Moning.
Lukim Aposel 3:1-10 na yumi skelim stori bilong Pita i oraitim lek bilong wanpela lek nogut man. Na yumi skelim long wanem as dispela mirakel i kamap na Luk i putim stori bilong en i stap long Buk Aposel (Luk em i man i raitim Buk Aposel)….
1Orait, wanpela taim Pita na Jon tupela i go long tempel long 3 klok long apinun long taim bilong mekim prea. 2Na ol man i karim wanpela lek nogut man i kam. Taim mama bilong em i karim em i gat lek nogut na i stap olsem. Na olgeta de ol i save karim em i kam long wanpela dua bilong tempel, em ol i kolim Naispela Dua, na em i save singaut bilong kisim mani long ol manmeri i go long tempel. 3Dispela man i lukim Pita na Jon tupela i laik i go insait long tempel na em i askim tupela long mani. 4Pita na Jon i lukim em na Pita i tok, “Lukluk long mitupela.” 5Na em i lukluk long tupela na em i tingim olsem, “Nau bai mi kisim samting long tupela.” 6Tasol Pita i tokim em, “Mi no gat silva o gol, tasol mi gat narapela samting mi ken i givim yu. Long nem bilong Jisas Krais bilong Nasaret yu kirap na wokabaut.” 7Na Pita i holim han sut bilong em na i kirapim em, na wantu lek na skru bilong lek i kamap orait. 8Em i kirap na i sanap na i wokabaut, na em i go insait long tempel wantaim Pita na Jon. Em i wokabaut na em i kalap kalap na em i litimapim nem bilong God. 9Olgeta manmeri ol i lukim em i wokabaut na litimapim nem bilong God 10na ol i save olsem em i man i sindaun long dua bilong tempel ol i kolim Naispela Dua na i singaut long kisim mani. Ol i lukim em i orait na ol i kirap nogut tru.
11Na dispela man i holimpas Pita na Jon, na ol i stap long veranda ol i kolim Veranda bilong Solomon. Na olgeta manmeri ol i kirap nogut na ol i ran i kam long tripela. 12Pita em i lukim ol na em tokim ol olsem, “Ol man bilong Israel, long wanem as yupela kirap nogut long dispela samting? Long wanem as yupela sanap na lukim mipela? Yupela no ken i tingim olsem, long strong bilong mitupela yet o long lotu pasin bilong mitupela yet mitupela i kirapim dispela man na i em i wokabaut. Nogat. 13God bilong Abraham na bilong Aisak na bilong Jekop, God bilong ol tumbuna papa bilong yumi, Em i bin givim biknem tru long wokman bilong Em Jisas. Na yupela i givim Em i go long han bilong Pailat. Pailat i laik lusim Em, tasol yupela i givim baksait long Jisas na tok nogat. 14Yupela i bin givim baksait long dispela Holi na Stretpela Man, na yupela i askim Pailat long givim narapela man long yupela, em man bilong kilim man i dai. 15Na yupela i kilim i dai As bilong laip. Na God i kirapim Em long matmat, na mitupela i witnisim dispela samting. 16Long nem bilong Jisas, long bilip long nem bilong Jisas, dispela lek nogut man i kisim strong, em dispela man yupela i lukim na save long em. Long bilip i kam long han bilong Jisas dispela man i kamap gutpela tru long ai bilong yupela olgeta.
Long wanem as dispela mirakel i kamap?
Hariap yumi ken i save olsem, lek nogut man em i no bilip strong na lek bilong em i kamap orait. Nogat. (Lukim lain 3-4.) Na hariap yumi ken i save olsem, Pita i no gat namba bilong wokim ol mirakel. Nogat. Mirakel i kamap long nem (namba) bilong Jisas – long strong na pawa bilong Jisas yet lek bilong lek nogut man i kamap orait. Jisas i stretim em, i no Pita i stretim em. (Lukim lain 12 wantaim lain 16.)
Orait, long wanem as dispela mirakel i kamap? Dispela mirakel i kamap bilong soim olgeta manmeri olsem, Jisas i stap laip. Dispela mirakel i givim sanis long Pita wantaim ol aposel bilong tokaut na tok klia olsem, Jisas i kirap bek pinis long dai na Em i stap laip. Pastaim, taim Jisas i stap wantaim ol manmeri long ples Juda, orait Jisas i wokim ol planti mirakel long ai bilong ol manmeri. Na bihain long dai na kirap bek bilong Em, Em i wokim ol mirakel i go yet. Em olsem na taim ol i lukim mirakel i kamap, orait ol i ken i save olsem, Jisas i stap yet, Em i no lus, Em i stap laip olsem ol aposel i tokim ol.
Na long dispela rot ol manmeri Jisas i bin lusim laip bilong Em bilong sevim, orait ol i ken i save olsem Jisas i stap laip, na ol i tanim bel na kam long Jisas na bilipim na trastim Jisas – ol i bilipim na trastim Jisas Em i rot God i makim bilong kisim bek ol – ol i bilipim na trastim God long kisim bek ol long feitful wok bilong Jisas long diwai kros.
Mirakel i pulim tingting bilong ol manmeri i kam long Jisas.
Jisas i yusim mirakel bilong pulim tingting bilong ol manmeri i kam long Em yet. Long dispela rot Jisas i singautim ol lain bilong Em. Long han bilong Pita Jisas i wokim mirakel long lek nogut man, na dispela mirakel i givim sanis long ol aposel bilong witnisim Jisas, na ol manmeri Jisas i dai long diwai kros bilong sevim, orait ol i harim ol aposel i witnisim Jisas, na ol i tanim bel na kam long Jisas na ol i bilipim na trastim God long kisim bek ol long feitful wok bilong Jisas. Long dispela pasin Jisas i singautim ol lain bilong Em i kam long Em na ol i stap aninit long bosim na kontrolim bilong Em.
Nogut yumi kisim rong tingting.
Ating ol sampela manmeri bilong ples na bilong taun ol i laik traim na oraitim sik bilong sikmanmeri. Ol i lukim stori bilong Pita i wokim mirakel na ol i laik wokim ol mirakel tu. Tasol dispela mirakel Jisas i wokim long han bilong Pita em i no stap bilong soim yumi olsem, Jisas i laik oraitim sik bilong olgeta sikmanmeri. Nogat. Mirakel i kamap bilong soim olsem, Jisas i kirap bek pinis long matmat na Em i stap laip. Dispela mirakel i stap bilong givim sanis long ol aposel bilong witnisim Jisas – i givim sanis long ol bilong tokim ol manmeri olsem, feitful wok bilong Jisas long diwai kros Em i rot God i makim bilong kisim bek sinmanmeri.
Pita i no wokim dispela mirakel bilong apim nem bilong em yet o bilong apim nem bilong misin bilong em yet o bilong pulim mani i kam long em yet. Nogat tru! Jisas i wokim mirakel long han bilong Pita bilong pulim tingting bilong ol manmeri i kam long Jisas yet, bai ol manmeri Jisas i lusim laip bilong Em bilong sevim ol i tanim bel na bilipim na trastim na bihainim Jisas.
Na yumi mas klia olsem, mirakel yet i no kirapim bilip long ol manmeri. Nogat. Sampela manmeri i lukim mirakel tasol ol i no bilip. Tasol ol manmeri Jisas i dai long diwai kros bilong sevim, orait mirakel i pulim tingting bilong ol i kam long Jisas na i kam long tok bilong Jisas (tok ol aposel i autim), na ol i save olsem, Jisas i stap laip na Jisas Em i rot God i makim bilong kisim bek sinmanmeri (lukim Aposel 4:4 wantaim Aposel 13:48). Yumi ken i save olsem Holi Spirit i kirapim bilip long bel bilong ol na ol i tanim bel na kam long Jisas na kam long tok bilong Jisas, na ol i trastim God long kisim bek ol long feitful wok bilong Jisas na ol i stap aninit long bosim bilong Jisas (lukim Efesus 2:8).
Manmeri Jisas i singautim i kam long Em yet ol i save bilip trutru. Ol i no harim tok tasol na tok “Em tru”. Nogat. Ol i senisim tingting bilong ol na ol i bilipim na trastim Jisas na dispela bilip i stiaim wokabaut bilong ol na i stiaim sindaun bilong ol na i stiaim wok bilong ol. Ol i wokabaut aninit long bosim bilong Jisas. Ol i sindaun aninit long bosim bilong Jisas. Ol i mekim wok bilong ol aninit long bosim bilong Jisas. Ol i amamas long feitful wok bilong Jisas na ol i trastim God long kisim bek ol long feitful wok bilong Jisas tasol. Na ol i litimapim nem bilong God na tok tenkyu long God.
Glenn.
Sapos yu laik save moa long dispela tok, orait yu lukim Aposel 3:1-16 long Autim Tok long www.pngbibleresources.org.
