Aposel 5:1-11.
Bilong harim (Audio)
Long Aposel 4:32-37 yumi bin skelim stori bilong ol manmeri i kisim na holim trupela bilip na hau ol i sindaun i stap wantaim. Luk (man i raitim buk Aposel) em i skruim dispela stori long Aposel 5:1-11. Long dispela hap yumi bai skelim stori bilong Ananaias na Safaira na yumi skelim pasin tupela i mekim namel long sios femili bilong God, em ol manmeri i kisim na holim trupela bilip long feitful wok bilong Jisas.
Na i gat wanpela bikpela samting yumi mas save gut long en pastaim, na dispela samting i olsem, ol wanwan manmeri i kisim na holim trupela bilip, orait i no gat wanpela samting i fosim ol long salim graun na kisim mani i kam long ol aposel bilong helpim ol rabismanmeri i stap wantaim ol. Nogat tru! Ol yet i kisim tingting na ol i salim graun bilong ol na ol i givim mani long ol aposel, na ol aposel i yusim bilong helpim ol rabismanmeri bilong ol. Ol i mekim long laik bilong ol yet na ol i amamas long mekim. Tru tumas, i no gat wanpela samting na i no gat wanpela man na i no gat wanpela lo samting i stap na i fosim ol long mekim dispela pasin.
Long lain 4 Pita i mekim klia olsem, graun bilong Ananaias em i graun bilong em yet, na em i fri olgeta long mekim wanem pasin em i laik mekim long graun bilong em. Na taim em i salim wanpela hap graun bilong em na kisim mani, orait dispela mani em i mani bilong em yet, na em i fri olgeta long mekim wanem pasin em i laik mekim long mani bilong em. Wanpela samting i no fosim Ananaias long salim graun bilong em, na wanpela samting i no fosim em long givim mani long ol aposel bilong helpim ol rabismanmeri.
Yumi save pinis olsem, ol manmeri i kisim na holim trupela bilip, ol wanwan bilong ol, taim ol i salim hap graun bilong ol na kisim mani na ol i givim long ol aposel bilong helpim ol brata na sista bilong ol i stap rabismanmeri, orait ol i mekim olsem long gutpela tingting na laik bilong ol yet. Taim ol i bilipim na trastim Jisas na feitful wok bilong Em, orait laip bilong ol i senis. Gutpela tingting na lavim bilong ol long ol nupela brata na sista i wok long kamap strong, na tingting bilong ol long ol graun na mani na ol kago samting bilong ol i slek i go daun. Pasin bilong bilipim na trastim Jisas i save kamapim dispela kain pasin long laip bilong manmeri i bilipim na trastim Jisas. Dispela kain bilip i save slekim tingting bilong ol long ol graun na mani na kago samting, na i strongim gutpela tingting na lavim bilong ol long ol nupela brata na sista bilong ol.
Ating planti manmeri long ples bilong yumi i paul long ol dispela samting. Ol i no tingim olsem ol dispela tok i stap bilong yumi olgeta, i stap bilong sutim bel bilong yumi olgeta. Nogat. Ol i tingim olsem, ol wait misineri na misin bilong ol wait misineri ol i ken i salim ol samting bilong ol na kisim mani i kam bilong helpim ol manmeri bilong Papua New Guinea. Na sampela bilong ol i tok strong long dispela samting, na taim ol wanwan misineri i no givim mani na ol kago samting long ol, orait ol i krosim ol na daunim ol.
Ol brata na sista, dispela kain tingting na dispela kain pasin i no stret. Tok i stap long Aposel 4:32 na i go pinis long Aposel 5:11 ol dispela tok i stap bilong yumi olgeta wantaim, maski yumi husat na maski yumi gat planti samting o yumi no gat planti samting. Yumi bilong Papua New Guinea yumi rits manmeri, yumi manmeri i gat planti samting. Yumi gat gutpela graun, na yumi gat gutpela kaikai long gaden bilong yumi, na yumi gat gutpela wara, na yumi gat ol planti femili i stap, na yumi gat ol kainkain gutpela samting olsem. Em olsem na, yumi i kisim na holim trupela bilip, yumi i bilipim na trastim Jisas na feitful wok bilong Em, orait yumi olgeta wanwan yumi mas tingting long hau yumi ken i helpim ol nupela brata na sista bilong yumi i stap rabismanmeri.
Yumi wanwan yumi mas skelim laip bilong yumi. Yumi lukim senis i stat long kamap long laip bilong yumi o nogat. Bilip long Jisas i stat long slekim tingting bilong yumi long ol graun na mani na kago samting o nogat. Bilip long feitful wok bilong Jisas i stat long strongim gutpela tingting na lavim bilong yumi long ol nupela brata na sista bilong yumi o nogat. Na sapos yu no lukim dispela kain senis i stat long kamap long laip bilong yu, orait yu mas tingim olsem, “Nogut mi giaman long mi bilipim na trastim Jisas.”
Tru tumas. Sapos yu no lukim dispela kain senis i stat long kamap long laip bilong yu, orait i gat kwesten mak i stap long bilipim na trastim bilong yu. Mi tok long stat bilong senis i kamap long yu, mi no tok long senis i kamap olgeta pinis long yu. Nogat. Taim yumi tanim bel na yumi bilipim na trastim na bihainim Jisas na yumi bilipim na trastim feitful wok bilong Em, orait senis i wok long kamap isi isi long laip bilong yumi, na isi isi trupela bilip i slekim tingting bilong yumi long ol graun na mani na kago samting, na isi isi trupela bilip i strongim gutpela tingting na lavim bilong yumi long ol nupela brata na sista bilong yumi. Na long olgeta yia senis bai kamap moa na moa.
Em olsem na, sapos yu lukim dispela kain senis i stat long kamap long laip bilong yu, orait dispela i gutpela tru na yu ken i amamas. Tasol sapos yu no lukim senis i stat long kamap long yu, orait i gat kwesten mak long yu bilipim na trastim Jisas o nogat. Nogut yu giaman tasol, na yu no tanim bel, na yu no bilipim na trastim feitful wok bilong Jisas, na yu no bihainim Em.
Na dispela tok i makim tupela marit Ananaias na Safaira. Yumi skelim stori bilong tupela. Tupela i stap olsem wanem? Tupela i wokim wanem samting na God i pinisim tupela?
Long Aposel 5:1-11 yumi ken i lukim 3-pela samting bilong Ananaias na Safaira….
1. Tupela i no gat gutpela tingting, tasol ol i laik ol manmeri i tingim olsem tupela i gat gutpela tingting.
Lukim lain 2. Taim tupela i salim graun bilong tupela yet, orait tupela i haitim ol sampela mani bilong graun bilong tupela, na tupela i kisim hap mani i kam long ol aposel. Na tupela i tok dispela hap mani em i olgeta mani bilong graun. Yu save, tupela i laik ol aposel na ol manmeri i tingim olsem tupela i kisim olgeta mani i kam. Tupela i laik ol aposel na ol manmeri i tingim olsem tupela i gat gutpela tingting. Tupela i laik ol aposel na ol manmeri i tingim olsem laip bilong tupela i senis.
Long Aposel 4:36-37 yumi lukim stori bilong wanpela man, nem bilong em Josep. Em i bin salim wanpela graun bilong em, na em i givim mani bilong dispela graun long ol aposel bilong helpim ol nupela brata na sista i rabismanmeri. Na ol aposel i lukim pasin bilong Josef na ol i givim nupela nem bilong em, na ol i kolim em Barnabas. Na dispela nupela nem i makim gutpela pasin bilong em. Minim bilong nem Barnabas i olsem, “Man bilong strongim bel bilong ol manmeri.”
Yu save, Barnabas em i no wanlain bilong ol. Nogat. Em i man bilong longwe ples Saiprus. Em olsem na, taim Barnabas i salim graun bilong em, na em i givim mani bilong dispela graun long ol aposel bilong helpim ol nupela brata na sista i rabismanmeri, orait ating dispela i strongim bel bilong olgeta manmeri i kisim na holim trupela bilip, na long dispela as ol aposel i givim dispela nupela nem long em.
Em olsem na, i luk olsem Ananaias na Safaira tupela i skelim ol dispela samting na tupela i kisim rong tingting. Ating tupela i tingim olsem, Barnabas i kisim biknem long ai bilong ol aposel na ol manmeri. Em olsem na, tupela i tingim olsem, “Mipela laik kisim biknem tu olsem Barnabas.”
Barnabas em i kisim gutpela tingting na em i salim graun bilong em na em i givim mani long ol aposel. Em i laik helpim ol nupela brata na sista bilong em na em i salim graun na em i givim mani long ol aposel. Tasol Ananaias na Safaira tupela i no kisim gutpela tingting bilong helpim olsem Barnabas. Nogat. Tupela i laik kisim biknem tasol, olsem na tupela i laik ol manmeri i tingim olsem tupela i gat gutpela tingting.
2. Tupela i mekim giaman bilong karamapim pasin bilong tupela.
Lukim lain 3-8. Taim Pita i askim Safaira olsem, “Dispela mani Ananaias i bin givim mipela, em i olgeta mani bilong graun bilong yutupela o sampela mani moa i stap?”, orait Safaira i bekim olsem, “Yes, em i olgeta mani bilong graun bilong mitupela.” Pastaim Ananaias i giamanim ol aposel wantaim ol manmeri i kisim na holim trupela bilip, na bihain Safaira i giamanim ol tu. Tasol tupela no giamanim ol manmeri tasol. Nogat. Tupela i giamanim God.
Tupela i gat tingting nogut na tupela giaman long mani tupela i kisim i kam long ol aposel. Tupela i fri long skelim mani bilong tupela yet. Tupela i fri long holim hap mani bilong tupela na givim hap mani tasol long ol aposel. Em olsem tasol tupela i laik ol aposel na ol manmeri i tingim olsem tupela i gat gutpela tingting. Laip bilong tupela i no senis, tasol tupela i laik ol manmeri i tingim olsem laip bilong tupela i senis. Em olsem na, tupela i mekim giaman bilong karamapim pasin bilong tupela.
3. Tupela i daunim God na daunim Holi Spirit na daunim Jisas.
Long lain 3 na long lain 4 na long lain 9 Luk (man i raitim buk Aposel) em i tok olsem, Ananaias na Safaira tupela i giamanim Holi Spirit, na tupela i mekim giaman long God, na tupela i traim Spirit bilong BIKPELA, Spirit bilong Jisas. Ating tupela i tingim olsem, i no bikpela samting long giamanim Holi Spirit, na i no bikpela samting long mekim giaman long God, na i no bikpela samting long traim Spirit bilong BIKPELA Jisas. Ating tupela i tingim olsem, God na Holi Spirit na Jisas em i no bikpela samting tumas, na bilip em i samting nating tasol. Long dispela tingting bilong tupela, na long dispela pasin bilong tupela, tupela i daunim God na daunim Holi Spirit na daunim Jisas.
Ananaias na Safaira tupela i no tingting long harim gut tok bilong ol aposel, na tupela no tingting long tanim bel na bilipim na trastim Jisas na bilipim na trastim feitful wok bilong Jisas. Tupela no laik brukim skru long ai bilong God na askim God long fogivim sin bilong tupela na askim God long kisim bek tupela long feitful wok bilong Jisas. Nogat. Tupela tingting strong yet long mani bilong tupela, na tupela i tingting yet long kisim biknem long ai bilong ol aposel na long ai bilong ol sios femili bilong God.
Ol brata na sista, yumi mas save gut long pasin bilong Ananaias na Safaira. Tupela i giaman long bilip. Long antap skin i luk olsem tupela i kisim na holim trupela bilip wantaim ol aposel na ol femili bilong God. Tasol nogat. Olpela bel bilong tupela i stap yet na tupela i tingting strong tasol long mani bilong tupela na long kisim biknem tasol long ai bilong ol manmeri. Tupela giaman tasol long bilip bilong tupela.
Ol manmeri i kisim na holim trupela bilip, taim ol i salim sampela hap graun bilong ol na kisim mani, na ol i givim mani long ol aposel bilong helpim ol nupela brata na sista i stap rabismanmeri, orait ol i no tingim ol yet na ol i mekim olsem. Ol i no tingting long kisim biknem na ol i mekim olsem. Nogat tru. Tingting bilong ol i senis, na trutru ol i tingim ol nupela brata na sista bilong ol na ol i amamas long helpim ol.
Gutpela tingting na lavim bilong ol long ol nupela brata na sista i wok long kamap strong, na tingting bilong ol long ol graun na mani na ol kago samting bilong ol i slek i go daun. Na dispela i opim rot bilong ol long salim graun na kisim mani bilong helpim ol nupela brata na sista. Pasin bilong bilipim na trastim Jisas i save kamapim dispela kain pasin long laip bilong manmeri i bilipim na trastim Jisas.
Yumi no lukim dispela samting long laip bilong Ananaisas na Safaira. Nogat. Yumi lukim pasin bilong manmeri bilong dispela graun tasol.
Ol brata na sista, ating sampela manmeri namel long yumi i stap olsem Ananaias na Safaira. Sampela manmeri bilong yumi i tingim olsem, i no bikpela samting long giamanim Holi Spirit, na i no bikpela samting long mekim giaman long God, na i no bikpela samting long traim Spirit bilong BIKPELA Jisas. Ol i tingim olsem, God na Holi Spirit na Jisas em i no bikpela samting tumas, na bilip em i samting nating tasol.
Sampela manmeri namel long yumi, ol i tok olsem, “Mi bilipim na trastim Jisas.” Em olsem tasol ol i stap yet long jelas pasin na selfis pasin na giaman pasin. Ol i stap olsem Ananaias na Safaira na ol i stap yet long olpela pasin bilong dispela graun. Wanpela senis i no stat long kamap long laip bilong ol.
Olgeta wik ol sampela manmeri ol i kam sindaun wantaim yumi, na ol i stap nating tasol. Ol i no skelim laip bilong ol, na ol i no skelim sin bilong ol, na ol i no skelim tok bilong God long feitful wok bilong Jisas. Nogat. Ol i sindaun nating tasol. Olsem Ananaias na Safaira ol i tingim olsem, ol samting bilong God na Holi Spirit na Jisas ol dispela samting i no bikpela samting tumas.
Na olsem Ananaias na Safaira, i gat ol sampela manmeri i save giaman long bilip bilong ol bilong amamasim ol waitman na ol misineri. Long antap skin ol i mekim ol gutpela toktok long ol samting bilong bilip, tasol ol i mekim bilong kisim ol kago samting long han bilong ol waitman na ol misineri na bilong kisim biknem long ai bilong ol manmeri.
Ol dispela kainkain manmeri ol i giaman long bilip, na long dispela pasin bilong ol, ol i daunim God na daunim Holi Spirit na daunim Jisas.
Ol brata na sista, God i hetim ol dispela kain pasin. God i hetim giaman bilip. Na samting God i mekim long Ananaias na Safaira i soim yumi hetim bilong God long giaman bilip namel long femili bilong God. Em olsem na yumi no ken i tingim olsem, God bai i stap nating na Em i no inap egensim manmeri i mekim giaman long bilip.
Lukim lain 11…. “Na bikpela pret i kamap long olgeta manmeri bilong sios na long ol manmeri i harim stori bilong ol dispela samting.” Ol manmeri i kisim na holim trupela bilip, taim ol i lukim ol samting i kamap long Ananaias na Safaira, orait ol i pret. Na ol manmeri autsait long sios femili bilong God ol tu ol i pret.
Dispela kain pret em i gutpela pret na yumi tu i mas kisim pret olsem. Dispela kain pret em i ken i helpim yumi tingting stret na yumi no stap nating na mekim giaman long bilip bilong yumi. Dispela kain pret i ken i helpim yumi skelim bilip bilong yumi na yumi kisim na holim strong trupela bilip long feitful wok bilong Jisas. Long dispela rot yumi bai lusim giaman pasin, na yumi brukim skru, na yumi askim God long fogivim sin bilong yumi, na trutru yumi bilipim na trastim God long kisim bek yumi long feitful wok bilong Jisas tasol. Na yumi lukim trupela senis i stat long kamap long laip bilong yumi.
Ol brata na sista, yumi no ken i makim ol narapela manmeri na yumi skelim ol. Nogat. Yumi skelim yumi yet. Nogut yumi sindaun nating na yumi giaman long bilip bilong yumi. Yumi kisim gutpela pret na yumi stap trutru aninit long feitful wok bilong Jisas, na trutru yumi bilipim na trastim God long karamapim sin bilong yumi long feitful wok bilong Jisas. Na yumi bihainim Em trutru.
Em tasol.
