Lukautim na helpim ol trupela wokman bilong God.

Lain 12-15 em i las toktok aposel Pol i mekim long Taitus long dispela pas bilong em. Na yumi save tingim olsem dispela las toktok em i no stap bilong skulim yumi. Yumi tingim olsem dispela las toktok em bilong Taitus tasol wantaim ol wanwan wokman i stap wantaim Taitus long ailan Krit. Yumi tingim olsem dispela las toktok em i samting bilong pinisim pas tasol – i olsem Pol i tok, “Tok bilong mi pinis nau”. Em olsem na yumi lukim dispela las toktok, tasol yumi save lusim na yumi tingim olsem em i no stap bilong skulim yumi.

Tasol yumi mas tingting olsem, God yet Em i putim dispela las toktok insait long Baibel, insait long Tok bilong God, na Em i no putim dispela toktok nating tasol. Nogat. Em i putim dispela toktok i stap bai yumi ken i kisim save long ol sampela samting bilong God yet na long ol sampela samting bilong hau yumi ken i sindaun long namel taim na yumi wetim taim bilong yumi lukim Jisas fes tu fes. Yumi mas save olsem, olgeta Tok bilong God i stap bilong skulim yumi, na dispela las toktok tu i stap bilong skulim yumi.

Orait, dispela las toktok i ken i skulim yumi long 2-pela samting….

1. Wok misineri em i wanpela bikpela wok.

Lukim lain 12-13. Aposel Pol na Taitus na Artemas na Tikikus na Senas na Apolos ol i mekim wok misineri. Sampela taim ol i raun long ol sampela hap na autim gutnius bilong God na sampela taim ol i sindaun long wanpela hap na autim Tok bilong God. Dispela em i wok bilong ol – ol i wok long autim trupela gutnius bilong grasia bilong God – ol i wok long autim tok bilong feitful wok bilong Jisas long diwai kros.

Taitus na Artemas na Tikikus na Senas na Apolos ol i autim trupela gutnius bilong grasia bilong God long feitful wok bilong Jisas long diwai kros. Na yumi ken i save ol i autim trupela gutnius, long wanem, aposel Pol i wanbel long wok bilong ol na em i tokim ol sios femili bilong ailan Krit long lukautim ol. Ol i wanwok bilong Pol bilong autim gutnius bilong grasia bilong God long feitful wok bilong Jisas.

Na i no gat kwesten mak long tok aposel Pol i autim. Nogat. Olgeta pas bilong aposel Pol long Nupela Testamen i pulap long tok bilong grasia bilong God – i pulap long tok bilong feitful wok bilong Jisas long diwai kros. Aposel Pol em i no bisi long ol narapela toktok na ol narapela samting. Nogat. Taim aposel Pol i mekim toktok, orait em i save kisim olgeta tok bilong em i kam stret long grasia bilong God long feitful wok bilong Jisas. Gutnius bilong grasia bilong God long feitful wok bilong Jisas em i nambawan samting stret bilong aposel Pol – gutnius bilong grasia bilong God long feitful wok bilong Jisas i stiaim olgeta tok na olgeta pasin bilong aposel Pol.

Long ples bilong yumi ol sampela misineri ol i no olsem aposel Pol na Taitus na Artemas na Tikikus na ol i autim gutnius bilong feitful wok bilong Jisas. Nogat. Ol i wok long mekim misin bilong ol i kamap bikpela na i kamap nambawan misin. Long tingting bilong ol na long pasin bilong ol gutnius bilong feitful wok bilong Jisas i no winim olgeta narapela samting. Nogat. Misin bilong ol i nambawan samting bilong ol.

Orait na lukim toktok aposel Pol i tokim Taitus wantaim ol manmeri bilong sios femili bilong God long ailan Krit. Ol i mas lukautim na helpim ol misineri i kam long ol, em ol misineri i autim trupela gutnius bilong grasia bilong God. Ol i mas helpim ol long ol samting ol i nidim bilong mekim wok bilong ol – ol i no ken i sotim ol. Ol i mas lukautim ol long gutpela wei na mekim gutpela pasin na gutpela toktok long ol.

Yumi mas klia olsem, Taitus na Artemas na Tikikus na Senas na Apolos ol i no man Krit. Nogat. Ol i bilong ol narapela hap. Ol i gat narapela kala skin o nogat, na ol i werim ol narapela kain klos o nogat, yumi no save, tasol yumi ken i save olsem, ol i no man Krit. Ol i bilong ol narapela hap na bilong ol narapela tok ples.

Tasol dispela i mas i stap samting nating bilong ol manmeri bilong sios femili bilong God long ailan Krit. Ol i no ken i tingting nogut long ol longwe man (olsem Taitus na Artemas na Tikikus na Senas na Apolos). Nogat. Ol i mas lukautim ol na helpim ol long ol samting ol i nidim bilong mekim wok misineri – ol i mas lukautim na helpim ol man i autim trupela gutnius bilong grasia bilong God long feitful wok bilong Jisas.

Long wanem? Gutnius bilong grasia bilong God long feitful wok bilong Jisas em i nambawan samting na ol samting bilong ples na tok ples nogat. Ol misineri olsem aposel Pol na Taitus na Artemas na Tikikus na Senas na Apolos ol i lusim haus bilong ol na lusim ples bilong ol na ol i lusim femili bilong ol na ol i lusim gutpela graun bilong ol bilong kisim trupela gutnius bilong feitful wok bilong Jisas i go long ol manmeri i no save long trupela gutnius.

Lukim stat bilong tok bilong aposel Pol long Taitus – lukim Taitus 1:1-3 – wok bilong Pol i olsem, em i wok long strongim bilip bilong ol manmeri bilong God, na em i wok long strongim save bilong ol long trupela tok – em i wok bilong strongim save bilong ol long trupela gutnius bilong grasia bilong God long feitful wok bilong Jisas long diwai kros.

Na Pol i mekim dispela wok bilong stiaim ol manmeri bilong God i go long pasin i holi na bilong givim hop long ol long kisim laip i stap oltaim oltaim. Tok Pol i autim i kirapim ol manmeri bilong God long wokabaut long pasin i holi na i givim hop na amamas long ol na ol i wetim taim we ol bai lukim Jisas fes tu fes.

Em olsem na dispela wok em i gutpela wok. Na em i gutpela tru long mekim dispela kain wok. Long dispela as aposel Pol i kisim maus bilong Aisaia na em i tok, “Lek bilong ol man i kam autim gutnius i naispela tru!” (lukim Rom 10:15). Dispela tok i mekim amamas long ol misineri i lusim ples bilong ol na graun bilong ol na femili bilong ol na ol i go long narapela hap bilong autim trupela gutnius bilong grasia bilong God long feitful wok bilong Jisas.

Em olsem na long dispela as aposel Pol i tokim ol manmeri bilong sios femili long ailan Krit na ol i mas lukautim na helpim ol dispela kain man. Taim ol i raun i kam long ol, orait ol i mas welkamim ol na lukautim ol na helpim ol.

Ol i no ken i jelas long ol. Ol i no ken i grisim ol na kisim ol sampela samting bilong ol. Nogat. Ol i mas rispektim ol na welkamim ol na lukautim ol na helpim ol.

Long ples bilong yumi ol planti manmeri ol i no bihainim dispela tok aposel Pol i mekim. Nogat. Ol planti manmeri i tingim olsem ol misineri i stap bilong givim kago long ol na bilong kamapim ol sevis long ol na bilong givim ol planti samting long ol. Dispela kain tingting i no stret na i no gutpela tingting. Ol manmeri bilong sios femili long ailan Krit ol i mas lukautim na helpim ol misineri, na yumi bilong PNG yumi mas mekim olsem. Yumi mas lukautim na helpim ol misineri, bai ol i ken i mekim gutpela wok bilong autim trupela gutnius bilong feitful wok bilong Jisas long diwai kros.

Maski yumi jelas long ol misineri. Yumi welkamim ol na lukautim ol na helpim ol, bai ol i fri long mekim wok bilong strongim yumi na givim hop long yumi long gutnius bilong grasia bilong God long feitful wok bilong Jisas – bai yumi amamas i stap long God i kisim bek yumi long feitful wok bilong Jisas long diwai kros tasol.

Sapos wanpela misineri i kam long hauslain bilong yumi na em i man bilong autim trupela gutnius bilong feitful wok bilong Jisas, orait yumi mas save olsem God i blesim hauslain bilong yumi – God i wokim gutpela samting stret na Em i givim dispela kain misineri long yumi. Em olsem na yumi mas welkamim em na lukautim em na helpim em, bai em i ken i mekim wok na yumi kisim amamas long hop bilong feitful wok bilong Jisas.

2. Ol narapela wok em i gutpela long ai bilong God.

Wok bilong autim trupela gutnius bilong grasia bilong God long feitful wok bilong Jisas em i gutpela wok, tasol ol narapela wok em i gutpela wok tu long ai bilong God. Lukim lain 14.

Olgeta manmeri bilong sios femili bilong God ol i mas gohet long mekim gutpela wok, bai ol i ken i helpim manmeri i nidim tru ol sampela helpim. Em olsem na ol i mas gohet long wokim gaden bilong ol o pulim pis o mekim wok kamda – ol i mas gohet long mekim ol kainkain gutpela wok olsem. Ol i mas lainim na ol i mas pas long ol kainkain gutpela wok olsem.

Ol i no ken i gohet long mekim wok i no gutpela long mekim. Ol i no ken i groim marawana o kisim mani long marawana o kisim mani long pilai kads o kisim mani long ol kainkain wok nogut olsem. Nogat. Ol i mas lainim na pas long olgeta wok i gutpela wok long mekim.

Olgeta manmeri bilong God ol i mas i stap manmeri bilong mekim wok. Ol i no ken i stap manmeri bilong les nabaut. Ol i mas i stap strongpela manmeri bilong mekim ol kainkain wok i gutpela long mekim.

Holim tingting long tok wanpela profet bilong ol Krit yet i mekim. Lukim Taitus 1:12. Profet i bin tok olsem, “Ol manmeri Krit ol i pulap long tok giaman, na ol i manmeri nogut olgeta, na ol i tingting long kaikai planti na les nabaut.” Les pasin em i kastem pasin bilong ol manmeri Krit. Em olsem tasol ol manmeri bilong God, ol manmeri bilong sios femili bilong God, ol i no ken i stap olsem. Nogat. Ol i mas strong long mekim wok. Ol i mas strong long mekim ol kainkain wok i gutpela long mekim.

Na olsem wanem ol i mas strong long mekim gutpela wok? Ol i mas strong long mekim wok, bai ol i kamapim ol samting bilong helpim ol manmeri i nidim ol sampela helpim. Ol i mas wok hat bilong kamapim ol samting, na taim ol i lukautim ol femili bilong ol pinis, orait ol i gat sampela samting moa bilong helpim ol manmeri i nidim ol sampela helpim, na bilong helpim ol wanwan misineri i kam long ol.

Long lain 14 aposel Pol i tok olsem, “Nogut ol lain manmeri bilong yumi i no karim kaikai long laip bilong ol.” Nogut ol manmeri i bilipim na trastim God long kisim bek ol long feitful wok bilong Jisas ol i no karim kaikai long laip bilong ol. Nogut ol i les manmeri na ol i no gat sampela samting bilong givim na helpim ol narapela manmeri i sot. Nogut ol i les na ol i no gat ol sampela samting bilong givim na helpim ol misineri i kam i stap wantaim ol. Bilip bilong ol i mas karim kaikai na dispela kaikai i olsem, ol i strong long mekim wok bai ol i gat sampela ekstra samting bilong givim na helpim ol manmeri i sot.

God yet i givim bikpela samting long ol – long grasia bilong Em, Em i givim laip na heven long ol – long feitful wok bilong Jisas long diwai kros God i fogivim sin bilong ol na givim nupela laip long ol na givim olgeta blesim bilong heven long ol. Em olsem na, hau na ol i les na ol i no gat ol samting bilong givim na helpim ol brata na sista bilong ol long sios femili na ol i no gat ol samting bilong givim na helpim ol wokman i autim trupela gutnius bilong grasia bilong God long feitful wok bilong Jisas?

Harim. Olgeta manmeri bilong God, em ol manmeri i tanim bel na bilipim na trastim God long kisim bek ol long feitful wok bilong Jisas, ol i save mekim grasia long ol narapela manmeri olsem God i bin mekim grasia long ol na sevim laip bilong ol. God i amamas long helpim ol na sevim ol, na ol manmeri bilong Em i amamas long helpim ol narapela manmeri i sot long ol sampela samting. Ol i no sanap na putim han bilong kisim ol sampela samting. Nogat. Ol i yusim han bilong ol na tuls bilong ol bilong kamapim ol ekstra samting bilong givim na helpim ol narapela manmeri.

Ol i gat bikpela tenkyu long God long helpim na sevim bilong Em, na taim ol i mekim gutpela wok bilong helpim ol narapela manmeri, orait ol i soim bikpela tenkyu bilong ol long ol gutpela wok God i bin mekim bilong kisim bek ol. Na taim ol i mekim dispela kain pasin, orait ol i karim kaikai long laip bilong ol. Trupela tenkyu i wok long bel bilong ol na i kamap ples klia.

Ating yumi bilong PNG yumi save sanap tumas na putim han bilong kisim ol planti samting long han bilong ol misineri na ol narapela manmeri. Dispela i no gutpela. Yumi i tanim bel na bilipim na trastim God long kisim bek yumi long feitful wok bilong Jisas, yumi no ken i stap les manmeri. Nogat. Yumi mas strong long mekim wok, bai yumi ken i kamapim ol sampela ekstra samting bilong givim na helpim ol narapela manmeri na bilong givim na helpim ol misineri i kam autim trupela gutnius bilong grasia bilong God long feitful wok bilong Jisas.

Sapos yumi gat bikpela tenkyu long God long wok Em i mekim long dai bilong Jisas bilong kisim bek yumi, orait yumi soim bikpela tenkyu bilong yumi na yumi strong long mekim wok, bai yumi gat ol sampela ekstra samting bilong helpim ol trupela wokman bilong God na bilong helpim ol brata na sista bilong yumi long sios femili bilong yumi na bilong helpim ol narapela manmeri i sot tumas.

Ol dispela kain wok em i gutpela wok long ai bilong God.

Em tasol.