Moning.
Nau moning nupela yia i kamap. Yia 2016 i pinis na nau yia 2017 i kamap.
Long yia 2016 planti kainkain samting i kamap long femili bilong mi. Ol sampela samting i kamap i givim amamas long mipela na ol sampela samting i kamap i givim hevi long mipela. Na ol sampela samting i kamap i givim bel hat long mipela na ol sampela samting i kamap i givim bel isi long mipela. Mi tok pinis, ol planti samting i kamap long femili bilong mi, na mi tingim olsem, planti kainkain samting olsem i kamap long femili bilong yu tu long yia 2016.
Na sapos yu save kisim Sande Baibel Toktok o yu save lukim PNG Bible Resources websait, orait bai yu save olsem, long 2016 mi bin toktok planti long tanim bel na bilipim na trastim feitful wok bilong Jisas long diwai kros. Na sori tumas sapos yu les long harim dispela kain toktok.
Tanim bel.
Tasol, i gat as na mi toktok planti long tanim bel na bilipim na trastim feitful wok bilong Jisas long diwai kros. Lukim tok bilong Jisas long Luk 13:1-9.
1 Long dispela taim sampela man i stori long Jisas long hau Pailat i bin tokim ol soldia bilong em na ol i go kilim ol sampela man bilong Galili taim ol i mekim ofa long God, na blut bilong ol na blut bilong ofa i kapsait wantaim. 2 Na Jisas i bekim dispela tok olsem, “Yupela gat wanem tingting, sin bilong ol dispela man bilong Galili i winim sin bilong ol narapela manmeri bilong Galili, na long dispela as hevi i bin kamap long ol, a? 3 Mi tokim yupela, nogat. Tasol harim, sapos yupela no tanim bel yupela olgeta i ken i lus olsem ol. 4 Na tawa bilong Siloam i bagarap na i pundaun antap long 18-pela man na i kilim ol, yupela gat wanem tingting, sin bilong ol dispela 18-pela man i winim sin bilong ol narapela manmeri bilong Jerusalem, na long dispela as tawa i pundaun na kilim ol, a? 5 Mi tokim yupela, nogat. Tasol harim, sapos yupela no tanim bel yupela olgeta i ken i lus olsem ol tasol.”
6 Na Jisas i autim wanpela tok piksa olsem, “Wanpela man i planim wanpela diwai fik long gaden bilong em, na bihain em i kam long kisim kaikai bilong em. Tasol diwai i no karim kaikai. 7 Em i tokim wokboi bilong gaden olsem, “Harim, 3-pela yia nau mi kam long kisim kaikai long dispela diwai fik, tasol em i no karim kaikai. Yu katim na rausim em. Nogut em i pinisim gris bilong graun. 8 Na wokboi i bekim tok olsem, “Bikpela man, yu lusim em i stap wanpela yia moa, na mi ken i brukim graun long as bilong em na putim marasin. 9 Sapos bihain em i karim kaikai em i gutpela. Tasol sapos nogat, orait yu ken katim na tromoi.”
Luk 13:1-9.
Jisas i tokaut long tanim bel. Jisas i givim woning long ol manmeri i harim tok bilong Em, em ol disaipel bilong Em wantaim ol gutpela manmeri wantaim ol lotu manmeri wantaim ol manmeri nogut tu. Jisas i tok klia olsem, sapos yupela i no tanim bel, orait yupela bai lus. Em olsem na tanim bel em i wanpela bikpela samting stret.
Yumi olgeta yumi mas tanim bel.
Taim Jisas i tok, “Tanim bel,” orait Em i sutim tok long yumi olgeta manmeri bilong dispela graun. Long wanem, yumi olgeta yumi wankain – yumi sin manmeri. Ating sampela taim yumi tingim olsem, taim trabel na hevi i kamap long ol sampela manmeri, orait sin bilong ol i bikpela tumas na long dispela as trabel na hevi i kamap long ol. Tasol Jisas i tok nogat. Jisas i tok olsem, olgeta manmeri i gat wok long tanim bel. Lukim Luk 13:1-5. Sin bilong ol narapela manmeri i no winim sin bilong yu na mi. Yumi olgeta yumi sin manmeri na long dispela as yumi olgeta yumi mas tanim bel. Long wanem, nogut yumi tu yumi lus.
Tanim bel em i bikpela samting stret.
Tanim bel em i samting bilong laip na dai. Sapos yumi tanim bel na yumi putim yumi yet aninit long Jisas, em olsem yumi bilipim na trastim God long kisim bek yumi long feitful wok bilong Jisas long diwai kros, orait bai yumi i stap laip. Tasol sapos yumi no tanim bel na putim yumi yet aninit long Jisas, orait bai yumi lus long God oltaim oltaim. Tanim bel em i bikpela samting. Em i no samting yumi ken i pilai pilai long em.
God Em i mekim gutpela long yumi.
Sapos yumi tanim bel, em olsem yumi putim yumi yet aninit long Jisas na yumi bilipim na trastim God long kisim bek yumi long feitful wok bilong Jisas, orait God bai fogivim sin bilong yumi na kisim bek yumi na Em bai lukautim yumi olsem yumi gutpela pikinini bilong Em i no gat rong. Long wanem, feitful wok bilong Jisas long diwai kros i rausim pe bilong sin na i rausim bel hat bilong God long sin bilong sin manmeri i tanim bel. Em olsem na wok bilong Jisas i opim rot bilong God i kisim bek sin manmeri. Ol dispela samting bilong God i kisim bek sin manmeri em i gutpela samting tru na Tok bilong God i kolim ol dispela samting “grasia bilong God”.
Taim bilong tanim bel i ken i ekspaia.
Tasol nogut yumi mekim nogut long grasia bilong God na yumi no tanim bel na yumi no putim yumi yet aninit long Jisas na trastim God long kisim bek yumi long feitful wok bilong Jisas long diwai kros. Lukim Luk 13:6-9. Jisas i autim wanpela tok piksa bilong soim yumi olsem, God i no inap wetim tanim bel bilong manmeri i go i go i go. Nogat. Taim bilong tanim bel i ken i ekspaia. Diwai i no karim kaikai em i tok piksa long ol manmeri Juda i no tanim bel. God i givim liklik sanis moa long ol na sapos ol i no tanim bel, orait God bai rausim ol na ol i no gat sanis moa bilong tanim bel. Na wankain olsem, sapos yumi no tanim bel hariap, orait taim bilong tanim bel i ken i ekspaia na i no gat sanis moa bilong yumi tanim bel na kisim laip wantaim God.
Long 2017 yu bai olsem wanem?
Yumi save tingim na plenim ol samting yumi laik wokim long 2017. Ating sampela bilong yumi i tingting long marit na kamapim femili. Na sampela bilong yumi i tingting long painim wok long taun. Na sampela bilong yumi i tingting long wokim nupela haus. Mi tok pinis, yumi save tingting na plenim ol sampela samting yumi laik mekim long 2017.
Tasol God i tingting long mekim wanem samting long yu long 2017? Em i tingting long givim wanpela yia moa long yu bilong yu i tanim bel, o nogat? Em i tingting long givim 6-pela mun tasol, o 2-pela mun tasol, o 1-pela wik moa long yu bilong tanim bel na kisim laip, a? Yumi no ken i save.
Ol pren bilong mi, plis tingting gut long laip bilong yu long dispela nupela yia 2017. Sapos yu no tanim bel na putim laip bilong yu long han bilong Jisas na trastim God long kisim bek yu long feitful wok bilong Jisas long diwai kros, orait mobeta nau yu mekim olsem. Plis yu no ken i tingim olsem, “Bihain bai mi tanim bel.” Long wanem, yu no save long hamas taim i stap yet bilong yu ken i tanim bel. Olsem na, nau em i rait taim stret bilong tanim bel.
Glenn.
