Efesus 5:15-21.
Ating sampela manmeri i skul long taun na i skul long yunivesiti na i wok long bikpela kampani nabaut ol i tingim olsem ol i save manmeri na ol manmeri bilong ples ol i no save manmeri. Ating sampela bilong ol i tingim olsem ol manmeri bilong ples ol i kanaka manmeri, long wanem, ol i no gat save olsem ol.
Tasol, husat i save manmeri trutru? Ol save manmeri em ol manmeri i skul tasol, a? Ol save manmeri em ol manmeri i go pinis long yunivesiti, a? Ol save manmeri em ol manmeri i wok long bikpela kampani long Mosipi na Lae, a? Ol save manmeri em ol manmeri i gat save long yusim komputa na Internet, a?
Aposel Pol i tok olsem, manmeri i gat save ol i manmeri i klia long laik bilong BIKPELA. Lukim Efesus 5:15-17.
Yumi i bilipim na trastim God long kisim bek yumi long feitful wok bilong Jisas long diwai kros na yumi pas wantaim long sios femili komyuniti bilong God, orait yumi mas i stap save manmeri. Yumi i bilipim na trastim na bihainim Jisas, orait yumi no ken i longlong i stap. Nogat. Yumi mas i stap manmeri i gat save. Yumi manmeri we Holi Spirit i bin opim ai na ia na bel bilong yumi na i kamapim laip long yumi bai yumi tanim bel na bilipim na trastim feitful wok bilong Jisas na bihainim Em, orait yumi no ken i stap olsem ol stupit manmeri. Nogat. Yumi mas i stap save manmeri long laik bilong BIKPELA bilong yumi.
Na manmeri i gat save ol i wanem kain manmeri? Manmeri i gat trupela save ol i stap olsem wanem? Long Efesus 5:15-21 yumi ken i skelim 6-pela samting….
1. Manmeri i save manmeri ol bai lukaut gut long hau ol i stap long laip bilong ol.
Lukim lain 15. Manmeri i gat het na i save yusim het ol bai lukaut gut long hau ol i wokabaut na hau ol i sindaun. Ol i no inap pasim tingting na bihainim olgeta pasin bilong ples na olgeta kastem pasin bilong tumbuna bilong ol. Nogat. Ol bai tingting gut na skelim gut olgeta samting bilong wokabaut na sindaun bilong ol.
Em olsem na ol bai lukaut gut long hau ol i marit. Ol bai lukaut gut long pasin ol i mekim insait long marit bilong ol na hau ol i lukautim pikinini bilong ol. Ol bai lukaut gut long pasin ol i mekim insait long sios. Ol bai lukaut gut long pasin ol i mekim nabaut. Ol i no inap pasim tingting. Olgeta taim ol bai skelim gut ol pasin bilong ol.
Manmeri i gat save, save manmeri, ol bai lukaut gut long olgeta pasin Pol i bin tokaut long em long stat long Efesus 4:17 i kam i kam long dispela hap tok nau yumi skelim. Sapos yumi pasim tingting long ol dispela samting, orait yumi longlong tasol, yumi no gat het. Save manmeri bai lukaut gut long dispela samting Pol i tokaut long em. Ol i bai lukaut gut long hau ol i stap long laip bilong ol.
2. Manmeri i gat save ol i no inap westim taim bilong ol.
Lukim lain 16. Manmeri i mekim pasin pamuk na olgeta kain pasin i doti na ol i mangalim marit meri na yangpela meri na ol i mekim doti toktok na stupit toktok na pilai toktok i doti – ol manmeri i mekim ol dispela kain pasin ol i westim laip bilong ol. Dispela pasin bilong ol em i no helpim wanpela manmeri. Dispela pasin bilong ol em i no kamapim wanpela gutpela kaikai long laip bilong ol na long laip bilong ol narapela manmeri. Dispela pasin bilong ol em i rabis pasin tasol. Ol i westim laip bilong ol.
Manmeri i gat save ol bai yusim taim bilong ol long gutpela wei. Nau i gat planti pasin nogut i stap long ples – i gat planti tudak pasin i stap. Tasol ol save manmeri bilong God ol i no inap i go insait long ol dispela pasin nogut. Nogat tru. Ol bai i stap separet na yusim taim bilong ol long ol gutpela samting.
Ol bai tingting long mekim gutpela pasin na gutpela toktok bilong helpim ol narapela manmeri klia long wei bilong God. Ol bai wok hat long olgeta pasin i rait pasin bilong ol manmeri bilong God. Ol bai wokabaut long pasin bilong lait, na lait pasin bilong ol bai putim tudak pasin bilong ol tudak manmeri long ples klia, na sampela bai sem na tanim bel na kam insait long nupela laip. Laip bilong save manmeri bai karim gutpela kaikai. Laip bilong ol bai helpim ol planti manmeri i kam long God wantaim ol.
3. Manmeri i gat save ol bai skelim gut olgeta laik bilong God.
Lukim lain 17. Sapos yumi laik save long olgeta laik bilong God, orait yumi mas skelim gut olgeta Tok bilong God. Long Baibel God i putim Em yet long ples klia bai yumi ken i save long Em. God i no laik yumi longlong long Em. Nogat. Em i laik yumi femili bilong Em yumi save gut long Em na save gut long olgeta samting bilong Em. Long dispela as yumi save skelim Tok bilong God.
Sampela manmeri ol i les long skelim na stadim ol Tok bilong God. Sampela manmeri ol i les long Tok bilong God na ol i laik amamas tasol. Harim. Yumi no ken i mekim olsem. God i laik yumi mas save long Em. Long dispela as God i givim Tok bilong Em long yumi, bai yumi save long Em. Na sapos yumi kisim trupela save long trupela God, orait bai yumi kisim trupela amamas.
God i opim ai na ia na bel bilong yumi, bai yumi save long olgeta pasin bilong Em, bai yumi save God Em i wanem kain God, bai yumi klia long olgeta liklik samting na olgeta bikpela samting – long olgeta samting Em i bin mekim bilong sevim yumi ol manmeri Em i bin makim.
Em olsem na, manmeri i gat save ol bai skelim gut olgeta Tok bilong God, na ol bai bihainim gut olgeta Tok bilong God. Ol bai amamas long skelim Tok bilong God bikos Tok bilong God i save tokaut long olgeta samting bilong God, na ol i laik save moa long God na long Jisas Krais, BIKPELA bilong ol.
(Lukluk gen long prea bilong Pol long Efesus 1:17-19.)
4. Manmeri i gat save bai pulimapim ol yet long olgeta gutpela wei bilong Holi Spirit.
Lukim lain 18. Harim. Ol manmeri i gat trupela save ol i no inap hamarim ol bia botol na pulap long bia na spak na ol man i lap na tok bilas long ol. Nogat. Ol bai pulimapim laip bilong ol long olgeta samting bilong God. Ol bai wanbel olgeta long Holi Spirit i stiaim tingting na laip bilong ol. Ol i laik pulap long olgeta gutpela pasin Holi Spirit i wok long kamapim long laip bilong ol manmeri bilong God.
God i givim Holi Spirit long yumi bilong opim ai na ia na bel bilong yumi na yumi luksave long olgeta wei bilong God na yumi harim gut olgeta tok God i tokim yumi na yumi tanim bel na bilipim na trastim olgeta wok God i bin mekim long dai bilong Krais. Na tu, God i givim Holi Spirit bilong stiaim na helpim yumi bihainim olgeta pasin i rait pasin bilong ol manmeri bilong God i mekim na bihainim.
Olsem na, yumi mas pulap long dispela. Yumi mas wanbel long Holi Spirit i mekim wok insait long laip bilong yumi. Yumi no ken i egensim dispela wok. Nogat. Yumi mas wanbel long wok bilong Em na wok wantaim. Larim tingting na pasin bilong God i pulap olgeta long yu.
Manmeri i gat save ol bai pulimapim ol yet long olgeta Tok bilong God na ol bai klia moa moa yet long olgeta samting God i bin mekim bilong ol long dai na kirap bek bilong Jisas Krais. Yumi no inap pinisim dispela samting, nogat, bai yumi “dringim” i go i go i go i go.
Sapos yu laik “spak”, orait yu “spak” long Tok bilong God – mi minim olsem, yu amamas moa na moa long God na tok tenkyu long Em na litimapim nem bilong Em.
5. Ol save manmeri bilong God ol bai lotu long rait wei.
Lukim lain 19-20. Lotu em i pasin bilong litimapim nem bilong God. Na dispela i no minim olsem yumi yusim nem bilong God tasol – yumi litimapim nem tasol na tok, “God, God.” Nogat. Litimapim nem bilong God em i pasin we yumi amamas long God na yumi wanbel long God, na yumi tokaut na putim olgeta gutpela bilong God long ples klia – yumi soim amamas na wanbel bilong yumi long toktok bilong yumi.
Pasin bilong litimapim nem bilong God i olsem yumi litimapim God yet na tokaut klia olsem God Em i bikpela na God Em i gutpela na God i winim yumi. Pasin bilong litimapim nem bilong God i olsem yumi tokaut long God. Taim yumi amamas long God na yumi tokaut long olgeta samting bilong God, em nau yumi litimapim nem bilong God.
Olsem na, taim yumi tokaut olsem….
- “Mi no gutpela man. Mi no fit long stretim laip bilong mi yet bai God i kisim bek mi. Nogat. Em olsem tasol God i bin makim mi na pasim mi long Krais na Krais i mekim wok long diwai kros bilong mekim mi klin long ai bilong God na God Em i kisim bek mi na adoptim mi na Holi Spirit i opim ai na ia na bel bilong mi na Em i givim bilip long mi. God yet i mekim olgeta wok bilong kisim bek mi na bikpela tenkyu bilong mi i go long God tasol.”
Taim yumi mekim kain tok olsem, na yumi mekim bilong apim God yet, orait yumi lotu trutru long God. Dispela kain pasin em i lotu pasin.
Lotu pasin em i pasin we yumi rispektim God na yumi rispektim rot bilong God na yumi rispektim wok bilong God na yumi lavim God na yumi laik tokaut na amamas long Em na putim Em i nambawan long laip bilong yumi na long sios bung bilong yumi. Lotu em i pasin we yumi tokaut klia olsem, God Em i nambawan na i no yumi i nambawan. Lotu em i pasin we yumi tokaut klia olsem, God Em i bikpela na i no yumi i bikpela – God Em i oana na bos bilong dispela wol na i no narapela – God Em i gutpela olgeta na i no yumi – lotu Em i pasin we yumi putim God fes long olgeta samting na yumi amamas na wanbel long putim God fes long olgeta samting.
Planti manmeri i tingim olsem, lotu em i pasin bilong amamasim ol yet. Ol i tingim olsem lotu em i samting bilong kisim gutpela filings. Ol i tingim olsem, lotu em i pasin bilong paitim kundu na paitim gita na singim ol song na mekim amamas tasol.
Tasol nogut. Lotu em i no dispela samting. Lotu em i pasin we yumi tokaut klia na yumi wanbel long olgeta samting bilong dispela trupela God i bin mekim olgeta wok inap pinis long kisim bek yumi pipia manmeri.
Yumi tok pinis olsem, “Ol save manmeri bilong God ol bai lotu long rait wei.” Olsem na, yu skelim. Sapos yu no save gut long God, na sapos yu no klia long olgeta wok God i bin mekim long dai bilong Krais bilong mekim yu klin, na sapos yu no save long wok bilong Holi Spirit long laip bilong yu bilong opim ai na ia na bel bilong yu, orait hau na bai yu tokaut klia long olgeta samting bilong God? Hau na bai yu litimapim God? Hau na bai yu lotu tru? Yu no inap.
Olsem na, manmeri i gat save, manmeri i save manmeri bilong God, ol i ken i litimapim nem bilong God. Ol i ken i tokaut klia long olgeta bikpela na gutpela samting bilong God. Ol i ken i lotu long rait wei.
Na sapos tru yumi amamas long olgeta wok God i mekim bilong kisim bek yumi, orait tingting bilong yumi i senis na yumi bai bihainim olgeta gutpela pasin bilong God. Lukim Rom 12:1-2. Taim yumi wokabaut long pasin i holi, orait yumi soimaut amamas na tenkyu bilong yumi long olgeta wok bilong God.
Long Efesus 5:19-20 Pol i tokim yumi long yusim song bilong Buk Song wantaim lotu song (lotu song i save tokaut long olgeta samting bilong God) wantaim ol song Holi Spirit i kamapim (dispela tu em i ol song i save givim biknem long God) na yumi toktok wantaim na yumi amamas long Papa na yumi tok tenkyu long Em long nem bilong Krais. Dispela em i gutpela rot bilong yumi lotu wantaim bilong givim biknem long God na Sevya bilong yumi.
Manmeri i save tru long God bai lotu tru long God. Sapos yumi laik lotu tru long God, orait yumi mas save tru long Em.
6. Ol save manmeri bilong God i no inap yusim save bilong ol bilong apim ol yet.
Lukim Efesus 5:21. Dispela tok i no hat tumas. Pol i minim olsem, yumi i gat save, yumi no ken i bikhet long dispela save. Nogat. Yumi daunim yumi yet na stap isi wantaim.
Long wanem? Krais i bin mekim wok bilong bringim yumi i kam insait long wanpela nupela femili bilong God, bai yumi litimapim nem bilong God tasol – Em i no bin mekim wok, bai yumi litimapim nem bilong yumi yet – taim yumi litimapim nem bilong yumi yet, orait yumi daunim brata bilong yumi na yumi no rispektim wok Krais i bin mekim bilong bringim yumi i kam insait long femili bilong God.
Olsem na, yumi no ken i yusim save God i givim yumi bilong daunim brata bilong yumi. Nogat. Yusim save God i givim yumi bilong helpim brata bilong yumi klia long God na long olgeta wei bilong God. Sindaun isi wantaim em na toktok wantaim em. Helpim brata na sista tasol.
Orait, yu skelim. Yu gat trupela save o nogat?
Em tasol.
