Mak
Tok bokis bilong sampela man i holim gaden wain.
12
1Na Jisas i autim wanpela tok bokis long ol olsem, “Wanpela man i plenim wanpela gaden wain. Em i wokim banis, na insait long banis em i wokim hul bilong putim tang bilong krungutim prut bilong wain, na em i wokim wanpela haus sikuriti. Na em i putim ol dispela samting i go long han bilong sampela man na ol bai putim pe na yusim ol dispela samting bilong mekim wok bisnis bilong ol. Em i mekim olsem na em i lusim ol na em i raun long wanpela longwe ples. 2Na taim prut em i mau em i salim wanpela wokboi bilong em i go long ol bilong kisim sampela prut bilong dispela gaden. 3Tasol, ol i holim dispela wokboi na paitim em nogut tru na salim em i go bek nating. 4Orait, papa bilong gaden i salim narapela wokboi i go long ol. Na ol i paitim em long het na mekim pasin nogut long em. 5Na em i salim narapela wokboi gen, na ol i kilim em i dai. Na em i salim planti wokboi moa i go long ol, na ol i paitim sampela na ol i kilim sampela i dai.
6“Na papa bilong gaden i gat wanpela man moa i stap bilong salim i go. Em i pikinini bilong em na em i lavim em tru. Na em i salim dispela pikinini i go long ol na em i tingim olsem, ‘Ol bai rispektim pikinini bilong mi.’
7“Tasol, ol dispela man i wok long yusim gaden ol i tok namel long ol yet olsem, ‘Dispela man bai kisim olgeta samting bilong papa bilong em. Kam, yumi kilim em i dai, na yumi yet i kisim dispela gaden.’ 8Olsem na, ol i holim em na kilim em i dai, na ol i tromoi bodi bilong em i go autsait long gaden.
9“Orait, papa bilong gaden em i ken i mekim wanem? Em i ken i kam na kilim ol dispela man i yusim gaden bilong em na em i ken i givim gaden bilong em i go long han bilong ol narapela man. 10-11Ating yupela no bin lukim dispela hap tok i stap long Tok bilong God, a? Dispela tok i olsem,
“ ‘Ol wokman bilong wokim haus ol i tingim wanpela ston i nogut na ol i rausim,
tasol dispela ston i kamap nambawan ston bilong haus i ken i sanap.
Na BIKPELA yet i mekim dispela samting i kamap na mipela i lukim dispela i gutpela tumas.’ ”
(Buk Song 118:22-23)
12Na ol dispela hetpris na tisa bilong lo na bikman i klia olsem, Jisas i bin mekim tok bokis bilong sutim tok long ol. Olsem na, ol i laik arestim Jisas. Tasol, ol i pret long ol manmeri na ol i lusim Em na i go.
Stori bilong givim takis mani long Sisar.
13Bihain, ol i salim sampela Farisi na sampela man i bihainim Herot i go long Jisas bilong trikim Jisas long mekim sampela tok i no stret. 14Ol i kam long Jisas na tokim Em olsem, “Tisa, mipela klia olsem Yu save bihainim pasin i stret olgeta taim. Na wanpela man i no inap grisim Yu. Nogat. Yu save bihainim trupela tok na autim trupela wei bilong God long olgeta man, maski ol i gat nem o nogat. Na mipela laik save olsem, i orait long mipela i ken i givim takis mani long Sisar o nogat? 15Mipela mas baim o mipela no ken i baim?”
Tasol Jisas i klia long dispela giaman pasin bilong ol na Em i tokim ol olsem, “Long wanem as yupela laik trikim Mi? Kisim wanpela mani i kam na Mi lukim.” 16Orait, ol i kisim wanpela mani i kam, na Jisas i askim ol olsem, “Pes bilong husat i stap long dispela mani. Na nem bilong husat i stap long em?”
Na ol i bekim olsem, “Sisar.”
17Na Jisas i tokim ol olsem, “Orait, samting bilong Sisar yupela givim long Sisar, na samting bilong God yupela givim long God.”
Na ol i tanim het long dispela tok bilong Jisas.
Ol Sadyusi i givim askim long Jisas.
18Na ol lain Sadyusi i kam long Jisas. Ol dispela lain i bilip olsem, ol daiman i no inap kirap bek gen long bihain. Em olsem na ol i askim Jisas olsem, 19“Tisa, Moses i bin raitim wanpela tok bilong yumi olsem, ‘Sapos wanpela man i dai, na em i no gat pikinini, na meri bilong em i stap, orait brata bilong dispela man i mas maritim dispela meri na kamapim sampela pikinini bilong brata bilong em.’ 20Orait na 7-pela brata i stap long ples. Fes brata em i maritim wanpela meri. Na em i no karim pikinini na em i dai. 21Olsem na, sekon brata i maritim dispela meri bilong brata bilong em. Na bihain em tu em i dai na em i no karim pikinini. Na namba 3 brata i bin mekim olsem tu. 22Orait, olgeta 7-pela brata i maritim dispela meri na ol i no kamapim pikinini na ol i dai. Na bihain dispela meri tu em i dai. 23Orait bihain, taim ol daiman i kirap bek gen, dispela meri bai i stap meri bilong husat? Yu save, olgeta dispela 7-pela man i bin maritim em.”
24Na Jisas i bekim dispela askim bilong ol olsem, “Yupela mekim kranki toktok. Long wanem? Yupela no klia gut long Tok bilong God na yupela no save long strong bilong God. 25Taim ol daiman i kirap bek gen ol i no inap marit. Nogat. Ol bai stap olsem ol ensel bilong heven. 26Na long dispela tok bilong daiman i ken i kirap bek gen, ating yupela no ritim buk Moses i bin raitim, a? Long stori bilong liklik diwai i paia God i tokim Moses olsem, ‘Mi God bilong Abraham na bilong Aisak na bilong Jekop.’ 27God Em i no God bilong daiman, nogat, Em i God bilong man i gat laip. Olsem na, yupela rong olgeta long dispela samting.”
Wanem lo bilong God i namba wan?
28Na wanpela tisa bilong lo em i kam na em i harim ol Sadyusi i diskasim bekim bilong Jisas. Na dispela tisa bilong lo em i klia olsem Jisas i bin bekim ol gutpela tru, na Em i askim Jisas olsem, “Bilong olgeta lo bilong God wanem lo i namba wan stret?” 29Na Jisas i bekim em olsem, “Namba wan lo stret em i olsem, ‘Yupela ol lain Israel yupela harim. BIKPELA, God bilong yumi, Em wanpela tasol Em i BIKPELA. 30Na yu mas lavim BIKPELA, God bilong yu. Yu mas lavim Em long bel bilong yu olgeta, na long laip bilong yu olgeta, na long tingting bilong yu olgeta, na long strong bilong yu olgeta.’ (Lo 6:4-5) 31Na namba 2 lo em i olsem, ‘Yu mas lavim ol narapela manmeri olsem yu lavim yu yet.’ (Wok Pris 19:18) Na narapela lo i no winim dispela tupela lo.”
32Na dispela tisa bilong lo i tok olsem, “Tisa, Yu tok tru. Tru tumas, God wanpela tasol i stap na i no gat narapela i stap. 33Na pasin bilong lavim God olgeta long bel bilong yumi na long tingting bilong yumi na long strong bilong yumi, na pasin bilong lavim ol narapela manmeri olsem yumi lavim yumi yet i winim olgeta ofa ol i kukim long paia na i winim olgeta narapela kain ofa tu.”
34Na dispela man i mekim gutpela na trupela tok. Na Jisas i tokim em olsem, “Ating yu kam klostu tru long kingdom bilong God.” Na long dispela taim i go olsem ol manmeri i pret long givim sampela askim moa long Jisas.
Krais Em i pikinini man bilong husat?
35Na Jisas i skulim ol manmeri insait long tempel. Na Em i givim wanpela askim long ol olsem, “Ol tisa bilong lo i tok olsem, Krais Em i pikinini man bilong Devit. Na dispela tok i gat wanem minim bilong em i stap? 36Holi Spirit i bin stiaim tok bilong Devit na Devit i bin tok olsem,
“ ‘BIKPELA i tokim BIKPELA bilong mi olsem,
“Sindaun long han sut bilong Mi na stap i go inap long Mi putim ol birua bilong yu aninit long lek bilong yu.” ’
(Buk Song 110:1)
37Devit yet em i kolim Krais ‘BIKPELA.’ Olsem na, Krais Em i pikinini bilong Devit olsem wanem?”
Na planti manmeri i stap na ol i amamas tru long harim tok bilong Jisas.
38Na taim Jisas i skulim ol Em i tok olsem, “Yupela lukaut long ol tisa bilong lo. Ol i laik tumas long putim longpela klos bilong apim ol yet na wokabaut i go. Na ol i laik tumas long ol manmeri i kolim ol ‘tisa’ na kain nem olsem taim ol i wokabaut long ples maket. 39Na taim ol i go insait long haus lotu bilong ol Juda ol i laik tumas long sindaun we ol manmeri i ken i lukim ol. Na long taim bilong bikpela kaikai ol i laik tumas long sindaun long ples bilong man i gat nem. 40Ol i save pinisim nating ol samting bilong ol wido meri, na ol i save mekim longpela prea bilong apim ol yet. Na God bai mekim save nogut tru long ol dispela kain man.”
Wido meri i givim ofa long God.
41Na Jisas i sindaun klostu long bokis mani bilong tempel we ol manmeri i save putim ofa bilong ol, na Em i lukluk long ol manmeri i tromoi mani long bokis. Planti maniman i tromoi bikpela mani long bokis. 42Tasol, wanpela wido meri i sot tru long mani em i kam, na em i putim tupela liklik mani i no gat hevi long bokis.
43Na Jisas i singautim ol disaipel bilong Em i kam na Em i tokim ol olsem, “Mi tok tru long yupela, dispela wido meri i sot tru long mani, em i putim mani i winim olgeta mani bilong ol narapela manmeri. 44Long wanem? Ol dispela manmeri ol i gat planti mani na ol i tromoi hap mani bilong ol long bokis. Tasol, dispela wido meri em i no gat planti mani na em i putim olgeta mani bilong em long bokis, na em i no gat sampela mani moa bilong baim kaikai bilong em.”
