Moning.
Lain 12-15 em i las toktok aposel Pol i mekim long Taitus long dispela pas bilong em. Na yumi save tingim olsem dispela las toktok em i no stap bilong skulim yumi – yumi tingim olsem dispela las toktok em bilong Taitus tasol wantaim ol wanwan wokman i stap wantaim Taitus long ailan Krit.
God yet i putim dispela las toktok insait long Baibel, insait long Tok bilong God, na Em i no putim dispela tok nating tasol. Nogat. Em i putim dispela tok i stap bai yumi ken i kisim save long ol sampela samting bilong God yet na long ol sampela samting bilong hau yumi ken i sindaun long namel taim na yumi wetim taim bilong yumi lukim Jisas fes tu fes. Yumi mas save olsem, olgeta Tok bilong God i stap bilong skulim yumi, na dispela las toktok tu i stap bilong skulim yumi.
Orait, yumi lukim Taitus 3:12-15….
12Taim mi salim Artemas o Tikikus i kam long yu, orait yu mas trai hat long kam long mi long taun Nikopolis. Long wanem, mi tingting long i stap long Nikopolis long taim bilong kol. 13Yu mas trai hat long helpim loyaman Senas na Apolos long wokabaut bilong tupela yet. Tupela i no ken i sot long wanpela samting. 14Na ol lain manmeri bilong yumi, ol i mas lainim gut na pas olgeta long mekim gutpela wok, bai ol i ken i helpim manmeri i nidim tru ol sampela helpim. Nogut ol lain manmeri bilong yumi i no karim kaikai long laip bilong ol.
15Olgeta manmeri i stap wantaim mi i tok olsem, mipela no lusim tingting long yu. Tokim ol manmeri i bilip na i lavim mipela olsem, mipela no lusim tingting long ol.
Grasia i ken i stap wantaim yupela olgeta.
Dispela las toktok i ken i skulim yumi long 2-pela samting….
1. Wok misineri em i wanpela bikpela wok.
Aposel Pol, Taitus, Artemas, Tikikus, Senas na Apolos ol i mekim wok misineri. Sampela taim ol i raun long sampela hap na autim gutnius bilong God na sampela taim ol i sindaun long wanpela hap na autim tok bilong God. Dispela em i wok bilong ol – ol i wok long autim trupela gutnius. Gutnius bilong grasia bilong God long feitful wok bilong Jisas em i nambawan samting stret bilong ol na i stiaim olgeta tok na olgeta pasin bilong ol.
Long ples bilong yumi ol sampela misineri ol i no olsem aposel Pol na Taitus na Artemas na Tikikus. Nogat. Ol i wok long mekim misin bilong ol i kamap bikpela na i kamap nambawan misin. Long tingting bilong ol na long pasin bilong ol gutnius bilong feitful wok bilong Jisas i no winim olgeta narapela samting. Nogat. Misin bilong ol i nambawan samting bilong ol.
Aposel Pol i tokim Taitus wantaim ol manmeri bilong sios femili olsem, ol i mas lukautim na helpim ol misineri i kam long ol, em ol misineri i autim trupela gutnius bilong grasia bilong God. Ol i mas helpim ol long ol samting ol i nidim bilong mekim wok bilong ol – ol i no ken i sotim ol. Ol i mas lukautim ol long gutpela wei na mekim gutpela pasin na gutpela toktok long ol.
Ol i no ken i jelas long ol. Ol i no ken i grisim ol bilong kisim ol sampela samting bilong ol. Nogat. Ol i mas rispektim ol na welkamim ol na lukautim ol na helpim ol.
Long ples bilong yumi ol planti manmeri ol i no bihainim dispela tok aposel Pol i mekim. Nogat. Ol planti manmeri ol i tingim olsem, ol misineri i stap bilong givim kago long ol na bilong kamapim ol sevis long ol na bilong givim ol planti samting long ol. Dispela kain tingting i no stret na i no gutpela tingting. Ol manmeri bilong sios femili long ailan Krit ol i mas lukautim na helpim ol misineri, na yumi bilong PNG yumi mas mekim olsem. Yumi mas lukautim na helpim ol misineri, bai ol i ken i mekim gutpela wok bilong autim trupela gutnius bilong feitful wok bilong Jisas long diwai kros.
Sapos wanpela misineri i kam long hauslain bilong yumi na em i man bilong autim trupela gutnius bilong feitful wok bilong Jisas, orait yumi mas save olsem God i blesim hauslain bilong yumi – God i wokim gutpela samting stret na Em i givim dispela kain misineri long yumi. Em olsem na yumi mas welkamim em na lukautim em na helpim em, bai em i ken i mekim wok na yumi kisim amamas long hop bilong feitful wok bilong Jisas.
2. Ol narapela wok em i gutpela long ai bilong God.
Wok bilong autim trupela gutnius bilong grasia bilong God long feitful wok bilong Jisas em i gutpela wok, tasol ol narapela wok em i gutpela wok tu long ai bilong God. Lukim lain 14.
Olgeta manmeri bilong sios femili bilong God ol i mas gohet long mekim gutpela wok, bai ol i ken i helpim manmeri i nidim tru ol sampela helpim. Em olsem na ol i mas gohet long wokim gaden bilong ol o pulim pis o mekim wok kamda – ol i mas gohet long mekim ol kainkain gutpela wok olsem. Ol i mas lainim na ol i mas pas long ol kainkain gutpela wok olsem.
Olgeta manmeri bilong God ol i mas i stap manmeri bilong mekim wok. Ol i no ken i stap manmeri bilong les nabaut. Nogat. Ol i mas i stap strongpela manmeri bilong mekim ol kainkain wok i gutpela long mekim.
Aposel Pol i tok olsem, nogut ol manmeri i bilipim na trastim God long kisim bek ol long feitful wok bilong Jisas ol i no karim kaikai long laip bilong ol. Nogut ol i les manmeri na ol i no gat sampela samting bilong givim na helpim ol narapela manmeri i sot. Bilip bilong ol i mas karim kaikai na dispela kaikai i olsem, ol i strong long mekim wok bai ol i gat sampela ekstra samting bilong givim na helpim ol manmeri i sot.
Olgeta manmeri bilong God, em ol manmeri i tanim bel na bilipim na trastim God long kisim bek ol long feitful wok bilong Jisas, ol i save mekim grasia long ol narapela manmeri olsem God i bin mekim grasia long ol bilong kisim bek ol. Ol i gat bikpela tenkyu long God long helpim na sevim bilong Em, na taim ol i mekim gutpela wok bilong helpim ol narapela manmeri, orait ol i soim bikpela tenkyu bilong ol long ol gutpela wok God i bin mekim bilong kisim bek ol. Na taim ol i mekim dispela kain pasin, orait bilip i karim kaikai long laip bilong ol.
Ating yumi bilong PNG yumi save sanap tumas na putim han bilong kisim ol planti samting long ol misineri na long ol narapela manmeri. Dispela i no gutpela. Sapos yumi gat bikpela tenkyu long God long wok Em i mekim long dai bilong Jisas bilong kisim bek yumi, orait yumi soim bikpela tenkyu bilong yumi na yumi strong long mekim wok, bai yumi gat ol sampela ekstra samting bilong helpim ol trupela wokman bilong God na bilong helpim ol brata na sista bilong yumi long sios femili bilong yumi na bilong helpim ol narapela manmeri i sot tumas.
Ol dispela kain wok em i gutpela wok long ai bilong God.
Glenn.
