Nogut sampela manmeri i giamanim yupela.

Long Efesus 5:3-7 God i tokim yumi long 3-pela samting….

God i tok….

1. Yupela no ken i mekim pasin olsem….

• Pasin pamuk (lain 3)
• Olgeta kain pasin i doti (lain 3)
• Mangalim ol samting bilong narapela manmeri (lain 3)
• Doti toktok (lain 4)
• Stupit toktok (lain 4)
• Pilai toktok i doti (lain 4)

Tok bilong God i klia olgeta – yumi manmeri God i bin makim na pasim long Krais, na Krais i mekim wok long diwai kros bilong mekim yumi holi na i no gat asua long ai bilong God, na Em i kisim bek yumi na adoptim yumi na putim yumi insait long femili bilong Em, insait long nupela komyuniti bilong Em, yumi no ken i mekim ol dispela kain pasin – yumi no ken i givim yumi yet long ol dispela kain pasin.

Yumi no ken i spoilim laip bilong narapela manmeri. Taim yu mekim pasin pamuk, em nau yu spoilim laip na sindaun bilong dispela meri. Yu tasol i givim nem nogut long em. Yu tasol mekim em i kamap pamuk meri. Na taim yu pamuk wantaim em, orait dispela meri i no inap marit gut nau – olgeta taim em bai marit nabaut tasol long planti man. Na yu mas klia olsem, em i yu i spoilim laip bilong em. Yu no ken i tok, “Em yet.” Nogat. Em i yu i bin grisim em na bagarapim em. Yu tasol.

Na wankain olsem long pasin i doti. Yu mekim pasin i doti wantaim wanpela meri, orait em i yu tasol i bagarapim na spoilim laip bilong em. Yu bagarapim em na yu bagarapim yu yet wantaim.

Na sampela taim, tupela man i mekim pasin i doti wantaim – na sampela taim tupela meri i mekim pasin i doti wantaim. Harim. Ol manmeri bilong God ol i no ken i mekim dispela kain pasin! Sampela taim ol sampela man i mekim pasin i doti wantaim meme! Harim! Ol manmeri bilong God ol i no ken i mekim dispela kain pasin!

Na yumi no ken i mangalim meri bilong narapela man. Yumi no ken i mangalim man bilong narapela meri. Yu no ken i mangalim meri pikinini bilong narapela man. Sapos yu mangalim, orait i no longtaim bai yu mekim sampela pasin bilong pulim meri na pamuk wantaim.

Na sapos yu wok long kisim meri bilong narapela man (o yu wok long kisim man bilong narapela meri), na yu kisim em, orait yu mas klia olsem, nau yu bagarapim na spoilim laip na sindaun bilong em. Nau olgeta manmeri bai tingim olsem, dispela meri em i wanpela pamuk meri na ol planti man bai traim na pulim.

God i tok, dispela pasin i no rait pasin bilong ol manmeri bilong God. Yu tingim Krais. Em i no mekim wanpela pasin bilong bagarapim na spoilim laip bilong yumi i bilong Em. Nogat tru. Em i bin lusim laip bilong Em bilong sevim laip bilong yumi. Pasin pamuk na doti pasin na mangalim pasin em i pasin bilong bagarapim na spoilim laip na sindaun bilong narapela manmeri. Yumi no ken i mekim!

Na tu, God i tok, “Yupela no ken i mekim doti toktok, na stupit toktok, na pilai toktok i doti.”

Ol dispela kain samting i save bagarapim na spoilim yu yet. Na ol dispela kain samting i save bagarapim na spoilim ol manmeri i harim dispela rabis toktok bilong yu. Ol manmeri i harim dispela kain toktok, ol bai i no inap rispektim yu. Nogat tru. Na tu, sapos yu mekim ol dispela kain toktok, orait dispela kain toktok i save spoilim tingting na bel bilong yu, na i no longtaim bai yu kirap na mekim ol kain pasin nogut.

God i tok, “Mobeta yumi yusim toktok bilong yumi bilong tok tenkyu long God.” Dispela kain toktok i save pulimapim tingting bilong yumi long olgeta gutpela tingting na bai yumi mekim gutpela pasin.

Orait, dispela em i fes samting God i tokim yumi long dispela hap ves. Namba 2 samting i olsem….

2. Yupela no ken i paul na yupela tingim olsem yupela ken i pas wantaim Krais na mekim ol dispela kain pasin nogut wantaim.

Lukim na skelim Efesus 5:5 pastaim….

• “Lotuim dispela pasin” i minim olsem, ol dispela kainkain pasin nogut i kamap nambawan samting olgeta long tingting na bel na laip bilong ol. Ol i pas long dispela kain pasin. Ol i laikim tumas na ol i save bihainim dispela pasin. Dispela pasin i save makim laip bilong ol. Manmeri i save mekim ol dispela kain pasin, i olsem dispela em i lotu bilong ol.

• “Ol dispela kain manmeri i no inap lukim kingdom bilong Krais na God.” Na manmeri we ol dispela kain pasin i stap nambawan samting long laip bilong ol, ol i no inap lukim kingdom bilong God. Ol manmeri we dispela kain pasin i makim laip bilong ol, ol i no inap lukim kingdom bilong God. Manmeri i save mekim ol dispela kain pasin ol i no inap lukim kingdom bilong God.

Orait nau lukim Efesus 5:6….

“Nogut sampela manmeri i giamanim yupela long tok gris” Ol i mekim wanem kain tok gris? Skruim dispela ves i go yet….

“Long wanem, ol manmeri i sakim tok bilong God bai pilim bel hat bilong God.”

Yu save, sampela manmeri i ken i tokim yumi olsem, “Sapos yu laik harim lotu, em i orait, em gutpela. Tasol nogut yu pas tumas long dispela samting na yu spoilim amamas na fan bilong yumi. Olsem na, yu kam na yumi pilai nabaut wantaim ol yangpela meri na em i orait, Sarere na Sande yu ken i harim lotu.” Yu save, ol i ken i grisim yumi long mekim pasin nogut na yumi ken i tingting, “Mi save harim lotu, bai mi i stap orait.”

Ol planti manmeri ol i ken i tokim yumi olsem, “Sapos yu harim lotu na kisim baptais na Lordsapa, em inap, yu no ken i tingting planti – yu no ken i senisim laip bilong yu tumas.” Yu save, sampela manmeri i ken i grisim yumi long larim pasin nogut i stap long laip bilong yumi na ol i ken i tokim yumi olsem, “No ken i wari, bai yu go.”

Yu save long pasin bilong sampela lotu manmeri – ol i tingim olsem ol i ken i holimpas ol pasin nogut na kisim heven tu – ol i tingim olsem, ol i ken i stap olsem ol haiden manmeri na kisim heven wantaim. Tasol ol i giamanim ol yet. Ol i paul. Na ol i ken i paulim tingting bilong yumi tu.

Pol i givim bikpela woning long ol manmeri bilong sios Efesus. Em i tok klia olsem, “Ol manmeri i sakim tok bilong God bai pilim bel hat bilong God” – ol i no inap lukim kingdom bilong heven – ol bai lus.

Harim. Long dispela as tasol God i tok long 1 Korin 5 olsem, “Man i mekim pasin pamuk, rausim em long sios – em mas i stap autsait.” Yu save, em i mekim rabis pasin tasol. Na nogut em i stap insait long sios na em i tingim olsem, “Mi orait. Mi save harim lotu. Mi no man nogut, mi lotu man.” Sapos em i kisim dispela kain tingting, orait em i no inap lusim pasin pamuk bilong em. Em i no inap lusim rabis pasin bilong em. Nogat. Em bai pasim tingting na holim pasin pamuk wantaim lotu pasin.

Tasol, yumi save pinis, man i save mekim dispela kain rabis pasin em i no inap tru long lukim kingdom bilong Krais na God. Em i no inap. Maski em i mekim ol naispela lotu toktok God i tok klia pinis, “Man i mekim ol dispela rabis pasin em i no inap tru long lukim heven. Nogat. Em bai lukim bel hat bilong God tasol.”

Olsem na, mobeta dispela kain man i stap autsait long sios na em i ken i klia long pasin bilong em. Taim em i lukim em i stap autsait long sios, orait em i ken i klia olsem, pamuk pasin bilong em, em i no liklik samting, na em i ken i pret na tanim bel.

Sampela taim yumi ken i sori long man i mekim pasin pamuk na em i stap autsait. Yumi save tingim olsem, “Mobeta em i kam bek insait long sios na harim Tok bilong God na em i ken i tanim bel.” Tasol, dispela i no gutpela tingting. Long wanem? Sapos dispela man i kam bek insait long sios, orait tingting bilong em i ken i paul na em i ken i tingim olsem, “Em i no bikpela samting tumas, mi ken i holim pasin pamuk na harim lotu na bihain bai mi lukim heven, em i no gat samting.” Olsem na, mobeta em i stap autsait long sios olsem God i tok.

Aposel Pol i mekim strongpela toktok long yumi. Yumi no ken i tingim olsem, yumi ken i holim pipia pasin na pipia toktok na pas long Krais wantaim. Nogat tru. Olsem na, yumi mas lusim ol rabis pasin na yumi bihainim ol pasin i holi na stretpela.

Pasin i holi na stretpela em i mak bilong manmeri i bilipim tru na Krais i mekim ol klin long ai bilong God. Manmeri i bilip tru, ol bai wok hat long lusim ol kainkain pasin nogut. Tasol ol manmeri i pas yet long ol kainkain pasin nogut, dispela i soim olsem, ol i giaman na ol i no bilip tru na ol i stap yet aninit long bel hat bilong God – ol i no bilong Em.

Long dispela as aposel Pol i givim bikpela woning long ol manmeri long sios Efesus na long yumi tu. Sapos yumi strong na yumi no laik senis na lusim ol kainkain pasin nogut, orait dispela i soimaut olsem yumi no bilip tru – yumi giaman tasol – na bai yumi fesim bel hat bilong God – yumi no inap lukim heven.

Nogut sampela manmeri i giamanim yupela long dispela samting….Yupela no ken i paul na yupela tingim olsem yupela ken i pas wantaim Krais na mekim ol dispela kain pasin nogut wantaim.

3. Yupela no ken i poroman wantaim ol manmeri i save mekim ol dispela kain pasin nogut.

Lukim Efesus 5:7. Dispela tok i klia – yumi no ken i poroman wantaim ol manmeri i save mekim ol dispela kain pasin nogut.

• No ken i sindaun na pilai kas wantaim ol.
• No ken i raun wantaim ol.
• No ken i bes-met wantaim ol.

Yumi mas i stap separet long ol. Yumi mas i stap longwe long ol. Yumi no ken i poroman wantaim ol. Nogut ol i pulim yumi i go long ol kainkain rabis pasin na yumi lus wantaim ol.

Yumi no ken i pilai pilai long senisim laip bilong yumi na bihainim na wokabaut long pasin i stretpela na holi.

Senisim laip na bihainim pasin i stretpela na holi em i no samting yumi ken i tingim olsem, “Bai mi mekim o nogat, mi no save.” Nogat. Yumi save olsem, God i kisim bek yumi long feitful wok bilong Jisas tasol. Em olsem na sapos Holi Spirit i bin opim ai na ia na bel bilong yumi na Em i tanim bel bilong yumi pinis na Em i givim bilip long yumi na yumi bilipim na trastim wok Krais i bin mekim bilong mekim yumi klin long ai bilong God, orait yumi bai lusim wei bilong ol haiden manmeri long ples na yumi bai kisim pasin God i save laikim.

Dispela gutpela pasin God i save laikim i no save karim yumi i go long heven. Nogat. Tasol, sapos yumi kisim tingting na yumi strong long senisim laip bilong yumi na yumi trai hat long wokabaut long dispela gutpela pasin God i save laikim, orait dispela i soim olsem, Holi Spirit i bin opim ai na ia na bel bilong yumi na yumi tanim bel tru na yumi bilip tru na yumi pas tru long Krais na yumi insait tru long femili bilong God.

As bilong dispela 3-pela toktok.

Taim yumi senisim tingting bilong yumi na yumi senisim pasin bilong yumi na yumi wok long lusim ol kainkain pasin nogut olsem Pol i tok, orait yumi stat nau na yumi wokabaut long rot bilong lavim.

Ol sampela manmeri i save tok olsem, “Mipela lain bilong lavim ol manmeri.” Tasol, ol i paulim ol sampela meri, na ol i mekim ol kainkain pasin i doti, na ol i mangalim ol samting bilong narapela manmeri, na ol i mekim ol doti toktok na stupit toktok na pilai toktok i doti. Ol dispela kain pasin i bagarapim ol narapela manmeri – ol dispela kain pasin i bagarapim ol brata na sista. Harim. Sapos ol i mekim olsem, orait ol i no manmeri bilong lavim. Ol i wokabaut yet long pasin bilong ol haiden manmeri. Na ol i no inap lukim kingdom bilong God. Pasin bilong ol i soim olsem, Holi Spirit Em i no opim ai na ia na bel bilong ol na ol i no tanim bel trutru na ol i wokabaut yet long haiden pasin bilong ol.

Tasol yumi i bilipim na trastim God long kisim bek yumi long feitful wok bilong Jisas long diwai kros, na yumi bilipim na trastim na bihainim Jisas, orait yumi no haiden manmeri. Nogat. Holi Spirit i opim ai na ia na bel bilong yumi pinis na feitful wok bilong Jisas i kisim yumi i kam pinis long femili bilong God. Olsem na, yumi bilong God na yumi laik bihainim ol gutpela bilong God, Papa bilong yumi.

Em tasol.