Aposel 2:42-47.
God Em i gutpela tumas na Em i givim ol planti planti manmeri long Jisas bilong Jisas i mekim wok long diwai kros bilong sevim laip bilong ol. Long diwai kros Jisas i kisim na pinisim pe bilong sin bilong ol dispela manmeri God i bin givim Em na Em i mekim ol i stap stretpela manmeri long ai bilong God. Jisas i mekim olsem na God Em i adoptim ol na mekim ol i stap femili bilong Em. Em olsem na long wok bilong Jisas long diwai kros God i kisim bek ol. Stori bilong wok bilong Jisas long diwai kros i stap long buk Matyu na Mak na Luk na Jon long Baibel.
Bihain long wok bilong Jisas long diwai kros, Jisas i wok long singautim ol dispela manmeri God i bin givim Em, bai ol i save long wok bilong Jisas long diwai kros bilong sevim ol, na ol i tanim bel na kam long Em na i stap aninit long bosim bilong Em na bihainim Em long wokabaut na long sindaun bilong ol. Stori bilong Jisas i singautim na kisim ol lain bilong Em i kam long Em yet i stap long buk Aposel.
Long Aposel sapta 1 yumi ken i lukim stori bilong Jisas i stap wantaim ol aposel bilong Em. Jisas i kirap pinis na Em i stap wantaim ol na Em i skulim ol long olgeta samting bilong kingdom bilong God. Na Em i skulim ol long wok Jisas i laik ol i mekim. Jisas i tokim ol olsem, “…..yupela bai kisim pawa taim Holi Spirit i kam long yupela, na yupela bai i stap witnis bilong Mi long Jerusalem, na long olgeta hap bilong distrik Judia na Samaria, na long olgeta 4-kona bilong dispela graun.”
Jisas i tokim ol long wetim Holi Spirit. Na taim Holi Spirit i kam long ol, orait Em bai givim strong long ol na bai ol i autim tok bilong feitful wok bilong Jisas long diwai kros, ol bai witnisim Jisas, na long pawa bilong Holi Spirit, ol manmeri Jisas i bin lusim laip bilong Em bilong sevim, ol bai harim tok bilong ol aposel, na ol bai tanim bel na bilipim na trastim Jisas na ol bai bihainim Em. Ol bai bilipim na trastim God i kisim bek ol long rot bilong feitful wok bilong Jisas long diwai kros na ol bai i stap aninit long bosim bilong Jisas.
Long Aposel sapta 2 yumi ken i lukim stori bilong Holi Spirit i kam pinis na i givim strong long ol aposel wantaim ol disaipel, em ol manmeri i bilipim na trastim na bihainim Jisas pinis. Ol i manmeri nating, tasol Holi Spirit i givim strong long ol na ol i tokaut klia na ol i autim tok long ol gutpela wok bilong God long feitful wok bilong Jisas long diwai kros. Na Pita i kirap na em i autim tok long ol planti manmeri i kam bung i stap, em ol manmeri i bin egensim Jisas na ol i pas wantaim ol manmeri nogut na ol i kilim Jisas i dai long diwai kros, na em i tokim ol long olgeta samting God i wokim long wok bilong Jisas. Pita i tokim ol long tanim bel na kam long sait bilong Jisas – em i tokim ol long tanim bel na bilipim na trastim na bihainim Jisas.
Holi Spirit i sutim bel bilong ol 3000 manmeri na ol i tanim bel na ol i kam long Jisas na ol i bilipim na trastim na bihainim Jisas. Ol i bilipim na trastim God long kisim bek ol long feitful wok bilong Jisas long diwai kros tasol. Em olsem na ol i kam i stap aninit long fogivim bilong God na i stap manmeri bilong God long femili bilong Em. Na long rot bilong baptais ol i putim nupela bilip bilong ol long Jisas long ples klia long ai bilong olgeta manmeri.
Orait na long Aposel 2:42-47 yumi ken i lukim stori bilong ol dispela 3000 manmeri i bung i stap wantaim ol aposel na ol disaipel (ol aposel na ol disaipel i stap 120 manmeri – lukim Aposel 1:15). Pastaim ol dispela 3000 manmeri ol i egensim Jisas, tasol nau ol i pas long Jisas na ol i pas wantaim ol aposel na ol disaipel. Pastaim ol i no bilipim na trastim Jisas Em i rot God i makim bilong kisim bek ol, tasol nau ol i bilipim na trastim God long kisim bek ol long rot bilong feitful wok bilong Jisas.
God i bin givim ol long Jisas na Jisas i lusim laip bilong Em bilong sevim laip bilong ol, tasol pastaim ol i no save. Tasol nau, long rot bilong witnis bilong Pita, na long pawa bilong Holi Spirit, ol i save na ol i tanim bel na ol i bilipim na trastim na bihainim Jisas. Jisas i singaut long ol na ol i kam pas long Jisas (Aposel 2:39), na ol i bung wantaim ol aposel na ol disaipel na ol i stap femili bilong God wantaim.
Buk Aposel em i stori bilong Jisas i singautim i kam long Em yet ol manmeri Em i bin lusim laip bilong Em bilong sevim, em ol manmeri God i bin givim Em. Em i dispela samting yumi lukim long Aposel sapta 1 na 2. Long Aposel 2:42-47 yumi lukim stori bilong ol manmeri Jisas i singautim i kam long Em yet na ol i bung i stap wantaim.
Na taim ol i bung wantaim, orait ol i mekim wanem kain pasin? Yumi skelim 4-pela samting….
1. Ol i pas olgeta long tisim bilong ol aposel.
Lukim lain 42. Ol aposel ol i tisim (skulim) ol manmeri long olgeta gutpela wok bilong God long feitful wok bilong Jisas. Na ol manmeri bilong God ol i givim ol yet bilong kisim dispela tisim (skul) bilong ol aposel. Olgeta tok ol aposel i autim long ol, orait ol manmeri bilong God ol i lainim na ol i kisim na ol i pas long en na ol i bihainim. Ol i kisim olgeta tok ol aposel i skulim ol long en, na ol i larim dispela tok i stiaim laip bilong ol. Tisim bilong ol aposel i stiaim bilip bilong ol. Bipo ol narapela tisim i bin stiaim bilip bilong ol dispela 3000 manmeri, tasol nau, ol i kisim na lainim tok bilong ol aposel, na em i dispela tok i stiaim bilip bilong ol na i stiaim laip bilong ol.
Sapos yumi kam pinis long Jisas na yumi bilong Em olsem ol dispela 3000 manmeri i bilong Em, orait yumi tu yumi mas givim yumi yet bilong kisim tisim bilong ol aposel. Bilong yumi tisim bilong ol aposel i stap long Nupela Testamen long Baibel.
Ol sampela man bilong autim tok, tok bilong ol i go long ol narapela narapela samting. Maski yumi lainim na bihainim toktok bilong ol. Yumi lainim na yumi kisim na yumi bihainim tok bilong ol aposel tasol. Yumi mas pas long skul na tisim bilong ol aposel i stap long Tok bilong God. Em i dispela samting i mas stiaim bilip na laip bilong ol manmeri bilong God.
2. Ol i pas olgeta long felosip.
Lukim lain 42 gen. Tok “felosip” i minim olsem “holimpas samting wantaim” o “samting i stap na ol i holimpas wantaim” o “ol i wokabaut (sindaun) wantaim long wanpela samting”. Ol manmeri i tanim bel na ol i bilipim na trastim na bihainim Jisas, ol i bilipim na trastim God long kisim bek ol long feitful wok bilong Jisas tasol na ol i bihainim Em. Em olsem na ol i wokabaut (sindaun) wantaim long dispela wanpela tingting na wanpela bilip. Long wanpela rot tasol God Em i fogivim sin bilong ol na Em i adoptim ol na kisim bek ol na Em i mekim ol i stap femili bilong Em. Long nupela femili ol i bung wantaim na kaikai wantaim, na wantaim ol i litimapim nem bilong God. Long laip bilong ol, ol i bilipim na trastim na bihainim wanpela bilip na wanpela rot wantaim.
Na ol i holimpas na serim ol samting bilong ol wantaim. Lukim lain 44-45. Ol i yusim ol samting bilong ol bilong helpim ol nupela brata na sista bilong ol long nupela femili. Ol i tingim olsem, ol “samting bilong mi em i samting bilong olgeta manmeri i bilip” na dispela tingting i stiaim pasin bilong ol. Em olsem na, sampela brata na sista ol i salim sampela graun bilong ol na kisim mani, na sampela brata na sista ol i salim ol sampela kago bilong ol na kisim mani, na ol i yusim dispela mani bilong helpim ol brata na sista bilong ol long nupela femili na klen bilong ol.
Ol dispela pasin, pasin bilong sindaun (wokabaut) wantaim long wanpela bilipim na trastim na bihainim wanpela rot wantaim, na pasin bilong holimpas na serim laip wantaim, ol dispela em i pasin bilong felosip.
Ating planti manmeri long ples na long taun ol i tingim olsem, taim ol i harim lotu, orait ol i felosip. Tasol ol i no pas long wanpela bilip bilong feitful wok bilong Jisas, na ol i no pas long tisim bilong ol aposel tasol, na ol i no litimapim nem bilong God tasol. Ol i no pas wantaim na serim laip bilong ol wantaim. Nogat. Ating planti lotu manmeri ol i pas tumas long ol olpela klen femili bilong ol, na ol i pas long ol tisim i no tisim bilong ol aposel, na ol i save litimapim nem bilong ol yet.
Taim ol 3000 manmeri i pas olgeta long felosip, orait ol i pas olgeta long wanpela bilip, na ol i bilipim na trastim wanpela rot God i makim bilong kisim bek ol, ol i bilipim na trastim God long kisim bek ol long feitful wok bilong Jisas long diwai kros tasol, na wantaim ol i bihainim Jisas, na wantaim ol i stap nupela femili bilong God, na wantaim ol i serim laip bilong ol wantaim – ol i pas olgeta long felosip.
Yumi mas skelim gut trupela minim bilong felosip, na yumi kam long wanpela trupela bilip long wok bilong Jisas, na yumi pas wantaim long femili na klen bilong God, na yumi serim laip bilong yumi long nupela brata na sista i bilipim na trastim God long kisim bek ol long feitful wok bilong Jisas tasol. Klen na femili bilong ples i no femili na klen bilong yumi moa. Nogat. Yumi i bilipim na trastim na bihainim Jisas, orait yumi bilong nupela femili na klen, na yumi pas olgeta long ol nupela brata na sista bilong yumi, na yumi serim laip bilong yumi wantaim.
3. Ol i pas olgeta long “brukim bret na kaikai wantaim”.
Lukim lain 42 gen wantaim lain 46. Yumi stori pinis liklik long ol femili bilong God ol i serim na ol i kaikai wantaim. Tasol yumi skelim dispela tok moa.
Ol sampela saveman i tingim olsem, taim ol i kaikai wantaim, orait dispela i minim olsem, ol i kaikaim Lordsapa wantaim. Em olsem na, dispela i minim olsem, ol i kaikai wantaim, na long namel long ol i kaikai, orait ol i kisim sampela bret na wain na ol i serim wantaim ol brata na sista i sindaun i stap wantaim, na ol i holim tingting long Jisas na long dai bilong Em long diwai kros. Taim ol i brukim bret (tok piksa bilong bodi bilong Jisas) na skelim wain (tok piksa bilong blut bilong Jisas) na ol i givim (tilim) long ol brata na sista, orait ol i tingim olsem, God i givim Jisas long mipela wanwan brata na sista bilong sevim laip bilong mipela. Em olsem na ol i tingim feitful wok bilong Jisas long diwai kros na ol i amamas wantaim.
Ol i pas wantaim, na ol i holim na bihainim wanpela bilip long olgeta gutpela wok bilong God long feitful wok bilong Jisas long diwai kros bilong sevim laip bilong ol wantaim, na ol i amamas long kaikai na serim laip bilong ol wantaim.
4. Ol i pas olgeta long prea.
Lukim lain 42 gen wantaim lain 47. Taim ol i prea, orait ol i no tingim ol samting bilong ol yet na ol i no apim nem bilong ol yet. Nogat. Ol i tingim olgeta gutpela wok bilong God long feitful wok bilong Jisas long diwai kros bilong sevim laip bilong ol, na ol i litimapim nem bilong God tasol. Taim ol i bung ol i prea long God na ol i givim biknem long God tasol. God na gutpela wok bilong God long wok bilong Jisas i pulimapim tingting bilong ol na i nambawan samting bilong ol, na long dispela as, God na gutpela wok bilong Em long wok bilong Jisas i pulap long prea bilong ol.
Lotu bilong ol manmeri bilong God.
Tisim (tok) bilong ol aposel i pulap long ol gutpela wok bilong God long feitful wok bilong Jisas na ol manmeri bilong God ol i pas long olgeta tisim bilong ol aposel. Na felosip bilong ol i pulap long ol gutpela wok bilong God long feitful wok bilong Jisas. Na pasin bilong kaikai wantaim i pulap long ol gutpela wok bilong God long feitful wok bilong Jisas. Na prea bilong ol i pulap long ol gutpela wok bilong God long feitful wok bilong Jisas. God i stap nambawan samting bilong ol, na long dispela as ol i litimapim nem bilong God tasol. Sapos lotu bilong yumi i stap olsem, orait em i gutpela lotu.
“Na gutpela pret i kamap long ol….”
Lukim lain 43. Ol i tingim olgeta gutpela wok bilong God long feitful wok bilong Jisas long diwai kros na ol i kisim gutpela pret. Gutpela pret i minim olsem, ol i rispektim God na ol i rispektim rot God i makim bilong kisim bek ol. Ol i daunim ol yet na ol i apim God na apim Jisas wantaim.
Em olsem na taim ol narapela manmeri, em ol manmeri i no tanim bel, ol i lukim pasin bilong ol femili bilong God, orait ol i tingting planti na ol i rispektim ol manmeri bilong God na ol i mekim gutpela pasin long ol (lain 47). Ol i no lap long ol na ol i no daunim ol na ol i no sutim tok long ol. Nogat. Ol i mekim gutpela long ol. Na….
“Long olgeta de na wik BIKPELA i kisim bek ol sampela manmeri moa, na long dispela pasin Em i mekim namba bilong ol i bilip i kamap planti moa.”
Ol brata na sista, tingim. Pasin bilong ol dispela 3000 manmeri bilong God i narapela kain olgeta long misin pasin bilong ples. Planti manmeri ol i bihainim misin pasin tasol, na tisim bilong ol na bung bilong ol na prea bilong ol, i no pulap tumas long olgeta gutpela wok bilong God long feitful wok bilong Jisas. Planti taim tumas ol i litimapim nem bilong misin bilong ol, na man bilong autim tok em i litimapim nem bilong em yet, na prea bilong ol i pulap long ol samting bilong ol yet. Ol i no litimapim nem bilong God tumas.
Yumi i bilipim na trastim God long kisim bek yumi long feitful wok bilong Jisas, orait yumi mas tingting gut na skelim sindaun na wokabaut bilong yumi. Yumi stap olsem ol 3000 manmeri bilong God i bung i stap long Jerusalem o nogat? Pasin long bung bilong yumi i wankain o nogat?
Yumi i bilipim na trastim God long kisim bek yumi long feitful wok bilong Jisas, yumi mas klia olsem, God i bin givim yumi long Jisas, na Jisas i dai long diwai kros bilong stretim yumi long ai bilong God, na Holi Spirit i opim ai na ia na bel bilong tanim bel bilong yumi na kisim yumi i kam long Jisas na yumi bilipim na trastim na bihainim Jisas.
Na sapos yumi tingim dispela, yumi tingim ol gutpela wok bilong God long feitful wok bilong Jisas bilong kisim bek yumi, orait bai yumi amamas moa long God na amamas na sindaun gutpela wantaim ol manmeri bilong God long femili bilong God.
Long olgeta de na wik BIKPELA i kisim bek ol sampela manmeri moa, na long dispela pasin Em i mekim namba bilong ol i bilip i kamap planti moa. Na yumi trastim BIKPELA long mekim wok bilong Em bilong singautim na kisim ol lain bilong Em i kam long Em yet namel long hauslain na taun komyuniti bilong yumi.
Em tasol.
