Moning.
Samting aposel Pol na Taitus i lukim long sios femili bilong God long ailan Krit, ating yumi save lukim long sios bilong yumi tu. Tupela i lukim ol sampela manmeri i mekim liklik samting i kamap bikpela samting na i kamap nambawan samting. Lukim Taitus 3:9-11….
9Tasol yu mas givim baksait long tok pait i no gat as bilong em i stap, na long ol kainkain tok bilong lista bilong nem bilong ol tumbuna, na long olgeta kainkain tok pait bilong lo. Long wanem, ol dispela samting i no save helpim manmeri na i no gat yus bilong em i stap. 10Na sapos wanpela man i mekim pasin bilong brukim sios, orait yu mas givim woning long em wanpela na tupela taim. Na sapos em i no harim tok, orait yu mas givim baksait long em olgeta. 11Yu mas save olsem, tingting bilong dispela kain man i paul pinis na em i mekim sin, na pasin em i mekim i daunim em yet.
Ol sampela manmeri bilong sios femili long ailan Krit ol i tok pait na toktok planti long 3-pela samting….
- Ol i tok pait long ol samting i no gat as bilong em i stap.
Lukim fes hap bilong lain 9. Aposel Pol i skulim Taitus long em i mas givim baksait long tok pait long ol samting i no gat as bilong em i stap. Samting i no gat as bilong em i stap em i liklik samting tumas na em i samting nating tumas. Em olsem na tok pait bilong ol dispela samting i no gat yus bilong em i stap na i no inap helpim ol manmeri bilong sios femili.
- Ol i toktok planti long lista bilong nem bilong ol tumbuna.
Lukim sekon hap bilong lain 9. Ol sampela manmeri ol i mekim kainkain toktok, ol i toktok planti, long ol samting bilong ol lista bilong nem bilong ol tumbuna. Na Pol i minim ol lista bilong nem bilong ol tumbuna i stap long Olpela Testamen, o em i tok long ol narapela lista, ating yumi no ken i save. Tasol yumi ken i save olsem, ol i toktok planti na ol i tok pait long ol dispela lista samting.
Ol sampela manmeri ol i ken i yusim ol dispela kain lista bilong apim ol yet na bilong kisim biknem long ai bilong ol manmeri. Ating ol i laik kisim namba. Yu save, sapos nem bilong tumbuna bilong wanpela man i stap long lista bilong ol nem tumbuna insait long Olpela Testamen, orait ating em i ken i apim em yet na i tingim olsem em i gat namba na em i winim ol narapela manmeri.
Em olsem tasol aposel Pol i tok olsem, ol dispela samting i no gat yus bilong em i stap. Em i samting nating tumas na i no save helpim ol manmeri bilong sios femili (lukim las hap bilong lain 9). Ol i toktok planti na tok pait long liklik samting tumas.
- Ol i tok pait long ol samting bilong lo bilong Olpela Testamen.
Lukim namba tri hap bilong lain 9. Na long ol narapela Tok bilong God yumi ken i save olsem ol sampela manmeri ol i tok pait long ol lo bilong kaikai (Mak 7:1-23 na Rom 14:1-9), na long lo bilong katim skin (buk Galesia), na long ol lo bilong de lotu (Rom 14:1-9 na Kolosi 2:16-17). Sampela taim ol i tok pait na tok olsem, manmeri i bihainim Jisas ol i mas katim skin na bihainim ol lo bilong kaikai bilong Olpela Testamen.
Bilong nau ol sampela manmeri ol i tok pait yet long ol dispela samting. Ol i tok pait na tok olsem, manmeri i bihainim Jisas ol i mas lukautim de Sabat na lukautim ol lo bilong kaikai bilong Olpela Testamen, na sapos yumi no lukautim ol samting olsem, orait God i no inap kisim bek yumi. Na sampela taim ol manmeri ol i skruim tok pait bilong ol na ol i tok olsem, sapos yumi no kisim baptais na yumi no kaikaim Lordsapa, orait God i no inap kisim bek yumi.
Tasol lukim Taitus 3:4-7 gen. Tok bilong God i klia olgeta olsem, God i kisim bek sinmanmeri long feitful wok bilong Jisas tasol. God i no inap kisim bek yumi long baptais bilong yumi na long Lordsapa bilong yumi na pasin bilong yumi bilong lukautim de Sabat. Nogat tru! God i kisim bek sinmanmeri long feitful wok bilong Jisas tasol.
Lukim tok bilong aposel Pol gen long lain 9 – tok pait long ol dispela samting bilong lo i no gutpela na i no inap helpim wanpela manmeri na i no gat yus bilong em i stap. Ol i westim taim bilong ol long tok pait long ol dispela samting.
Na aposel Pol i tok, tok pait long ol dispela samting bai spoilim sios femili bilong God. Tok pait long ol dispela samting bai bagarapim ol manmeri bilong sios femili bilong God.
Long dispela as Taitus yet i no ken i pas long tok pait long ol dispela samting, na em i mas stopim ol narapela manmeri long pas long ol dispela tok pait. Ol manmeri bilong God ol i no ken i westim taim bilong ol long ol dispela tok pait. Long wanem, ol dispela samting i liklik samting tumas na tok pait bilong ol bai bagarapim sios femili bilong God.
Yumi i bilipim na trastim God long kisim bek yumi long feitful wok bilong Jisas tasol, orait yumi no ken i pas long tok pait long ol dispela samting bilong kaikai na de Sabat na de Sande na ol kainkain samting olsem. Nogat. Sapos yumi pas long ol dispela samting, orait bai yumi bagarapim sios femili bilong God tasol.
Liklik samting i kamap bikpela samting na i kamap nambawan samting.
Ol manmeri i tok pait long ol lo bilong kaikai na ol lo bilong de Sabat na de Sande na ol kainkain samting olsem, orait ol i mekim liklik samting i kamap bikpela samting na ol i mekim ol dispela samting i kamap nambawan samting.
Longpela taim tumas yumi lotu manmeri, long tok pait bilong yumi , yumi mekim liklik samting i kamap bikpela samting na i kamap nambawan samting. Yumi toktok planti long ol samting bilong kaikai na Sabat na baptais na Lordsapa na ol kainkain samting olsem, na long dispela rot yumi mekim ol dispela liklik samting i kamap bikpela samting tumas na i kamap nambawan samting. Tok bilong yumi i karamapim na haitim ol tok i bikpela tru na i nambawan – tok bilong yumi i karamapim tok bilong God i kisim bek sinmanmeri long feitful wok bilong Jisas tasol. Dispela tok i bikpela tru na i nambawan olgeta.
Yumi planti manmeri yumi tok pait long samting bilong lo na ol manmeri ol i no save long God i kisim bek sinmanmeri long feitful wok bilong Jisas tasol. Ol i no save, long wanem, tok pait bilong yumi long ol liklik samting i karamapim trupela bikpela toktok long feitful wok bilong Jisas!
Yumi i bilipim na trastim God long kisim bek yumi long feitful wok bilong Jisas tasol, orait yumi no ken i bihainim tok pait pasin bilong ol dispela samting. Nogat. Yumi mas larim liklik samting i stap liklik samting, na yumi larim bikpela samting i stap bikpela samting. Feitful wok bilong Jisas i bikpela samting stret na i nambawan samting olgeta. Yumi larim feitful wok bilong Jisas tasol i stap nambawan samting.
Glenn.
