Mak
Wanpela meri i mekim amamas long Jisas.
14
1Orait, i gat tupela de yet i stap na bihain taim bilong Abrusim na taim bilong Kaikaim Bret i No Gat Yis bai kamap. Na ol hetpris na ol tisa bilong lo i wok long painim sampela wei hait bilong arestim Jisas na kilim Em i dai. 2Na ol i tok olsem, “Yumi no ken i arestim Em long taim bilong Kaikaim Bret i No Gat Yis. Nogut ol manmeri i lukim na ol i kros na kirapim pait.”
3Na Jisas i stap long Betani long haus bilong wanpela man ol i save kolim Saimon i Gat Sik Lepa. Em i sindaun kaikai na wanpela meri em i kam long Em. Na dispela meri i holim wanpela botol ston, na insait long dispela botol ston i gat wel i gat naispela smel. Na pe bilong dispela samting i antap tumas. Na dispela meri em i brukim maus bilong botol ston na kapsaitim wel long het bilong Jisas.
4Na sampela manmeri i stap wantaim Jisas ol i bel nogut na ol i tok namel long ol yet olsem, “Olsem wanem dispela meri i westim wel i gat naispela smel? 5Mipela inap salim na kisim bikpela mani olsem wan yia pe bilong ol wokman. Na mipela inap yusim dispela kain mani bilong helpim ol rabis manmeri.” Em olsem na ol i krosim dispela meri nogut tru.
6Na Jisas i tok, “Larim em. Bilong wanem yupela i givim hevi long em? Em i bin mekim gutpela pasin long Mi. 7Ol rabisman bai stap wantaim yupela i go i go, na wanem taim yupela laik yupela ken i helpim ol. Tasol, Mi no inap i stap wantaim yupela i go i go. 8Dispela meri i mekim pasin inap long strong bilong em. Em i kapsaitim wel long Mi bilong redim bodi bilong Mi long matmat. 9Mi tok tru long yupela, long olgeta ples ol i autim gutnius nabaut long dispela graun, bai ol i tokaut long pasin dispela meri i bin mekim na ol bai holim tingting long em.”
10Na Judas Iskariot, wanpela bilong ol 12-pela disaipel, em i go long ol hetpris na em i tokim ol olsem, “Mi ken i helpim yupela arestim Jisas.” 11Ol i amamas long harim dispela tok na ol i promis long givim mani long em. Em olsem na, Judas i wok long painim gutpela taim bilong putim Jisas long han bilong ol.
Jisas i bihainim pasin bilong Abrusim wantaim ol disaipel.
12Long fes de bilong taim bilong Kaikaim Bret i No Gat Yis ol i save kilim pikinini sipsip bilong mekim pasin bilong Abrusim, na long dispela de ol disaipel bilong Jisas i askim Em olsem, “Mipela bai go we na redim olgeta samting bilong Yu ken i kaikaim kaikai bilong Abrusim?”
13Na Jisas i salim tupela disaipel i go na Em i tokim tupela olsem, “Yutupela go insait long siti na wanpela man i karim sospen wara bai bungim yutupela. Na yutupela bihainim dispela man. 14Na taim em i go insait long wanpela haus, orait yutupela tokim papa bilong dispela haus olsem, ‘Tisa i tok, Rum bilong Mi bilong kaikaim kaikai bilong Abrusim wantaim ol disaipel bilong Mi i stap we?’ 15Na em bai soim yutupela wanpela bikpela rum i stap antap. Em i gat tebol na bet samting i stap na i redi pinis. Yutupela redim kaikai bilong mipela long dispela rum.”
16Na tupela disaipel i lusim ol na i go insait long siti na ol i lukim olgeta samting olsem Jisas i bin tokim ol. Em olsem na tupela i redim kaikai bilong Abrusim.
17Long apinun Jisas i kam wantaim 12-pela disaipel bilong Em. 18Na taim ol i sindaun kaikai Jisas i tokim ol olsem, “Mi tok tru long yupela, wanpela bilong yupela nau i kaikai wantaim Mi bai putim Mi i go long han bilong birua.”
19Na ol disaipel i pilim bel hevi na ol i askim Jisas wan wan, “Ating Yu no tok long mi, a?”
20Na Jisas i bekim askim bilong ol olsem, “Em i wanpela bilong yupela 12-pela disaipel nau i putim bret bilong em insait long dis wantaim Mi.” 21Pikinini bilong Man bai go olsem ol profet i bin tok. Tasol, sori tumas long dispela man i putim Pikinini bilong Man long han bilong birua. Mobeta mama bilong dispela man i no bin karim em.”
22Ol i kaikai i stap na Jisas i kisim wanpela bret na Em i tok tenkyu long God na Em i brukim na Em i givim long ol disaipel bilong Em. Na Jisas i tok, “Yupela kisim. Dispela em i bodi bilong Mi.”
23Na Em i kisim wanpela kap i gat wain i stap long em na Em i tok tenkyu long God na Em i givim ol, na olgeta i dring long em.
24Na Jisas i tokim ol, “Dispela em i blut bilong Mi bilong nupela kontrak. Em i kapsait bilong helpim planti manmeri. 25Na Mi tok tru long yupela, Mi no inap dring gen dispela wain i go inap long de Mi bai dring nupela gen insait long kingdom bilong God.”
26Na taim ol i singim wanpela lotu song pinis, orait ol i go long maunten Oliv.
Pita bai givim baksait long Jisas.
27Na Jisas i tokim ol olsem, “Yupela olgeta bai lusim Mi. Long wanem? Tok bilong God i stap olsem,
“ ‘Mi bai kilim wasman bilong sipsip,
na ol sipsip bai ranawe i go nabaut.’
(Sekaraia 13:7)
28Tasol, bihain, taim Mi kirap bek gen, Mi bai go paslain long yupela long Galili.”
29Tasol Pita i tokaut klia olsem, “Ol i ken i lusim Yu, tasol mi no inap.”
30Na Jisas i bekim tok bilong Pita olsem, “Mi tok tru long yu, nau tasol, long biknait stret na kakaruk i no krai tupela taim yet, yu yet bai tokaut 3-pela taim olsem, ‘Mi no bilong Jisas.’ ”
31Tasol Pita i tok strong olsem, “Nogat. Sapos ol i laik kilim mi wantaim Yu em i orait tasol mi no inap tokaut olsem, ‘Mi no bilong Jisas.’ ” Na olgeta disaipel i mekim wankain toktok.
Jisas i prea long hap Getsemani.
32Ol i go long wanpela hap nem bilong em Getsemani. Na Jisas i tokim ol disaipel bilong Em olsem, “Yupela sindaun hia, Mi laik i go na mekim prea.” 33Em i kisim Pita na Jems na Jon i go wantaim Em, na Em i stat nau na pilim bikpela hevi stret long bel bilong Em. 34Na Jisas i tok, “Bikpela hevi tru i kamap long bel bilong Mi na klostu dispela hevi i pinisim laip bilong Mi. Yupela stap hia na was.”
35Na Jisas i go liklik moa, na Em i pundaun long graun na Em i prea olsem, “Sapos i gat wei bilong Mi ken i abrusim dispela taim, orait Mi laik abrusim.” 36Na Em i prea olsem, “Aba, Papa, wanem samting Yu laik mekim Yu inap mekim. Plis rausim dispela kap long Mi. Tasol, Mi no laik Yu bihainim laik bilong Mi. Nogat. Mi laik Yu bihainim laik bilong Yu.”
37Na Jisas i kam bek na Em i lukim ol disaipel ol i slip i stap, na Em i tokim Pita olsem, “Saimon, yu slip, a? Yu no inap was i stap long wanpela aua tasol, a? 38Yupela mas was na prea, nogut wanpela traim i kamap na pundaunim yupela. Ating long bel yupela laik bihainim gutpela pasin, tasol bodi bilong yupela i no gat strong.”
39Jisas i lusim ol gen na Em i mekim prea gen olsem Em i bin mekim pastaim. 40Na taim Em i kam bek Em i lukim ol disaipel i slip. Ol i ai raun tumas na ol i slip i stap. Na taim Jisas i kirapim ol, ol i no gat toktok.
41Bihain Jisas i kam bek namba 3 taim na Em i tokim ol disaipel olsem, “Yupela slip na malolo i stap yet, a? Em inap nau. Taim i kamap pinis. Lukim, ol i laik putim Pikinini bilong Man i go long han bilong ol sinman. 42Yupela kirap, na yumi go nau. Man i laik putim Mi long han bilong birua i kam pinis.”
Ol i arestim Jisas.
43Jisas i toktok yet na Judas, wanpela bilong ol 12-pela disaipel, em i kamap. Na planti man ol i kam wantaim em na ol i holim naip na stik. Ol hetpris na ol tisa bilong lo na ol bikman ol i bin salim ol dispela lain i kam.
44Na dispela man i laik putim Jisas long han bilong birua, em i bin pasim tok pinis wantaim birua olsem, “Mi bai givim kis long Jisas bilong makim Em. Taim yupela lukim, orait yupela arestim dispela man na ol sikuriti i ken i kisim Em i go.” 45Em olsem na Judas em i go klostu long Jisas na em i tok, “Tisa,” na em i givim kis long Jisas. 46Na ol man i kam wantaim Judas ol i holim Jisas na arestim Em. 47Na wanpela man i sanap klostu na em i kisim naip bilong em na em i paitim wokboi bilong namba wan hetpris. Taim em i paitim em, em i katim of ia bilong em.
48Na Jisas i tokim ol olsem, “Mi lida bilong ol lain nogut i laik kapsaitim gavman na yupela holim ol naip na stik na yupela kam bilong arestim Mi, a? 49Olgeta de Mi stap wantaim yupela na Mi tisim ol manmeri insait long tempel na yupela no holim Mi. Tasol, Tok bilong God i mas i kamap tru.” 50Na ol disaipel i lusim Jisas na ranawe.
51-52Na wanpela yangpela man i bihainim Jisas i kam. Em i pasim laplap tasol long bodi bilong em. Na taim ol i lukim na holim em, orait em i lusim laplap bilong em na em i ranawe skin nating.
Ol i sanapim Jisas long kot Sanhidaren.
53Na ol i kisim Jisas i go long haus bilong namba wan hetpris. Na olgeta hetpris na bikman na tisa bilong lo ol i kam bung i stap. 54Na Pita i bihainim Jisas longwe liklik na em i bihainim Em i go insait long banis bilong namba wan hetpris. Em i sindaun wantaim ol sikuriti na em i hatim skin bilong em long paia.
55Ol hetpris wantaim olgeta man bilong kot Sanhidaren ol i wok long painim sampela rong bilong Jisas na ol i ken i kilim Em i dai, tasol ol i no lukim wanpela rong. 56Planti manmeri i sanap na sutim giaman toktok long Jisas, tasol toktok bilong ol i no wankain.
57Na sampela manmeri i sanap na ol i mekim tok giaman olsem, 58“Mipela harim Jisas i mekim tok olsem, ‘Mi bai brukim dispela tempel ol man i bin wokim, na long 3-pela de Mi bai wokim narapela tempel ol man i no bin wokim.’ ” 59Tasol, dispela toktok tu i no kamap wankain.
60Na namba wan hetpris i sanap long ai bilong ol na em i askim Jisas olsem, “Yu bai bekim ol dispela toktok o nogat? Dispela toktok ol i sutim long Yu i olsem wanem?” 61Tasol Jisas i no mekim wanpela toktok na Em i no bekim.
Na gen namba wan hetpris i givim askim long Jisas olsem, “Yu Krais, Pikinini bilong dispela Holi God mipela save lotu long Em o nogat?”
62Na Jisas i tok olsem, “Mi dispela man. Na yupela bai lukim Pikinini bilong Man i sindaun long han sut bilong God i gat olgeta pawa. Na bai yupela lukim Em i kam antap long klaut bilong heven.”
63Na namba wan hetpris i brukim klos bilong em na em i tok, “Yumi no nidim ol narapela witnis. 64Em yet i mekim tok bilas long God na yupela bin harim. Nau yupela gat wanem tingting?”
Na olgeta i pasim tok olsem, “Em i gat rong. Olsem na, Em i mas dai.” 65Na sampela man i kirap na spet long Jisas. Ol i pasim laplap long ai bilong Em na ol i solapim Em. Na ol i tokim Em olsem, “Yu mekim tok profet, husat i paitim Yu?” Na ol sikuriti i kisim Em na ol i paitim Em nogut tru.
Pita i givim baksait long Jisas.
66Pita i stap daunbilo, insait long banis bilong haus, na wanpela wokmeri bilong namba wan hetpris i go kam. 67Na taim em i lukim Pita i hatim skin bilong em long paia em glasim em gut tru.
Na em i tok, “Yu tu i bin i stap wantaim dispela man Jisas bilong Nasaret.”
68Tasol Pita i tok ‘nogat’ olsem, “Mi no save long dispela tok yu mekim.” Na em i go sanap klostu long dua.
69Na taim dispela wokmeri i lukim Pita i sanap klostu long dua em i tokim ol man i sanap nabaut, “Dispela man em i wanpela bilong ol.” 70Tasol gen Pita i tok ‘nogat’.
Na bihain liklik ol man i sanap klostu long Pita i tokim Pita olsem, “Ating i mas tru, yu wanpela bilong ol. Long wanem? Yu bilong distrik Galili.”
71Na Pita i mekim strongpela tok tru antap na em i tok, “Mi no save long dispela man yupela i tok long em.” Na em i strongim dispela tok olsem, “Sapos mi giaman, orait mi ken i bagarap.”
72Na wantu kakaruk i krai namba tu taim. Pita i harim na em i holim tingting long tok Jisas i bin mekim. Jisas i bin tok olsem, “Kakaruk i no krai tupela taim yet, yu bai tokaut 3-pela taim olsem, ‘Mi no bilong Jisas.’ ” Pita i tingting, na em i krai nogut tru.
