut i no gat orait bilong polis bilong draivim. Polis i holim na kalabusim em, na taim ol lain bilong em i kam baim bek em long kalabus, orait draiva i kisim olpela ka nogut bilong em na em i raun yet long rot long olpela ka i no gat orait bilong polis bilong draivim. Yu save, ol femili i baim bek draiva long kalabus, tasol em i no senisim tingting bilong em na em i no senisim pasin bilong em.
Harim. Jisas i no baim bek yumi bilong yumi ken i raun yet long olpela tingting na olpela pasin bilong yumi. Nogat. Jisas i baim bek yumi bilong yumi bihainim Em na yumi wokabaut long nupela wei bilong Jisas.
2.. Pikinini Bilong Man bilong visin bilong Daniel i lusim laip bilong Em bilong baim bek laip bilong yumi, na dispela samting i winim olgeta samting.
Yumi manmeri bilong dispela graun, yumi laik pas long ol wanwan lotu na ol wanwan misin, yumi laik pas long nem bilong lotu na nem bilong misin. Tasol harim, mobeta yumi pas olgeta tasol long nem bilong Jisas. Wok bilong Jisas long diwai kros bilong baim bek yumi i winim ol wanwan lotu na ol wanwan misin. Na yumi no nidim narapela samting. Yumi nidim Jisas tasol.
Na sapos yu bilipim na trastim na bihainim Jisas pinis, orait yu apim nem bilong Jisas tasol. Maski yumi apim nem bilong lotu bilong yumi. Harim tok bilong Aposel Pol long 1 Korin 1:30-31.
30God yet Em i as tru bilong laip bilong yumi i pas long Krais Jisas, na bilong yumi God i mekim Krais Jisas i kamap trupela save bilong Em. Em olsem na Krais Jisas Em i stretpela pasin bilong yumi, na long wok bilong Em yumi kamap holi manmeri bilong God, na Em i rot bilong God i kisim bek yumi. 31Long dispela as, na Tok bilong God i tok pinis olsem, “Sapos yu laik litimapim na trastim nem bilong wanpela samting, orait yu litimapim na trastim nem bilong BIKPELA tasol.” (Jeremaia 9:24) 1 Korin 1:30-31.
Em tasol.
