Moning.
Skelim dispela 2-pela tok. Wanpela tok em i trupela tok na narapela tok em i giaman tok. Yu gat wanem tingting?
- Yumi bihainim Jisas pastaim, na bihain Jisas i ken i lukim pasin bilong yumi long bihainim Em, na Em i ken i amamas long pasin bilong yumi na kisim bek yumi.
- Jisas i mekim wok, na long wok bilong Jisas God i kisim bek yumi, na bihain long God i kisim bek yumi pinis, orait yumi bihainim Jisas.
Sampela lotu i skulim manmeri olsem, tok namba 1 em i tru. Ol i tok olsem, yumi mas bihainim Jisas pastaim, na bihain Jisas i ken i lukim pasin bilong yumi long bihainim Em na Em i ken i amamas long yumi na kisim bek yumi. Tasol dispela tok i no tru.
Tok namba 2 em i tru. Jisas i bin feitful na i mekim wok long diwai kros, na long feitful wok Jisas i bin mekim God i kisim bek yumi, na bihain long God i kisim bek yumi pinis, orait yumi mekim wok long bihainim Jisas.
Skelim tok aposel Pol i mekim long manmeri i bihainim Jisas long taun Korin.
God yet Em i as tru bilong laip bilong yumi i pas long Krais Jisas, na bilong yumi God i mekim Krais Jisas i kamap trupela save bilong Em. Em olsem na Krais Jisas Em i stretpela pasin bilong yumi, na long wok bilong Em yumi kamap holi manmeri bilong God, na Em i rot bilong God i kisim bek yumi. Long dispela as, na Tok bilong God i tok pinis olsem, “Sapos yu laik litimapim na trastim nem bilong wanpela samting, orait yu litimapim na trastim nem bilong BIKPELA tasol.” 1 Korin 1:30-31.
Tok bilong aposel Pol i klia olgeta. God yet Em i as bilong laip bilong manmeri i pas long Krais Jisas. Jisas Em i stretpela pasin bilong ol. Ol i kamap holi manmeri bilong God long stretpela pasin bilong Jisas. God i kisim bek ol long wok bilong Jisas tasol. Jisas Em i rot bilong God i kisim bek ol.
Tingim. Sapos God i lukim na skelim ol naispela na gutpela pasin yumi mekim long bihainim Jisas, na long dispela rot yumi kamap holi manmeri bilong God na God i kisim bek yumi, orait yumi yet yumi as bilong laip bilong yumi na yumi ken i litimapim na trastim nem bilong yumi yet.
Harim tok bilong Jisas long Jon 14:15.
Sapos yupela lavim Mi tru, orait yupela bai bihainim gut ol tok bilong Mi.
Manmeri i lavim Jisas, ol bai bihainim olgeta tok bilong Jisas. Pasin bilong bihainim Jisas em i no rot bilong God i ken i kisim bek manmeri. Nogat. Pasin bilong bihainim Jisas em i mak bilong manmeri i lavim Jisas. Ol manmeri i lavim Jisas ol i amamas long bihainim Jisas.
Na husat i lavim Jisas? Manmeri i lavim Jisas em i manmeri i klia olsem, Jisas Em i stretpela pasin bilong em. Manmeri i lavim Jisas em i save olsem em i kamap holi manmeri bilong God long stretpela pasin bilong Jisas. Manmeri i lavim Jisas em i bilip olsem God i kisim bek em long wok bilong Jisas tasol. Manmeri i lavim Jisas em i save olsem Jisas Em i rot bilong God i kisim bek em. Ol manmeri i klia long ol dispela feitful wok Jisas i bin mekim bilong sevim ol, orait ol i save lavim Jisas.
Ol manmeri i lavim Jisas ol i amamas long bihainim Jisas.
Yumi no wok long bihainim Jisas bai Jisas i ken i laikim yumi na kisim bek yumi. Nogat tru! Yumi bihainim Jisas bikos Jisas i bin mekim olgeta wok inap pinis bilong God i ken i kisim bek yumi.
Yumi no wok long bihainim Jisas bai Jisas i ken i laikim yumi na kisim bek yumi. Nogat tru! Yumi bihainim Jisas bikos Jisas i bin mekim olgeta wok inap pinis bilong God i ken i kisim bek yumi. Olsem na, taim Holi Spirit i opim ai na ia na bel bilong yumi na yumi klia long feitful wok bilong Jisas na yumi tanim bel na bilipim na trastim feitful wok bilong Jisas, em nau, long dispela taim, God i kisim bek yumi pinis na Em i kisim yumi kam insait pinis long femili bilong God. Long dispela as tasol nau yumi lavim Jisas na yumi amamas long bihainim Jisas long ol gutpela wei.
Yumi i lavim Jisas, yumi save litimapim na trastim nem bilong BIKPELA tasol. Long maus bilong yumi, yumi ken i tok tenkyu long God. Yumi ken i tok tenkyu long olgeta wok Em i bin mekim bilong kisim bek yumi. Tasol tu, yumi ken i soim tenkyu bilong yumi long laip bilong yumi. Yumi ken i soim tenkyu bilong yumi long pasin bilong yumi. Olsem na, yumi i laik tok tenkyu na soim tenkyu bilong yumi long God, yumi save wok hat long bihainim Jisas.
Em olsem na, tok namba 2 em i tru olgeta. Jisas i bin mekim wok long diwai kros, na long feitful wok bilong Jisas God i kisim bek yumi, na bihain long God i kisim bek yumi pinis, orait yumi lavim Jisas na yumi amamas long bihainim Em bilong soim tenkyu bilong yumi long Em.
Glenn.
