Moning.
Yu save, taim bilong Krismas na taim bilong Niu Yia dispela tupela samting i kamap bikpela samting bilong yumi long P.N.G. Long Krismas yumi tingim taim Jisas i lusim heven na Em i kam daun long dispela graun na Em i kamap man. Na long Niu Yia yumi statim nupela yia – yia 2017 i pinis na yia 2018 i kamap.
Long wanem as Jisas i kam?
Long Krismas yumi save amamas long kam bilong Jisas. Na dispela i gutpela. Tasol i gutpela tu long yumi tingim as bilong kam bilong Jisas. Long Mak 2:17 Jisas yet i tok klia olsem,
17…….“Ol manmeri i no gat sik ol i no nidim dokta. Nogat. Ol sikman tasol i nidim dokta. Olsem na, Mi no kam bilong singautim ol stretpela manmeri. Nogat. Mi kam bilong singautim ol sin manmeri.”
Jisas i skruim tok long Mak 10:45 na Em i makim Em yet “Pikinini Bilong Man” na Em i tok olsem,
45Pikinini Bilong Man Em i no kam bilong mekim ol manmeri i stap wokboi bilong Em. Nogat. Em i kam bilong mekim wok bilong helpim ol na bilong givim laip bilong Em yet bilong baim bek ol dispela planti manmeri.”
Em olsem na Jisas Em i no kam bilong raun nating long dispela graun. Nogat. Em i kam bilong lusim laip bilong Em yet bilong baim bek laip bilong ol planti manmeri i no stretpela manmeri na sik bilong sin i holim ol.
Long Galesia 2:21 aposel Pol i toktok long dispela samting. Em i tok olsem, sapos yumi ken i kamap stretpela manmeri long strong bilong yumi yet long bihainim ol lo bilong God, na God i kisim bek yumi long dispela stretpela pasin bilong yumi, orait Jisas i kam na i dai nating.
21Mi no save mekim grasia bilong God i kamap samting nating. Long wanem, sapos lo em inap mekim yumi kamap stretpela man long ai bilong God, orait Krais Em i dai nating tasol.
Grasia bilong God.
Grasia bilong God em i olgeta samting God i mekim long yumi sin manmeri bilong kisim bek yumi na mekim yumi i stap femili bilong Em. Em olsem na grasia bilong God i makim olgeta feitful wok Jisas i mekim long diwai kros bilong pinisim pe bilong sin bilong yumi bilong baim bek yumi. Grasia bilong God i makim olgeta wok bilong Holi Spirit bilong opim ai na ia na bel bilong yumi, bai yumi kisim save na yumi bilipim na trastim feitful wok bilong Jisas na bihainim Em.
Em olsem na, sapos God i kisim bek yumi long wok bilong yumi yet long bihainim lo bilong God, orait yumi no nidim grasia bilong God, na yumi no nidim Jisas i kam na i dai bilong pinisim pe bilong sin bilong yumi, na yumi no nidim Holi Spirit i opim ai na ia na bel bilong yumi. Long wanem, God i kisim bek yumi long wok bilong yumi yet.
Tingim. Sapos God i kisim bek yumi long ol naispela wok bilong yumi yet, orait ol wok bilong Jisas long diwai kros em i no gat yus bilong em na ol wok bilong Jisas em i samting nating tasol – i olsem Jisas i kam nating tasol na grasia bilong God long feitful wok bilong Jisas em i samting nating tasol.
Wanpela rot tasol i stap.
Ating planti manmeri bilong P.N.G. i mekim grasia bilong God i kamap samting nating. Ol i amamas long Jisas i kam na Em i dai, tasol long bilip bilong ol na long pasin bilong ol, ol i mekim wok bilong Jisas i stap samting nating tasol. Long wanem, ol i tingim na ol i bilipim olsem, God bai kisim bek ol long stretpela na gutpela pasin bilong ol yet – ol i tingim na bilipim olsem, God bai kisim bek ol long ol naispela na gutpela lotu pasin bilong ol yet. Dispela tingting na bilip bilong ol i daunim grasia bilong God na i daunim feitful wok bilong Jisas long diwai kros na i mekim ol dispela samting i stap samting nating tasol.
Jisas i no tingim olsem wok bilong Em long diwai kros em i samting nating. Nogat. Skelim tok bilong Jisas long Jon 14:6.
6Mi yet Mi rot, na Mi as bilong Tok i tru, na Mi as bilong laip. Em i no gat wanpela man inap i go long Papa long narapela rot. Nogat. Long Mi tasol.
Long dispela tok Jisas i tok klia olsem, God i kisim bek sin manmeri long feitful wok bilong Jisas tasol – God i no inap kisim bek ol long ol narapela narapela samting na long ol narapela narapela rot. Nogat tru! God i kisim bek sin manmeri – manmeri i no stretpela na sik bilong sin i holim ol – God i kisim bek ol long feitful wok bilong Jisas tasol.
Em olsem na sapos yu tingim na bilipim olsem narapela rot i stap bilong God i kisim bek yu, orait yu mekim wok bilong Jisas i kamap samting nating. Sapos yu tingim na bilipim olsem, God bai kisim bek yu long feitful wok bilong yu yet long bihainim lo na long bihainim lotu pasin, orait yu mekim wok bilong Jisas i kamap samting nating olgeta.
Nupela yia bilong yumi.
Sori tumas, ol planti manmeri ol i amamas long Krismas na kam bilong Jisas, tasol long bilip bilong ol na long pasin bilong ol, ol i daunim Jisas na daunim kam bilong Em na mekim wok bilong Em na grasia bilong God i stap samting nating.
Nau long dispela nupela yia 2018 yumi ken i senis na yumi ken i lusim dispela kain bilip na yumi kam long trupela bilip na yumi bilipim na trastim God long kisim bek yumi long feitful wok bilong Jisas tasol. Yumi no inap i go long Papa long stretpela pasin bilong yumi yet. Yumi no inap i go long Papa long lotu pasin bilong yumi yet. Nogat. Yumi ken i go long Papa long feitful wok bilong Jisas tasol. Em olsem na, long dispela nupela yia, yumi tanim bel na yumi bilipim na trastim God long kisim bek yumi long feitful wok bilong Jisas long diwai kros tasol, na yumi bihainim Em.
Glenn.
